3. O ta ũrĩa 1 Akorintho 15:30-32 yonanĩtie-rĩ, wĩtĩkio wa Paulo wĩgiĩ kũriũka wamũteithirie gwĩka atĩa?

³ Wĩtĩkio wa Paulo wĩgiĩ kũriũka nĩ wamũteithirie gũkirĩrĩria magerio matiganĩte. (Thoma 1 Akorintho 15:30-32.) Eerire Akristiano a Korintho ũũ: “Niĩ ngʼethagĩra gĩkuũ o mũthenya.” Ningĩ aandĩkire ũũ: “Niĩ ndanahũũrana na nyamũ cia gĩthaka Efeso.” No kũhoteke aaragia ũhoro wĩgiĩ kũrũa na nyamũ kĩhaaro-inĩ kĩmwe kĩa mathaako thĩinĩ wa Efeso. (2 Kor. 1:8; 4:10; 11:23) Kana hihi akorũo aaragĩrĩria igũrũ rĩgiĩ Ayahudi na andũ angĩ arĩa maamũkararagia, arĩa maatariĩ ta “nyamũ cia gĩthaka.” (Atũm. 19:26-34; 1 Kor. 16:9) O ũrĩa kũngĩkorũo kwarĩ, Paulo nĩ aacemanirie na magerio maingĩ maritũ. Ĩndĩ aarĩ na kĩĩrĩgĩrĩro kĩega kĩa mahinda marĩa maroka.​—2 Kor. 4:16-18.

5. Nĩ mwerekera ũrĩkũ mũũru ũngĩtũma twage wĩtĩkio harĩ kĩĩrĩgĩrĩro gĩa kũriũka?

⁵ Paulo eerire ariũ a Ithe witũ matigakorũo na mwerekera mũũru ta ũrĩa warĩ na andũ amwe arĩa mooigaga ũũ: “Angĩkorũo arĩa akuũ matikaariũkio, ‘nĩ tũkĩrĩei na tũnyue, tondũ rũciũ nĩ tũgaakua.’” O na mbere ya matukũ ma Paulo, andũ amwe no maarĩ na mwerekera ta ũcio. No gũkorũo Paulo aagwetaga ciugo iria irĩ thĩinĩ wa Isaia 22:13, iria cionanagia mwerekera ũrĩa Aisiraeli maarĩ naguo. Handũ ha kwĩrutanĩria gũkuhĩrĩria Ngai, maathingataga maũndũ ma gwĩkenia. Mwerekera wa Aisiraeli watariĩ ta ũrĩa ũkoragwo na andũ aingĩ ũmũthĩ, wa gwĩkenia rĩrĩa marĩ muoyo tondũ no makue hĩndĩ o yothe. O na kũrĩ ũguo, Bibilia nĩ yonanagia moimĩrĩro moru marĩa rũrĩrĩ rwa Isiraeli rwagĩire namo nĩ ũndũ wa gũkorũo na mwerekera ta ũcio.​—2 Maũ. 36:15-20.

6. Kĩĩrĩgĩrĩro gĩa kũriũka kĩagĩrĩire gũtũteithia atĩa rĩrĩa tũrathuura arata?

⁶ Gũkorũo atĩ Jehova no ahote kũriũkia andũ arĩa makuĩte, nĩ kwagĩrĩire kũhutia matua maitũ megiĩ gũthuura arata. Ariũ a Ithe witũ a Korintho nĩ maabataraga kwĩmenyerera nĩguo matikagĩe ũrata na andũ arĩa mateetĩkĩtie ũhoro wĩgiĩ kũriũkio. Ũhoro wao nĩ ũratũruta ũndũ wa bata, atĩ moimĩrĩro no makorũo marĩ moru harĩ ithuĩ tũngĩthuura gũtuĩka arata na andũ arĩa maikaraga mũtũũrĩre o wa gwĩkenia mategwĩciria ũhoro wa mahinda marĩa maroka. Kũhũthĩra mahinda maingĩ na andũ acio no gũthũkie mĩtugo na muonere wa maũndũ wa Mũkristiano. O na no gũtũme ekage maũndũ marĩa Ngai athũire. Nĩkĩo Paulo ooigire ũũ: “Arahũkai meciria-inĩ manyu na njĩra ya ũthingu na mũtikamenyere kwĩhagia.”​—1 Kor. 15:33, 34.