Hihi no Ũnyitanĩre Wĩra-inĩ wa Kũhunjia Mũthenya wa Kiumia?

1. Tũngĩĩruta atĩa kuumana na ũrĩa Paulo na andũ arĩa maahunjagia nao Filipi meekire?

¹ Kwarĩ mũthenya wa Thabatũ, mũthenya ũrĩa Ayahudi aingĩ thĩinĩ wa itũũra rĩa Filipi maahurũkaga. Paulo na andũ arĩa maahunjagia nao maaceerete itũũra rĩu marĩ rũgendo-inĩ rwao rwa ũmishonarĩ. O nao mangĩahurũkire kuuma ũtungata-inĩ mũthenya ũcio, gũtirĩ mũndũ ũngĩamarutire mahĩtia. No rĩrĩ, o nĩ mamenyaga atĩ Ayahudi nĩ maacemanagia nja ya itũũra rĩu kũhoya, kwoguo makĩhũthĩra wega mweke ũcio kũmahunjĩria. No mũhaka akorũo Paulo hamwe na arĩa maahunjagia nao nĩ maakenire mũno rĩrĩa Ludia na andũ a nyũmba yake yothe maabatithirio. (Atũm. 16:13-15) Tondũ andũ aingĩ ũmũthĩ mahurũkaga mũthenya wa Kiumia-rĩ, na githĩ ti wega kũhũthĩra mũthenya ũcio kũmahunjĩria?

2. Nĩ moritũ marĩkũ andũ a Jehova matooretie nĩguo mahote kũhunjagia mũthenya wa Kiumia mategũthĩnio?

² Gũtooria Ũkararia wa Kũhunjia Mũthenya wa Kiumia: Mwaka-inĩ wa 1927, andũ a Jehova nĩ meekĩrirũo ngoro mahũthagĩre mathaa maigana ũna ma mũthenya wa Kiumia ũtungata-inĩ. Ũndũ ũcio ũkĩrehe ũkararia o rĩo. Andũ aingĩ bũrũri-inĩ wa Amerika makĩnyitwo nĩ ũndũ wa kuuna mawatho ma Thabatũ ya mũthenya wa Kiumia, kwagithia andũ thayũ, na kwendia matarĩ na marũa. No andũ a Jehova matiakuire ngoro. Mĩaka-inĩ ya 1930, makĩbanga ahunjia a ciũngano cia hakuhĩ magacemania nĩguo mahunjie itũũra rĩna. Ahunjia mangĩanyitirũo, makoragwo marĩ aingĩ ũũ atĩ thigari itiahotaga kũrũgamia wĩra wao. Hihi wee kũna nĩ ũkenagĩra ũrĩa ariũ acio a Ithe witũ meeimire nĩguo tũhote kũhunjagia mũthenya wa Kiumia tũtegũthĩnio?

3. Nĩ kĩĩ gĩtũmaga mũthenya wa Kiumia ũkorũo ũrĩ mwega wa kũhunjia?

³ Mũthenya Mwega Makĩria wa Kũhunjia: Andũ aingĩ matithiaga wĩra mũthenya wa Kiumia, makoragwo mĩciĩ. Makoragwo mahurũkĩte. Andũ amwe arĩa mathiaga kanitha no metĩkĩre kwaria ũhoro wa Ngai makĩria mũthenya ũcio. Angĩkorũo tũthiaga mĩcemanio iitũ mũthenya wa Kiumia, tũkoragwo twĩhumbĩte ũrĩa twagĩrĩirũo kwĩhumba rĩrĩa tũrathiĩ kũhunjia. Kwoguo-rĩ, githĩ to tũkĩbange gũthiĩ kũhunjia mbere kana thutha wa mĩcemanio. Angĩkorũo nĩ ũkũbatara-rĩ, no ũkuue tũirio tũnini.

4. Nĩ gĩkeno kĩrĩkũ tũngĩgĩa nakĩo tũngĩhũthĩra ihinda rĩna rĩa mũthenya wa Kiumia kũhunjia?

⁴ Angĩkorũo nĩ tũkũhũthĩra gĩcunjĩ kĩna kĩa mũthenya wa Kiumia kũhunjia-rĩ, ithuĩ no tũkuona ihinda rĩrĩa tũrabatara rĩa kũhurũka. Na tweka ũguo tũkũhurũka tũiganĩre, nĩ ũndũ wa kũnyitanĩra ũtungata-inĩ ũrĩa mũtheru. (Thim. 19:23, NW) O na no tũgĩe na gĩkeno gĩa kuona mũndũ ta Ludia!