• Bibilia Ĩngĩgũteithia Atĩa?
    Kenera Ũtũũro Tene na Tene!—Wĩrute Bibilia
    • Ithomo rĩa 1. Bibilia ĩhingũrĩtwo.

      ITHOMO RĨA 01

      Bibilia Ĩngĩgũteithia Atĩa?

      Ithuothe nĩ tũkoragwo na ciũria ciĩgiĩ ũtũũro, mathĩna, gĩkuũ, na ihinda rĩũkĩte. Ningĩ no twĩciragia ũhoro wĩgiĩ maũndũ ma o mũthenya ta kuona mbeca cia mabataro na kũgĩa na famĩlĩ ĩrĩ na gĩkeno. Andũ aingĩ nĩ mamenyete atĩ Bibilia no ĩmateithie kuona macokio ma ciũria cia bata ũtũũro-inĩ, na ningĩ nĩ ĩkoragwo na ũtaaro ũngĩmateithia ũtũũro-inĩ wa o mũthenya. Hihi wee nĩ ũrona ta Bibilia ĩngĩteithia andũ?

      1. Nĩ ciũria ta irĩkũ Bibilia ĩcokagia?

      Bibilia nĩ ĩcoketie ciũria ici cia bata: Indo iria irĩ muoyo cioimire kũ? Muoroto wa ũtũũro nĩ ũrĩkũ? Andũ mathĩnĩkaga nĩkĩ? Gũthiaga atĩa harĩ mũndũ rĩrĩa akua? Angĩkorũo mũndũ wothe endaga thayũ-rĩ, nĩ kĩĩ gĩgĩtũmaga gũkorũo na mbaara? Hihi thĩ nĩ ĩgaathira ihinda-inĩ rĩũkĩte? Bibilia nĩ ĩtwĩkĩraga ngoro tũcarie macokio ma ciũria ta icio na andũ milioni nyingĩ nĩ monete atĩ macokio marĩa ĩheanaga nĩ matũmaga maiganĩre.

      2. Bibilia ĩngĩtũteithia atĩa gũkenera ũtũũro wa o mũthenya?

      Bibilia nĩ ĩtũheaga motaaro mega. Kwa ngerekano, nĩ ĩrutanaga ũrĩa famĩlĩ ingĩkorũo na gĩkeno kĩa ma. Nĩ ĩtwĩraga ũrĩa tũngĩka rĩrĩa twagĩa na mĩtangĩko, na ũrĩa tũngĩkenera wĩra witũ. Tũgĩthoma ibuku rĩrĩ, nĩ ũkuona ũrĩa Bibilia ĩrutanaga igũrũ rĩgiĩ maũndũ macio na mangĩ maingĩ. No ũkinyĩrĩre kuona atĩ “Rĩandĩko o rĩothe,” rĩandĩkĩtwo thĩinĩ wa Bibilia, “rĩrĩ ũguni.”​—2 Timotheo 3:16.

      Ibuku rĩrĩ ti rĩo Bibilia. Nĩ rĩa gũgwĩkĩra ngoro wĩthuthurĩrie Bibilia arĩ wee. Kwoguo tũrakũũria ũthome maandĩko marĩa mandĩkĩtwo icunjĩ-inĩ ici, na ũringithanie na maũndũ marĩa ũreruta.

      THUTHURIA MAKĨRIA

      Reke tuone ũrĩa Bibilia ĩteithĩtie andũ, ũrĩa ũngĩkenera kũmĩthoma, na nĩkĩ nĩ wega gwetha ũteithio nĩguo ũhote gũtaũkĩrũo nĩyo.

      3. Bibilia no ĩtũtongorie

      Bibilia nĩ ta ũtheri wa gũtũmũrĩkĩra. No ĩtũteithie gũtua matua mega na kũmenya maũndũ marĩa mageekĩka ihinda rĩũkĩte.

      Thomai Thaburi 119:105, mũcoke mwarĩrĩrie ciũria ici:

      • Mwandĩki wa Thaburi ĩyo aarĩ na mawoni marĩkũ kwerekera Bibilia?

      • Wee ũkoragwo na mawoni marĩkũ kwerekera Bibilia?

      Mũthuri ũragerera rũteere-inĩ rwa iria hwaĩ-inĩ akĩmũrĩka njĩra na tochi.

      4. Bibilia no ĩcokie ciũria iria twĩyũragia

      Mũtumia ũmwe nĩ oonire macokio Bibilia-inĩ ma ciũria cia bata iria eeyũrĩtie mĩaka mĩingĩ. Mwĩrorerei VIDEO ĩno, mũcoke mwarĩrĩrie ciũria iria irũmĩrĩire.

      VIDEO: Ndũkanate Mwĩhoko! (1:48)

      • Kũringana na video ĩyo-rĩ, mũtumia ũcio eeyũragia ciũria ta irĩkũ?

      • Kwĩruta Bibilia kwamũteithirie atĩa?

      Bibilia nĩ ĩtwĩkĩraga ngoro tũũrie ciũria. Thomai Mathayo 7:7, mũcoke mwarĩrĩrie kĩũria gĩkĩ:

      • Nĩ ciũria ta irĩkũ wĩyũragia ũngĩenda Bibilia ĩgũcokerie?

      5. No ũkenere gũthoma Bibilia

      Andũ aingĩ nĩ makenagĩra gũthoma Bibilia na nĩ magunĩkĩte nĩ ũndũ wa gwĩka ũguo. Mwĩrorerei VIDEO ĩno, mũcoke mwarĩrĩrie ciũria iria irũmĩrĩire.

      Gũthoma Bibilia (2:05)

      • Kũringana na video ĩyo-rĩ, andũ acio ethĩ maiguaga atĩa igũrũ rĩgiĩ gũthoma?

      • O na angĩkorũo matiendete gũthoma-rĩ, nĩ kĩĩ gĩtũmaga makenere gũthoma Bibilia?

      Bibilia ĩtwĩrĩte atĩ no ĩtũhe motaaro mangĩtũũmĩrĩria na matũhe kĩĩrĩgĩrĩro. Thomai Aroma 15:4, mũcoke mwarĩrĩrie kĩũria gĩkĩ:

      • Hihi no wende kũmenya makĩria ũhoro wĩgiĩ kĩĩranĩro kĩu kĩgiĩ kũũmĩrĩrio na kũgĩa na kĩĩrĩgĩrĩro?

      6. Andũ arĩa angĩ no matũteithie gũtaũkĩrũo nĩ Bibilia

      Makĩria ma gwĩthomera Bibilia mũndũ arĩ wiki, andũ aingĩ nĩ monete atĩ nĩ mateithĩkaga mamĩarĩrĩria na andũ angĩ. Thomai Atũmwo 8:26-31, mũcoke mwarĩrĩrie kĩũria gĩkĩ:

      Mbica irĩ hamwe: 1. Filipu agĩtaarĩria Mũethiopia Maandĩko. 2. Mũira wa Jehova akĩarĩrĩria Bibilia na mũtumia ũmwe hamwe na ciana ciake igĩrĩ.

      Mũndũ ũrĩa warĩ Mũethiopia nĩ aabataraga ũteithio nĩguo ataũkĩrũo nĩ Maandĩko. O na ũmũthĩ, andũ aingĩ nĩ monete atĩ nĩ mateithĩkaga marĩrĩria Bibilia hamwe na andũ angĩ

      ANDŨ AMWE MOIGAGA: “Bibilia nĩ ta mũtitũ, ndũngĩtaũkĩrũo nĩyo.”

      • Wee ũngiuga atĩa? Ũngiuga ũguo nĩkĩ?

      ŨRĨA TWERUTA

      Bibilia nĩ ĩtũheaga motaaro mangĩtũteithia ũtũũro-inĩ wa o mũthenya, ĩgatũhe macokio ma ciũria cia bata, ĩkomĩrĩria andũ, na ĩkamahe kĩĩrĩgĩrĩro.

      Ciũria cia gũcokera

      • Nĩ motaaro megiĩ maũndũ ta marĩkũ tũngĩona thĩinĩ wa Bibilia?

      • Nĩ ciũria ta irĩkũ Bibilia ĩcoketie?

      • Nĩ ũndũ ũrĩkũ ũngĩenda kũmenya kuuma Bibilia-inĩ?

      Geria gwĩka ũũ

      RIKĨRA

      Thuthuria ũrĩa ũtaaro wa Bibilia ũngĩhũthĩka mahinda-inĩ maya.

      “Morutani ma Bibilia Marĩ Ũũgĩ Ũtangĩhĩtũkwo nĩ Mahinda” (Mũrangĩri Na. 1 2018)

      Wĩrorere wone ũrĩa Bibilia yateithirie mũthuri ũmwe warĩ na mawoni matarĩ mega kwĩyerekera kuuma arĩ mũnini.

      Ũrĩa Ndambĩrĩirie Ũtũũro Mwerũ Ũrĩ na Gĩkeno (2:53)

      Thuthuria ũtaaro wa Bibilia wĩgiĩ ũtũũro wa famĩlĩ.

      “Maũndũ 12 Mangĩteithia Famĩlĩ Kũgaacĩra” (g18.2)

      Wĩrute ũrĩa Bibilia ĩrũngaga muonere wa andũ aingĩ wĩgiĩ nũũ ũtongoragia thĩ.

      Wagĩrĩirũo Kwĩruta Bibilia Nĩkĩ?​—Video Yothe (3:14)

  • Bibilia nĩ Ndũmĩrĩri Kuuma Kũrĩ Ngai
    Kenera Ũtũũro Tene na Tene!—Wĩrute Bibilia

    • 1. Angĩkorũo andũ nĩo maandĩkire Bibilia-rĩ, nĩ kĩĩ kĩngĩtũma tuuge atĩ yumĩte kũrĩ Ngai?

      Bibilia yaandĩkirũo nĩ andũ ta 40 kwa ihinda rĩa kĩndũ mĩaka 1,600, kuuma mwaka wa 1513 M.M.M. nginya kĩndũ mwaka wa 98 M.M. O na gũtuĩka andũ arĩa maamĩandĩkire mooimĩte mĩrerere-inĩ ĩtiganĩte, Bibilia ndĩĩhĩngĩcaga. Ũndũ ũcio ũngĩhoteka atĩa? Tondũ Ngai nĩwe Mũtungi wa Bibilia. (Thoma 1 Athesalonike 2:13.) Andũ arĩa maandĩkire Bibilia matiandĩkire mawoni mao ene. Handũ ha ũguo, “maaririe maũndũ moimĩte kũrĩ Ngai o ta ũrĩa maatongoririo nĩ roho mũtheru.”a (2 Petero 1:21) Ngai aahũthĩrire roho wake mũtheru gũtongoria andũ acio nĩguo mandĩke meciria make.​—2 Timotheo 3:16.