Ikaraga Hakuhĩ na Ithondeka rĩa Jehova

MŨRUTWO Jakubu aandĩkire ũũ: “Kuhĩrĩriai Ngai, nake nĩ ekũmũkuhĩrĩria.” (Jak. 4:8) O na gũtuĩka tũtirĩ akinyanĩru, Jehova ndakoragwo igũrũ mũno kana kũraihu mũno na ithuĩ ũndũ atangĩtũigua tũkĩmũhoya. (Atũm. 17:27) Tũngĩkuhĩrĩria Ngai atĩa? No twĩke ũguo kũgerera gũkũria ũrata wa hakuhĩ na Jehova na njĩra ya kũmũhoyaga kuuma ngoro. (Thab. 39:12) Ningĩ no tũgĩe na ũrata wa hakuhĩ na Ngai kũgerera kwĩruta Kiugo gĩake Bibilia tũtegũtĩrĩria. Na njĩra ĩyo nĩ tũrĩmenyaga Jehova Ngai, mĩoroto yake, na ũrĩa endaga twĩke. (2 Tim. 3:16, 17) Nĩ ũndũ ũcio, nĩ tũrĩhotaga kũmwenda na tũkonania atĩ nĩ tũmwĩtigĩrĩte na njĩra ya gwĩthema kũmũrakaria.​—Thab. 25:14.

² O na kũrĩ ũguo, gũkorũo na ũrata wa hakuhĩ na Jehova kũngĩhoteka o kũgerera Mũrũ wake, Jesu. (Joh. 17:3; Rom. 5:10) Gũtirĩ mũndũ ũngĩ ũngĩtũteithia kũmenya wega meciria ma Jehova gũkĩra ũrĩa Jesu aatũteithirie. Aarĩ na ũkuruhanu wa hakuhĩ mũno na Ithe, nginya akiuga ũũ: “Gũtirĩ mũndũ ũĩ Mũriũ tiga Awa, na gũtirĩ mũndũ ũĩ Awa tiga Mũriũ na mũndũ o wothe ũrĩa Mũriũ endaga kũguũrĩria.” (Luk. 10:22) Kwoguo rĩrĩa twathoma mabuku ma Injiri tũkona ũrĩa Jesu aaiguaga na ageciria, tũkoragwo tũkĩĩruta ũrĩa Jehova aiguaga na ũrĩa eciragia. Ũmenyo ta ũcio nĩ ũtũhotithagia gũkuhĩrĩria Ngai witũ makĩria.

³ Rungu rwa ũtongoria wa Mũrũ wa Ngai, nĩ tũhotaga gũkũria ũrata wa hakuhĩ na Jehova na njĩra ya gũikaraga hakuhĩ na ithondeka rĩake rĩrĩa rĩtũteithagia kũmenya ũrĩa tũngĩka wendi wa Ngai. O ta ũrĩa kwarathĩtwo thĩinĩ wa Mathayo 24:45-47, Mwathi witũ Jesu Kristo, nĩ amũrĩte “ngombo ĩrĩa njĩhokeku na njũgĩ,” nĩguo ĩheage andũ a nyũmba yake “irio ihinda rĩrĩa rĩagĩrĩire.” Mahinda-inĩ maya, ngombo ĩrĩa njĩhokeku nĩ ĩtũheaga irio nyingĩ cia kĩĩroho. Kũgerera ngombo ĩyo, Jehova nĩ atũtaaraga tũthomage Kiugo gĩake o mũthenya, tũgathiaga mĩcemanio ya Gĩkristiano tũtegũtĩrĩria, na tũkahunjagia na kĩyo ‘ũhoro ũrĩa mwega wa Ũthamaki.’ (Mat. 24:14; 28:19, 20; Josh. 1:8; Thab. 1:1-3) Tũtingĩenda gũkorũo na mawoni matagĩrĩire kwerekera ngombo ĩrĩa njĩhokeku. Twagĩrĩirũo kwĩrutanĩria gũikaraga hakuhĩ na ithondeka rĩa Jehova na tũgathĩkagĩra ũtongoria wa rĩo. Ũndũ ũcio nĩ ũrĩtũteithagia gũkuhĩrĩria Jehova Ngai witũ makĩria, ũgatũhe hinya na ũgatũgitĩra o na tũgĩcemanagia na magerio.

MAGERIO MARAINGĨHA NĨKĨ?

⁴ Kwahoteka ũkoretwo ũhoro-inĩ wa ma mĩaka mĩingĩ. Angĩkorũo nĩguo, hatarĩ nganja nĩ ũkirĩrĩirie maũndũ maingĩ marĩa mageragia wĩkindĩru waku. No o na angĩkorũo nĩ hĩndĩ ũramenyire Jehova na ũrambĩrĩria kũnyitanĩra na andũ ake, nĩ ũĩ atĩ Shaitani ũrĩa Mũcukani nĩ okagĩrĩra mũndũ o wothe ũnyitaga mbaru ũnene wa Jehova. (2 Tim. 3:12) Kwoguo, o na angĩkorũo ũkirĩrĩirie maũndũ maingĩ kana manini, ndwagĩrĩirũo kũigua guoya kana gũkua ngoro. Jehova eranĩire atĩ nĩ arĩgũteithagia na nĩ agaakũhonokia na akũhe kĩheo kĩa muoyo mahinda mokĩte.​—Ahib. 13:5, 6; Kũg. 2:10.

⁵ Ithuothe no kũhoteke nĩ tũgũcemania na magerio ihinda rĩrĩa rĩtigarĩte rĩa mũtabarĩre ũyũ wa Shaitani. Kuuma Ũthamaki wa Ngai wambĩrĩria gwathana mwaka wa 1914, Shaitani nĩ aagirĩrĩirio gũthiaga igũrũ kũrĩ Jehova. Aaharũrũkirio gũkũ thĩ hamwe na araika ake. Maũndũ moru marĩa marathiĩ na mbere makĩongerekaga thĩinĩ wa thĩ, hamwe na kũnyarirũo kwa ndungata cia Jehova, nĩ moimĩrĩro ma marakara marĩa Shaitani arĩ namo na ningĩ monanagia atĩ tũratũũra matukũ-inĩ ma kũrigĩrĩria ma wathani wake mũũru.​—Kũg. 12:1-12.

⁶ Shaitani nĩ mũrakaru mũno nĩ ũndũ wa kwagithio hinya na nĩ oĩ atĩ atigĩtie o kahinda kanini. Arĩ hamwe na ndaimono ciake, ekaga ũrĩa wothe angĩhota nĩguo aharaganie wĩra wa kũhunjia na athũkie ũrũmwe wa ndungata cia Jehova. Ũndũ ũcio ũtũmaga tũkorũo mbaara-inĩ ya kĩĩroho, “na tũtirarũa na mwĩrĩ na thakame, no tũrarũa na thirikari, na atongoria, na athani a thĩ a nduma ĩno, [na] maroho moru marĩa marĩ igũrũ.” Nĩguo tũhootane tũrĩ mwena wa Jehova, no mũhaka tũikare twĩhumbĩte indo ciothe cia mbaara na tũtigatigithĩrie kũrũa. No mũhaka ‘twĩhande wega nĩguo twĩtiirie mawara’ ma Mũcukani. (Ef. 6:10-17) Kwoguo no mũhaka tũkirĩrĩrie.

GŨKŨRIA NGUMO YA ŨKIRĨRĨRIA

⁷ Ũkirĩrĩria nĩ “ũhoti wa gwĩtiiria moritũ kana mĩnyamaro.” Thĩinĩ wa Bibilia, ũkirĩrĩria nĩ gũthiĩ na mbere gwĩka ũndũ ũrĩa wagĩrĩire o na kũrĩ na moritũ, ũkararia, kũnyarirũo, kana ũndũ ũngĩ o wothe ũrĩa werekeirio gũthũkia wĩkindĩru witũ harĩ Ngai. No mũhaka Akristiano makũrie ngumo ya ũkirĩrĩria, na ũndũ ũcio nĩ woyaga ihinda. Ũhoti witũ wa gũkirĩrĩria ũthiaga na mbere ũkĩongererekaga o ũrĩa tũrakũra kĩĩroho. Twakirĩrĩria magerio manini ma wĩtĩkio marĩa mokaga kĩambĩrĩria-inĩ kĩa ũtũũro witũ wa Gĩkristiano, tũgĩaga na hinya makĩria, tũkahota gũkirĩrĩria magerio maritũ marĩa tũrĩcemania namo thutha-inĩ. (Luk. 16:10) Tũtiagĩrĩirũo gweterera nginya rĩrĩa magerio manene marĩũka atĩ nĩguo tũtue itua irũmu rĩa kũrũmia wĩtĩkio. Twagĩrĩirũo gũkorũo tũtuĩte itua irũmu mbere ya magerio gũka. Mũtũmwo Petero aandĩkire ũũ akĩenda kuonania atĩ ũkirĩrĩria ũtwaranaga hamwe na ngumo ingĩ cia Gĩkristiano: “Mwĩrutanĩriei biũ kuongerera ngumo ya wega harĩ wĩtĩkio wanyu, na harĩ wega ũcio wanyu muongerere ũmenyo, harĩ ũmenyo wanyu muongerere kwĩgirĩrĩria, na harĩ kwĩgirĩrĩria kwanyu muongerere ũkirĩrĩria, harĩ ũkirĩrĩria wanyu muongerere wĩrutĩri Ngai, harĩ wĩrutĩri wanyu harĩ Ngai muongerere wendo ta wa andũ a nyina ũmwe, harĩ wendo wanyu ta wa andũ a nyina ũmwe muongerere wendo kwerekera andũ othe.”​—2 Pet. 1:5-7; 1 Tim. 6:11.

⁸ Jakubu nĩ oonanirie bata wa gũkũria ngumo ya ũkirĩrĩria rĩrĩa aandĩkire ũũ thĩinĩ wa marũa make: “Ariũ a Ithe witũ, onagai kĩrĩ gĩkeno gĩtheri rĩrĩa mwacemania na magerio matiganĩte, mũkĩmenyaga atĩ wĩtĩkio ũcio wanyu ũgeretio nĩ ũtũmaga mũgĩe na ũkirĩrĩria. No rekagai ũkirĩrĩria ũrĩkie wĩra waguo, nĩgetha mũkoragwo mũrĩ akinyanĩru na mũrĩ agima maũndũ-inĩ mothe, mũtekwaga ũndũ o na ũmwe.” (Jak. 1:2-4) Jakubu ooigire atĩ Akristiano magĩrĩirũo gũkena hĩndĩ ĩrĩa macemania na magerio tondũ nĩ mamateithagia kũgĩa na ũkirĩrĩria. Hihi nĩ wonaga maũndũ na njĩra ĩyo? Jakubu aacokire akĩonania atĩ ũkirĩrĩria nĩ wa bata harĩ kwagagĩria ngumo citũ cia Gĩkristiano nĩguo twĩtĩkĩrĩke nĩ Ngai biũ. Ũkirĩrĩria witũ nĩ ũgĩaga hinya o mũthenya rĩrĩa twacemania na magerio na twamatooria. Ũkirĩrĩria ũcio nĩ ũtũmaga tũkũrie ngumo ingĩ njega iria tũbataraga.

⁹ Jehova nĩ akenaga rĩrĩa tuonania ũkirĩrĩria, na ũndũ ũcio nĩ ũgaatũma atũhe muoyo wa tene na tene. Jakubu aacokire akiuga ũũ: “Gũkena nĩ mũndũ ũrĩa ũthiaga na mbere gũkirĩrĩria igerio, tondũ arĩkia gwĩtĩkĩrĩka nĩ akaamũkĩra thũmbĩ ya muoyo, ĩrĩa Jehova eerĩire arĩa mathiaga na mbere kũmwenda.” (Jak. 1:12) Twecũrania ũhoro wa muoyo ũcio twĩrĩirũo, nĩ tũrĩhotaga gũkirĩrĩria. Tũtingĩhota gũikara ũhoro-inĩ wa ma tũtarĩ na ũkirĩrĩria. Tũngĩtĩkĩra gũtoorio nĩ hatĩka cia thĩ ĩno, nĩ ũhũthũ tũcokerere maũndũ ma thĩ ĩno. Tũngĩaga ũkirĩrĩria, tũtirĩkoragwo na roho mũtheru wa Jehova, na kwoguo tũtirĩonanagia maciaro ma roho ũtũũro-inĩ witũ.

¹⁰ Nĩguo tũhote gũthiĩ na mbere gũkirĩrĩria mahinda-inĩ maya maritũ, nĩ tũrabatara gũkũria mawoni marĩa magĩrĩire kwerekera mĩnyamaro ĩrĩa tũcemanagia nayo tũrĩ Akristiano. Ririkana Jakubu aandĩkire ũũ: “Onagai kĩrĩ gĩkeno gĩtheri.” Ũndũ ũcio no ũkorũo ũtarĩ mũhũthũ, tondũ no tũkorũo tũkĩnyamarĩka kĩĩmwĩrĩ kana kĩĩmeciria. No ririkanaga atĩ ũreka ũguo nĩ ũndũ wa ũtũũro wa ihinda rĩũkĩte. Harĩ ũndũ atũmwo maacemanirie naguo ũngĩtũteithia kuona ũrĩa tũngĩkorũo na gĩkeno hĩndĩ ĩrĩa tũranyamarĩka. Ũndũ ũcio wonekaga ibuku-inĩ rĩa Atũmwo rĩrĩa riugaga ũũ: “Magĩta atũmwo acio, makĩmahũũra, na makĩmaatha matige kwaria na rĩĩtwa rĩa Jesu, magĩcoka makĩmarekereria. Nao makĩehera mbere ya Sanhedrini makenete tondũ wa kuonwo matagĩrĩire gũtĩo nĩ ũndũ wa rĩĩtwa rĩa Jesu.” (Atũm. 5:40, 41) Atũmwo nĩ maataũkĩirũo atĩ kũnyamarĩka kwao kuonanagia atĩ nĩ maathĩkagĩra watho wa Jesu na atĩ nĩ meetĩkĩrĩkaga harĩ Jehova. Petero akĩandĩka marũa make ma mbere mĩaka mĩingĩ thutha ũcio, nĩ aarĩrĩirie ũguni ũrĩa uumanaga na kũnyamarĩka nĩ ũndũ wa maũndũ ma ũthingu.​—1 Pet. 4:12-16.

¹¹ Ũndũ ũngĩ nĩ ũrĩa wahutĩtie Paulo na Sila. Rĩrĩa maatungataga itũũra-inĩ rĩa Filipi marĩ amishonarĩ, nĩ maanyitirũo na magĩthitangĩrũo gũthumbũra itũũra rĩu na kũrutana mĩtugo ĩrĩa ĩtetĩkĩrĩtio. Nĩ ũndũ ũcio makĩhũũrũo ũũru mũno na magĩikio njera. Bibilia ĩtwĩraga atĩ marĩ njera o na matarĩ mararigitwo ironda, “kĩndũ ta ũtukũ gatagatĩ, Paulo na Sila nĩ kũhoya maahoyaga makĩgoocaga Ngai na nyĩmbo, nao ohwo nĩ maamathikagĩrĩria.” (Atũm. 16:16-25) Paulo na Sila moonaga kũnyamarĩka kwao nĩ ũndũ wa Kristo na njĩra ĩrĩa yagĩrĩire, tondũ moonaga kũrĩ ũira wa wĩkindĩru wao mbere ya Ngai na andũ, na kũrĩ njĩra ya kũruta ũira makĩria kũrĩ arĩa mangĩendire gũthikĩrĩria ũhoro ũrĩa mwega. Ũndũ ũcio nĩ wahutĩtie nginya mĩoyo ya andũ angĩ. Ũtukũ o ũcio, mũrangĩri wa njera ĩyo na andũ a nyũmba yake nĩ maamathikĩrĩirie na magĩtuĩka arutwo. (Atũm. 16:26-34) Paulo na Sila nĩ meehokete Jehova, hinya wake, na wendi wake wa kũmateithĩrĩria hĩndĩ ĩyo maanyamarĩkaga, na Jehova ndaamatiganĩirie.

¹² O na ũmũthĩ, Jehova nĩ atũheete maũndũ marĩa mothe tũbataraga ma gũtũteithia rĩrĩa twacemania na magerio. Nĩ endaga tũkirĩrĩrie. Nĩ atũheete Kiugo gĩake kĩrĩa gĩtũheaga ũmenyo ũrĩa wa ma wĩgiĩ muoroto wake. Ũndũ ũcio nĩ wĩkĩraga wĩtĩkio witũ hinya. Nĩ tũkoragwo na mweke wa kũnyitanĩra na Akristiano arĩa angĩ na kũhe Ngai ũtungata mũtheru. Ningĩ nĩ tũkoragwo na mweke wa gũtũũria ũrata wa hakuhĩ na Jehova kũhĩtũkĩra mahoya. Nĩ athikagĩrĩria rĩrĩa tũramũgooca na rĩrĩa tũramũthaitha atũteithie gũtũũria mũrũgamo mwega mbere yake. (Afil. 4:13) Ningĩ nĩ tũgĩaga na hinya twecũrania ũhoro wa kĩĩrĩgĩrĩro kĩrĩa kĩigĩtwo mbere itũ.​—Mat. 24:13; Ahib. 6:18; Kũg. 21:1-4.

GŨKIRĨRĨRIA MAGERIO MATIGANĨTE

¹³ Magerio marĩa tũcemanagia namo ũmũthĩ no ta marĩa arutwo a Jesu Kristo maacemanagia namo. Mahinda-inĩ maya, Aira a Jehova nĩ manyariragwo kana makarumwo nĩ andũ maheetwo ũhoro ũtarĩ wa ma. O ta matukũ-inĩ ma atũmwo, ũkararia mũingĩ umanaga na andũ arĩa manyitĩrĩire ndini mũno, arĩa Kiugo kĩa Ngai kĩguũrĩtie atĩ morutani mao nĩ ma maheeni o hamwe na mĩtugo yao. (Atũm. 17:5-9, 13) Rĩmwe na rĩmwe, andũ a Jehova nĩ mateithĩkaga nĩ ũndũ wa gũkinyĩra ihooto cia kĩĩwatho iria iheanagwo nĩ thirikari cia gĩũteti. (Atũm. 22:25; 25:11) O na kũrĩ ũguo, atongoria thirikari-inĩ manahũthĩra watho kũgiria wĩra witũ makĩenda kũniina ũtungata witũ wa Gĩkristiano. (Thab. 2:1-3) Hĩndĩ ta ĩyo, tũrũmagĩrĩra kĩonereria kĩa atũmwo, arĩa mooigire ũũ marĩ na ũmĩrĩru: “No mũhaka twathĩkĩre Ngai arĩ we mũtongoria, no ti andũ.”​—Atũm. 5:29.

¹⁴ O ũrĩa roho wa gũtũũgĩria bũrũri ũrathiĩ ũkĩingĩhaga thĩinĩ wa thĩ, noguo ahunjia a ũhoro ũrĩa mwega marathiĩ na mbere kũhatĩkwo matiganĩrie ũtungata ũrĩa maheetwo nĩ Ngai. Ndungata ciothe cia Ngai nĩ cioyaga na ũritũ mũkaana ũrĩa ũrĩ thĩinĩ wa Kũguũrĩrio 14:9-12 wĩgiĩ gũthathaiya ‘nyamũ ĩrĩa ya gĩthaka na mũhianano wayo.’ Nĩ tuonaga bata wa kũrũmĩrĩra ciugo ici cia Johana: “Hau nĩho arĩa aamũre mabataraga ũkirĩrĩria, o acio mathĩkagĩra maathani ma Ngai na makarũmia biũ wĩtĩkio harĩ Jesu.”

¹⁵ Magerio marĩa moimanaga na mbaara, ngahĩha cia gĩũteti, kũnyarirũo, na wĩra witũ kũgirio nĩ thirikari, no matũme tũremwo nĩ gũthiĩ na mbere na ũthathaiya wa Gĩkristiano tũrĩ na wĩyathi. No tũremwo nĩ gũcemania na arĩa angĩ tũrĩ kĩũngano. O na no tũremwo nĩ kwaranĩria na wabici ya rũhonge. Nao arori a mũthiũrũrũko no maremwo nĩ gũceerera ciũngano. Mabuku no mage gũtũkinyĩra. Wagĩrĩirũo gwĩka atĩa maũndũ ta macio mangiumĩra?

¹⁶ Ĩka ũrĩa wothe ũngĩhota ihinda-inĩ rĩu. No ũhote kwĩruta ũrĩ wiki. Andũ no macemanie marĩ tũkundi tũnini mĩciĩ-inĩ na no mahũthĩre mabuku ma tene na Bibilia. Ndũkamake kana ũtangĩke. Kĩama Kĩrĩa Gĩtongoragia nĩ gĩgaacaria o na ihenya njĩra cia kwaranĩria na ariũ a Ithe witũ arĩa mehokeirũo maũndũ kĩũngano-inĩ.

¹⁷ O na ũngĩĩkora kũndũ weheranĩtio na Akristiano arĩa angĩ othe, ririkana atĩ ndweheranĩtio na Jehova na Mũriũ wake, Jesu Kristo. No ũhote gũtũũria kĩĩrĩgĩrĩro gĩaku kĩrĩ kĩrũmu. Jehova no ahote kũigua mahoya maku na akũhe hinya kũgerera roho wake. Mwĩhoke akũhe ũtongoria. Ririkana atĩ ũrĩ ndungata ya Jehova na mũrutwo wa Jesu Kristo. Kwoguo, hũthĩra wega mĩeke ĩrĩa ũngĩgĩa nayo ya kũhunjia. Jehova nĩ ekũrathima kĩyo gĩaku, na andũ angĩ mahota kũnyitanĩra nawe ũthathaiya-inĩ wa ma.​—Atũm. 4:13-31; 5:27-42; Afil. 1:27-30; 4:6, 7; 2 Tim. 4:16-18.

¹⁸ O na kũrĩ ũguo, ũngĩcemania na ũgwati wa gĩkuũ ta ũrĩa atũmwo na andũ angĩ maacemanirie naguo, wĩhoke “Ngai ũrĩa ũriũkagia arĩa akuũ.” (2 Kor. 1:8-10) Wĩtĩkio waku harĩ kĩĩrĩgĩrĩro gĩa kũriũka no ũgũteithie gũkirĩrĩria ũkararia o na ũngĩkorũo ũrĩ mũnene atĩa. (Luk. 21:19) Jesu nĩ aamenyaga atĩ wĩhokeku wake hĩndĩ ya magerio nĩ ũngĩekĩrire arĩa angĩ ngoro makirĩrĩrie, na nĩ aatũtigĩire kĩonereria. O nawe no wĩkĩre Akristiano arĩa angĩ ngoro na njĩra o ta ĩyo.​—Joh. 16:33; Ahib. 12:2, 3; 1 Pet. 2:21.

¹⁹ Makĩria ma kũnyarirũo na gũkarario, no ũbatare gũkirĩrĩria maũndũ mangĩ maritũ. Kwa ngerekano, andũ amwe nĩ makuĩte ngoro nĩ ũndũ wa kwaga gũthikĩrĩrio gĩcigo-inĩ kĩrĩa mahunjagia. Angĩ nao nĩ mahiũranagia na mĩrimũ ĩtiganĩte kana mathĩna mangĩ marĩa moimanaga na kwaga gũkinyanĩra. O na mũtũmwo Paulo nĩ aabataraga gũkirĩrĩria igerio rĩatũmaga aritũhĩrũo nĩ kũhingia ũtungata wake. (2 Kor. 12:7) Nake Epafrodito, Mũkristiano wa karine ya mbere kuuma Filipi, ‘nĩ aathuthĩkĩte ngoro tondũ arata ake nĩ maaiguĩte atĩ aarĩ mũrwaru.’ (Afil. 2:25-27) Kwaga gũkinyanĩra gwitũ na kwa andũ arĩa angĩ no kũrehe mathĩna mangĩkorũo marĩ maritũ gũkirĩrĩria. No kũhoteke nĩ harĩ mũrũ kana mwarĩ wa Ithe witũ tũtaiguithanagia o na kana mũndũ wa famĩlĩ. No mũndũ no ahote gũkirĩrĩria na atoorie maũndũ ta macio angĩrũmĩrĩra ũtaaro wa Kiugo kĩa Jehova.​—Ezek. 2:3-5; 1 Kor. 9:27; 13:8; Kol. 3:12-14; 1 Pet. 4:8.

TUA ITUA RĨA GŨTŨŨRA ŨRĨ MWĨHOKEKU

²⁰ Twagĩrĩirũo kũrũmĩrĩra ũtongoria wa Jesu Kristo, ũrĩa Jehova athuurĩte atuĩke Mũtwe wa kĩũngano. (Kol. 2:18, 19) Nĩ tũrabatara kũrutithania wĩra na “ngombo ĩrĩa njĩhokeku na njũgĩ” na arĩa mamũrĩtwo marĩ arori. (Ahib. 13:7, 17) Tũngĩrũmagĩrĩra biũ mĩbango ya gĩtheokrasi na tũnyitanagĩre na arĩa maratongoria, nĩ tũrĩhingagia wendi wa Jehova. Ningĩ nĩ tũrabatara kũhoyaga kaingĩ. Ririkana atĩ gũikio njera kana kũhingĩrũo tũrĩ oiki gũtingĩtũgirĩrĩria kwaranĩria na Ithe witũ wa igũrũ ũrĩ wendo kana gũthũkie ũrũmwe ũrĩa tũkoragwo naguo hamwe na Akristiano arĩa angĩ.

²¹ Rekei tũtue itua rĩa gũkirĩrĩria na gwĩka ũrĩa wothe tũngĩhota wĩra-inĩ wa kũhunjia, twĩrutanĩrie biũ kũruta wĩra ũrĩa Jesu aatigĩire arũmĩrĩri ake rĩrĩa aameerire ũũ: “Thiĩi mũgatue andũ arutwo kuuma ndũrĩrĩ-inĩ ciothe, mũkĩmabatithagia thĩinĩ wa rĩĩtwa rĩa Ithe witũ, na rĩa Mũriũ, na rĩa roho mũtheru, mũkĩmarutaga kũrũmia maũndũ marĩa mothe ndĩmwathĩte.” (Mat. 28:19, 20) Rekei tũkirĩrĩrie o ta Jesu, na twĩcũranagie ũhoro wa kĩĩrĩgĩrĩro kĩa Ũthamaki na kĩĩranĩro kĩa muoyo wa tene na tene. (Ahib. 12:2) Tondũ tũrĩ arũmĩrĩri a Kristo mabatithĩtio, tũrĩ na mweke wa kũhingia ũrathi wa Jesu wĩgiĩ “ithirĩro rĩa mũtabarĩre wa maũndũ.” Ooigire ũũ: “Ũhoro ũyũ mwega wa Ũthamaki nĩ ũkaahunjio thĩ yothe ĩrĩa ĩikaragwo ũtuĩke ũira kũrĩ ndũrĩrĩ ciothe, na hĩndĩ ĩyo nĩrĩo mũico ũgaakinya.” (Mat. 24:3, 14) Tũngĩĩrutanĩria na ngoro yothe wĩra-inĩ ũcio ihinda-inĩ rĩrĩ, nĩ tũgakenera muoyo wa tene na tene thĩinĩ wa thĩ njerũ ya Jehova ĩrĩ na ũthingu.