Thiĩ na Mbere

RĨRĨA waambĩrĩirie kũhũthĩra motaaro ma Bibilia, nĩ waambĩrĩirie gwĩka ũgarũrũku harĩ mwĩcirĩrie, mĩario, na mĩtugo ĩrĩa yekĩrĩte mĩri mũno thĩinĩ waku. Mũingĩ wa ũgarũrũku ũcio wawĩkire o na ũtaingĩrĩte thĩinĩ wa Cukuru ya Ũtungata wa Gĩtheokrasi. No kũhoteke rĩu nĩ ũthiĩte na mbere nginya ũkeyamũrĩra Jehova. Hihi ũguo nĩ kuga atĩ ndũrabatara gũthiĩ na mbere makĩria? Aca. Ũbatithio waku nĩ kĩambĩrĩria.

O na gũtuĩka aarĩ mũthuri wa kĩũngano, mũrutwo Timotheo eerirũo nĩ Paulo ‘ekagĩre kĩyo’ harĩ ũtaaro ũrĩa aahetwo na harĩ mĩeke ya ũtungata ĩrĩa eehokeirũo, ‘aikarage arũmĩtie maũndũ macio,’ nĩguo ‘andũ othe monage ũrĩa aathiaga na mbere.’ (1 Tim. 4:12-15) O na angĩkorũo nĩ hĩndĩ ũrambĩrĩria kũrũmĩrĩra ũhoro wa ma kana ũrĩ na ũmenyeru mũingĩ mũtũũrĩre-inĩ wa Gĩkristiano, wagĩrĩirũo nĩ kwĩrutanĩria gũthiĩ na mbere.

Ũmenyo na Ũgarũrũku

Thĩinĩ wa Aefeso 3:14-19, tũthomaga atĩ mũtũmwo Paulo aahoire atĩ Akristiano arĩa angĩ maarĩ hamwe nake ‘mahote gũtaũkĩrũo biũ nĩ wariĩ, ũraihu, na ũriku’ wĩgiĩ ũhoro wa ma. Nĩ ũndũ ũcio, Jesu nĩ aaheire athuri marĩ ta iheo wĩra wa kũrutana, gũtaarana, na gwaka kĩũngano. Gwĩcũranagia ũhoro wa Kiugo kĩa Ngai kĩrĩa gĩtongoretio na roho, hamwe na ũtongoria wa arutani marĩ na ũmenyeru, no gũtũteithie ‘gũkũra’ kĩĩroho.—Ef. 4:11-15.

Gũkũra kũu nĩ hamwe na ‘kwerũhio meciria maitũ.’ Ũguo nĩ kuga kũgĩa na mwerekera mũrũmu wa meciria-inĩ ũrĩa ũrĩtwaranaga na wa Ngai na wa Kristo. Kũbataraga gũthiĩ na mbere kwĩruta ũhoro wa mwĩcirĩrie wao, nĩguo mũndũ ‘ehumbe ũmũndũ ũrĩa mwerũ.’ (Ef. 4:23, 24) Rĩrĩa ũrathoma Injiri-rĩ, hihi nĩ wonaga maũndũ macio megiĩ ũtũũro wa Kristo marĩ kĩonereria harĩ wee? Hihi nĩ ũthingataga kuona ngumo itiganĩte iria cioonanirio nĩ Jesu ũgacoka ũgekĩra kĩyo gũcikũria ũtũũro-inĩ waku?—1 Pet. 2:21.

Maũndũ marĩa wendete kwaria no monanie ũrĩa ũthiĩte na mbere. Arĩa mehumbĩte ũmũndũ mwerũ matiaragia mĩario ya maheeni, irumi, kana ya waganu. Ithenya rĩa ũguo, mĩario yao ĩkoragwo ‘ĩrĩ mĩagĩrĩru, ya kũguna arĩa mamĩiguaga.’ (Ef. 4:25, 26, 29, 31; 5:3, 4; Jud. 16) Maũndũ marĩa maragia marĩ mĩcemanio-inĩ ya kĩũngano na marĩ kũndũ kũngĩ nĩ maguũragia atĩ ma nĩ ĩragarũra mĩtũũrĩre yao.

Angĩkorũo nĩ ũtigĩte ‘gũikaraga ũkĩagagagio na ũgĩtwarangagwo nĩ ũrutani o wothe ta arĩ rũhuho rũgũkũhuruta-rĩ,’ ũcio naguo nĩ ũira wa atĩ nĩ ũrathiĩ na mbere kĩĩroho. (Ef. 4:14) Kwa ngerekano-rĩ, wĩkaga atĩa rĩrĩa thĩinĩ wa thĩ kuoimĩra maũndũ maingĩ merũ, maũndũ marabatara itua, kana ma gwĩkenia? Hihi nĩ ũgucagĩrĩrio kũhũthĩra mahinda ma maũndũ ma kĩĩroho gũthingata maũndũ macio? Gwĩka ũguo no kũgirie ũthiĩ na mbere kĩĩroho. Nĩ ũndũ wa ũũgĩ makĩria kũgũra mahinda ma gũthingata maũndũ ma kĩĩroho.—Ef. 5:15, 16.

Ningĩ mĩikaranĩrie yaku na andũ no yonanie ũrĩa ũrathiĩ na mbere kĩĩroho. Hihi nĩ wĩrutĩte ‘kũiguagĩra tha, na kuohagĩra’ aarĩ na ariũ a Ithe witũ?—Ef. 4:32.

Gũthiĩ na mbere gwĩka maũndũ na njĩra ya Jehova kwagĩrĩirũo kuoneka ũrĩ kĩũngano-inĩ na ũrĩ mũciĩ. Ningĩ nĩ kwagĩrĩirũo kuoneka ũrĩ cukuru, mũingĩ-inĩ, na wĩra-inĩ. (Ef. 5:21–6:9) Angĩkorũo maũndũ-inĩ ta macio mothe nĩ ũronania biũ ngumo cia ũngai, gũthiĩ gwaku na mbere nĩ kũreyonania.

Hũthĩra Kĩheo Gĩaku

Jehova nĩ atũheete o mũndũ mohoti matiganĩte. Erĩgagĩrĩra tũmahũthĩre gũteithia arĩa angĩ, na njĩra ĩyo kũgerera ithuĩ, akonia andũ tha ciake. Ũhoro-inĩ ũcio mũtũmwo Petero aandĩkire ũũ: “O ta ũrĩa o mũndũ wanyu aheetwo kĩheo, . . . tungatanagĩrai o ro ũguo, ta mũrĩ aramati ega a Wega wa Ngai.” (1 Pet. 4:10) Wee ũhũthagĩra ũramati waku atĩa?

Petero athiĩte na mbere kuga ũũ: “Mũndũ angĩkorũo akĩaria-rĩ, nĩaarie ta arĩ ciugo cia Ngai ekũheana.” (1 Pet. 4:11) Mũhari ũcio ũtĩtĩrithĩtie mũndũ kwaria biũ kũringana na Kiugo kĩa Ngai, nĩguo Ngai agoocithagio. Ningĩ njĩra ĩrĩa ĩkũhũthĩrũo kwaria ũhoro ũcio yagĩrĩirũo kũgoocithia Jehova. Gĩthomo gĩa Cukuru ya Ũtungata wa Gĩtheokrasi no gĩgũteithie kũhũthĩra kĩheo gĩaku na njĩra ta ĩyo—ũgoocithagie Ngai kũgerera ũrĩa ũteithagia arĩa angĩ. Ũrĩ na muoroto ũcio-rĩ, ũngĩthima atĩa ũrĩa ũrathiĩ na mbere thĩinĩ wa cukuru ĩno?

Handũ ha kũrora tu nĩ ngumo cigana ũrutĩire wĩra thĩinĩ wa bomu yaku ya ngumo cia mwarĩrie kana mũthemba wa mĩario ĩrĩa wanaheo-rĩ, rora ũrĩa cukuru ĩno yagagĩrĩtie igongona rĩa kanua gaku. Cukuru ĩno ĩtũhaaragĩria ũrĩa tũngĩgĩa na moimĩrĩro makĩria ũtungata-inĩ. Kwoguo wĩyũrie ũũ: ‘Hihi kũna nĩ ndĩhaaragĩria ũrĩa ngũthiĩ kũhunjia? Hihi nĩ nyonagia arĩa hunjagĩria atĩ nĩ ndĩramarũmbũiya? Hihi nĩ thondekaga mũthingi wa gũcokera andũ na njĩra ya kũmoria kĩũria tũngĩarĩrĩria hĩndĩ ĩyo ĩngĩ? Angĩkorũo harĩ mũndũ ndutaga Bibilia-rĩ, hihi nĩ ndĩrerutanĩria gũtuĩka mwarimũ ũrakinyĩra ngoro?’

Ndũgathime ũrĩa ũrathiĩ na mbere na njĩra ya kũrora mawĩra ma ũtungata marĩa ũheetwo. Gũthiĩ gwaku na mbere gũtiĩhocetie harĩ mawĩra macio ma ũtungata, ĩndĩ kwĩhocetie harĩ ũrĩa ũmahũthagĩra. Ũngĩheo mweke mũna wĩgiĩ kũrutana, wĩyũrie ũũ: ‘Hihi kũna nĩ hũthĩrire ũhoti wa kũrutana? Hihi nĩ ndutire mĩario ĩyo na njĩra ĩhutirie ũtũũro wa arĩa mamĩiguire?’

Kũhũthĩra kĩheo gĩaku nĩ kuga kuoya ikinya rĩa mbere. Hihi nĩ woyaga ikinya rĩa mbere kũhunjia na arĩa angĩ? Hihi kĩũngano-inĩ kĩanyu nĩ ũcaragia mĩeke ya gũteithia arĩa marerutire ma ica ikuhĩ, ciana, kana arĩa marĩ mawathe ma kĩĩmwĩrĩ? Hihi nĩ wĩrutagĩra gũtheria Nyũmba ya Ũthamaki kana gũteithia na njĩra itiganĩte hĩndĩ ya irũrũngano na igomano? Hihi mahinda mamwe no ũtungatagĩre ũrĩ painia wa gũteithĩrĩria? Hihi no ũtungatĩre ũrĩ painia wa hĩndĩ ciothe kana ũgateithie kĩũngano kĩrĩ na bata mũnene wa ahunjia? Angĩkorũo ũrĩ mũrũ wa Ithe witũ-rĩ, hihi nĩ ũrathingata gũkũria ngumo cia Kĩĩmandĩko nĩguo ũtuĩke mũteithia wa ũtungata kana ũtuĩke mũthuri? Wĩrutĩri waku wa kwĩyendera gũteithĩrĩria na gwĩtĩkĩra mawĩra nĩ ũira wa atĩ nĩ ũrathiĩ na mbere.—Thab. 110:3.

Itemi rĩa Ũmenyeru

Angĩkorũo nĩ ũiguaga ũtingiarĩirũo nĩ ũndũ wa kwaga ũmenyeru mũtũũrĩre-inĩ wa Gĩkristiano, ndũgakue ngoro. Kiugo kĩa Ngai no ‘kĩũhĩgie ũrĩa ũtarĩ mũũgĩ.’ (Thab. 19:7; 119:130; Thim. 1:1-4) Kũhũthĩra ũtaaro wa Bibilia gũtũteithagia tũgunĩke na ũũgĩ mũkinyanĩru wa Jehova, ũrĩa wa bata makĩria gũkĩra ũũgĩ o wothe ũrĩa umanaga na ũmenyeru mũtheri. O na kũrĩ ũguo, o ũrĩa tũrathiĩ na mbere ũtungata-inĩ wa Jehova, noguo tũgĩaga na ũmenyeru wa goro. Tũngĩũhũthĩra wega atĩa?

Nĩ ũndũ wa gũkorũo acemanĩtie na maũndũ matiganĩte ũtũũro-inĩ, mũndũ ahota kuga ũũ: ‘Ũndũ ũyũ ndanacemania naguo rĩngĩ. Nĩ njũĩ ũrĩa ngwĩka.’ Hihi ũcio no ũkorũo ũrĩ ũndũ wa ũũgĩ? Thimo 3:7 ĩtũheaga mũkaana ũyũ: “Tigaga kwĩona wee mwene ta wĩ mũũgĩ.” Ũmenyeru wagĩrĩirũo kwandandũra muonere witũ wa maũndũ marĩa twagĩrĩirũo nĩ kũrora rĩrĩa tũrahiũrania na maũndũ matiganĩte ũtũũro-inĩ. O na kũrĩ ũguo, angĩkorũo nĩ tũrathiĩ na mbere kĩĩroho, ũmenyeru witũ wagĩrĩirũo gũtũteithia biũ tũmenye atĩ nĩ tũrabatara irathimo cia Jehova nĩguo tũgaacĩre. Kwoguo, ũthii witũ na mbere nduonanagio nĩ ũrĩa tũngʼethagĩra maũndũ tũrĩ na ũmĩrĩru witũ ithuĩ ene, ĩndĩ nĩ na ũrĩa tũkoragwo twĩhaarĩirie gũcaria ũtongoria wa Jehova ũtũũro-inĩ witũ. Wonanagio na njĩra ya gũkorũo tũrĩ na ma atĩ gũtirĩ ũndũ ũngĩkĩka atawĩtĩkĩrĩtie na ningĩ na njĩra ya gũtũũria ũkuruhanu ũrĩ na wĩhokeku na wendo hamwe na Ithe witũ wa Igũrũ.

Ndũkanacoke na Thutha

O na mũtũmwo Paulo arĩ Mũkristiano mũitĩrĩrie maguta, mũgimaru kĩĩroho, nĩ aamenyaga atĩ nĩ aabataraga ‘gũtambũrũka’ nĩguo akinyĩre muoroto wa ũtũũro. (Afil. 3:13-16) Hihi muonere waku nĩ ta ũcio?

Ũthiĩte na mbere nginya gĩkĩro kĩrĩkũ? Wĩthime ũgimaru waku kũringana na ũrĩa wĩhumbĩte biũ ũmũndũ mwerũ, ũrĩa wathĩkagĩra biũ ũnene wa Jehova, na ũrĩa ũrerutanĩria kũhũthĩra iheo ciaku gũtĩithia Jehova. O ũrĩa ũragunĩka nĩ gĩthomo gĩa Cukuru ya Ũtungata wa Gĩtheokrasi, ngumo iria irĩ thĩinĩ wa Kiugo kĩa Ngai ciagĩrĩirũo gũthiĩ ikĩonekaga mwarĩrie-inĩ na mũrutanĩre-inĩ waku. Ndũkanariganĩrũo nĩ maũndũ macio megiĩ ũthii waku wa na mbere. Kenagio nĩmo, na ũthii waku wa na mbere nĩ ũrĩonekaga wega.