Araika Nĩa na Marutaga Wĩra Ũrĩkũ?

Jehova nĩ endaga tũmenye ũhoro wĩgiĩ famĩlĩ yake ya igũrũ. Famĩlĩ ĩyo nĩ hamwe na araika, arĩa metagwo “ariũ a Ngai.” (Ayubu 38:7) Bibilia yugaga atĩa igũrũ rĩgiĩ araika? Mahutagia ũtũũro wa andũ atĩa? Hihi araika othe nĩ a famĩlĩ ya Ngai?

1. Araika nĩa?

Jehova oombire araika atanomba thĩ. O ta Jehova, araika nĩ ciũmbe cia roho cikaraga igũrũ na tũtingĩhota gũciona. (Ahibirania 1:14) Gũkoragwo na araika milioni nyingĩ, na o mũraika akoragwo arĩ ngũrani na ũrĩa ũngĩ. (Kũguũrĩrio 5:11) Nĩ ‘mahingagia kiugo kĩa Jehova, na magathĩkĩra mũgambo wake.’ (Thaburi 103:20) Mahinda-inĩ ma tene, rĩmwe Jehova nĩ aatũmaga araika matware ndũmĩrĩri, na mateithie andũ ake na mamahonokie. Mahinda-inĩ maya, araika nĩ matongoragia Akristiano kũrĩ andũ arĩa marenda kwĩruta ũhoro wĩgiĩ Ngai.

2. Shaitani na ndaimono ciake nĩa?

Araika amwe matiaikarire marĩ ehokeku harĩ Jehova. Mũraika wa mbere ũrĩa waremeire Jehova nĩ ũrĩa “wĩtagwo Mũcukani na Shaitani, ũrĩa ũhĩtithagia thĩ yothe ĩrĩa ĩikaragwo.” (Kũguũrĩrio 12:9) Shaitani eendaga gwathaga arĩa angĩ, na kwoguo akĩheenereria Adamu na Hawa, na thutha ũcio akĩheenereria o na araika angĩ nĩguo manyitanĩre nake ũremi-inĩ ũcio. Araika acio maaremeire Jehova metagwo ndaimono. Jehova nĩ aatigĩrĩire atĩ nĩ maingatwo igũrũ, makĩharũrũkio gũkũ thĩ, na nĩ marĩniinwo.—Thoma Kũguũrĩrio 12:9, 12.

3. Shaitani na ndaimono mageragia atĩa gũtũhĩtithia?

Shaitani na ndaimono mahĩtithagia andũ aingĩ kũgerera maũndũ ma ndaimono, kana kũgerera mũtugo mũũru wa kũgeria kwaranĩria na maroho. Kwa ngerekano, andũ amwe nĩ macaragia ũhoro harĩ atuĩria a njata, arĩa marathaga mohoro, aragũri, na ago. Angĩ nao nĩ macaragia ũrigitani ũhutanĩtie na maũndũ ma ndaimono. Ningĩ andũ nĩ maheenagio atĩ no maranĩrie na arĩa makuĩte. No Jehova atũheete mũkaana ũyũ: “Mũtikanathiĩ kũrĩ andũ arĩa maragia na maroho, na mũtikanacarie ũhoro kũrĩ arĩa marathaga mohoro.” (Maũndũ ma Alawii 19:31) Atũheete mũkaana ũcio nĩguo atũgitĩre kuumana na Shaitani na ndaimono. Makoragwo marĩ thũ cia Ngai na mendaga gũtwĩka maũndũ moru.

THUTHURIA MAKĨRIA

4. Araika nĩ mateithagia andũ merute ũhoro wĩgiĩ Jehova

Araika a Ngai matihunjagĩria andũ ĩmwe kwa ĩmwe. Ithenya rĩa ũguo, no matongorie athathaiya a Ngai kũrĩ andũ arĩa marenda kwĩruta ũhoro ũmwĩgiĩ. Thomai Kũguũrĩrio 14:6, 7, mũcoke mwarĩrĩrie ciũria ici:

• Tũbataraga ũteithio wa araika nĩkĩ tũkĩhunjia?

• Hihi nĩ wekĩrũo ngoro nĩ kũmenya atĩ araika no magũtongorie kũrĩ andũ arĩa mendaga kũigua ũhoro wĩgiĩ Bibilia? Nĩkĩ?

5. Regana na maũndũ ma ndaimono

Shaitani na ndaimono nĩ thũ cia Jehova, na nĩ thũ citũ o na ithuĩ. Thomai Luka 9:38-42, mũcoke mwarĩrĩrie kĩũria gĩkĩ:

• Ndaimono ciĩkaga andũ maũndũ ta marĩkũ?

Tũtiagĩrĩirũo gwĩtĩkĩria ndaimono ũtũũro-inĩ witũ. Thomai Gũcokerithia Maathani 18:10-12, mũcoke mwarĩrĩrie ciũria ici:

• Ndaimono ihũthagĩra njĩra irĩkũ kũgeria gũtũhĩtithia na kwaranĩria na ithuĩ? Nĩ maũndũ marĩkũ ma ndaimono andũ mekaga gĩcigo-inĩ kĩrĩa ũikaraga?

• Hihi nĩ ũkuona ta Jehova ekĩte wega nĩ gũtũgiria kwĩingĩria maũndũ-inĩ ma ndaimono? Ũngiuga ũguo nĩkĩ?

Mwĩrorerei VIDEO ĩno, mũcoke mwarĩrĩrie ciũria iria irũmĩrĩire.

VIDEO: “Reganagai na Mũcukani” (5:02)

• Hihi nĩ ũkuona ta gĩthitũ kĩrĩa Palesa oohete kairĩtu gake kĩarĩ kĩũru? Ũngiuga ũguo nĩkĩ?

• Palesa aabataraga gwĩka atĩa nĩguo agitĩrũo kuumana na ndaimono?

Kuuma o tene, Akristiano a ma makoretwo makĩregana na ndaimono. Thomai Atũmwo 19:19 na 1 Akorintho 10:21, mũcoke mwarĩrĩrie kĩũria gĩkĩ:

• Nĩkĩ nĩ ũndũ wa bata kwananga kĩndũ o gĩothe ũngĩkorũo nakĩo kĩhutanĩtie na maũndũ ma ndaimono?

6. No ũtoorie Shaitani na ndaimono ciake

Ndaimono ciathagwo nĩ Shaitani. No araika arĩa ehokeku matongoragio nĩ mũraika ũrĩa mũnene wĩtagwo Mikaeli. Mikaeli nĩ rĩĩtwa rĩngĩ rĩa Jesu. Mikaeli akoragwo na hinya ũigana atĩa? Thomai Kũguũrĩrio 12:7-9, mũcoke mwarĩrĩrie ciũria ici:

• Nĩa makoragwo na hinya makĩria, nĩ Mikaeli na araika ake kana nĩ Shaitani na ndaimono ciake?

• Hihi nĩ ũkuona ta arũmĩrĩri a Jesu marabatara gwĩtigĩra Shaitani na ndaimono ciake?

No ũtoorie Shaitani na ndaimono ciake. Thomai Jakubu 4:7, mũcoke mwarĩrĩrie kĩũria gĩkĩ:

• Ũngĩĩgitĩra atĩa kuumana na Shaitani na ndaimono?

ŨRĨA TWERUTA

Araika arĩa ehokeku nĩ matũteithagia. Shaitani na ndaimono ciake nĩ thũ cia Jehova, na mahũthagĩra maũndũ ma ndaimono kũhĩtithia andũ.

Ciũria cia gũcokera

• Araika a Jehova mateithagia andũ atĩa kwĩruta ũhoro wake?

• Shaitani na ndaimono ciake nĩa?

• Wagĩrĩirũo gwĩthema maũndũ mothe mahutanĩtie na ndaimono nĩkĩ?

RIKĨRA

Thoma wone ũira wa kuonania atĩ Jesu nĩwe Mikaeli, mũraika ũrĩa mũnene.

“Mikaeli Mũraika Ũrĩa Mũnene Nũũ?” (Gĩcunjĩ thĩinĩ wa jw.org/ki)

Thuthuria wone ũira wa kuonania atĩ Mũcukani ti ũũru ũkoragwo thĩinĩ witũ.

“Hihi Mũcukani arĩ Kuo?” (Gĩcunjĩ thĩinĩ wa jw.org/ki)

Thoma wone ũrĩa mũtumia ũmwe aahotire gũtigana na maũndũ ma ndaimono.

“Nĩ Aagĩire na Muoroto Ũtũũro-inĩ” (w93 07/01)

Thoma wone ũrĩa Shaitani ahũthagĩra maũndũ ma ndaimono kũhĩtithia andũ.

“Ma Ĩkoniĩ Ciama, Ũragũri na Ũgo” (Njĩra ya Muoyo wa Tene na Tene, gĩcunjĩ gĩa 5)