Koragwo ũrĩ Mwĩhokeku Maũndũ-inĩ Mothe

Ithuothe twendaga gũkorũo na arata ehokeku. O na Jehova erĩgagĩrĩra arata ake makorũo marĩ ehokeku. No ũndũ ũcio ti mũhũthũ, tondũ andũ aingĩ thĩinĩ wa thĩ ĩno matikoragwo marĩ ehokeku. Tũgunĩkaga atĩa nĩ ũndũ wa gũkoragwo tũrĩ ehokeku maũndũ-inĩ mothe?

1. Gĩtũmi kĩrĩa kĩnene gĩa gũkorũo tũrĩ ehokeku nĩ kĩrĩkũ?

Rĩrĩa twakorũo tũrĩ ehokeku harĩ andũ arĩa angĩ, tuonagia Jehova atĩ nĩ tũmwendete na nĩ tũmũheete gĩtĩo. Ũhoro wa ma nĩ atĩ, Jehova nĩ amenyaga maũndũ mothe marĩa tũreciria na marĩa tũreka. (Ahibirania 4:13) Nĩ onaga rĩrĩa twathuura gũikara tũrĩ ehokeku na ũndũ ũcio nĩ ũmũkenagia. Kiugo gĩake kiugaga ũũ: “Jehova nĩ athũire mũndũ ũrĩ wara, no nĩ agĩaga ũrata wa hakuhĩ na arĩa arũngĩrĩru.”—Thimo 3:32.

2. Tũngĩkorũo tũrĩ ehokeku ũtũũro-inĩ witũ na njĩra ta irĩkũ?

Jehova endaga “[twaragie] ũhoro wa ma mũndũ na ũrĩa ũngĩ.” (Zekaria 8:16, 17) Ũguo nĩ kuuga atĩa? O na angĩkorũo tũraria na andũ aitũ a famĩlĩ, arĩa tũrutaga wĩra nao, aarĩ na ariũ a Ithe witũ, kana anene a thirikari, tũtiagĩrĩirũo kũheenania kana kũheana ũhoro ũtarĩ mũrũngĩrĩru. Andũ ehokeku matiiyaga kana makahũthĩra wara gũtunya andũ arĩa angĩ. (Thoma Thimo 24:28 na Aefeso 4:28.) Ningĩ nĩ marĩhaga magooti mothe marĩa magĩrĩirũo nĩ kũrĩha. (Aroma 13:5-7) Kũgerera njĩra icio na ingĩ, “[tũikaraga] tũrĩ ehokeku maũndũ-inĩ mothe.”—Ahibirania 13:18.

3. Tũgunĩkaga atĩa nĩ ũndũ wa gũikara tũrĩ ehokeku?

Rĩrĩa andũ arĩa angĩ mamenya atĩ tũkoragwo tũrĩ ehokeku, nĩ matwĩhokaga. Nĩ tũtũmaga mũndũ wothe thĩinĩ wa kĩũngano aigue arĩ na thayũ, ta arĩ thĩinĩ wa famĩlĩ ya andũ mendanĩte. Nĩ tũkoragwo na thamiri theru. Ningĩ wĩhokeku witũ no ‘ũgoocithie ũrutani wa Ngai, o we Mũhonokia witũ,’ na ũtũme andũ angĩ mende gũtungatĩra Jehova.—Tito 2:10.

THUTHURIA MAKĨRIA

4. Gũkorũo tũrĩ ehokeku nĩ gũkenagia Jehova

Thomai Thaburi 44:21 na Malaki 3:16, mũcoke mwarĩrĩrie ciũria ici:

• Nĩkĩ ti ũndũ wa ũũgĩ gwĩciria atĩ no tũhithe ma ndĩkamenyeke?

• Ũgwĩciria Jehova aiguaga atĩa rĩrĩa twathuura kwaria ma o na rĩrĩa ũtarĩ ũndũ mũhũthũ gwĩka ũguo?

5. Koragwo ũrĩ mwĩhokeku hingo ciothe

VIDEO: Nĩ Ũndũ Ũrĩkũ Ũrehaga Gĩkeno?—Thamiri Theru (2:32)

Thomai Ahibirania 13:18, mũcoke mwarĩrĩrie ũrĩa tũngĩkorũo tũrĩ ehokeku . . .

• famĩlĩ-inĩ.

• wĩra-inĩ kana cukuru.

• maũndũ-inĩ mangĩ.

6. Nĩ tũgunĩkaga nĩ ũndũ wa gũkorũo tũrĩ ehokeku

Rĩmwe na rĩmwe no twĩkore tũkĩingĩra thĩna-inĩ nĩ ũndũ wa gũkorũo tũrĩ ehokeku. No ũcio nĩguo ũndũ ũrĩa mwega biũ twagĩrĩirũo nĩ gwĩka. Thomai Thaburi 34:12-16, mũcoke mwarĩrĩrie kĩũria gĩkĩ:

• Gũkorũo ũrĩ mwĩhokeku kũngĩagĩria ũtũũro waku na njĩra ĩrĩkũ?

1. Rĩrĩa mũthuri na mũtumia makorũo marĩ ehokeku nĩ mekagĩra kĩhiko kĩao hinya

2. Rĩrĩa mũruti wĩra akorũo arĩ mwĩhokeku nĩ atũmaga ũrĩa ũmwandĩkĩte amwĩhoke

3. Rĩrĩa raia makorũo marĩ ehokeku nĩ matũmaga anene a thirikari mamehoke

ŨRĨA TWERUTA

Jehova endaga arata ake makorũo marĩ ehokeku maũndũ-inĩ mothe marĩa maroiga na marĩa mareka.

Ciũria cia gũcokera

• Tũngĩkorũo tũrĩ ehokeku na njĩra ta irĩkũ?

• Nĩkĩ ti ũndũ wa ũũgĩ gwĩciria atĩ no tũhithe ma ndĩkamenyeke?

• Ũngĩenda gũkoragwo ũrĩ mwĩhokeku maũndũ-inĩ mothe nĩkĩ?

RIKĨRA

Aciari mangĩruta ciana ciao atĩa gũkoragwo irĩ njĩhokeku?

Aragia Ma (1:44)

Tũgunĩkaga atĩa rĩrĩa twahingia maũndũ marĩa tuugĩte atĩ nĩ tũgwĩka?

Hingagia Ũrĩa Wĩranĩire, Wamũkĩre Irathimo (9:09)

Nĩ kĩĩ gĩateithirie mũndũ ũmwe ũtaarĩ mwĩhokeku kũgarũrĩra mũtũũrĩre wake na kwambĩrĩria kũruta wĩra ũtarĩ wa gũtunyana?

“Nĩ Nderutire atĩ Jehova nĩ Mũigua Tha na nĩ Ohanagĩra” (Mũrangĩri, Mĩĩ 1, 2015)