ŨTEITHIO KŨRĨ FAMĨLĨ
Ũrĩa Ũngĩteithia Mwana Waku Gwĩka Wega Mathomo-inĩ
Mwana waku ndatindanagĩra na maũndũ ma cukuru, na nĩ agaga gũthoma na gwĩka wĩra wa cukuru. Moimĩrĩro nĩ marĩkũ? Akagwa kĩgeranio na agakorũo na mĩthiĩre mĩũru. Ũngĩteithia mwana waku atĩa gwĩka wega mathomo-inĩ?
Maũndũ marĩa wagĩrĩirũo kũmenya
Kũmũhatĩka no thĩna kuongagĩrĩra. Kũhatĩka mwana waku gũtũmaga agĩe na mĩtangĩko arĩ cukuru na arĩ mũciĩ! Nĩguo anyihanyihie mĩtangĩko, mwana waku no aheenanie, ahithe moimĩrĩro ma igeranio iria agwĩte, kana age gũthiĩ cukuru. Thĩna no kũneneha ũngĩneneha.
Iheo no ikorũo na moimĩrĩro moru. Mũthuri ũmwe wĩtagwo Andrew ooigire ũũ: “Nĩguo twĩkĩre mũirĩtu witũ ngoro, nĩ twamũheaga iheo rĩrĩa ahĩtũka igeranio, no ũndũ ũcio watũmaga ecirie o ũhoro wa iheo icio. Angĩagũire kĩgeranio, aaiguaga ũũru mũno nĩ ũndũ wa kwaga kũheo kĩheo makĩria ma ũrĩa aaiguaga nĩ ũndũ wa kũgwa kĩgeranio.”
Gũcokereria arimũ mahĩtia gũtingĩguna mwana waku. Mwana waku ahota gũtua atĩ mũndũ ndabataraga gwĩkĩra kĩyo nĩguo agĩe na moimĩrĩro mega. Ningĩ ahota kwĩruta gũcokagĩrĩria andũ arĩa angĩ mahĩtia make na erĩgagĩrĩre arĩa angĩ mamweheragĩrie mathĩna make. Na njĩra nguhĩ, mwana waku no age kwĩruta ũndũ wa bata ũngĩmũteithia atuĩka mũndũ mũgima—gwĩtĩkagĩra moimĩrĩro ma ciĩko ciake.
Ũrĩa ũngĩka
Giragĩrĩria marakara maku. Ũngĩkorũo ũrakarĩte, wĩtheme kwarĩrĩria na mwana waku moimĩrĩro ma igeranio ciake. Mũthuri ũmwe wĩtagwo Brett ooigire ũũ: “Tũrĩ na mũtumia wakwa nĩ tũgĩaga na moimĩrĩro mega rĩrĩa twaria tũrĩ ahooreru na tũtarakarĩte.”
Ũtaaro wa Bibilia: ‘Hiũhaga gũthikĩrĩria, ndũkahiũhage kwaria, na ndũkahiũhage kũrakara.’—Jakubu 1:19.
Menya thĩna nĩ ũrĩkũ. Itũmi iria ciũĩkaine mũno cia kũgwa kĩgeranio nĩ kũũgitwo, gũcenjio cukuru, gwĩtigĩra igeranio, mathĩna ma famĩlĩ, kwaga toro, kwaga mũtaratara wa gũthoma, kana kwaga kũiga meciria gĩthomo-inĩ. Ndũgatue na ihenya atĩ mwana waku nĩ kĩgũũta.
Ũtaaro wa Bibilia: “Mũndũ ũrĩa wonanagia ũtaũku ũndũ-inĩ mũna nĩ arĩgaacagĩra.”—Thimo 16:20.
Tigĩrĩra harĩ na handũ hega ha gũthomera. Thondeka mũtaratara wa hĩndĩ ĩrĩa arĩthomaga na akaruta wĩra wa cukuru. Tigĩrĩra harĩ na handũ mwana angĩkagĩra wĩra wa cukuru ategũtahwo meciria (nĩ indo ta TV kana thimũ). Banga mahinda manini manini ma gwĩka wĩra wa cukuru nĩguo mwana waku akahota kũiga meciria ũndũ-inĩ ũcio. Mũthuri ũmwe wĩtagwo Hector kuuma Njĩrĩmani ooigire ũũ: “Kĩgeranio gĩakuhĩrĩria, tũcokagĩra maũndũ manini o mũthenya handũ ha gweterera nginya ndagĩka ya mũico.”
Ũtaaro wa Bibilia: “Maũndũ mothe nĩ marĩ ihinda rĩamo.”—Kohelethu 3:1.
Mwĩkĩre ngoro gũthoma. O ũrĩa mwana waku egũtaũkĩrũo wega nĩ ũrĩa agunĩkaga ihinda-inĩ rĩrĩ athiĩ cukuru, noguo ekũigua ekĩrĩtwo ngoro gũthiĩ na mbere gũthoma. Kwa ngerekano, mathabu no mamũteithie kũmenya ũrĩa angĩhũthĩra mbeca ciake.
Ũtaaro wa Bibilia: “Gĩa na ũũgĩ, gĩa na ũtaũku. . . . Ũtĩage mũno.”—Thimo 4:5, 8.
Geria ũũ: Teithĩrĩria mwana waku agĩka wĩra wa cukuru, no ndũkamwĩkĩre. Andrew ooigire ũũ: “Mũirĩtu witũ aamenyerete ũteithio witũ nginya akaga kũhũthĩra meciria make.” Ruta mwana waku ũrĩa angĩka wĩra wa cukuru arĩ wiki.