To Christopher, Hannah, na Gina maiguaga ũguo. Andũ aingĩ kuuma thĩ yothe nĩ metĩkĩtie matarĩ na nganja atĩ Ngai nĩ amonaga marĩ arata ake. Hihi wee ũiguaga atĩa? Hihi nĩ ũiguaga ũkuhĩrĩirie Ngai? Hihi no wende gũkorũo wĩ hakuhĩ nake, kana o na kũmũkuhĩrĩria makĩria? No gũkorũo nĩ wĩyũragia atĩrĩ: ‘Hihi no kũhoteke mũndũ o na arĩ kĩũmbe kĩnini, akorũo na ũrata wa hakuhĩ hamwe na Ngai Mwene Hinya Wothe? Angĩkorũo nĩguo-rĩ, kũngĩhoteka atĩa?’

NO TŨHOTE GŨKUHĨRĨRIA NGAI

Bibilia nĩ yonanagia atĩ mũndũ no ahote kũgĩa na ũrata wa hakuhĩ hamwe na Ngai. Yugaga atĩ Ngai eetire Iburahimu ũrĩa warĩ ithe wa rũrĩrĩ rwa Isiraeli “mũrata wakwa.” (Isaia 41:8) Ningĩ rora wone ciugo njega iria ciandĩkĩtwo thĩinĩ wa Jakubu 4:8: ‘Kuhĩrĩriai Ngai, nake nĩ ekũmũkuhĩrĩria inyuĩ.’ Kwoguo hatarĩ nganja, no kũhoteke kũgĩa na ũrata wa hakuhĩ hamwe na Ngai. No tondũ Ngai ndonekaga-rĩ, ũngĩhota atĩa ‘kũmũkuhĩrĩria’ na gũkenera ũrata wa hakuhĩ hamwe nake?

Nĩguo tũhote kuona macokio ma kĩũria kĩu, ta wĩcirie makinya marĩa mũndũ oyaga rĩrĩa arenda gũtuma ndũgũ na mũndũ ũngĩ. Ũndũ wa mbere nĩ kũmenyana marĩĩtwa. Thutha ũcio, o ũrĩa marĩthiaga makĩaranagĩria kaingĩ, makerana maũndũ marĩa mareciria na ũrĩa maraigua, noguo ũrata wao ũthiaga ũgĩkũraga. Na mangĩĩrutanĩria gwĩkana maũndũ mega, ũrata wao ũthiaga ũgacĩrĩte biũ. Ũguo noguo gũthiaga harĩ gũkũra kwa ũrata witũ hamwe na Ngai. Reke tuone ũrĩa ũndũ ũcio wĩkĩkaga.

Hihi nĩ ũrĩ mũrata ũmwe waku wa gĩtĩ kĩa mbere na ndũĩ rĩĩtwa rĩake? Gũtingĩhoteka. Mũtumia ũmwe wĩtagwo Irina kuuma Bulgaria oigire ũũ: “Gũtingĩhoteka mũndũ akuhĩrĩrie Ngai angĩkorũo ndoĩ rĩĩtwa rĩake.” O ta ũrĩa gĩcunjĩ kĩa mbere kĩgwetete, nĩ ũndũ wa gĩkeno kũmenya atĩ Ngai nĩ arenda ũmũkuhĩrĩrie. Kwoguo, kũgerera Bibilia, Ngai nĩ emenyithĩtie kũrĩ wee, akoiga ũũ: “Niĩ nĩ niĩ Jehova; rĩu nĩrĩo rĩĩtwa rĩakwa.”—Isaia 42:8.

Hihi Jehova nĩ atindanagĩra kana nĩ ũĩ rĩĩtwa rĩake, o na kana nĩ ũrĩhũthagĩra? Ta wĩcirie ũndũ ũyũ: Rĩĩtwa rĩa Ngai, rĩandĩkĩtwo na ndemwa inya cia Kĩhibirania iria ciĩtagwo Tetragrammaton, rĩonekaga hakuhĩ maita 7,000 thĩinĩ wa Maandĩko ma tene ma Kĩhibirania. Macio nĩ maita maingĩ mũno tũngĩringithania na rĩĩtwa rĩngĩ o rĩothe rĩgwetetwo Bibilia-inĩ. Hatarĩ nganja, ũcio nĩ ũira wa kuonania atĩ Jehova nĩ arenda tũmũmenye na tũhũthĩre rĩĩtwa rĩake.a

O na kũrĩ ũguo, andũ amwe monaga kũhũthĩra rĩĩtwa rĩake ta arĩ kũmwagĩra gĩtĩo, atĩ tondũ Ngai nĩ mũtheru na mwene hinya wothe. Nĩ ma, nĩ ũndũ mũũru kũhũthĩra rĩĩtwa rĩa Ngai na njĩra ĩtagĩrĩire, o ta ũrĩa ũtangĩhũthĩra rĩĩtwa rĩa mũrata waku wa hakuhĩ na njĩra ĩtagĩrĩire. Ĩndĩ, nĩ wendi wa Jehova atĩ andũ arĩa mamwendete matĩage rĩĩtwa rĩake na makarĩmenyithania kũrĩ andũ. (Thaburi 69:30, 31; 96:2, 8) Ririkana atĩ Jesu aarutire arutwo ake mahoyage ũũ: “Ithe witũ wĩ Igũrũ, Rĩĩtwa rĩaku nĩrĩamũrũo.” O na ithuĩ no tũkorũo na itemi rĩa gũtheria rĩĩtwa rĩa Ngai na kũrĩmenyithania kũrĩ andũ. Gwĩka ũguo nĩ gũtũteithagia kũmũkuhĩrĩria makĩria.—Mathayo 6:9.

Bibilia yonanagia atĩ Ngai nĩ athikagĩrĩria arĩa ‘macũranagia ũhoro wa rĩĩtwa rĩake.’ (Malaki 3:16) Igũrũ rĩgiĩ mũndũ ta ũcio, Jehova eranagĩra ũũ: “Nĩndĩĩmũhatũraga hatĩ-inĩ; ndĩĩmũigaga handũ haraya na igũrũ, nĩ ũndũ nĩamenyete rĩĩtwa rĩakwa. Arĩngayagĩra, na niĩ ngamwamũkĩria; nĩndĩrĩikaraga nake hingo ya mĩnyamaro.” (Thaburi 91:14, 15) Kũmenya na kũhũthĩra rĩĩtwa rĩa Jehova nĩ kwa bata angĩkorũo nĩ tũrenda gũkenera ũrata wa hakuhĩ hamwe nake.

Arata a hakuhĩ maikaraga makĩaranagĩria kaingĩ kũringana na ũrĩa maũndũ mao marametĩkĩria, hihi kũgerera thimũ, e-mail, intaneti, marũa, kana o ene gũcemania. Nĩ ũndũ ũcio, nĩguo tũgĩe na ũrata wa hakuhĩ hamwe na Ngai no nginya twaranagĩrie nake kaingĩ. No hihi tũngĩka ũguo atĩa?

No twarie na Jehova kũgerera mahoya. O na kũrĩ ũguo, kwaranĩria na Ngai na njĩra ya mahoya gũtihaana ta ũrĩa twaranagĩria na andũ a riika riitũ. No nginya tũmenyage atĩ hingo ĩrĩa tũrahoya, tũkoragwo tũkĩaranĩria na Mũũmbi witũ, Ũrĩa Mũtũgĩru Mũno igũrũ na thĩ. Ũndũ ũcio wagĩrĩirũo gũtũma tũmũhoe tũrĩ na gĩtĩo kĩnene mũno. Ningĩ nĩguo mahoya maitũ maiguo nĩ Ngai, nĩ harĩ maũndũ marĩa twagĩrĩirũo kũhingia. Reke tũthuthurie maũndũ matatũ.

Wa mbere, twagĩrĩirũo kũhoya Jehova Ngai arĩ o we wiki, no ti kũrĩ Jesu, “atheru,” kana mũhianano. (Thama 20:4, 5) Bibilia yugaga ũũ: ‘Menyithagiai Ngai maũndũ marĩa mothe mwendaga, mũkĩmũhoyaga na mũkĩmũthaithaga, hamwe na kũmũcokeria ngatho.’ (Afilipi 4:6) Wa kerĩ, no nginya tũhoe kũgerera rĩĩtwa rĩa Jesu Kristo, Mũrũ wa Ngai. Jesu we mwene aataarĩirie ũũ: ‘gũtirĩ mũndũ ũkinyaga gwĩ Ithe witũ, atokĩire harĩ niĩ.’ (Johana 14:6) Wa gatatũ, mahoya maitũ no nginya maringane na wendi wa Ngai. Bibilia yugaga ũũ: ‘Twahoya ũndũ waganĩrĩire na kwenda gwake, nĩatũiguaga.’a—1 Johana 5:14.

Ningĩ, ũrata ndũngĩtũũra angĩkorũo no mũndũ ũmwe waragia harĩ arata erĩ. O ta ũrĩa arata makenagĩra kwaranĩria, nĩ twagĩrĩirũo kũreka Ngai atwarĩrie, na tũgathikagĩrĩria rĩrĩa araria. Hihi wee nĩ ũĩ ũrĩa Ngai atwaragĩria?

Ũmũthĩ, Jehova Ngai “atwaragĩria” kũgerera Kiugo gĩake kĩrĩa kĩandĩke, nĩkĩo Bibilia. (2 Timotheo 3:16, 17) Tũngiuga ũguo nĩkĩ? Wĩcirie ngerekano ĩno: Hĩndĩ ĩrĩa wamũkĩra marũa kuuma kũrĩ mũrata, thutha wa kũmathoma, no wĩre andũ ũũ ũcanjamũkĩte, “Nĩ ndaigua ũhoro kuuma kũrĩ mũrata wakwa!” No ndanakwĩra ũhoro ũcio na kanua, nĩ kwandĩkwo ũkwandĩkĩtwo. Na njĩra o ta ĩyo, hĩndĩ ĩrĩa ũrathoma Bibilia, ũrareka Jehova akwarĩrie. Nĩ ũndũ ũcio, Gina, ũrĩa tũkũgwetete gĩcunjĩ-inĩ kĩa mbere, oigire ũũ: “Ngwĩciria atĩ, angĩkorũo nĩ ngwenda Ngai anyonage ndĩ mũrata wake, no nginya thomage ‘marũa’ marĩa atwandĩkĩire—nĩmo Bibilia.” Agĩcoka akĩongerera ũũ: “Gũthoma Bibilia o mũthenya nĩ gũtũmĩte nguhĩrĩrie Ngai makĩria.” Hihi wee nĩ ũrekaga Jehova akwarĩrie o mũthenya na njĩra ya gũthoma Kiugo gĩake Bibilia o mũthenya? Ũngĩka ũguo, nĩ ũrĩiguaga ũkuhĩrĩirie Ngai makĩria.

“No ngwĩkĩre ũrĩa wothe ũngĩenda, wee njĩra tu.” Kwahoteka ndũngĩhota kwĩra mũndũ ũtoĩ kana mũndũ ũtarĩ mũrata wa hakuhĩ ciugo ta icio. O na kũrĩ ũguo, ndũngĩremwo kwĩra mũrata waku wa gĩtĩ kĩa mbere ciugo icio. Harĩ arata a hakuhĩ, nĩ ũndũ wa ndũire o mũndũ kũigua akĩenda gwĩka wendi wa ũrĩa ũngĩ.

Bibilia yonanagia atĩ Jehova nĩ ekaga maũndũ marĩa oĩ nĩ megũkenia arĩa mamũthathayagia. Kwa ngerekano, Mũthamaki Daudi, ũrĩa wakenagĩra ũrata wa hakuhĩ hamwe na Ngai oigire ũũ: “Maũndũ ma magegania nĩ maingĩ marĩa wee ũtwĩkĩire, o gwata meciria marĩa ũtwĩciragĩria ithuĩ. . . . maarema gũtarĩka nĩ ũrĩa marĩ maingĩ!” (Thaburi 40:5) Makĩria ma ũguo, Jehova nĩ ekaga maũndũ ma gũkenia nginya arĩa matamũmenyete, ‘akamahũnia wega, na ngoro ciao agaciiyũria na gĩkeno.’—Atũmwo 14:17.

Tondũ Jehova nĩ akenaga gwĩka maũndũ marĩa makenagia arĩa angĩ, nĩ wega gũtanya atĩ arĩa marenda gũtuĩka arata ake magĩrĩirũo gwĩka maũndũ marĩa ‘makenagia ngoro’ yake. (Thimo 27:11) No hihi nĩ ũndũ ũrĩkũ ũngĩka nĩguo ũkenie Ngai? Bibilia yugaga ũũ: “Na mũtikanariganĩrũo nĩ gwĩkana wega o na gũtanahanĩra, nĩ ũndũ magongona ta macio nĩmo Ngai akenagio nĩmo.” (Ahibirania 13:16) Hihi ũguo nĩ kuonania atĩ o gwĩkana wega na kũhe andũ indo ciitũ nĩ kũiganĩte nĩguo mũndũ akenie Jehova?

Bibilia yugaga ũũ: “Gũtarĩ na wĩtĩkio gũtingĩkĩhoteka kũmũkenia.” (Ahibirania 11:6) Nĩ wega kũmenya atĩ, thutha wa Iburahimu ‘kwĩhoka Ngai,’ nĩrĩo ‘eetirũo mũrata wa Ngai.’ (Jakubu 2:23) Jesu Kristo o nake nĩ aatĩtĩrithirie bata wa ‘kwĩhoka [kana, gwĩtĩkia] Ngai’ angĩkorũo nĩ tũgũkenera irathimo ciake. (Johana 14:1) No hihi ũngĩhota atĩa kũgĩa na wĩtĩkio ũrĩa Ngai atanyaga kuuma kũrĩ arĩa endaga mamũkuhĩrĩrie. No wambĩrĩrie na kũgĩa na mũbango wa kwĩrutaga Kiugo kĩa Ngai, Bibilia. Ũngĩka ũguo, nĩ ũkũgĩa na “ũmenyi wa kũmenyaga ũrĩa endaga” na nĩ ũndũ ũcio nĩ ũkwĩruta ‘kũmũkenagia maũndũ-inĩ mothe.’ Ningĩ o ũrĩa ũgũthiĩ na mbere kuongerera ũmenyo waku wĩgiĩ Jehova na kũhũthagĩra motaaro marĩa ũreruta megiĩ ithimi ciake cia ũthingu, wĩtĩkio waku harĩ we nĩ ũgũkũra nake nĩ arĩgũkuhagĩrĩria makĩria.—Akolosai 1:9, 10.

Ũngĩka atĩa nĩguo ũkuhĩrĩrie Ngai? Nĩ twarĩkia kwarĩrĩria makinya marĩa ũngĩoya nĩguo ũkũrie ũrata nake, nĩmo:

1. Kũmenya na kũhũthĩra rĩĩtwa rĩa Ngai, Jehova.

2. Kwaranagĩria nake kaingĩ kũgerera mahoya na kwĩruta Kiugo gĩake, Bibilia.

3. Gwĩkaga maũndũ marĩa makenagia Jehova hingo ciothe.

Ũngĩĩthuthuria kũringana na maũndũ macio twagweta-rĩ, hihi no uuge atĩ nĩ ũreka ũrĩa kũrabatarania nĩguo ũkuhĩrĩrie Ngai? He maũndũ ũrona ta ũngĩgarũrĩra? Nĩ ma kĩyo nĩ kĩrabatarania, no ta wĩcirie moimĩrĩro.

Jennifer kuuma Amerika (U.S.) oigire ũũ: “Kĩyo kĩrĩa gĩothe mũndũ ekagĩra gũkũria ũrata wa hakuhĩ hamwe na Ngai ti gĩa tũhũ. Ũrata ũyũ ũkũrehagĩra irathimo nyingĩ ta kwĩhoka Ngai mũno, gũtaũkĩrũo nĩ ngumo ciake wega, na makĩria, wendo gatagatĩ-inĩ kanyu ũkongerereka. Gũtirĩ ũtũũro mwega ta ũcio!”

Angĩkorũo no wende gũkenera ũrata wa hakuhĩ hamwe na Ngai-rĩ, Aira a Jehova nĩ megũkena gũgũteithia gwĩka ũguo. No mabange kwĩruta Bibilia nawe hatarĩ marĩhi. Wĩ mũnyite ũgeni mĩcemanio-inĩ yao ya kwĩruta ũhoro wa Bibilia, thĩinĩ wa Nyũmba ya Ũthamaki ĩrĩa ĩrĩ hakuhĩ nawe, kũrĩa ũgũkenera kũnyitanĩra na andũ arĩa moyaga na ũritũ ũrata wao hamwe na Ngai.a Weka ũguo, ũrĩiguaga o ta mwandĩki wa Thaburi, ũrĩa woigire ũũ: “No niĩ-rĩ, gũkuhĩhĩria Ngai, nĩkuo kũnjagĩrĩire.”—Thaburi 73:28.