Hihi Daudi nĩ aagĩrĩirũo nĩ gwĩciria atĩ Ngai no akorũo akĩmũririkana? Hihi Ngai nĩ agwĩciragia wee mwene? Andũ aingĩ ũmũthĩ matiĩtĩkĩtie atĩ Ngai no akorũo akĩmeciria. Nĩkĩ hihi?

Ũndũ ũmwe nĩ tondũ Ngai nĩ wa kĩĩroho; ndarĩ mwĩrĩ ta witũ wa nyama na thakame. Onaga ndũrĩrĩ itariĩ ta “gataata ka maĩ karĩ ndoo-inĩ, nacio cionagwo ihaana o ta karũkũngũ kanini karĩa gatigĩtwo ratiri-inĩ.” (Isaia 40:15) Mũthomi ũmwe ũtetĩkĩtie Ngai, aandĩkire atĩ “mũndũ wĩtĩkĩtie atĩ nĩ kũrĩ Ngai ũrũmbũyanagia na ũrĩa areka, akoragwo akĩyona arĩ wa bata mũno.”

Andũ angĩ nao monaga ta matarĩ kĩene mbere ya Ngai nĩ ũndũ wa mĩtugo yao. Mũthuri ũmwe warĩ na mawoni ta macio wĩtagwo Jim, oigire ũũ: “Nĩ ndahoyaga Ngai kaingĩ mũno ahe ngumo ya thayũ na ya kwĩgirĩrĩria, no marakara makwa matiathiraga. Ndona ũguo, ngĩtua na ngoro atĩ ndĩ mũndũ mũũru mũno, na atĩ Ngai ndangĩhota kũndeithia.”

Hihi Ngai nĩ araihanĩrĩirie mũno na andũ ũũ atĩ ndatindanagĩra nao? Ngai atuonaga atĩa hihi? Gũtirĩ mũndũ ũngĩhota gũcokia ciũria icio atangĩmenyithio nĩ Ngai we mwene ũrĩa aiguaga. Kiugo gĩake Bibilia, kiugaga atĩ Ngai ndakoragwo kũnene na andũ ũũ atĩ ndameciragia marĩ mũndũ ũmwe ũmwe. Bibilia yugaga: “O na atakĩrĩ haraya na mũndũ o na ũmwe witũ.” (Atũmwo 17:27) Icunjĩ inya iria ikũrũmĩrĩra, nĩ ikwarĩrĩria ũrĩa Ngai aiguaga kwerekera mũndũ ũmwe ũmwe na ũrĩa onanĩtie atĩ nĩ atwĩciragia na nĩ arũmbũyanagia na andũ.

KĨRĨA GĨTŨMAGA ANDŨ AMWE MAKORŨO NA NGANJA: Kũringana na ũthuthuria ũrĩa wĩkĩtwo wa ica ikuhĩ, galaksĩ itũ ĩkoragwo na thĩ ingĩ ta bilioni 100. Andũ aingĩ meciria ũhoro wa ũrĩa igũrũ rĩrĩ inene, nĩ meyũragia, ‘Nĩ kĩĩ kĩngĩtũma Mũũmbi mwene hinya wothe atindanĩre na ũrĩa andũ matarĩ kĩene mareka thĩinĩ wa thĩ ĩmwe tu?’

ŨRĨA BIBILIA ĨRUTANAGA: Ngai ndangĩatũheire Bibilia acoke atũtiganĩrie. Handũ ha ũguo, atũũmagĩrĩria ũũ: “Ndĩĩgũtaaraga o ngĩkũbaraga na riitho rĩakwa.”—Thaburi 32:8.

Ta wĩcirie ũhoro wa Hagari, mũtumia Mũmisiri ũrĩa watũũraga karine-inĩ ya 20, mbere ya Kristo. Hagari ndarĩ na gĩtĩo harĩ mũmwathi wake Sarai, nĩ ũndũ ũcio Sarai, akĩmũnyarira mũno, nake Hagarĩ akĩũrĩra werũ-inĩ. Hihi Ngai nĩ aatiganĩirie Hagari atĩ tondũ nĩ aahĩtĩtie? Bibilia yugaga: “Mũraika wa Jehova akĩmũkora.”a Mũraika ũcio akĩmũũmĩrĩria na ciugo ici: “Jehova nĩeiguĩrĩire ũrĩa ũnyarirĩtwo.” Nake Hagari akĩĩra Jehova, “Wee wĩ Mũrungu-Ũrĩa-Muoni.”—Kĩambĩrĩria 16:4-13.

“Mũrungu-Ũrĩa-Muoni” nĩ akuonaga o nawe. Kwa ngerekano: Mũciari wendete ciana ciake nĩ aciroraga mũno, tondũ o ũrĩa kaana karĩ kanini, noguo kabataraga kũrorũo makĩria. Ũndũ ũmwe na ũcio, Ngai nĩ atũroraga, makĩria rĩrĩa tũkuĩte ngoro kana rĩrĩa tũraigua tũhootekete. Jehova oigĩte ũũ: “Niĩ nĩ niĩ njikaraga o kũu igũrũ kũndũ gũtheru, ningĩ ngaikara ndĩ hamwe na mũndũ ũrĩa wĩ na ngoro ĩherete na ĩrĩa ĩĩnyihĩtie, nĩguo ngaarahũre roho wa mũndũ ũcio wĩnyihĩtie, o na ngaramũkie andũ acio maikaraga maherete na ngoro ciao.”—Isaia 57:15.

O na kũrĩ ũguo, no wĩyũrie ũũ: ‘Ngai andoraga na njĩra ĩrĩkũ? Hihi aroraga ũrĩa haana na nja, kana aroraga ũrĩa ngoro yakwa ĩtariĩ, na akaamenya wega?’

KĨRĨA GĨTŨMAGA ANDŨ AMWE MAKORŨO NA NGANJA: Andũ aingĩ meciragia atĩ Ngai onaga andũ marĩ ehia kana matarĩ atheru ũũ atĩ matibataire gwĩcirio. Kendra, mũtumia ũmwe wathuthĩkĩte ngoro, nĩ eeyonaga hĩndĩ ciothe arĩ mwĩhia tondũ wa kũremwo nĩ gũtũũra kũringana na maathani ma Ngai. Nĩ ũndũ ũcio agĩtiga kũhoyaga.

ŨRĨA BIBILIA ĨRUTANAGA: Jehova nĩ atũĩ wega na ndaroraga o kwaga gũkinyanĩra gwitũ. Bibilia yugaga ũũ: “Nĩ gũkorũo we nĩoĩ ũũmbe ũrĩa twombirũo; nĩaririkanaga atĩ ithuĩ tũrĩ o rũkũngũ.” Makĩria ma ũguo, ndatwĩkaga “ta ũrĩa mahĩtia maitũ maagĩrĩirũo,” no nĩ atuohagĩra arĩ na tha rĩrĩa twerira.—Thaburi 103:10, 14.

Ta wicirie ũhoro wa Mũthamaki Daudi ũrĩa ũgwetetwo gĩcunjĩ-inĩ kĩa mbere kĩa ngathĩti ĩno. Eerire Ngai ũũ mahoya-inĩ: “Maitho maku no maanyonaga hĩndĩ ĩo ndarĩ o kĩongero, na matukũ mothe nĩmaandĩkĩtwo thĩinĩ wa mbuku yaku . . . Thuuthuuria, Mũrungu, ũmenye ngoro yakwa.” (Thaburi 139:16, 23) Daudi nĩ aarĩ na ma atĩ, o na gũtuĩka aarĩ mwĩhia, o na ageka mehia maritũ mũno, Jehova nĩ onaga atĩ nĩ eerirĩte kuuma ngoro.

Jehova nĩ akũĩ wega makĩria gũkĩra ũrĩa mũndũ ũngĩ o wothe angĩkũmenya. Bibilia yugĩte ũũ: “Mũndũ wa gũkũ thĩ abaraga one ũrĩa mũndũ atariĩ akĩonwo na maitho, no rĩrĩ, Jehova abaraga ngoro thĩinĩ.” (1 Samueli 16:7) Ngai nĩ oĩ atĩ maũndũ marĩa wagaire kuuma kũrĩ aciari, mũrerere, kũrĩa warereirũo na ũmũndũ waku nĩcio itũmaga wĩke maũndũ na njĩra ĩrĩa wĩkaga nayo. Nĩ onaga, na nĩ akenaga rĩrĩa ũrageria gũkũria ngumo njega o na gũtuĩka nĩ ũhĩtagia.

No hihi Ngai ahũthagĩra atĩa ũmenyo ũrĩa arĩ naguo ũkwĩgiĩ nĩguo akũũmĩrĩrie?

KĨRĨA GĨTŨMAGA ANDŨ AMWE MAKORŨO NA NGANJA: Andũ amwe nĩ monaga ta matagĩrĩire kũhoya Ngai amateithie mathĩna-inĩ mao, o na rĩrĩa marabatara kũũmĩrĩrio. Mũtumia ũmwe wĩtagwo Raquel oigire ũũ: “Ndeciria ũhoro wa andũ othe arĩa marĩ thĩinĩ wa thĩ, na mathĩna maritũ marĩa macemanagia namo, nyonaga mathĩna makwa marĩ manini mũno nginya ngaaga bata wa kũhoya Ngai andeithie.”

ŨRĨA BIBILIA ĨRUTANAGA: Ngai nĩ ateithĩtie andũ na njĩra nene mũno na akamomĩrĩria. Andũ othe thĩinĩ wa thĩ nĩ maagaire mehia kuuma kũrĩ Adamu, kwoguo gũtirĩ mũndũ ũngĩhota gũtũũra biũ kũringana na ũrĩa Ngai endaga. O na kũrĩ ũguo, Ngai “nĩwe watwendaga ithuĩ, agĩkĩrekia Mũriũ [Jesu Kristo] oke atuĩke ihaki rĩa mehia maitũ.” (1 Johana 4:10) Kũgerera igongona rĩa Jesu, nĩ tuohagĩrũo mehia, tũkagĩa na thamiri theru, na tũkagĩa na kĩĩrĩgĩrĩro gĩa gũgatũũra tene na tene thĩinĩ wa thĩ njerũ ĩrĩ na thayũ.a No rĩrĩ, igongona rĩu rĩarutirũo no ũndũ wa andũ othe, kana hihi nĩ wonania wa atĩ Ngai nĩ agwĩciragia ũrĩ mũndũ kĩũmbe?

Ta wĩcirie ũhoro wa mũtũmwo Paulo. Nĩ aahutirio mũno nĩ igongona rĩu rĩa Jesu nginya akĩandĩka ciugo ici: “Ndũũraga . . . no ũndũ wa gwĩtĩkia Mũrũ wa Ngai, o we wanyendire, agĩkĩĩruta nĩ ũndũ wakwa.” (Agalatia 2:20) Ma nĩ atĩ, Jesu aakuire mĩaka mĩingĩ mbere ya Paulo gũtuĩka Mũkristiano. O na kũrĩ ũguo, Paulo onire igongona rĩu rĩrĩ kĩheo aahetwo nĩ Ngai.

Igongona rĩa Jesu nĩ kĩheo Ngai akũhete o nawe. Kĩheo kĩu nĩ kĩonanagia atĩ Ngai nĩ akuonaga ũrĩ wa bata. No gĩtũme ũgĩe na “ũũmĩrĩru ũrĩa ũtathiraga, o na . . . kĩĩrĩgĩrĩro kĩega” na gĩtũme ‘ũikarage ũrũmĩte wega ũhoro-inĩ wa ciĩko o na ciugo iria ciothe njega.’—2 Athesalonike 2:16, 17.

Ririkana, Jesu aarutire muoyo wake ũrĩ igongona mĩaka ta 2,000 mĩhĩtũku. No nĩ ũndũ ũrĩkũ ũmũthĩ wonanagia atĩ Ngai nĩ endaga ũtuĩke mũrata wake?

KĨRĨA GĨTŨMAGA ANDŨ AMWE MAKORŨO NA NGANJA: Andũ aingĩ arĩa metĩkĩtie nĩ kũrĩ Ngai nĩ maiguaga maraihanĩrĩirie nake. Mũtumia ũmwe wĩtagwo Christina kuuma bũrũri wa Ireland, ũrĩa wathiaga kanitha o kiumia, oigire, “Ndamuonaga arĩ o Ngai ũrĩa wombire indo ciothe, no ndiamũĩ, ndiaiguaga ndĩ hakuhĩ nake.”

ŨRĨA BIBILIA ĨRUTANAGA: O na rĩrĩa tũngĩkorũo tũũrĩte njĩra, Jehova ndatũtiganagĩria. Jesu aaheanire ngerekano ĩno kuonania ũrĩa Ngai atũrũmbũyagia: “Mũndũ angĩkorũo arĩ na mbũri igana, na ĩmwe yacio yũre, githĩ ndangĩtiga iria ingĩ mĩrongo kenda na kenda, athiĩ irĩma-inĩ, agacarie ĩrĩa yũrĩte?” Aarutanire atĩa? “O ũguo nake Ithe wanyu, ũrĩa wĩ igũrũ, ndendaga o na hanini kamwe ga twana tũu kore.”—Mathayo 18:12-14.

O “kamwe ga twana tũu” nĩ ka bata mũno maitho-inĩ ma Ngai. Ngai athiaga na njĩra ĩrĩkũ nĩguo “agacarie ĩrĩa yũrĩte”? O ta ũrĩa rĩandĩko rĩrĩa rĩrĩ kĩambĩrĩria-inĩ gĩa gĩcunjĩ gĩkĩ rĩonanĩtie, Jehova nĩ agucagĩrĩria andũ kũrĩ we.

Ta rora wone ũrĩa Ngai oire ikinya rĩa mbere kũgucĩrĩria andũ ehokeku kũrĩ we. Karine-inĩ ya mbere, Ngai nĩ aatũmire mũtũmwo Mũkristiano wetagwo Filipu acemanie na Mũethiopia nĩguo maarĩrĩrie ũrathi wa Bibilia ũrĩa Mũethiopia ũcio aathomaga. (Atũmwo 8:26-39) Thutha ũcio, Ngai nĩ aatũmire Petero aceerere mũthigari Mũroma wetagwo Korinelio, ũrĩa watũire ahoyaga Ngai na werutanagĩria mũno kũmũtungatĩra. (Atũmwo 10:1-48) Ningĩ Ngai nĩ aatongoririe Mũtũmwo Paulo hamwe na Akristiano angĩ mathiĩ rũũĩ-inĩ rũrĩa rwakoragwo nja ya itũũra rĩa Filipu. Marĩ kũu, nĩ maacemanirie na mũtumia ũmwe warĩ “mũhoi wa Ngai” wetagwo Ludia, na “Mwathani agĩtũma ngoro yake yende gũthikĩrĩria.”—Atũmwo 16:9-15.

Thĩinĩ wa ngerekano icio ciothe, Jehova nĩ aatigĩrĩire atĩ andũ acio othe maamwethaga nĩ magĩa na mweke wa kũmũmenya. Nĩ a ũmũthĩ maceragĩra andũ nyũmba kwa nyũmba na kũndũ kwa mũingĩ makĩmaheaga ndũmĩrĩri ya Bibilia ĩgiĩ Ngai? Andũ aingĩ mangiuga nĩ “Aira a Jehova.” Ta wĩyũrie, ‘Hihi no gũkorũo Ngai arahũthĩra andũ acio nĩguo angucĩrĩrie harĩ we?’ Tũgũkũria ũhoe Ngai agũteithie nĩguo wĩtĩkĩre kũgucĩrĩrio nĩwe.a