5 Ngai Etĩkagĩra Ũthathaiya o Wothe—Hihi Ũcio nĩ Ũhoro wa Ma?

Ũrĩa ũngĩkorũo ũiguĩte: “O ta ũrĩa kũngĩkorũo na njĩra nyingĩ ingĩkinyia andũ kũndũ kũmwe, noguo gũkoragwo na njĩra nyingĩ cia gũkinyia andũ kũrĩ Ngai. No mũhaka o mũndũ ecarĩrie njĩra yake mwene ya kũmũkinyia kwĩ Ngai.”

Ũrĩa Bibilia ĩrutanaga: No mũhaka tũthathaiye Ngai na ngoro yothe na twĩtheme ũhinga. Jesu nĩ eerire atongoria a ndini a hĩndĩ yake kĩrĩa gĩatũmĩte maregwo nĩ Ngai: “Isaia nĩaarathire ũhoro wanyu wega ma, hinga ici, ta harĩa haandĩkĩtwo atĩrĩ, Andũ aya mandĩaga na mĩromo, No ngoro ciao ii kũraya na niĩ.” (Mariko 7:6) Gũthathaiya na ngoro yothe kuo gwiki gũtingĩtũma ũthathaiya witũ wĩtĩkĩrĩke nĩ Ngai.

Jesu nĩ onanirie ũndũ ũcio wega rĩrĩa oimbũranirie ihĩtia inene rĩa ũthathaiya wa atongoria acio a ndini na arũmĩrĩri ao. Akĩhũthĩra Kiugo kĩa Ngai aamerire ũũ: “Kaĩ maturagia ndu maʼhoyage tũhũ-ĩ, Maũndũ marĩa matũire marutanaga makĩrĩ o maathani ma andũ.” (Mariko 7:7) Ũthathaiya wao warĩ ‘wa tũhũ,’ na ndwarĩ kĩene, tondũ meekagĩrĩra irĩra ciao cia ndini gũkĩra maathani ma Ngai.

Handũ ha Bibilia kuuga atĩ kũrĩ njĩra nyingĩ njĩtĩkĩrĩku cia gũthathaiya Ngai-rĩ, ĩrutanaga atĩ kũrĩ njĩra o ĩmwe tu. Mathayo 7:13, 14 yugaga ũũ: “Tonyerai mũromo ũrĩa mũceke: nĩ gũkorũo mũromo nĩ mwariĩ, na njĩra nĩ njaramu ĩrĩa ĩkinyaga kũndũ kũrĩa gwa kũũrĩra, na andũ arĩa matonyagĩra ho nĩ aingĩ. Nĩ gũkorũo mũromo nĩ mũceke, na njĩra nĩ ngunderu ĩrĩa ĩkinyaga kũrĩa kwĩ muoyo, na andũ arĩa mamĩonaga nĩ anyinyi.”

Ũrĩa kũmenya ma kũngĩgũteithia: Ta hũũra mbica ũrĩa ũngĩigua angĩkorũo ũkoretwo ũkĩĩmenyeria kwa ihinda rĩa mĩeri mĩingĩ nĩguo ũgaakorũo thĩinĩ wa kĩhĩtahĩtano kĩa marathoni, na ũkarĩkia ũrĩ wa mbere, ĩndĩ ũhootani waku ũkaregwo nĩ ũndũ wa kuuna watho mũna ũtekũmenya. No wone kĩyo gĩaku gĩothe kĩrĩ gĩa tũhũ. Hihi ũndũ ta ũcio no wĩkĩke ũthathaiya-inĩ witũ harĩ Ngai?

Akĩringithania ũthathaiya witũ na kĩhĩtahĩtano, mũtũmwo Paulo aandĩkire ũũ: “Mũndũ aahĩtahĩtana mathako-inĩ, ndekagĩrũo thũmbĩ tiga o akorirũo aathĩkĩire ũrĩa gwathanĩtwo.” (2 Timotheo 2:5) Twĩtĩkagĩrũo nĩ Ngai twamũthathaiya kũringana na ‘ũrĩa athanĩte,’ ũguo nĩ kuuga na njĩra ĩrĩa we endaga. Tũtingĩĩthuurĩra njĩra ĩrĩa tũrĩtungatagĩra Ngai nayo, o ta ũrĩa mũtengʼeri atangĩĩthurĩra watho ũrĩa ekũrũmĩrĩra agĩtengʼera na erĩgĩrĩre gũtuwo mũhootani.

Nĩguo tũkenie Ngai, no mũhaka ũthathaiya witũ ũkorũo ũtarĩ na maheeni. Jesu oigire: ‘Arĩa ahoi kũna makaahoyaga Ithe witũ na roho na mamũhoyage na ma.’ (Johana 4:23) Tũmenyaga njĩra ĩrĩa ya ma ya gũthathaiya Ngai kũgerera Kiugo gĩake, Bibilia.—Johana 17:17.a

[Kohoro ka Magũrũ-inĩ]

Hihi ndini ciothe nĩ irutaga andũ gũthathaiya Ngai ũrĩa we endaga?