ŨTHUTHURIA INTANETI-INĨ
Ũthuthuria
INTANETI-INĨ
Gĩkũyũ
ũ
  • ĩ
  • ũ
  • BIBILIA
  • MABUKU
  • MĨCEMANIO
  • km 4/13 kar. 3-4
  • Ũngĩra Mũithĩramu Atĩa?

Hatirĩ video.

Tũrekere, nĩ hagĩa thĩna kũhingũra video ĩyo.

  • Ũngĩra Mũithĩramu Atĩa?
  • Ũtungata Witũ wa Ũthamaki—2013
Ũtungata Witũ wa Ũthamaki—2013
km 4/13 kar. 3-4

Ũngĩra Mũithĩramu Atĩa?

1 Hihi nĩ ũrĩ wahunjĩria Mũithĩramu? Angĩkorũo nĩ ũrĩ weka ũguo, no gũkorũo nĩ wamenyire atĩ makoragwo marũmĩtie wĩtĩkio wao mũno harĩ Ngai. O na kũrĩ ũguo, matiũĩ maũndũ maingĩ megiĩ Paradiso gũkũ thĩ ta ũrĩa ĩrathĩtwo nĩ anabii a Jehova, na no twende kwaranĩria nao igũrũ rĩgiĩ kĩĩrĩgĩrĩro kĩu. (1 Tim. 2:3, 4) Ũhoro ũyũ ũrĩ haha wagĩrĩirũo gũgũteithia ũmahe ũira na njĩra njega.

2 Aithĩramu metĩkĩtie Alla, kana Ngai, na magetĩkia atĩ Muhammadi nĩ mũnabii wa Ngai. Ibuku rĩao itheru nĩ Korani, na ndini yao nĩ Ũithĩramu, na ũguo nĩ kuuga “gwathĩka.” Korani yugaga atĩ kũhenania na kũhoya ngai cia mĩhianano nĩ mahĩtia, Ngai nĩ ũmwe, na atĩ ti gĩcunjĩ kĩa Ũtatũ. Ningĩ, ĩrutanaga atĩ muoyo ndũkuaga, ũhoro wa mwaki wa icua, na atĩ paradiso ĩgaakorũo igũrũ. Aithĩramu nĩmetĩkĩrĩte atĩ Bibilia nĩ Kiugo kĩa Ngai no magetĩkia atĩ nĩĩgarũrĩtwo, na magetĩkia atĩ Korani ĩrĩ o na rũthiomi rũrĩa yaandĩkirũo naruo mbere, itũire ĩrĩ theru.

3 Korũo ũrĩ na Ũrata, Hũthĩra Ũũgĩ na Ũtaũku: Rĩrĩa ũraaria na Mũithĩramu korũo ũrĩ na ũrata na ũkorũo na ũũgĩ. (Thim. 25:15) Ririkana atĩ wĩtĩkio wa Aithĩramu nĩ ũkoragwo ũrĩ mũrũmu na atĩ merutĩte na njĩra ya gũcokacokera. Kwogwo, gũtindanĩra na morutani ma ndini na gũthuthuria wendi wa Ngai nĩ ũrĩkũ, ti ũndũ makoretwo magĩĩka. (Rom. 12:2) Nĩguo tũmateithie, nĩ tũrabatara gũkorũo na ũtaũku na ũkirĩrĩria.—1 Kor. 9:19-23.

4 Wĩtheme kũhũthĩra ciugo ingĩtũma Mũithĩramu one ta ũrĩ wa ndini iria ciĩĩtaga cia Gĩkristiano. Mwĩre cararũkũ atĩ wee ndũrĩ Mũgathoreki kana wa ndini ya Kĩĩprotestanti, atĩ wee ũrĩ ngũrani. Ĩta Bibilia Ibuku rĩa Ngai. Tondũ Aithĩramu nĩ mathũire ciugo “Mwana wa Ngai” nĩ wega kwaga kũhũthĩra kana kwarĩrĩria ũndũ ũcio nginya rĩrĩa agaakũra kĩĩroho. O na kũrĩ ũguo, no warie ũhoro wĩgiĩ Jesu, ũkĩmwĩta mũnabii kana mũtũmwo. Wĩtheme gũkararania nake. Ũngĩona atĩ nĩ arakara, wĩyeherere kahora.

5 Nĩ wega kwaria na mũndũ ũmwe ithenya rĩa marĩ gĩkundi. Maita maingĩ nĩ wega atumia mahunjĩrie atumia, arũme mahunjĩrie arũme. Hatarĩ nganja, rĩmwe no kwage kũhoteka gwĩka ũguo, no nĩ wega kũhũthĩra ũũgĩ. Ningĩ, Aithĩramu nĩmaroraga mũno ũrĩa atumia mehumbaga na makegemia. Aarĩ a Ithe witũ nĩ magĩrĩire kũmenya ũndũ ũcio.—1 Kor. 10:31-33.

6 Maũndũ Marĩa Mũngĩarĩrĩria: Aria cararũkũ ũhoro wĩgiĩ ũnene na wendo wa Ngai. Ndũkaage kũmeera atĩ wee nĩ wĩtĩkĩtie na ma atĩ Ngai nĩ ũmwe (no ti Ũtatũ), na atĩ ti wega kũhoya mĩhianano. Aria ũhoro wa waganu ũrĩa ũrĩ thĩinĩ wa thĩ—mbaara, rũmena na ngahĩha cia kĩĩndũrĩrĩ, na ũhinga ũrĩa ũroneka wega harĩ andũ a ndini.

7 Thĩinĩ wa broshua Mwongozo wa Mungu—Njia Yetu ya Kwenda Paradiso nĩ ũkuona maũndũ mangĩ mangĩhũthĩrũo kwaria na Mũithĩramu. Ĩhaarĩirio ĩgucĩrĩrie Aithĩramu arĩa maikaraga kũrĩa matagirĩtio kwĩruta Bibilia.

8 No uuge ũũ: “Ndĩrerutanĩria mũno kwaria na Aithĩramu. Ngoretwo ngĩthoma ũhoro wĩgiĩ ndini yanyu na nĩ menyete atĩ nĩ mwĩtĩkĩtie Ngai ũmwe wa ma na anabii ake othe. [Eterera acokie.] No nyende kwaria nawe ũhoro wĩgiĩ mũnabii ũmwe wa tene warathire ũhoro wa thĩ kũgarũrũo ĩtuĩke paradiso. No ngũthomere ũrĩa mũnabii ũcio aandĩkire? [Thoma Isaia 11:6-9.] Ũrathi ũcio ũtũmaga ndĩcirie ũndũ ũrĩ thĩinĩ wa Korani ũrĩa ũrĩ kabuku-inĩ gaka.” Humbũria karatathi ga 9 ka broshua Mwongozo wa Mungu, na ũthome ũhoro ũrĩa wandĩkĩtwo na ndemwa ngwatu rangi, ũrĩa ũroiga atĩ arĩa athingu makagaya thĩ. Angĩkorũo nĩ arakenio, thiĩ na mbere na ndeereti ũkĩarĩrĩria kĩbungo kĩa 7 nginya gĩa 9 karatathi-inĩ kau kangĩ. Mũtigĩre broshua, na ũbange gũcoka.—Nĩguo wone ũndũ ũngĩ ũngĩhũthĩra rora Huduma ya Ufalme Yetu Februarĩ 1998, karatathi ga 6, kĩbungo kĩa 27.

9 Ũkĩũria mũndũ atĩ mwĩrute broshua Mwongozo wa Mungu, nĩ wega kuuga atĩ nĩ ndeereti no ti wĩruti wa Bibilia. Mwarĩkia kwĩruta broshua, mũrutwo no ehaarĩrie gũthoma broshua Ũhoro Mwega kana ibuku Bibilia Ĩrutanaga. Mabuku maitũ marĩa mahaarĩirio nĩ ũndũ wa Aithĩramu nĩ broshua Imani ya Kweli—Siri ya Kuwa na Maisha Yenye Furaha, trakti Jinsi ya Kuipata Barabara ya Kwenda Kwenye Paradiso, na kabuku The Time for True Submission to God.

10 Tũrĩ na ũmenyo ũcio wa wĩtĩkio wa Gĩithĩramu, no tũhote kũmenya mabuku marĩa tũngĩhũthĩra rĩrĩa tũrahunjĩria Aithĩramu na njĩra ĩrĩa tũngĩhũthĩra tũkĩmahunjĩria. Jehova arorathima kĩo giitũ gĩa gũteithia andũ othe nĩguo makaĩre rĩĩtwa rĩake na mahonokio.—Atũm. 2:21.

    Mabuku ma Gĩkũyũ (1991-2025)
    Uma
    Ingĩra
    • Gĩkũyũ
    • Tũma
    • Thondeka
    • Copyright © 2025 Watch Tower Bible and Tract Society of Pennsylvania
    • Mawatho ma Ũhũthĩri
    • Ũigi wa Hitho
    • Ũrĩa Ũhoro Ũgitagirũo
    • JW.ORG
    • Ingĩra
    Tũma