Kũhatanĩrĩria na Njĩra Njega

ATHURI Akristiano no mũhaka makorũo na ũhoti wa “kũhatanĩrĩria na ũrutani ũrĩa mwagĩrĩru.” (Tit. 1:9) Rĩmwe na rĩmwe no mũhaka meke ũguo o na kũrĩ na mathĩna maritũ mũno. Harĩ bata maheanage ũtaaro ũringanĩte na ũtongoria wa Maandĩko. Nĩ ũndũ ũcio no mũhaka athuri mathĩkagĩre ũtaaro ũyũ: ‘Rũmanagĩrĩria ũhoro-inĩ wa gũtaarana.’ (1 Tim. 4:13) O na gũtuĩka ũhoro ũrĩa tũrarĩrĩria ũhutĩtie mũno athuri a kĩũngano, kana arĩa marenda gũtuĩka athuri-rĩ, nĩ kũrĩ hĩndĩ aciari mabataraga kũhatĩrĩria ciana ciao, kana arutani makabatara kũhatĩrĩria arutwo ao a Bibilia. Ũtongoria ũyũ noguo wagĩrĩirũo nĩ kũrũmĩrĩrũo maũndũ-inĩ ta macio.

Maũndũ Marĩa Mabataraga Kũhatanĩrĩria. Nĩguo ũmenye nĩ maũndũ-inĩ marĩkũ mabataraga kũhatanĩrĩria-rĩ, nĩ wega gũthuthuria maũndũ marĩ Bibilia-inĩ marĩa maabatarire kũhatanĩrĩria. Mũtũmwo Petero nĩ aahatĩrĩirie athuri mamenyagĩrĩre mũno wĩra wao ũrĩa mehokeirũo marĩ arĩithi a rũũru rwa Ngai. (1 Pet. 5:1, 2) Mũtũmwo Paulo nĩ aaheire Tito ũtaaro atĩ ahatagĩrĩrie anake nĩguo “maikarage marĩ na ũũgĩ wa ngoro.” (Tit. 2:6) Paulo eekĩrire Akristiano a hĩndĩ yake ngoro ‘maragie ũhoro o ũmwe’ na methemage arĩa meendaga kũrehe nyamũkano gatagatĩ-inĩ kao. (1 Kor. 1:10; Rom. 16:17; Afil. 4:2) O na gũtuĩka Paulo nĩ aagathĩrĩirie Akristiano a kĩũngano gĩa Thesalonike nĩ ũndũ wa maũndũ mega marĩa meekaga-rĩ, nĩ aamahatĩrĩirie makĩria atĩ mahũthagĩre ũrutani ũrĩa maarutĩtwo. (1 Thes. 4:1, 10) Petero nĩ aathaithire Akristiano a hĩndĩ yake mathiĩ na mbere ‘gũtigana na merirĩria ma mwĩrĩ.’ (1 Pet. 2:11) Nĩ ũndũ wa ũgucania wa andũ mateetigĩrĩte Ngai arĩa meingĩrĩtie biũ mĩtugo-inĩ ya ũũra thoni, Juda nĩ aahatĩrĩirie Akristiano a hĩndĩ yake ‘marũagĩrĩre biũ wĩtĩkio magwatĩirie.’ (Jud. 3, 4) Akristiano othe nĩ meekĩrirũo ngoro mahatanagĩrĩrie o mũndũ na ũrĩa ũngĩ nĩguo hatikagĩe o na ũmwe ũngĩũmio ngoro nĩ maheeni ma mehia. (Ahib. 3:13) Petero aahatĩrĩirie Ayahudi arĩa mataarĩ na wĩtĩkio harĩ Kristo ũũ: “Wĩhonokiei kũrĩ rũciaro rũrũ ruogomu.”—Atũm. 2:40.

Nĩ ngumo irĩkũ ibataranagia nĩguo mũndũ ahote kũhatanĩrĩria biũ maũndũ-inĩ ta macio? Mũndũ ũrĩa ũrahatanĩrĩria angĩhota atĩa gwĩka ũguo na kĩyo ategũkũmana?

“Nĩ Ũndũ wa Wendani.” Angĩkorũo tũtirahatanĩrĩria nĩ ũndũ wa gũtindĩkwo nĩ “wendani,” no tũrakarie andũ. (Filem. 9) Ma nĩ atĩ harĩa ikinya rĩa na ihenya rĩrabatara kuoywo, njĩra ya mwaria ya kũheana ũhoro yagĩrĩirũo kuonania mĩtũkĩ. Mũndũ angĩaria na mũgambo mũhoereru mũno, ũndũ ũrĩa aroiga no ũiguĩke ta ũtarĩ na ũritũ. Gũkĩrĩ ũguo, mũndũ agĩrĩirũo nĩ kũhatanĩrĩria kuuma ngoro-inĩ biũ na arĩ na ũcayanĩri mũingĩ. Kũhatĩrĩria na njĩra ya wendo no kũrurumũre athikĩrĩria mũno. Akĩaria handũ-inĩ hake na ha arĩa maarutithanagia wĩra nake, Paulo eerire andũ a Thesalonike ũũ: “Nĩmũũĩ atĩ nĩtwamwĩkaga, o mũndũ o mũndũ, ta ũrĩa mũthuri ekaga ciana ciake mwene, tũkamũhatagĩrĩria.” (1 Thes. 2:11) Arori acio Akristiano meekĩraga aarĩ na ariũ a Ithe witũ ngoro marĩ na wendo. Reke ciugo ciaku itongoragio nĩ wendo wa ma harĩ athikĩrĩria aku.

Gĩa na ũtaũku. Ndũkahehenje ngoro cia arĩa ũrerutanĩria kũrurumũra moe ikinya. O na kũrĩ ũguo, ndũgetigĩre kwĩra athikĩrĩria aku ‘motaaro mothe ma Ngai.’ (Atũm. 20:27) Athikĩrĩria arĩa makenagĩra ũtaaro matingĩkũrakarĩra kana makũmene atĩ tondũ nĩ wamahatĩrĩria ũrĩ na wendo meke ũrĩa kwagĩrĩire.—Thab. 141:5.

Kaingĩ ũtanahatĩrĩria andũ, nĩ wega kũmagathĩrĩria kuuma ngoro nĩ ũndũ wa ũndũ mũna. Wĩcirie ũhoro wa maũndũ mega marĩa aarĩ na ariũ a Ithe witũ mareka—marĩa mangĩkorũo magĩkenia Jehova: wĩtĩkio ũrĩa monanagia wĩra-inĩ wao, wendo ũrĩa ũmatindĩkaga merutanĩrie, na gũkirĩrĩria kwao rungu rwa magerio. (1 Thes. 1:2-8; 2 Thes. 1:3-5) Ũndũ ũcio nĩ ũgũtũma aarĩ na ariũ a Ithe witũ meigue atĩ nĩ mendetwo na mone atĩ nĩ ũramarũmbũiya, ũndũ ũrĩa ũgũtũma maiyũkie ũtaaro ũrĩa ũkũrũmĩrĩra.

“Ũgĩkiragĩrĩria Mũno.” Kũhatanĩrĩria kwagĩrĩirũo gwĩkwo na njĩra ya ‘ũkirĩrĩria mũnene.’ (2 Tim. 4:2) Ũndũ ũcio ũhutĩtie maũndũ marĩkũ? Ũhutĩtie wetereri ũrĩ na ũkirĩrĩria o na rĩrĩa mũndũ arekwo ũũru kana agatuurio. Mũndũ ũrĩ na ũkirĩrĩria mũnene akoragwo na mwĩhoko atĩ athikĩrĩria ake nĩ mekũhũthĩra maũndũ marĩa aroiga. Gũkorũo na mwerekera ũcio rĩrĩa ũrahatĩrĩria, gũgũteithia athikĩrĩria aku matikone ta ũramecirĩria maũndũ moru. Kuonania atĩ ndũrĩ na nganja atĩ aarĩ na ariũ a Ithe witũ nĩ mendete gũtungatĩra Jehova biũ kũringana na ũhoti wao nĩ gũkũmarurumũra mathiĩ na mbere gwĩka ũrĩa kwagĩrĩire.—Ahib. 6:9.

“Kũhatanĩrĩria na Ũrutani Ũrĩa Mwagĩrĩru.” Mũthuri wa kĩũngano angĩhota atĩa “kũhatanĩrĩria na ũrutani ũrĩa mwagĩrĩru”? Nĩ na njĩra ya ‘gũtũũra arũmagia ũhoro ũrĩa wa kwĩhokeka, o ũrĩa ũringaine na ũrutani ũrĩa arutanaga.’ (Tit. 1:9) Handũ ha kũheana mawoni maku-rĩ, reke Kiugo kĩa Ngai gĩkorũo kĩrĩ kĩhumo gĩaku gĩa kũhatanĩrĩria. Reke maũndũ marĩa ũrabatara kwaria makorũo matongoretio nĩ Bibilia. Gweta moguni marĩa moimanaga na mũndũ kũhũthĩra ũtaaro wa Bibilia ũkoniĩ maũndũ marĩa ũroiga. Ririkana moimĩrĩro ma mahinda maya na marĩa maroka ma kwaga kũrũmĩrĩra Kiugo kĩa Ngai, ũcoke ũmahũthĩre kũiguithia athikĩrĩria aku bata wa kuoya ikinya rĩrĩa rĩagĩrĩire.

Tigĩrĩra atĩ nĩ watarĩria athikĩrĩria aku wega ũrĩa magĩrĩirũo nĩ gwĩka na ũrĩa magĩrĩirũo nĩ kũwĩka. Onania biũ atĩ mũthingi wa ihooto ciaku nĩ Maandĩko. Angĩkorũo Maandĩko nĩ maheanĩte wĩyathi wa gwĩthurĩra thĩinĩ wa ũndũ mũna, taarĩria mĩhaka ya wĩyathi ũcio. Ũgĩtiriha, hatĩrĩria athikĩrĩria aku biũ nĩguo ũmekĩre hinya makĩria moe ikinya.

Na “Wĩyathi wa Kwaria.” Nĩguo mũndũ ahote kũhatanĩrĩria ũrĩa kwagĩrĩire no mũhaka akorũo na “wĩyathi wa kwaria thĩinĩ wa wĩtĩkio.” (1 Tim. 3:13, NW) Nĩ kĩĩ kĩhotithagia mũndũ kwaria arĩ na wĩyathi? Nĩ gũkorũo arĩ ‘kĩonereria maũndũ-inĩ mega,’ kĩringanĩte na ũrĩa areera aarĩ na ariũ a Ithe witũ meke. (Tit. 2:6, 7; 1 Pet. 5:3) Nĩ ũndũ ũcio, arĩa marahatĩrĩrio moe ikinya rĩna nĩ mekuona atĩ ũrĩa ũramahatĩrĩria ndarerĩgĩrĩra meke maũndũ marĩa we atekaga. Nĩ marĩonaga atĩ no megerekanie na wĩtĩkio wake o ũrĩa nake arerutanĩria kwĩgerekania na Kristo.—1 Kor. 11:1; Afil. 3:17.

Mũndũ angĩruta ũtaaro akĩhũthĩra Kiugo kĩa Ngai na eke ũguo na njĩra ya wendo no kũgĩe na moimĩrĩro mega mũno. Arĩa mahetwo wĩra ũcio wa gũtaarana magĩrĩirũo nĩ kwĩrutanĩria gwĩka ũguo ũrĩa kwagĩrĩire.—Rom. 12:8.