Moimĩrĩro ma Kũhunjia ‘Mĩgũnda rĩu Nĩ Yerũhĩte Ĩgethwo’

1, 2. (a) Nĩ kĩĩ gĩatũmire arutwo a Jesu magege? (b) Nĩ kũgetha kwa mũthemba ũrĩkũ Jesu aaragĩrĩria?

MŨTHENYA ũmwe Jesu eerire arutwo ake ũũ: ‘Tiirai maitho, mũbare mĩgũnda, muone atĩ rĩu nĩ yerũhĩte ĩgethwo.’ Nao makĩrora mwena ũrĩa Jesu aamonagia, no handũ ha kuona mĩgũnda yerũhĩte, makĩona ĩrurĩte tondũ caĩri yakoretwo o hĩndĩ yamera. Ũndũ ũcio ũgĩtũma magege mũno. Kwahoteka meyũririe atĩrĩ, ‘nĩ kĩĩ gĩkũgethwo na nĩguo tũtigĩtie mĩeri mĩingĩ nĩguo ihinda rĩa magetha rĩkinye?’​—Joh. 4:35.

² No Jesu ndaaragia ũhoro wa kũgetha irio iria ciahandĩtwo mĩgũnda-inĩ. Ithenya rĩa ũguo, aahũthagĩra ihinda rĩu kũruta arutwo ake maũndũ merĩ ma bata megiĩ kũgetha na njĩra ya kĩĩroho, ũguo nĩ kuuga gũcokanĩrĩria andũ kĩũngano-inĩ gĩa Gĩkristiano. Nĩ maũndũ marĩkũ macio? Nĩguo tũmamenye, reke tũthuthurie ũhoro ũcio makĩria.

Rĩĩtana na Kĩĩranĩro

3. (a) Kwahoteka nĩ kĩĩ gĩatũmire Jesu oige atĩ: ‘Mĩgũnda nĩ yerũhĩte ĩgethwo’? (Rora kohoro ka magũrũ-inĩ.) (b) Jesu aatarĩirie ciugo icio atĩa?

³ Kwarĩ mwaka wa 30, hakuhĩ na taũni ya Asamaria yetagwo Sukaru rĩrĩa Jesu aaragia na arutwo ake ũhoro ũcio. Rĩrĩa arutwo ake maaingĩrire taũni-inĩ ĩyo, Jesu aatigirũo gĩthima-inĩ harĩa aaheire mũtumia ũmwe ũhoro wa ma na mũtumia ũcio agĩtaũkĩrũo na ihenya bata wa guo. Arutwo a Jesu maacoka, mũtumia ũcio agĩthiĩ Sukaru atengʼerete, nĩguo akeere andũ a kwao maũndũ ma magegania marĩa eerutĩte. Ciugo ciake nĩ ciagucĩrĩirie andũ mũno, na aingĩ ao magĩthiĩ gĩthima-inĩ nĩguo makone Jesu. No kũhoteke atĩ hĩndĩ ĩyo, rĩrĩa Jesu aaikirie maitho mbere ya mĩgũnda akĩona kĩrĩndĩ kĩa Asamaria gĩũkĩte na kũrĩa maarĩ, nĩrĩo aagwetire ciugo ici: ‘Tiirai maitho, mũbare mĩgũnda, muone atĩ rĩu nĩ yerũhĩte ĩgethwo.’a Na nĩguo onanie atĩ aaragĩrĩria magetha ma kĩĩroho, akĩongerera ciugo ici: ‘Ũrĩa ũgethaga nĩ aracokanĩrĩria irio cia kũhirũo muoyo-inĩ wa tene na tene.’​—Joh. 4:5-30, 36.

4. (a) Jesu aarutanire maũndũ marĩkũ merĩ ma bata megiĩ magetha? (b) Tũkwarĩrĩria ciũria irĩkũ?

⁴ Jesu aarutanire maũndũ marĩkũ merĩ ma bata megiĩ magetha ma kĩĩroho? Wa mbere, wĩra ũcio nĩ wa mĩtũkĩ. Rĩrĩa oigire atĩ ‘mĩgũnda nĩ yerũhĩte ĩgethwo,’ eekagĩra arũmĩrĩri ake ngoro magĩe kĩyo gĩa kũhunjia. Nĩguo onie arutwo ake bata wa kwĩhĩka, ongereire ũũ: “Ũrĩa ũgethaga [nĩ araamũkĩra] mũcara.” Wĩra wa magetha nĩ waambĩrĩirie, kwoguo gũtiarĩ na ihinda rĩa kũmaĩrĩria. Wa kerĩ, aruti wĩra me na gĩkeno. Jesu oigire atĩ ahandi na agethi nĩ ‘megũkenanĩra hamwe.’ (Joh. 4:35b, 36) O ta ũrĩa Jesu aakenire nĩ kuona ‘Asamaria aingĩ makĩmwĩhoka,’ noguo arutwo ake mangĩkagĩa na gĩkeno makĩruta wĩra wa kũgetha na ngoro yothe. (Joh. 4:39-42) Ũndũ ũcio wekĩkire mahinda-inĩ ma Jesu nĩ wa bata mũno harĩ ithuĩ tondũ nĩ wonanagia maũndũ marĩa mekĩkaga ihinda-inĩ rĩrĩ kũrĩ na wĩra mũnene makĩria wa kũgetha. Hihi magetha ma matukũ maya maambĩrĩirie rĩ? Nĩa manyitaga itemi wĩra-inĩ ũcio? Moimĩrĩro makoretwo marĩ marĩkũ?

Mũthamaki Witũ nĩ Aratongoria Wĩra-inĩ Mũnene wa Magetha

5. Nũũ ũtongoragia wĩra-inĩ wa magetha, na kĩoneki kĩa Johana kĩonanagia atĩa atĩ wĩra ũcio nĩ wa mĩtũkĩ?

⁵ Kĩoneki-inĩ kĩrĩa Johana onirio, Jehova nĩ aaguũririe atĩ nĩ aamũrĩte Jesu atongorie wĩra ũcio wa magetha. (Thoma Kũguũrĩrio 14:14-16.) Thĩinĩ wa kĩoneki kĩu, Jesu onekaga arĩ na thũmbĩ ya thahabu na rũhiũ rwa kũgetha. “Thũmbĩ ya thahabu” ĩrĩa Jesu eekĩrĩte mũtwe yonanagia atĩ nĩwe Mũthamaki ũrĩa ũrathana. Naruo “rũhiũ rũũgĩ rũa igetha” rũrĩa aanyitĩte ruonanagia wĩra wake arĩ Mũgethi. Jehova aatĩtĩrithirie atĩ wĩra ũcio nĩ wa mĩtũkĩ rĩrĩa oigire ũũ kũgerera mũraika: “Irio cia thĩ nĩirĩkĩtie kũũma.” Hatarĩ nganja, ‘ihinda rĩa kũgetha nĩ ikinyu’ kwoguo gũtirĩ na ihinda rĩa kũmaĩrĩria. Jesu nĩ aathĩkire rĩrĩa Ngai aamwĩrire ‘aikie rũhiũ rwake,’ na agĩĩka ũguo na njĩra ya gũcokanĩrĩria andũ aingĩ gũkũ thĩ. Kĩoneki kĩu kĩa magegania nĩ kĩratũririkania o rĩngĩ atĩ ‘mĩgũnda nĩ yerũhĩte ĩgethwo.’ Hihi kĩoneki kĩu nĩ gĩtũteithagia kũmenya rĩrĩa wĩra ũcio wa magetha waambĩrĩirie? Ĩĩ nĩ gĩtũteithagia!

6. (a) “Hĩndĩ ya magetha” yambĩrĩirie rĩ? (b) Wĩra wa kũgetha “irio cia thĩ” waambĩrĩirie rĩ? Taarĩria.

⁶ Tondũ kĩoneki kĩa Johana thĩinĩ wa Kũguũrĩrio mũrango wa 14 kĩronania Jesu, o we Mũgethi, ekĩrĩte thũmbĩ-rĩ (mũhari wa 14), ũndũ ũcio ũronania atĩ nĩ aarĩkĩtie gũtuwo Mũthamaki mwaka-inĩ wa 1914. (Dan. 7:13, 14) Kahinda kanini thutha ũcio, Jesu akĩĩrũo ambĩrĩrie kũgetha (mũhari wa 15). Ngerekano ya Jesu ĩgiĩ kũgetha ngano o nayo nĩ yonanagia atĩ maũndũ mangĩarũmanĩrĩire o ũguo. Oigire ũũ: “Hĩndĩ ya magetha, nĩyo ithirĩro-inĩ rĩa mahinda maya.” Kwoguo, hĩndĩ ya magetha na ithirĩro rĩa mahinda maya ciambĩrĩirie ihinda-inĩ rĩmwe mwaka wa 1914. (Mat. 13:30, 39) Kũringana na ũtaũku ũrĩa tũrĩ naguo, no tuuge atĩ wĩra wa kũgetha waambĩrĩirie mĩaka ĩigana ũna thutha wa Jesu gũtuĩka Mũthamaki. Kuuma mwaka wa 1914 nginya kĩambĩrĩria-inĩ kĩa mwaka wa 1919, Jesu aambire kũruta wĩra wa gũtheria arũmĩrĩri ake aitĩrĩrie maguta. (Mal. 3:1-3; 1 Pet. 4:17) Thutha ũcio mwaka-inĩ wa 1919, hĩndĩ ya kũgetha “irio cia thĩ” ĩkĩambĩrĩria. Atekũrĩa marĩĩgu, Jesu akĩhũthĩra ngombo ĩrĩa ĩĩhokekete ĩrĩa aakoretwo aamũra, nĩguo ĩteithie ariũ a Ithe witũ kuona ũrĩa wĩra wa kũhunjia wabataraga mĩtũkĩ. Reke tuone ũrĩa gwathiire.

7. (a) Nĩ ũthuthuria ũrĩkũ wateithirie ariũ a Ithe witũ kuona atĩ wĩra wa kũhunjia warĩ wa mĩtũkĩ? (b) Ariũ a Ithe witũ meekĩrirũo ngoro meke atĩa?

⁷ Ngathĩti ya Mũrangĩri ya Julaĩ mwaka wa 1920 yoigire ũũ: “Thutha wa gũthuthuria Maandĩko nĩ kuonekete atĩ kanitha nĩ ũheetwo gĩtĩo kĩnene gĩa gũtwarĩra andũ ndũmĩrĩri ĩgiĩ ũthamaki.” Kwa ngerekano, ciugo iria irĩ ũrathi-inĩ wa Isaia nĩ ciateithirie ariũ a Ithe witũ kuona atĩ ndũmĩrĩri ya Ũthamaki yarĩ ĩhunjio thĩinĩ wa thĩ yothe. (Isa. 49:6; 52:7; 61:1-3) Matiamenyaga ũrĩa ũndũ ũcio ũngĩahingirio, no nĩ maarĩ na ma atĩ Jehova nĩ angĩamahingũrĩire njĩra. (Thoma Isaia 59:1.) Nĩ ũndũ wa gũtaũkĩrũo wega makĩria nĩ ũrĩa wĩra wa kũhunjia wabataraga mĩtũkĩ, ariũ a Ithe witũ nĩ meekĩrirũo ngoro mongerere kĩyo kĩao ũtungata-inĩ. Maaiyũkirie ũndũ ũcio atĩa?

8. Ariũ a Ithe witũ maataũkĩirũo nĩ maũndũ marĩkũ merĩ megiĩ wĩra wa kũhunjia mwaka wa 1921?

⁸ Ngathĩti ya Mũrangĩri ya Dicemba 1921 yoigire ũũ: “Mwaka ũyũ nĩguo ũkoretwo ũrĩ mwega biũ harĩ mĩaka ĩrĩa ĩngĩ; na andũ aingĩ nĩ maiguĩte ndũmĩrĩri ya ũhoro wa ma mwaka-inĩ wa 1921 gũkĩra mwaka ũngĩ o wothe.” Yongereire ũũ: “Harĩ o na wĩra ũngĩ mũingĩ wa kũruta. . . . Nĩ tũũrutei tũkenete.” Ũndũ ũcio ũronania atĩ ariũ a Ithe witũ nĩ maataũkĩirũo nĩ maũndũ merĩ ma bata megiĩ wĩra wa kũhunjia marĩa Jesu eerire arutwo ake atĩ: Wĩra ũcio nĩ wa mĩtũkĩ, na atĩ aruti wĩra me na gĩkeno.

9. (a) Ngathĩti ya Mũrangĩri yoigire atĩa igũrũ rĩgiĩ wĩra wa kũgetha mwaka-inĩ wa 1954, na yoigire ũguo nĩkĩ? (b) Gũkoretwo na wongerereku ũrĩkũ wa ahunjia thĩinĩ wa thĩ yothe ihinda-inĩ rĩa mĩaka 50 mĩhĩtũku? (Rora mũcoro ũrĩ na kĩongo “Wongerereku wa Thĩ Yothe.”)

⁹ Mĩaka-inĩ ya 1930, thutha wa ariũ a Ithe witũ gũtaũkĩrũo atĩ kĩrĩndĩ kĩnene kĩa ngʼondu ingĩ nĩ kĩngĩamũkĩrire ndũmĩrĩri ya Ũthamaki, wĩra wa kũhunjia nĩ wongererekire makĩria. (Isa. 55:5; Joh. 10:16; Kũg. 7:9) Moimĩrĩro maarĩ marĩkũ? Ahunjia a ndũmĩrĩri ya Ũthamaki mongererekire kuuma 41,000 mwaka wa 1934 nginya 500,000 mwaka wa 1953! Nĩkĩo ngathĩti ya Mũrangĩri ya Dicemba 1, 1954 yoigire ũũ: “Wĩra ũyũ wa magetha wa thĩ yothe ũhingĩte nĩ ũndũ wa roho wa Jehova na hinya wa Kiugo gĩake.”b​—Zek. 4:6.

Ũrĩa Moimĩrĩro ma Magetha Maarathĩtwo Kũgerera Ngerekano

10, 11. Ngerekano ya kahĩndĩ ga karatarĩ yonanagia maũndũ marĩkũ megiĩ gũkũra?

¹⁰ Thĩinĩ wa ngerekano iria aaheanaga ciĩgiĩ Ũthamaki, Jesu nĩ aatarĩirie wega moimĩrĩro ma wĩra wa magetha. Rekei tũthuthurie ngerekano ya kahĩndĩ ga karatarĩ na ĩrĩa ĩgiĩ ndawa ya kũimbia. Tũkwarĩrĩria makĩria ũrĩa ngerekano icio ihingĩtio matukũ-inĩ maya ma kũrigĩrĩria.

¹¹ Ngerekano ya kahĩndĩ ga karatarĩ. Nĩ kũrĩ mũndũ wahandire kahĩndĩ ga karatarĩ. Gaakũra, gagĩtuĩka mũtĩ ũrĩa nyoni cia rĩera-inĩ ciathiaga kũraara honge-inĩ ciaguo. (Thoma Mathayo 13:31, 32.) Nĩ maũndũ marĩkũ megiĩ gũkũra monanĩtio ngerekano-inĩ ĩyo? (1) Gĩkĩro kĩrĩa kahĩndĩ kau gaakũrire nakĩo nĩ kĩa magegania. “O na gaakorũo ge kanini gũkĩra mbeũ ciothe,” gaatuĩkire mũtĩ ũrĩ na “honge nene.” (Mar. 4:31, 32) (2) No mũhaka kangĩakũrire. Rĩrĩa kahĩndĩ kau “kaahandwo-rĩ, gagakũra.” Jesu ndoigire, “No gakũre.” Handũ ha ũguo, oigire ũũ: “Gagakũra.” Gatingĩagirĩrĩirio gũkũra. (3) Mũtĩ ũcio nĩ wagucagĩrĩria ageni na makona ha kũraara. ‘Nyoni cia rĩera-inĩ ciokaga kũraara honge-inĩ ciaguo.’ Maũndũ macio matatũ mahaanaine atĩa na wĩra wa kũgetha na njĩra ya kĩĩroho ũrĩa ũrarutwo matukũ-inĩ maya?

12. Ngerekano ya kahĩndĩ ga karatarĩ ĩkonainie atĩa na magetha ma mahinda maya? (Rora nginya mũcoro ũrĩ na kĩongo “Wongerereku wa Arutwo a Bibilia.”)

¹² (1) Gĩkĩro gĩa gũkũra: Ngerekano ĩyo yonanagia gũkũra kwa ũhoro wa Ũthamaki o hamwe na kĩũngano gĩa Gĩkristiano. Kuuma mwaka wa 1919, aruti wĩra me kĩyo nĩ makoretwo magĩcokanĩrĩrio thĩinĩ wa kĩũngano gĩa Gĩkristiano. Kahinda-inĩ kau, aruti wĩra maarĩ anini, no nĩ mongererekire na ihenya. Kahĩndĩ kau gakũrĩte na njĩra ya magegania kuuma kĩambĩrĩria-inĩ kĩa mĩaka ya 1900 nginya ũmũthĩ. (Isa. 60:22) (2) Gũkũra nĩ kwa o mũhaka: Kĩũngano gĩa Gĩkristiano gĩkoretwo gĩgĩkũra na njĩra ĩtangĩhota kũgirĩrĩrio. Gũtekũmakania nĩ mĩhĩnga ĩigana atĩa ĩigĩtwo nĩ thũ cia Ngai, kahĩndĩ kau nĩ gaathiire o na mbere gũkũra gatekũgirĩrĩrio nĩ mĩhĩnga ĩyo. (Isa. 54:17) (3) Handũ ha kũraara: “Nyoni cia rĩera-inĩ” iria ithiaga kũraara mũtĩ-inĩ ũcio, irũgamĩrĩire andũ aingĩ arĩa marĩ na ngoro njega kuuma mabũrũri ta 240 arĩa metĩkĩrĩte ndũmĩrĩri ya Ũthamaki na makaingĩra kĩũngano-inĩ gĩa Gĩkristiano. (Ezek. 17:23) Marĩ kũu nĩ maamũkagĩra irio cia kĩĩroho, makahurũkio, na makagitĩrũo.​—Isa. 32:1, 2; 54:13.

13. Ngerekano ya ndawa ya kũimbia yonanagia maũndũ marĩkũ megiĩ gũkũra?

¹³ Ngerekano ĩgiĩ ndawa ya kũimbia. Rĩrĩa mũtumia ongereire ndawa ya kũimbia mũtu-inĩ, ndawa ĩyo yatũmire mũtu ũcio wothe ũimbe. (Thoma Mathayo 13:33.) Nĩ maũndũ marĩkũ megiĩ gũkũra monanĩtio ngerekano-inĩ ĩyo? Reke tũthuthurie maũndũ merĩ. (1) Gũkũra nĩ kũrehaga ũgarũrũku. Ndawa ya kũimbia yatheremire “kinya mũtu ũcio wothe ũkĩimbio nĩyo.” (2) Gũkũra nĩ gũtheremaga. Ndawa ĩyo yaimbirie ‘ibaba ciothe ithatũ cia mũtu.’ Maũndũ macio merĩ maringaine atĩa na kũgetha gwa kĩĩroho kwa mahinda maya?

14. Ngerekano ya ndawa ya kũimbia ĩkonainie atĩa na magetha ma mahinda maya?

¹⁴ (1) Kũgarũrũka: Ndawa ya kũimbia ĩrũgamĩrĩire ndũmĩrĩri ya Ũthamaki, naguo mũtu ũkarũgamĩrĩra andũ. O ta ũrĩa mũtu ũgarũrũkaga wakimwo hamwe na ndawa ya kũimbia, noguo ngoro cia andũ igarũrũkaga thutha wa gwĩtĩkĩra ndũmĩrĩri ya Ũthamaki. (Rom. 12:2) (2) Gũtherema: Gũtherema kwa ndawa ya kũimbia kũrũgamĩrĩire gũtherema kwa ndũmĩrĩri ya Ũthamaki. Ndawa ya kũimbia ĩtheremaga ĩkaingĩra mũtu-inĩ wothe. O ũndũ ũmwe na ũguo, ndũmĩrĩri ya Ũthamaki nĩ ĩtheremete nginya “ituri ciothe cia thĩ.” (Atũm. 1:8) Ũndũ ũcio ningĩ nĩ ũronania atĩ ndũmĩrĩri ya Ũthamaki nĩ ĩtheremete nginya thĩinĩ wa icigo iria wĩra wa kũhunjia ũgirĩtio, o na gũtuĩka andũ aingĩ no maage kuona wĩra ũcio ũgĩthiĩ na mbere.

15. Ciugo iria irĩ thĩinĩ wa Isaia 60:5, 22 ihingĩte atĩa? (Rora nginya mathandũkũ marĩ na kĩongo “Jehova Nĩ Aatũmire Kũhoteke” karatathi-inĩ ka 93, na “Ũrĩa ‘Nyũmba Ĩrĩa Nyinyi Ĩtuĩkĩte Rũrĩrĩ rwĩ na Hinya’” karatathi-inĩ ka 96-97.)

¹⁵ Mĩaka ta 800 mbere ya Jesu kũheana ngerekano icio, Jehova nĩ aarathĩte kũgerera Isaia ũrĩa wĩra wa kũgetha na njĩra ya kĩĩroho ũngĩahingirio matukũ-inĩ maya, na gĩkeno kĩrĩa ũngĩarehire.c Aatarĩirie atĩ andũ mangĩoimire “kũndũ kũraya mũno” moke thĩinĩ wa ithondeka rĩake. Akĩaranĩria na “Jerusalemu” ĩrĩa ũmũthĩ ĩrũgamĩrĩirũo nĩ aitĩrĩrie maguta arĩa matigarĩte gũkũ thĩ, oigire ũũ: “Nĩũkona wega, warĩrio ũtheri, o nayo ngoro yaku nĩĩgacanjamũka o na ĩigue wega nĩ ũrĩa ĩmakũkĩte, tondũ indo ciothe iria ikuuagwo ikagerio igũrũ rĩa iria rĩrĩa inene, o ta ũrĩa ciingĩhĩte, nĩikerekerio harĩ wee, o naguo ũtonga wa ndũrĩrĩ ũrehwo harĩ wee.” (Isa. 60:1, 4, 5, 9) Ciugo icio nĩ cia ma biũ! Mahinda-inĩ maya, andũ arĩa matungatĩire Jehova ihinda iraya nĩ macanjamũkaga nĩ kuona ũrĩa mũigana wa ahunjia a Ũthamaki mabũrũri-inĩ mao wongererekete, kuuma andũ anini nginya andũ ngiri nyingĩ.

Kĩrĩa Gĩtũmaga Ndungata Ciothe cia Jehova Ikorũo na Gĩkeno

16, 17. Gweta gĩtũmi kĩmwe kĩrĩa gĩtũmaga ‘mũhandi na mũgethi makenanĩre hamwe.’ (Rora nginya gathandũkũ karĩ na kĩongo “Ũrĩa Trakti Igĩrĩ Ciahutirie Ngoro Igĩrĩ Gĩcigo-inĩ kĩa Amazon.”)

¹⁶ Ririkana ũrĩa Jesu eerire arutwo ake atĩ: ‘Ũrĩa ũgethaga nĩ aracokanĩrĩria irio cia kũhirũo muoyo-inĩ wa tene na tene, nĩguo mũhandi na mũgethi makenanĩre hamwe.’ (Joh. 4:36) ‘Tũkenanagĩra hamwe’ atĩa tũkĩruta wĩra wa kũgetha wa thĩ yothe? Twĩkaga ũguo na njĩra cigana ũna. Reke tũthuthurie njĩra ithatũ.

¹⁷ Wa mbere, nĩ tũkenaga kuona itemi rĩrĩa Jehova akoragwo narĩo wĩra-inĩ ũcio. Rĩrĩa tũrahunjia ndũmĩrĩri ya Ũthamaki, tũkoragwo tũkĩhanda mbeũ. (Mat. 13:18, 19) Narĩo rĩrĩa twateithia mũndũ gũtuĩka mũrũmĩrĩri wa Kristo, tũkagetha maciaro. Na ithuothe nĩ tũkenaga mũno tuona ũrĩa Jehova atũmaga mbeũ cia Ũthamaki ‘imere na igakũra.’ (Mar. 4:27, 28) Mbeũ imwe iria tũhandaga imeraga thutha-inĩ na ikagethwo nĩ andũ angĩ. No gũkorũo waneyonera ũndũ ta ũrĩa wonetwo nĩ mwarĩ wa Ithe witũ Joan wa kuuma Britain, ũrĩa wabatithirio mĩaka 60 mĩhĩtũku. Oigire ũũ: “Ndanacemania na andũ makanjĩra atĩ nĩ ndaahandire mbeũ ngoro-inĩ ciao rĩrĩa ndamahunjĩirie mĩaka mĩingĩ mĩhĩtũku. O na itekũmenya, aarĩ na ariũ a Ithe witũ angĩ nĩ meerutire Bibilia hamwe nao na makĩmateithia gũtuĩka ndungata cia Jehova. Nĩ ngenaga nĩ gũkorũo atĩ mbeũ iria ndahandire nĩ ciakũrire na ikĩgethwo.”​—Thoma 1 Akorintho 3:6, 7. 

18. Rĩandĩko rĩa 1 Akorintho 3:8 rĩonanĩtie gĩtũmi kĩrĩkũ gĩa gũkena?

¹⁸ Wa kerĩ, nĩ tũkenaga twaririkana ciugo ici cia Paulo: ‘Gũtirĩ ũtakaaheo ũtungati wake mwene kũringana na wĩra wĩ mĩnoga ũrĩa we mwene arutĩte.’ (1 Kor. 3:8) O mũruti wĩra aheagwo kĩheo kũringana na wĩra ũrĩa arutĩte, no ti kũringana na moimĩrĩro ma wĩra ũcio. Ũndũ ũcio no wĩkĩre ngoro mũno arĩa mahunjagia icigo iria itarĩ moimĩrĩro manene. Maitho-inĩ ma Ngai, Mũkristiano o wothe ũrĩa ũnyitanagĩra wĩra-inĩ wa kũhanda na ngoro yake yothe nĩ ‘aciaraga maciaro maingĩ,’ na nĩ ũndũ ũcio e na gĩtũmi kĩega gĩa gũkena.​—Joh. 15:8; Mat. 13:23.

19. (a) Ũrathi wa Jesu thĩinĩ wa Mathayo 24:14 ũkonainie atĩa na gĩkeno gitũ? (b) Nĩ ũndũ ũrĩkũ twagĩrĩirũo kũririkana o na tũngĩaga kũgĩa na mũrutwo wa Bibilia?

¹⁹ Wa gatatũ, nĩ tũkenaga nĩ gũkorũo wĩra witũ nĩ ũhingagia ũrathi. Ta wĩcirie icokio rĩa Jesu rĩrĩa arutwo ake maamũririe ũũ: “Kĩmenyithia kĩa rĩrĩa ũgoka, o na gĩa ithirĩro rĩa mahinda maya, nĩ kĩrĩkũ?” Aameerire atĩ ũndũ ũmwe ũrĩ kĩmenyithia-inĩ kĩu nĩ wĩra wa kũhunjia thĩinĩ wa thĩ yothe. Hihi aaragia ũhoro wa wĩra wa gũtua andũ arutwo? Aca. Oigire ũũ: ‘Ũhoro-ũyũ-mwega wa ũthamaki nĩũkahunjio thĩ yothe, ũtuĩke ũira.’ (Mat. 24:3, 14) Nĩ ũndũ ũcio, kũhunjia ũhoro wa Ũthamaki kana kũhura mbeũ, nĩ ũndũ ũmwe ũrĩ kĩmenyithia-inĩ kĩu. Kwoguo, nĩ tũririkanage atĩ o na tũngĩaga kũgĩa na moimĩrĩro mega ma gũtua andũ arutwo, nĩ tũhingagia wĩra wa kũruta “ũira.”d Gũtekũmakania ũrĩa andũ mekũiyũkia ndũmĩrĩri itũ, nĩ tũnyitaga itemi harĩ kũhingia ũrathi ũrĩa warathĩtwo nĩ Jesu, na tũgakenera gũkorũo tũrĩ “arutithania wĩra hamwe na Ngai.” (1 Kor. 3:9) Githĩ kĩu ti gĩtũmi kĩega gĩa gũkena!

“Kuuma o Rĩrĩa Riũa Rĩkũratha Nginya o Rĩgĩthũa”

20, 21. (a) Ciugo iria irĩ thĩinĩ wa Malaki 1:11 irahinga atĩa? (b) Ũtuĩte itua rĩa gwĩka atĩa ũhoro-inĩ wĩgiĩ wĩra wa kũgetha, na nĩkĩ?

²⁰ Jesu nĩ aateithirie arutwo ake kuona wĩra wa magetha ũrĩ wa mĩtũkĩ. Kwambĩrĩria mwaka wa 1919 gũthiĩ na mbere, Jesu nĩ akoretwo agĩteithia arũmĩrĩri ake a mahinda maya mataũkĩrũo nĩ ũndũ ũcio. Moimĩrĩro nĩ atĩ, andũ a Ngai nĩ mongereire kĩyo wĩra-inĩ ũcio. Gũtirĩ mũndũ kana ũndũ ũngĩgirĩrĩria wĩra wa kũgetha. O ta ũrĩa mũnabii Malaki aarathĩte, ũmũthĩ wĩra wa kũhunjia ũrarutwo “kuuma o rĩrĩa riũa rĩkũratha nginya o rĩgĩthũa.” (Mal. 1:11) Nĩ ma, kuuma irathĩro nginya ithũĩro, ahandi na agethi marutaga wĩra na magakenanĩra hamwe gũtekũmakania kũrĩa mangĩkorũo marĩ thĩinĩ wa thĩ. Na kuuma rũcinĩ nginya hwaĩ-inĩ, tũrutaga wĩra na mĩtũkĩ.

²¹ Rĩrĩa twaikia maitho na thutha mĩaka 100 mĩhĩtũku tũkona ũrĩa gakundi kanini ka ndungata cia Jehova gatuĩkĩte “rũrĩrĩ rũĩ hinya mũno,” ngoro citũ nĩ ‘icanjamũkaga.’ (Isa. 60:5, 22) Rekei gĩkeno kĩu hamwe na wendo witũ harĩ Jehova, “Mwathani mwene magetha,” itũtindĩke kũhingia itemi ritũ harĩ kũrĩkia wĩra ũyũ mũnene wa kũgetha!​—Luk. 10:2.