Ciũria Kuuma Kũrĩ Athomi

Kũringana na Johana 11:35, Jesu aaitire maithori nĩkĩ atanariũkia Lazaro?

Nĩ ũndũ wa ndũire kũrĩra rĩrĩa twakuĩrũo nĩ mũndũ twendete tondũ tũtigũcoka kũmuona. O na gũtuĩka Jesu nĩ eendete Lazaro-rĩ, ndaitire maithori nĩ ũndũ atĩ nĩ aakuĩte. Ta ũrĩa ibuku rĩu rĩa Johana rĩonanagia, aaitire maithori nĩ ũndũ wa kũiguĩra arĩa maakuĩrĩirũo tha.—Joh. 11:36.

Kĩambĩrĩria-inĩ rĩrĩa Jesu aaiguire atĩ Lazaro nĩ mũrũaru, ndaigana gũthiĩ na ihenya nĩguo akamũhonie. Bibilia yugaga: “Nake [Jesu] aaigua atĩ [Lazaro] nĩ mũrũaru, akĩamba gũikara mĩthenya ĩĩrĩ o kũu aarĩ.” (Joh. 11:6) Nĩ kĩĩ gĩatũmire Jesu ahũthĩrĩrie? Aarĩ na gĩtũmi gĩa gwĩka ũguo. Oigire ũũ: “Ndũari ĩo ti ya gĩkuũ; nĩ ya gũtũma Ngai agoocwo, atĩ Mũrũ wa Ngai agoocithio nĩyo.” (Joh. 11:4) Kwoguo Jesu eendaga kũhũthĩra gĩkuũ kĩa Lazaro ‘kũgoocithia Ngai.’ Na njĩra ĩrĩkũ? Thutha wa kahinda kanini Jesu nĩ angĩaringire kĩama kĩnene na njĩra ya kũriũkia mũrata wake kuuma mbĩrĩra-inĩ.

Akĩaria na arutwo ake ũhoro wa gĩkuũ kĩu, Jesu aakĩringithanirie na toro. Nĩkĩo aamerire atĩ nĩ ‘egũthiĩ akamũũkĩrie.’ (Joh. 11:11) Jesu onaga kũriũkia Lazaro gũtariĩ ta ũrĩa mũciari angĩũkĩria kaana gake karĩ toro. Nĩ ũndũ ũcio, hatiarĩ na gĩtũmi kĩa Jesu kũigua ihooru nĩ ũndũ gĩkuũ kĩa Lazaro.

Gũkĩrĩ ũguo-rĩ, nĩ kĩĩ gĩatũmire Jesu aite maithori? Maũndũ marĩa mathiũrũrũkĩirie mũhari ũcio nĩ matũteithagia kuona macokio. Rĩrĩa Jesu onire Mariamu mwarĩ wa nyina na Lazaro na andũ angĩ makĩrĩra nĩ ‘aacaire roho-inĩ na agĩtangĩka.’ Nĩ ũndũ wa kuona ũrĩa maarĩ na ruo, Jesu nĩ aahutirio mũno nginya ‘agĩcaya roho-inĩ.’ Ũndũ ũcio nĩguo watũmire ‘aite maithori.’ Nĩ ũndũ wa kuona arata ake endete magũmĩirũo nĩ ihooru inene Jesu nĩ aaiguire ruo mũno.—Joh. 11:33, 35.

Rũgano rũrũ ruonanagia atĩ hĩndĩ ya thĩ njerũ ĩrĩa ĩroka, Jesu arĩ na hinya na ũhoti wa gũgaacokia muoyo endwa aitũ arĩa makuĩte. Ningĩ nĩ rũtũteithagia kuona atĩ Jesu nĩ aiguagĩra arĩa makuĩrĩirũo tha. Ũndũ ũngĩ tũngĩĩruta nĩ atĩ nĩ twagĩrĩirũo nĩ kũiguĩra tha arĩa maracakaya nĩ ũndũ wa gũkuĩrũo nĩ mũndũ mendete.

Jesu nĩ aamenya atĩ nĩ ekũriũkia Lazaro. Ona kũrĩ ũguo, nĩ aaitire maithori nĩ ũndũ wa wendo na tha ciake nyingĩ kwerekera arata ake. O ũndũ ũmwe na ũcio, gũcaĩra arĩa angĩ no gũtũme ‘tũrĩre na arĩa mararĩra.’ (Rom. 12:15) Mũndũ kuonania ihooru na njĩra ya kũrĩra ti kuuga atĩ ndarĩ na wĩtĩkio atĩ andũ nĩ makaariũkio. Na githĩ ndũkĩrĩ ũndũ mwega atĩ Jesu nĩ aatũigĩire kĩonereria gĩa gũcaĩra arĩa makuĩrĩirũo, na njĩra ya gũita maithori o na gũtuĩka nĩ aamenyaga atĩ nĩ ekũriũkia Lazaro?