Jehova Anyonaga Atĩa?
1. Bibilia ĩringithanĩtio na gĩcicio nĩkĩ?
1 Wĩroraga maita maigana na gĩcicio? Aingĩ aitũ twĩkaga ũguo o mũthenya nĩguo tuone harĩa twagĩrĩirũo nĩ gwĩthondeka. Bibilia ĩringithanĩtio na gĩcicio. Gũthoma Kiugo kĩa Ngai nĩ gũtũteithagia twĩyone ũrĩa tũhaana na thĩinĩ; ũrĩa Jehova atuonaga. (1 Sam. 16:7; Jak. 1:22-24) Kiugo kĩa Ngai no kĩhote “gũkũũrana meciria ma ngoro o na ũrĩa ĩcirĩire gwĩka.” (Ahib. 4:12) Gũthoma na gwĩcũũrania Bibilia o mũthenya kũngĩtũteithia atĩa kuona harĩa tũrabatara kũrutĩra wĩra nĩguo tũgĩe na moimĩrĩro mega wĩra-inĩ witũ wa kũhunjia?—Thab. 1:1-3.
2. Bibilia ĩngĩtũteithia atĩa twĩthuthurie?
2 Hũthĩra Bibilia ĩrĩ ta Gĩcicio: Maũndũ marĩa mandĩkĩtwo thĩinĩ wa Bibilia megiĩ ndungata njĩhokeku cia Jehova, no matũrute ngumo iria Jehova onaga irĩ cia bata. Kwa ngerekano, Daudi nĩ onanirie kĩyo nĩ ũndũ wa rĩĩtwa rĩa Ngai. (1 Sam. 17:45, 46) Isaia nĩ eerutĩire kũhunjia arĩ na ũcamba kũndũ kwarĩ na moritũ maingĩ na mũno. (Isa. 6:8, 9) Wendo mũnene ũrĩa Jesu aarĩ naguo kwerekera Ithe wa matu-inĩ, nĩ watũmire one ũtungata ũrĩ wa gũcanjamũra na wa gũtũma aiganĩre handũ ha kũwona ũrĩ mũrigo. (Joh. 4:34) Akristiano a karine ya mbere maahunjagia na kĩyo, nĩ mehokete Jehova, na nĩ matuĩte itua rĩa kwaga gũcoka na thutha. (Atũm. 5:41, 42; 2 Kor. 4:1; 2 Tim. 4:17) Gwĩcũũrania ngerekano ta icio no gũtũteithie gwĩthuthuria ithuĩ ene tũrĩ na muoroto wa kwagagĩria ũtungata witũ mũtheru.
3. Nĩ ũndũ kĩ tũtiagĩrĩirũo nĩ kũhũthĩrĩria gwĩka mogarũrũku marĩa magĩrĩire?
3 Oya Ikinya rĩa Gũthondeka: Hatirĩ bata wa kwĩrora tũcoke twage kuoya ikinya rĩa gũthondeka harĩa tũrona hagĩrĩire gũthondekwo. No tũhoe Jehova atũteithie kuona harĩa tũrabatara gũthondeka na atũteithie gwĩka ũgarũrũku ũrĩa ũrabatarania. (Thab. 139:23, 24; Luk. 11:13) Tondũ kahinda karĩa gatigarĩte nĩ kanini mũno, tũtiagĩrĩire kũhũthĩrĩria gwĩka mogarũrũku marĩa magĩrĩire.—1 Kor. 7:29; 1 Tim. 4:16.
4. Mũndũ ũrĩa ũcũthagĩrĩria Kiugo kĩa Ngai na ageka ũgarũrũku ũrĩa wagĩrĩire agĩaga na moimĩrĩro marĩkũ?
4 Jehova akoragwo arĩ na bata na mũndũ witũ wa na thĩinĩ, no ti ũrĩa tũhaana na nja. (1 Pet. 3:3, 4) Mũndũ ũrĩa ũcũthagĩrĩria Kiugo kĩa Ngai na ageka ũgarũrũku ũrĩa wagĩrĩire agĩaga na moimĩrĩro marĩkũ? Angĩkorũo “ti mũndũ wa kũũigua akariganĩrũo, no nĩ mũndũ ũrĩa ũwĩkaga, mũndũ ũcio nĩakarathimĩrũo maũndũ marĩa ekaga.” (Jak. 1:25) Tũrĩkoragwo tũrĩ ndungata cia Jehova irĩ na gĩkeno na irĩ na moimĩrĩro mega tondũ nĩ “kwenenia twenenagia ũtheri wa riri wa Mwathani ta icicio.”—2 Kor. 3:18.