Andũ aingĩ nĩ maritũhagĩrũo kwarĩrĩria ũhoro wĩgiĩ ngomanio. O na kũrĩ ũguo, Bibilia yaragĩrĩria ũhoro wĩgiĩ ngomanio na njĩra ya gĩtĩo ĩtekũhithĩrĩra ũndũ. Maũndũ marĩa yugĩte nĩ matũgunaga, na no twĩrĩgĩrĩre ũguo tondũ Bibilia yumĩte kũrĩ Jehova na nĩwe watũmbire. Kwoguo nĩ oĩ ũndũ ũrĩa ũngĩtwagĩrĩra. Nĩ atwĩrĩte ũrĩa twagĩrĩirũo nĩ gwĩka nĩguo tũmũkenagie na agatwĩra ũrĩa tũngĩka nĩguo tũkenere ũtũũro tene na tene.

1. Jehova onaga ngomanio atĩa?

Ngomanio nĩ kĩheo kuuma kũrĩ Jehova. Endaga ngomanio ĩkenerũo nĩ mũthuri na mũtumia arĩa mahikanĩtie. Kĩheo kĩu nĩ gĩteithagia arĩa mahikanĩtie kũgĩa ciana, na kuonania wendo wao harĩ mũndũ na ũrĩa ũngĩ na njĩra ĩrĩa yagĩrĩire, na magakenera. Nĩkĩo Bibilia yugaga ũũ: “Ũrokenaga hamwe na mũtumia wa wĩthĩ waku.” (Thimo 5:18, 19) Jehova erĩgagĩrĩra arĩa mahikanĩtie makorũo marĩ ehokeku harĩ mũndũ na ũrĩa ũngĩ, kwoguo matiagĩrĩirũo kwĩingĩria ũtharia-inĩ.—Thoma Ahibirania 13:4.

2. Ngomanio itagĩrĩire nĩ kĩĩ?

Bibilia yugĩte atĩ “arĩa meingĩragia thĩinĩ wa ngomanio itagĩrĩire . . . matikaagaya Ũthamaki wa Ngai.” (1 Akorintho 6:9, 10) Andĩki a Bibilia arĩa maandĩkire na Kĩngiriki, maahũthĩrire kiugo por·neiʹa makĩarĩrĩria ngomanio itagĩrĩire. Kiugo kĩu kĩhutĩtie (1) ngomanioa gatagatĩ ka andũ matahikanĩtie, (2) ngomanio gatagatĩ ka arũme kwa arũme kana atumia gwa atumia, na (3) ngomanio hamwe na nyamũ. Nĩ tũkenagia Jehova na tũkagunĩka rĩrĩa “[twethema] ngomanio itagĩrĩire.”—1 Athesalonike 4:3.

THUTHURIA MAKĨRIA

3. Ũragĩra ngomanio itagĩrĩire

Jusufu nĩ eerutanĩirie gwĩthema ngomanio itagĩrĩire. Thomai Kĩambĩrĩria 39:1-12, mũcoke mwarĩrĩrie ciũria ici:

• Nĩ kĩĩ gĩateithirie Jusufu kũũrĩra ngomanio itagĩrĩire?—Rora mũhari wa 9.

• Nĩ ũkuona ta Jusufu aatuire itua rĩrĩa rĩagĩrĩire? Ũngiuga ũguo nĩkĩ?

VIDEO: Ũragĩra Mĩtugo Mĩũru (5:06)

Jehova endaga ithuothe tũregane na mĩtugo mĩũru. Thomai 1 Akorintho 6:18, mũcoke mwarĩrĩrie ciũria ici:

• Nĩ maũndũ ta marĩkũ mangĩtũma mũndũ ekore aingĩrĩte ngomanio-inĩ itagĩrĩire?

• Ũngĩũrĩra mĩtugo mĩũru na njĩra ĩrĩkũ?

4. No ũhote kũregana na igerio

VIDEO: Tooria Magerio Kũgerera Gũthomaga Bibilia (3:02)

• Mũrũ wa Ithe witũ ũcio ũrĩ video-inĩ eekire atĩa rĩrĩa aamenyire atĩ meciria make na ciĩko ciake nĩ ingĩatũmire age wĩhokeku harĩ mũtumia wake?

O na Akristiano ehokeku rĩmwe nĩ maritũhagĩrũo kũiga meciria mao marĩ matheru. Ũngĩĩthema atĩa gũikara ũgĩĩciragia maũndũ moru? Thomai Afilipi 4:8, mũcoke mwarĩrĩrie ciũria ici:

• Twagĩrĩirũo gwĩciragia ũhoro wĩgiĩ maũndũ ma mũthemba ũrĩkũ?

• Gũthomaga Bibilia na gũkorũo na maũndũ maingĩ ma gwĩka ũtungata-inĩ wa Jehova kũngĩtũteithia atĩa kũregana na igerio rĩa kwĩingĩria mehia-inĩ?

5. Ithimi cia Jehova nĩ itũgunaga

VIDEO: Kwaga Wĩcirio (9:31)

• Mwanake ũcio eeingĩririe igerio-inĩ atĩa?—Rora Thimo 7:8, 9.

• Kũringana na Thimo 7:23, 26, ngomanio itagĩrĩire no ikorũo na moimĩrĩro moru. Nĩ mathĩna marĩkũ tũngĩĩthema tũngĩikara tũrĩ atheru kĩĩmĩtugo?

• Gũikara tũrĩ atheru kĩĩmĩtugo kũngĩtũteithia atĩa gũkenera ũtũũro tene na tene?

Andũ amwe meciragia atĩ maũndũ marĩa Bibilia yugaga megiĩ ngomanio cia arũme kwa arũme na atumia gwa atumia mationanagia wendo. No Jehova nĩ Ngai ũrĩ wendo na endaga andũ othe makenere ũtũũro tene na tene. Nĩguo twagĩrĩre gũtũũra tene na tene, no mũhaka tũrũmagĩrĩre ithimi ciake. Thomai 1 Akorintho 6:9-11, mũcoke mwarĩrĩrie kĩũria gĩkĩ:

• Kũringana na mawoni ma Ngai-rĩ, hihi merirĩria ma ngomanio cia arũme kwa arũme na atumia gwa atumia nomo tu magĩrĩire gwĩthemwo?

Ithuothe nĩ tũbataraga gwĩka mogarũrũku nĩguo tũkenie Ngai. Hihi nĩ tũgunĩkaga nĩ ũndũ wa gwĩka ũguo? Thomai Thaburi 19:8, 11, mũcoke mwarĩrĩrie ciũria ici:

• Hihi nĩ ũkuona ta tũngĩhota kũrũmĩrĩra ithimi icio cia Jehova cia mĩtugo? Ũngiuga ũguo nĩkĩ?

ŨRĨA TWERUTA

Ngomanio nĩ kĩheo Jehova aheete mũthuri na mũtumia arĩa mahikanĩtie makenagĩre.

Ciũria cia gũcokera

• Ngomanio itagĩrĩire ihutĩtie maũndũ marĩkũ?

• Nĩ kĩĩ kĩngĩtũteithia gwĩthema ngomanio itagĩrĩire?

• Tũgunĩkaga atĩa rĩrĩa twarũmĩrĩra ithimi cia Jehova cia mĩtugo?

RIKĨRA

Thuthuria wone kĩrĩa gĩtũmaga Ngai ende mũthuri na mũtumia mahikanie angĩkorũo nĩ marenda gũikarania.

“Bibilia Yugaga Atĩa Igũrũ Rĩgiĩ Andũ Gũikarania Hamwe Matahikanĩtie?” (Gĩcunjĩ thĩinĩ wa jw.org/ki)

Thoma wone kĩrĩa kĩngĩtũma tuuge atĩ maũndũ marĩa Bibilia ĩrutanaga megiĩ ngomanio cia arũme kwa arũme na atumia gwa atumia mationanagia atĩ twagĩrĩirũo gũthũũra arĩa mekaga maũndũ macio.

“Hihi Ngomanio cia Arũme kwa Arũme na Atumia gwa Atumia nĩ Njũru?” (Gĩcunjĩ thĩinĩ wa jw.org/ki)

Thoma wone ũrĩa mawatho ma Ngai megiĩ ngomanio matũgitagĩra.

“Hihi Kwarahũra Ciĩga cia Ũciari cia Mũndũ Ũkĩhũthĩra Kanua nĩ Mũthemba wa Ngomanio?” (Gĩcunjĩ thĩinĩ wa jw.org/ki)

Ũndũire-inĩ ũmwe, andũ metĩkĩtie atĩ mũndũ ndangĩkorũo na gĩkeno atarĩ kĩhiko-inĩ. O na kũrĩ ũguo, ti andũ othe arĩa marĩ kĩhiko-inĩ makoragwo na gĩkeno, na ti othe arĩa matarĩ kĩhiko-inĩ matakoragwo na gĩkeno. No Bibilia yugaga atĩ mũndũ gũkorũo atarĩ kĩhiko-inĩ nĩ kĩheo na gũkorũo arĩ kĩhiko-inĩ no kĩheo.

1. Moguni mamwe ma mũndũ gũkorũo atarĩ kĩhiko-inĩ nĩ marĩkũ?

Bibilia yugaga ũũ: “Mũndũ o wothe ũkũingĩra thĩinĩ wa kĩhiko nĩ egwĩka wega, no mũndũ o wothe ũtekũingĩra thĩinĩ wa kĩhiko nĩ egwĩka wega makĩria.” (Thoma 1 Akorintho 7:32, 33, 38.) Nĩ na njĩra irĩkũ mũndũ ũtarĩ thĩinĩ wa kĩhiko ‘angĩka wega makĩria’? Akristiano arĩa matarĩ kĩhiko-inĩ matikoragwo na ũigĩrĩrĩki ta wa arĩa marĩ kĩhiko-inĩ wa kũhangʼĩra mabataro ma ũrĩa mahikanĩtie nake. Kwoguo nĩ makoragwo na wĩyathi makĩria. Kwa ngerekano, amwe nĩ mahotaga kwandandũra ũtungata wao na njĩra itiganĩte, hihi ta gũthamĩra kũndũ kũngĩ nĩguo mahunjie ũhoro ũrĩa mwega. Makĩria ma ũguo, no mahote kũhũthĩra mahinda maingĩ makĩria gũkuhĩrĩria Jehova.

2. Moguni mamwe ma kũhikania kĩĩwatho nĩ marĩkũ?

O ta ũrĩa kwaga gũkorũo kĩhiko-inĩ kũrĩ moguni, no taguo gũkorũo kĩhiko-inĩ kũrĩ moguni ma mwanya. Bibilia yugaga atĩ “nĩ kaba andũ erĩ gũkĩra ũmwe.” (Kohelethu 4:9) Ũndũ ũcio nĩ wonekaga wega makĩrĩa harĩ Akristiano arĩa marũmagĩrĩra motaaro ma Bibilia kĩhiko-inĩ kĩao. Andũ arĩa mahikanĩtie kĩĩwatho makoragwo mehĩtĩte gũtũũra mendaine na maheanĩte gĩtĩo. Ũndũ ũcio nĩ ũtũmaga maigue marĩ na ũgitĩri gũkĩra andũ arĩa maikaranagia matahikanĩtie kĩĩwatho. Ningĩ kĩhiko ta kĩu nĩ gĩtũmaga ciana cigue irĩ na ũgitĩri makĩria.

3. Jehova onaga kĩhiko atĩa?

Rĩrĩa Jehova aanyitithanirie mũthuri na mũtumia wa mbere, ooigire ũũ: “Mũndũrũme nĩ agaatiga ithe na nyina manyitane na mũtumia wake.” (Kĩambĩrĩria 2:24) Jehova endaga mũthuri na mũtumia makorũo mendaine na matũũranie hamwe rĩrĩa rĩothe megũkorũo muoyo. Etĩkĩrĩtie ndigano o rĩrĩa tu ũmwe wao eingĩrĩtie ũtharia-inĩ. Hĩndĩ ta ĩyo, Jehova nĩ aheaga mũndũ ũrĩa ũtarĩ na mahĩtia kĩhooto gĩa gũtua kana nĩ ekwenda matigane.a (Mathayo 19:9) Jehova ndetĩkĩrĩtie Akristiano kũingĩra kĩhiko-inĩ na makĩria ma mũndũ ũmwe.—1 Timotheo 3:2.

THUTHURIA MAKĨRIA

4. Hũthĩra wega kĩheo gĩa gũkorũo ũtarĩ kĩhiko-inĩ

Jesu oonaga atĩ nĩ kĩheo mũndũ gũkorũo atarĩ kĩhiko-inĩ. (Mathayo 19:11, 12) Thomai Mathayo 4:23, mũcoke mwarĩrĩrie kĩũria gĩkĩ:

• Jesu aahũthĩrire kĩheo gĩa gũkorũo atarĩ kĩhiko-inĩ atĩa gũtungatĩra Ithe na gũteithia andũ arĩa angĩ?

Akristiano arĩa matarĩ kĩhiko-inĩ no makorũo na gĩkeno mangĩhũthĩra ũtũũro wao ta ũrĩa Jesu aahũthĩrire ũtũũro wake. Mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.

VIDEO: Arĩa Matarĩ Kĩhiko-inĩ (3:11)

• Akristiano arĩa matarĩ kĩhiko-inĩ mangĩhũthĩra ũtũũro wao na njĩra ta irĩkũ njega?

Hihi nĩ ũĩ?

Bibilia ndiugĩte mũndũ agĩrĩirũo kũingĩra kĩhiko-inĩ arĩ na mĩaka ĩigana. O na kũrĩ ũguo, nĩ ĩkĩraga mũndũ ngoro gweterera nginya ahĩtũkie “ihinda rĩa wĩthĩ,” rĩrĩa merirĩria ma ngomanio makoragwo marĩ na hinya mũno ũũ atĩ no matũme mũndũ mwĩthĩ aremwo gũtua matua ma ũũgĩ.—1 Akorintho 7:36.

5. Thuura na ũũgĩ mũndũ wa kũhikania nake

Itua rĩa gũthuura mũndũ wa kũhikania nake nĩ rĩmwe rĩa matua marĩa ma bata mũno mũndũ angĩtua. Thomai Mathayo 19:4-6, 9, mũcoke mwarĩrĩrie kĩũria gĩkĩ:

• Mũkristiano agĩrĩirũo kwĩmenyerera ndagatengʼerere kũingĩra kĩhiko-inĩ nĩkĩ?

Bibilia no ĩgũteithie kũmenya maũndũ marĩa ũngĩrora rĩrĩa ũracaria mũndũ wa kũhikania nake. Ũndũ ũrĩa wa bata makĩria nĩ gũthuura mũndũ wendete Jehova.b Thomai 1 Akorintho 7:39 na 2 Akorintho 6:14, mũcoke mwarĩrĩrie ciũria ici:

• Wagĩrĩirũo kũhikania o na Mũkristiano tawe nĩkĩ?

• Ũgwĩciria Jehova angĩigua atĩa tũngĩhikania na mũndũ ũtamwendete?

6. Koragwo na mawoni ta ma Jehova megiĩ kĩhiko

Hĩndĩ ya Aisiraeli, arũme amwe nĩ maatigaga atumia ao nĩ ũndũ wa itũmi cia mwĩyendo. Thomai Malaki 2:13, 14, 16, mũcoke mwarĩrĩrie kĩũria gĩkĩ:

• Jehova athũire ndigano itarĩ cia kĩhooto nĩkĩ?

Mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.

VIDEO: Kĩhiko nĩ gĩa Gũtũũra (4:30)

• Angĩkorũo ũrĩa mũhikanĩtie nake ti mwĩtĩkia-rĩ, ũngĩka atĩa nĩguo kĩhiko kĩanyu gĩkorũo na gĩkeno?

7. Rũmagĩrĩra ithimi cia Jehova ciĩgiĩ kĩhiko

VIDEO: No Ũhote Gũkinyĩra Ithimi cia Jehova Ciĩgiĩ Kĩhiko (4:14)

Thomai Ahibirania 13:4, mũcoke mwarĩrĩrie ciũria ici:

• Nĩ ũkuona ta tũngĩhota kũrũmĩrĩra ithimi cia Jehova ciĩgiĩ kĩhiko? Ũngiuga ũguo nĩkĩ?

Jehova nĩ erĩgagĩrĩra Akristiano maandĩkithie ihiko ciao kana ndigano, tondũ mabũrũri-inĩ maingĩ ũguo nĩguo watho wa thirikari ũkoragwo ugĩte. Thomai Tito 3:1, mũcoke mwarĩrĩrie kĩũria gĩkĩ:

• Angĩkorũo ũrĩ thĩinĩ wa kĩhiko-rĩ, hihi kĩhiko gĩaku nĩ gĩtĩkĩrĩkĩte kĩĩwatho nĩ thirikari?

ŨRĨA TWERUTA

Gũkorũo mũndũ arĩ kĩhiko-inĩ kana atarĩ kĩhiko-inĩ nĩ kĩheo kuuma kũrĩ Jehova. Arĩa marĩ kĩhiko-inĩ o hamwe na arĩa matarĩ kĩhiko-inĩ no makorũo na gĩkeno na maiganĩre mangĩtũũra kũringana na wendi wa Jehova.

Ciũria cia gũcokera

• Mũndũ angĩhũthĩra wega atĩa ihinda rĩrĩa atarĩ kĩhiko-inĩ?

• Bibilia yugaga twagĩrĩirũo kũhikania o na Mũkristiano ũngĩ ta ithuĩ nĩkĩ?

• Maandĩko maheanĩte mũthingi ũrĩkũ wa gũtigana?

RIKĨRA

Kũhikania “thĩinĩ wa Mwathani tu” nĩ kuuga atĩa?

“Ciũria Kuuma Kũrĩ Athomi” (w04 07/01)

Wĩrorere video igĩrĩ nguhĩ iria ingĩgũteithia gũtua matua mega megiĩ gũtuma ndũgũ na kĩhiko.

Kwĩhaarĩria Kũingĩra Kĩhiko-inĩ (11:53)

Wĩrorere wone kĩrĩa gĩtũmaga mũrũ wa Ithe witũ ũmwe one atĩ kĩrĩa Jehova amũhete nĩ gĩkĩrĩte kĩrĩa gĩothe aatiganire nakĩo.

Ndarĩ na Mwĩhoko atĩ nĩ Angĩerutire Ũhoro wa Ma (1:56)

Nĩ maũndũ ta marĩkũ mũndũ agĩrĩirũo kwamba gwĩcũrania atanatua itua rĩa gũtigana kana kweheranĩra na ũrĩa mahikanĩtie nake?

“Tĩaga Mũbango wa Ngai Wĩgiĩ Kĩhiko” (Mũrangĩri, Dicemba 2018)