Ngai endaga tũgaatũũra na thayũ na gĩkeno thĩinĩ wa paradiso gũkũ thĩ tene na tene!

No wahota kwĩyũria, ‘Ũndũ ũcio ũngĩhoteka atĩa?’ Bibilia yugaga atĩ Ũthamaki wa Ngai nĩ ũgaatũma ũndũ ũcio ũhoteke, ningĩ wendi wa Ngai nĩ atĩ andũ othe merute ũhoro wĩgiĩ Ũthamaki ũcio na muoroto wake harĩ ithuĩ.​—⁠Thaburi 37:​11, 29; Isaia 9:⁠7.

Ngai endaga tũgunĩke.

O ta ũrĩa mũciari mwega endagĩra ciana ciake maũndũ mega, Ithe witũ wa igũrũ endaga tũgaatũũra na gĩkeno tene na tene. (Isaia 48:​17, 18) Eranĩire atĩ “mũndũ ũrĩa wĩkaga wendi wa Ngai atũũraga tene na tene.”​—⁠1 Johana 2:⁠17.

Ngai endaga tũrũmĩrĩre njĩra ciake.

Bibilia yugaga atĩ Mũũmbi witũ nĩ endaga ‘gũtũruta ũhoro wĩgiĩ njĩra ciake’ nĩguo “tũgeragĩre tũcĩra-inĩ twake.” (Isaia 2:​2, 3) Nĩ acokanĩrĩirie “andũ . . . metanĩtio na rĩĩtwa rĩake” nĩguo mamenyithanie wendi wake thĩ yothe.​—⁠Atũmwo 15:⁠14.

Ngai endaga tũmũthathaiye tũrĩ na ũrũmwe.

Handũ ha kũgayũkania andũ, ũthathaiya mũtheru wa Jehova ũmanyitithanagia wendo-inĩ wa ma. (Johana 13:35) Nĩa ũmũthĩ mararuta andũ ũrĩa mangĩtungatĩra Ngai marĩ na ũrũmwe kũndũ guothe? Tũgũkũũria ũthuthurie ũndũ ũcio ũkĩhũthĩra kabuku gaka.

Wee ũĩ Aira a Jehova aigana? Amwe aitũ no makorũo nĩ andũ arĩa ũikaranagia nao, mũrutithanagia wĩra nao, kana arĩa mũthomaga nao. O na no tũkorũo twanateereta nawe ũhoro wa Bibilia. Ithuĩ nĩ ithuĩ a, na tũhunjagĩria andũ ũhoro ũrĩa twĩtĩkĩtie nĩkĩ?

Tũhaana o ta andũ arĩa angĩ. Tuumĩte mĩrerere-inĩ na mĩikarĩre ĩtiganĩte. Amwe aitũ maarĩ a ndini ingĩ, nao angĩ matietĩkĩtie Ngai. O na kũrĩ ũguo, tũtanatuĩka Aira a Jehova, o ũmwe witũ nĩ aahũthĩrire ihinda gũthuthuria morutani ma Bibilia na kinyi. (Atũmwo 17:11) Tũgĩtĩkania na ũrĩa twerutire, na o mũndũ agĩĩtuĩra itua rĩa gũthathaiya Jehova Ngai.

Kwĩruta Bibilia nĩ gũtũgunaga. O ta mũndũ ũngĩ o wothe, nĩ tũhiũranagia na mathĩna na mawathe maitũ ene. No nĩ ũndũ wa kwĩrutanĩria kũhũthĩra motaaro ma Bibilia ũtũũro-inĩ witũ wa o mũthenya, mũtũũrĩre witũ nĩ wagĩrĩte na njĩra nene. (Thaburi 128:​1, 2) Ũcio nĩ ũndũ ũmwe ũtũmaga tũhunjĩrie andũ arĩa angĩ maũndũ mega marĩa twĩrutĩte kuuma Bibilia-inĩ.

Tũtũũraga kũringana na ithimi cia Ngai. Ithimi icio, iria irutanagwo nĩ Bibilia, itũmaga tũgĩe na gĩkeno na tũtĩe andũ arĩa angĩ, o hamwe na kuonania ngumo ta wĩhokeku na ũtugi. Nĩ itũmaga tũtuĩke andũ mangĩĩhokeka na marĩ kĩyo, na igatũma famĩlĩ igĩe na ũrũmwe na ikorũo na mĩtugo mĩega. Kũmenya atĩ “Ngai ndarĩ mũthutũkanio,” gũtũmaga tũkorũo tũrĩ famĩlĩ ĩmwe ya kĩĩroho thĩ yothe, ĩtarĩ rũmena rwa gĩĩkabira kana gĩũteti. O na gũtuĩka tũhaana o ta andũ arĩa angĩ, tũrĩ andũ a mwanya.​—⁠Atũmwo 4:13; 10:​34, 35.

• Aira a Jehova mahaanaine na andũ arĩa angĩ na njĩra ĩrĩkũ?

• Aira a Jehova mamenyete ithimi irĩkũ nĩ ũndũ wa kwĩruta Bibilia?

Andũ aingĩ meciragia atĩ Aira a Jehova nĩ rĩĩtwa rĩa ndini njerũ. O na kũrĩ ũguo, mĩaka makĩria ma 2,700 mĩhĩtũku, ndungata cia Ngai ũrĩa ũmwe wa ma cietagwo “aira” ake. (Isaia 43:​10-12) Gũkinyĩria mwaka wa 1931, twetagwo Arutwo a Bibilia. Nĩ kĩĩ gĩatũmire twambĩrĩrie kũhũthĩra rĩĩtwa Aira a Jehova?

Nĩ rĩmenyithanagia Ngai witũ. Kũringana na maandĩko ma tene, rĩĩtwa rĩa Ngai, Jehova, rĩonekaga maita ngiri nyingĩ thĩinĩ wa Bibilia. Thĩinĩ wa Bibilia nyingĩ rĩĩtwa rĩu nĩ rĩeheretio hagekĩrũo marĩĩtwa ma ũnene ta Mwathani kana Ngai. Ĩndĩ, Ngai wa ma rĩrĩa eeguũrĩirie Musa na rĩĩtwa rĩake, Jehova, aamwĩrire ũũ: “Rĩu nĩrĩo rĩĩtwa rĩakwa tene na tene.” (Thama 3:15) Na njĩra ĩyo, akĩĩyonania atĩ we nĩ ngũrani na ngai ciothe cia maheeni. Nĩ twĩrahagĩra gwĩtanio na rĩĩtwa itheru rĩa Ngai.

Nĩ rĩonanagia wĩra ũrĩa tũrutaga. Andũ aingĩ a tene, nĩ maarutaga ũira wĩgiĩ wĩtĩkio wao harĩ Jehova, na wa mbere gwĩka ũguo arĩ Habili, mũndũ warĩ mũthingu. Mĩaka-inĩ ĩrĩa yarũmĩrĩire, Nuhu, Iburahimu, Sara, Musa, Daudi, hamwe na angĩ, nĩ moongererekire harĩ ‘itu rĩu inene rĩa aira.’ (Ahibirania 11:4–12:⁠1) O ta ũrĩa mũndũ angĩruta ũira igooti-inĩ nĩ ũndũ wa mũndũ ũtehĩtie-rĩ, nĩ twĩhotorete kũmenyithania ũhoro wa ma wĩgiĩ Ngai witũ.

Twĩgerekanagia na Jesu. Bibilia ĩmwĩtaga “mũira ũrĩa mwĩhokeku na wa ma.” (Kũguũrĩrio 3:14) Jesu we mwene ooigire atĩ nĩ ‘aamenyithirie andũ rĩĩtwa rĩa Ngai’ o akĩrutaga “ũira wĩgiĩ ũhoro ũrĩa wa ma” ũkoniĩ Ngai. (Johana 17:26; 18:37) Kwoguo, arũmĩrĩri a ma a Jesu no mũhaka metanio na rĩĩtwa rĩa Jehova na marĩmenyithanie. Ũguo ­nĩguo Aira a Jehova merutanagĩria gwĩka.

• Arutwo a Bibilia maambĩrĩirie kũhũthĩra rĩĩtwa Aira a Jehova nĩkĩ?

• Jehova akoretwo na aira thĩinĩ wa thĩ ihinda rĩigana atĩa?

• Nũũ Mũira ũrĩa mũnene wa Jehova?