Hihi no ũririkane ũkĩgwa thĩ rĩrĩa warĩ mwana? No gũkorũo wanetema guoko kana ũkagurario iru. No ũririkane mami wanyu agĩkũũmĩrĩria? Kwahoteka aagũthambagia kĩronda kĩu agacoka agakĩoha. O na gũtuĩka nĩ warĩraga, nĩ wahoreraga mami wanyu akũhĩmbĩria na akwĩra ciugo cia gũgũthaitha. Ihinda-inĩ rĩu, wabatara kũũmĩrĩrio nĩ womagĩrĩrio.

No o ũrĩa tũrakũra, noguo ũtũũro ũthiaga ũritũhĩte. Mathĩna mathiaga manenehete na kuo kũũmĩrĩrio gũkanyiha. Ũndũ wa kĩeha nĩ atĩ, mathĩna ma andũ agima matingĩniinwo na kũhĩmbĩrio nĩ mũciari kana mohwo ta kĩronda. Ta wĩcirie ngerekano ici.

• Hihi nĩ ũrĩ wagĩa na ruo rwa kũbutwo wĩra? Julian oigaga atĩ rĩrĩa aabutirũo wĩra, aamakire nginya agĩtukanĩrũo. Eeyũragia ũũ: ‘Ngwĩka atĩa nĩguo hote kũrũmbũiya famĩlĩ yakwa? Thutha wa kũruta wĩra na kĩyo mĩaka ĩyo yothe-rĩ, kambuni ĩrona ta itarĩ kĩene nĩkĩ?’

• No gũkorũo ũkuĩte ngoro nĩ ũndũ wa kĩhiko kĩanyu kũharagana. Raquel ataaragĩria ũũ: “Rĩrĩa mũthuri wakwa aandigire o rĩmwe mĩeri 18 mĩthiru, ndaiguire kĩeha kĩnene mũno. Ngĩigua ngoro yakwa ta yatũka maita merĩ. Ndaiyũrirũo nĩ ruo rwa mwĩrĩ na rwa ngoro. Nĩ ndamakire mũno.”

• No gũkorũo ũrĩ na thĩna wa mwĩrĩ ũroneka ta ũtangĩthira. Rĩmwe no ũigue ta ũrĩa Ayubu aiguaga rĩrĩa oigire ũũ: “Muoyo nĩ gũthũũra ndĩũthũũrĩte; ndikwenda gũtũũra hĩngo ciothe.” (Ayubu 7:16) O na no ũigue ta Luis, ũrĩ na mĩaka 80, ũrĩa woigire ũũ: “Rĩmwe njiguaga ta njetereire o gũkua.”

• Kana hihi nĩ gĩkuũ kĩa mũndũ wendete gĩtũmaga ũbatare kũũmĩrĩrio. Robert ataaragĩria ũũ: “Rĩrĩa mwana wakwa aakuire aksidenti-inĩ ya ndege, ndietĩkirie. Ndacokire ngĩigua ruo rũnene mũno, rũrĩa Bibilia ĩringithanagia na gũthecwo nĩ rũhiũ rũnene.”​—Luka 2:35.

Robert, Luis, Raquel, na Julian nĩ moomĩrĩirio, nginya mahinda-inĩ macio maritũ. Moomĩrĩirio nĩ Ngai Mwene-Hinya-Wothe, ũrĩa mwega mũno harĩ kũũmanĩrĩria. Omanagĩrĩria atĩa? Hihi no akũũmĩrĩrie o nawe?

Mũtũmwo Paulo aandĩkire atĩ Jehovaa nĩ “Ngai ũrĩa ũmagĩrĩria andũ maũndũ-inĩ mothe,” na “nĩwe ũtũũmagĩrĩria magerio-inĩ maitũ mothe.” (2 Akorintho 1:3, 4) Kwoguo, Bibilia ĩtuonagia atĩ gũtirĩ mũndũ Ngai atangĩũmĩrĩria na atĩ gũtirĩ ũgwati o na ũrĩkũ ũngĩtũkora Ithe witũ wa igũrũ aremwo nĩ gũtũũmĩrĩria.

Ũrĩa kũrĩ nĩ atĩ, nĩ harĩ ũndũ tũngĩbatara gwĩka angĩkorũo nĩ tũkwenda Ngai atũũmĩrĩrie. Ndagĩtarĩ angĩtũteithia atĩa angĩkorũo tũtirĩ kĩrĩko nake? Mũnabii Amosi oririe ũũ: “Andũ erĩ maahota gũgĩtwarana matarĩ karĩko?” (Amosi 3:3) Nĩkĩo Maandĩko matwĩraga ũũ: “Kuhĩrĩriai Ngai, nake nĩ ekũmũkuhĩrĩria.”—Jakubu 4:8.

Tũngĩkorũo na ma atĩa atĩ Ngai nĩ egũtũkuhĩrĩria? Wa mbere, nĩ atwĩraga kaingĩ atĩ nĩ endaga gũtũteithia. (Rora gathandũkũ gĩcunjĩ-inĩ gĩkĩ.) Ũndũ wa kerĩ nĩ atĩ, tũrĩ na ũira kuuma kũrĩ andũ arĩa Ngai omĩrĩirie, a matukũ maitũ na a matukũ ma tene.

Mũthamaki Daudi nĩ aacemanirie na mathĩna maingĩ, o ta andũ aingĩ ũmũthĩ arĩa maretha ũteithio kuuma kũrĩ Ngai. Hĩndĩ ĩmwe aathaithire Jehova ũũ: “Igua mũgambo wakwa wa gũgũthaitha ngĩkũrĩragĩra.” Hihi Ngai nĩ aamũiguire? Ĩĩ. Daudi aacokire akiuga: “Ndĩ mũteithĩku: tondũ ũcio ngoro yakwa ĩgagĩkengeũka mũno.”—Thaburi 28:2, 7.

ITEMI RĨA JESU HARĨ KŨŨMĨRĨRIA ARĨA OTHE MARACAKAYA

Muoroto wa Ngai warĩ atĩ Jesu akorũo na itemi rĩa mwanya harĩ kũũmanĩrĩria. Harĩ mawĩra marĩa Jesu aaheirwo nĩ Ngai, nĩ aagĩrĩirũo ‘kuohohania kana kũũmĩrĩria arĩa athuthĩku ngoro’ na ‘kũhoragĩria arĩa othe me na kĩeha.’ (Isaia 61:1, 2) O ta ũrĩa kwarathĩtwo, Jesu nĩ aarũmbũyagia mũno andũ ‘arĩa maanogete na maatitikithĩtio mĩrigo.’—Mathayo 11:28-30.

Jesu omagĩrĩria andũ na njĩra ya kũmahe ũtaaro wa ũũgĩ, kũmarũmbũiya na wendo, na nginya kũhonia arwaru. Hĩndĩ ĩmwe, mũndũ warĩ na mangũ nĩ aathaithire Jesu akĩmwĩra ũũ: “Angĩkorũo no wende, theria.” Jesu aaringirũo nĩ tha na akĩmũcokeria: “Nĩ ngwenda! Thera.” (Mariko 1:40, 41) Na mũndũ ũcio warĩ na mangũ akĩhona.

Ũmũthĩ, Mũrũ wa Ngai ndarĩ gũkũ thĩ, kwoguo ndangĩtũũmĩrĩria ĩmwe kwa ĩmwe. No Ithe, Jehova, “Ngai ũrĩa ũmagĩrĩria andũ maũndũ-inĩ mothe,” nĩ athiaga na mbere gũteithia arĩa marĩ na thĩna. (2 Akorintho 1:3) Ta wĩcirie njĩra ici inya nene iria Ngai ahũthagĩra kũũmĩrĩria andũ.

• Bibilia. “Nĩ gũkorũo maũndũ mothe marĩa maandĩkirũo tene maandĩkirũo marĩ ma gũtũruta, nĩ getha kũgerera ũkirĩrĩria witũ na kũgerera kũmĩrĩrio nĩ Maandĩko tũgĩe na kĩĩrĩgĩrĩro.”—Aroma 15:4.

• Roho Mũtheru wa Ngai. Kahinda kanini thutha wa Jesu gũkua, kĩũngano gĩa Gĩkristiano nĩ kĩagĩire na ihinda rĩa thayũ. Nĩkĩ? “Nĩ gĩetigĩrĩte Jehova na gĩgatũũra kũringana na hinya ũrĩa kĩaheagwo nĩ roho mũtheru.” (Atũmwo 9:31) Roho mũtheru, hinya wa wĩki wa Ngai, nĩ ũkoragwo na ũhoti mũnene. Ngai no aũhũthĩre kũũmĩrĩria mũndũ o wothe arĩ thĩna-inĩ o wothe.

• Mahoya. Bibilia ĩtwĩraga ũũ: “Mũtigatangĩkage nĩ ũndũ o na ũrĩkũ, no maũndũ-inĩ mothe menyithagiai Ngai maũndũ marĩa mũbataraga . . . naguo thayũ wa Ngai ũrĩa ũkĩrĩte ũtaũku wothe nĩ ũrĩgitagĩra ngoro cianyu na meciria manyu kũgerera Kristo Jesu.”—Afilipi 4:6, 7.

• Akristiano Arĩa Angĩ no matuĩke arata a ma arĩa tũngĩhoka hĩndĩ ya thĩna. Mũtũmwo Paulo aatarĩirie atĩ arĩa maarutithanagia wĩra nao ‘nĩ maamũmĩrĩirie mũno’ mahinda-inĩ ma “mĩtangĩko . . . yothe na mĩnyamaro.”—Akolosai 4:11; 1 Athesalonike 3:7.

No hihi wahota gũkorũo ũkĩyũria ũrĩa ũndũ ũcio ũngĩhoteka. Rekei twĩcirie ũhoro wa andũ macemanĩtie na mathĩna ta marĩa magwetetwo gĩcunjĩ-inĩ kĩa mbere. O ta andũ acio, no wone atĩ Ngai nĩ ahingagia kĩĩranĩro gĩkĩ gĩake: “O ta ũrĩa mwana oomagĩrĩrio nĩ nyina, noguo na niĩ ndĩmũũmĩrĩria.”—Isaia 66:13, The Holy Bible in Gĩkũyũ Language.

RĨRĨA WĨRA WAGĨTE

Setha oigire ũũ: “Twakorirũo tũtarĩ wĩra ihinda-inĩ rĩmwe tũrĩ na mũtumia wakwa. Kwa ihinda rĩa mĩaka ĩrĩ twateithagio nĩ andũ a famĩlĩ na mawĩra ma ibarũa. Nĩ ũndũ ũcio mũtumia wakwa Priscilla, agĩkua ngoro mũno, na niĩ ngĩigua itarĩ kĩene.

“Twahiũranirie na ũndũ ũcio atĩa? Priscilla nĩ eeririkanagia kaingĩ ciugo cia Jesu thĩinĩ wa Mathayo 6:34. Oigire atĩ tũtiagĩrĩirũo gwĩtanga nĩ ũndũ wa rũciũ tondũ o mũthenya nĩ ũrĩ mĩtangĩko yaguo. Ningĩ mahoya make ma kuuma ngoro nĩ maamũheire hinya wa gũthiĩ na mbere. Na niĩ nĩ ndomĩrĩirio nĩ Thaburi 55:22. O ta mwandĩki wa Thaburi, nĩ ndarekereirie mũrigo wakwa harĩ Jehova, na akĩndirĩrĩra. O na gũtuĩka rĩu nĩ ndonire wĩra, tũhũthĩtie ũtũũro witũ o ta ũrĩa Jesu oigire thĩinĩ wa Mathayo 6:20-22. Makĩria ma ũguo, nĩ tũkuhĩrĩirie Ngai makĩria na tũgakũhanĩrĩria makĩria.”

Jonathan ataarĩirie ũũ: “Rĩrĩa biacara ya famĩlĩ yaharire, nĩ ndetigĩrire mũno ndeciria ũhoro wa ihinda rĩũkĩte. Kĩyo kĩa mĩaka 20 kĩorĩire thĩ nĩ ũndũ wa bũrũri kwaga mbeca. Tũkĩambĩrĩria kũnegenanagia na mũtumia wakwa nĩ ũndũ wa thĩna wa mbeca. O na tũtingĩahũthĩrire kandi ya kũgũra indo tondũ tuonaga ta ĩngĩregwo.

“No Kiugo kĩa Ngai na roho wake nĩ ciatũteithirie gũtua matua mega. Nĩ nderutire gwĩtĩkĩra wĩra o wothe, na tũkĩnyihanyihia mahũthĩro maitũ. Ningĩ nĩ twateithĩrĩirio nĩ Aira a Jehova arĩa angĩ. Nĩ maatũteithirie kwĩyona tũrĩ a bata na magĩtũteithia hĩndĩ ĩrĩa kwaritũhĩte mũno.”

RĨRĨA KĨHIKO KĨAHARAGANA

Raquel oigire ũũ: “Rĩrĩa mũthuri wakwa aandigire, ndatuurirũo mũno na ngĩigua ndakarĩte. Ngĩiyũrũo nĩ kĩeha kĩnene. No nĩ ndakuhĩrĩirie Ngai, na akĩnyũmĩrĩria. Thayũ wa Ngai nĩ wagitagĩra ngoro yakwa ndamũhoya o mũthenya. Nĩ ta aahonagia ironda cia ngoro yakwa.

“Ningĩ nĩ ũndũ wa Kiugo gĩake Bibilia, nĩ ndatooririe marakara marĩa ndaarĩ namo. Ndecũranirie ciugo cia mũtũmwo Paulo, thĩinĩ wa Aroma 12:21: ‘Ndũkanareke ũũru ũgũtoorie, ĩndĩ tooragia ũũru na njĩra ya gwĩkaga wega.’

“Mũrata ũmwe wakwa nĩ aandeithirie kuona bata wa gũthiĩ na mbere na ũtũũro. Aanyonirie Kohelethu 3:6 na akĩnjĩra atĩ nĩ kũrĩ hĩndĩ tũbataraga ‘kũũrũo nĩ kĩndũ.’ Ũtaaro ũcio warĩ mũritũ mũno, no nĩguo ndabataraga. Rĩu ndĩ na mĩoroto ĩngĩ ya ũtũũro.”

Elizabeth oigire ũũ: “Rĩrĩa kĩhiko kĩaharagana, mũndũ nĩ abataraga ũteithio. Ndaarĩ na mũrata wakoragwo ho nĩ ũndũ wakwa. Aarĩraga hamwe na niĩ, akanyũmĩrĩria, na agatũma njigue nyendetwo. Ndĩ na ma atĩ Jehova nĩwe wamũhũthagĩra kũũhonia ironda cia ngoro.”

THĨNA WA MWĨRĨ KANA ŨKŨRŨ

Luis, ũrĩa ũgwetetwo gĩcunjĩ-inĩ kĩa mbere, arĩ na thĩna mũnene wa ngoro, na maita merĩ aarĩ hakuhĩ gũkua. Rĩu abataraga gwĩkĩrũo rĩera mathaa 16 o mũthenya. Oigire ũũ: “Njikaraga ngĩhoyaga Jehova kaingĩ. Na thutha wa kũhoya, nĩ njiguaga roho wa Ngai ũkĩhe hinya. Mahoya maheaga ũmĩrĩru wa gũthiĩ na mbere tondũ nĩ njĩtĩkĩtie Ngai, na nĩ njũĩ atĩ nĩ anũmbũyagia.”

Petra, ũrĩa ũrĩ na mĩaka makĩrĩa ma 80, ataaragĩria ũũ: “Nyendaga gwĩka maũndũ maingĩ no ndingĩhota. Ndikenaga ndona hinya wakwa ũgĩthira. Njiguaga nogereire na ndingĩikara itekũhũthĩra ndawa. Kaingĩ ndirikanaga ũrĩa Jesu eerire Ithe amwehererie ũndũ mũna mũritũ angĩkorũo nĩ kũngĩahotekire. No Jehova nĩ omĩrĩirie Jesu, na no anyũmagĩrĩria. Nĩ ndeithĩka tondũ hoyaga o mũthenya. Njiguaga wega makĩria thutha wa kwaria na Ngai.”—Mathayo 26:39.

Noguo Julian, ũrĩa ũkoretwo na mũrimũ wa mũnyiginyigi kwa ihinda rĩa hakuhĩ mĩaka 30 aiguaga. Oigire, “handũ ha gũikarĩra gĩtĩ kĩega kĩa wabici, rĩu njĩkaragĩra gakaari ga gũtindĩkwo. No ũtũũro wakwa nĩ ũrĩ muoroto tondũ ndĩũhũthĩraga gũtungatĩra andũ arĩa angĩ. Kũheana no kũnyihanyihie mathĩna, na Jehova nĩ ahingagia kĩĩranĩro gĩake atĩ nĩ arĩtũũmagĩrĩria hĩndĩ ĩrĩa twabatara ũteithio. O ta mũtũmwo Paulo, no njuge ũũ ndi na ma: ‘Nĩ gũkorũo maũndũ-inĩ mothe nĩ ngoragwo na hinya kũgerera ũrĩa ũheaga hinya.’”—Afilipi 4:13.

GŨKUĨRŨO NĨ MŨNDŨ WENDETE

Antonio oigire ũũ: “Rĩrĩa baba aakuire aksidenti-inĩ, ndietĩkirie ũndũ ũcio. Ndonire ũrĩ ũndũ ũtarĩ wa kĩhooto tondũ aarĩ o mũthii wa magũrũ. No hatirĩ ũndũ ingĩekire. Aaikarire thikũ ithano atekwĩigua agĩcoka agĩkua. Nĩ ndegiragĩrĩria ndikarĩre tũrĩ na mami, no ndatigwo ndĩ wiki ndaarĩraga mũno. Ndatindaga ngĩyũria, ‘Gwathire ũguo nĩkĩ?’

“Mahinda-inĩ macio maritũ, nĩ ndahoyaga Jehova ahe thayũ na andeithie kũũmĩrĩria. Na o kahora, nĩ ndacokereirie. Nĩ ndaririkanire Bibilia nĩ ĩtaaragĩria atĩ ‘maũndũ materĩgĩrĩirũo’ no makore mũndũ o wothe. Tondũ Ngai ndangĩhenania, ndĩ na ma atĩ nĩ ngona baba rĩngĩ hĩndĩ ĩrĩa akaariũkio.”—Kohelethu 9:11; Johana 11:25; Tito 1:2.

Robert, ũrĩa ũgwetetwo gĩcunjĩ-inĩ kĩa mbere, arĩ na mawoni ta macio. Oigire ũũ: “Tũrĩ na mũtumia wakwa nĩ twagĩire na thayũ wa meciria ũrĩa ũgwetetwo thĩinĩ wa Afilipi 4:6, 7. Twagĩire na thayũ ũcio nĩ ũndũ wa kũhoya Jehova. Thayũ ũcio wa meciria nĩ watũhotithirie kwaria na andũ a mohoro ũhoro wĩgiĩ kĩĩrĩgĩrĩro gitũ gĩa kũriũka. O na gũtuĩka aksidenti ĩyo ya ndege nĩ yaninire mwana witũ, no tũririkanaga mahinda mega marĩa twakenaga tũrĩ hamwe. Twendaga gwĩciria o ũhoro wa mahinda macio mega.

“Rĩrĩa twerirũo nĩ Aira a Jehova arĩa angĩ atĩ nĩ maatuonire TV-inĩ tũgĩtaarĩria wĩtĩkio witũ tũhoreire, twameerire atĩ twahotire gwĩka ũguo nĩ ũndũ wa mahoya maingĩ marĩa maahoetwo nĩ ũndũ witũ. Njĩtĩkĩtie itarĩ na nganja atĩ Jehova aatũmagĩrĩria kũgerera ndũmĩrĩri ciao nyingĩ.”

O ta ũrĩa ngerekano icio ironania, Ngai no omĩrĩrie andũ marĩ na mathĩna na moritũ matiganĩte. Ĩĩ we Ngai no akũũmĩrĩrie? Gũtekũmakania mathĩna marĩa ũrĩhiũranagia namo ũtũũro-inĩ, nĩ harĩ njĩra ũngĩũmĩrĩrio nayo mahinda-inĩ maya maritũ.b Na githĩ ti wega ũhoyage Jehova ũteithio! Nĩwe “Ngai ũrĩa ũmagĩrĩria andũ maũndũ-inĩ mothe.”​—2 Akorintho 1:3.