Maandĩko ma Gĩkristiano ma Kĩngiriki nĩ magwetete Baranaba na mũtũmwo Paulo maita maingĩ. Athuri acio maatungataga marĩ arori arĩa magendaga, na maaceeragĩra ciũngano cia karine ya mbere. Maaceragĩra ciũngano nĩkĩ? Tondũ nĩ maarũmbũyagia ariũ a Ithe wao a kĩĩroho kuuma ngoro. Paulo ooigire atĩ eendaga ‘macoke magaceerere ariũ a Ithe wao’ nĩguo mamenye ũrĩa maathiaga na mbere. Nĩ eerutĩire gũthiĩ kilomita magana maingĩ nĩguo akamekĩre hinya. (Atũmwo 15:36) Arori arĩa magendaga ũmũthĩ makoragwo na wendi o ta ũcio.

Mokaga gũtwĩkĩra ngoro. O mũrori wa mũthiũrũrũko aceeragĩra ciũngano ta 20 ũguo, akahũthĩra kiumia kĩmwe na o kĩũngano maita merĩ mwaka. No tũgunĩke mũno nĩ ũmenyeru wa ariũ acio a Ithe witũ na wa atumia ao angĩkorũo nĩ mahikanĩtie. Nĩ merutanagĩria kũmenya andũ othe, ethĩ o na akũrũ, na nĩ makoragwo mehaarĩirie gũthiĩ na ithuĩ ũtungata-inĩ na tũkĩĩruta na arutwo aitũ a Bibilia. Arori acio nĩ mathiaga iceera rĩa ũrĩithi hamwe na athuri, na nĩ marutaga mĩario ya gwĩkĩra ngoro mĩcemanio-inĩ na igomano-inĩ nĩguo matwĩkĩre hinya.​—⁠Atũmwo 15:⁠35.

Marũmbũyagia andũ othe. Arori a mũthiũrũrũko nĩ marũmbũyagia mũno ũrĩa ciũngano irathiĩ na mbere kĩĩroho. Nĩ mekaga mũcemanio na athuri a kĩũngano na ndungata cia kĩũngano nĩguo mamenye ũrĩa kĩũngano kĩrathiĩ na mbere, na makamahe ũtaaro mangĩhũthĩra makĩruta wĩra wao. Nĩ mateithagia mapainia kũgaacĩra ũtungata-inĩ wao, na nĩ makenaga kũmenyana na arĩa mambĩrĩirie kũnyitanĩra na ithuĩ ica ikuhĩ, na kũigua ũrĩa marathiĩ na mbere kĩĩroho. O ũmwe wa ariũ acio a Ithe witũ erutagĩra arĩ ‘mũrutithania wĩra hamwe na ithuĩ nĩguo tũgunĩke.’ (2 Akorintho 8:23) Nĩ twagĩrĩirũo kwĩgerekania na wĩtĩkio wao na wĩrutĩri wao harĩ Ngai.​—⁠Ahibirania 13:⁠7.

• Arori a mũthiũrũrũko maceeragĩra ciũngano nĩkĩ?

• Ũngĩgunĩka atĩa nĩ iceera rĩao?

Rĩrĩa kwagĩa na gĩcanjama, Aira a Jehova mabangaga o hĩndĩ ĩyo ũrĩa megũtwara ũteithio kũrĩ ariũ a Ithe wao arĩa mahutĩtio nĩ thĩna ũcio. Kĩyo kĩu kĩonanagia ũrĩa twendanĩte kuuma ngoro o mũndũ na ũrĩa ũngĩ. (Johana 13:​34, 35; 1 Johana 3:⁠17, 18) Tũmateithagia na njĩra irĩkũ?

Nĩ tũtũmaga ũteithio wa kĩĩmbeca. Rĩrĩa ngʼaragu nene yagũmĩire Judea, Akristiano a tene thĩinĩ wa Antiokia nĩ maatũmĩire ariũ a Ithe wao acio ũteithio wa kĩĩmbeca. (Atũmwo 11:​27-30) No taguo na ithuĩ, twamenya atĩ ariũ a Ithe witũ a gĩcigo kĩna gĩa thĩ marĩ na thĩna, nĩ tũtũmaga ũteithio kũgerera ciũngano citũ nĩguo tũteithie acio marĩ thĩna-inĩ.​—⁠2 Akorintho 8:​13-15.

Nĩ tũmaheaga ũteithio wa indo iria marabatara. Athuri a kĩũngano arĩa marĩ kũu ũndũ ũcio wekĩka matigagĩrĩra atĩ nĩ mamenya harĩa o mũndũ thĩinĩ wa kĩũngano kĩao arĩ na atĩ ndarĩ ũgwati-inĩ. Kamĩtĩ ya kũheana ũteithio no ĩtabanie ũrĩa mekũheo irio, maĩ matheru ma kũnyua, nguo, gwa gũikara, na ũrigitani. Aira a Jehova aingĩ arĩa marĩ na ũũgĩ ũrĩa ũrabatarania nĩ merutagĩra kũhũthĩra mbeca ciao gũthiĩ gũteithia na gũthondeka mĩciĩ ĩrĩa mĩthũkie kana Nyũmba cia Ũthamaki. Ũrũmwe ũrĩa tũkoragwo naguo tũrĩ ithondeka na ũmenyeru ũrĩa tũgĩĩte naguo tũkĩrutithania wĩra nĩ ũtũhotithagia kũbanga maũndũ narua nĩgetha tũheane ũteithio hĩndĩ ya thĩna. O na tũgĩteithagia “arĩa twĩtainwo nao thĩinĩ wa wĩtĩkio” nĩ tũteithagia o na andũ arĩa angĩ rĩrĩa twahota, gũtekũmakania nĩ a ndini ĩrĩkũ.​—⁠Agalatia 6:⁠10.

Nĩ tũmateithagia kĩĩroho na kĩĩmeciria. Arĩa magũmĩirũo nĩ icanjama nĩ mabataraga mũno kũũmĩrĩrio. Hĩndĩ ta ĩyo, tũheagwo hinya nĩ Jehova, “Ngai mwene ũhoro wothe wa kũũmanĩrĩria.” (2 Akorintho 1:​3, 4) Nĩ tũmenyithagia acio aritũhĩre ciĩranĩro cia Bibilia, tũkamoomĩrĩria atĩ ica ikuhĩ Ũthamaki wa Ngai nĩ ũrĩniina icanjama ciothe iria irehaga ruo na mĩnyamaro.​—⁠Kũguũrĩrio 21:⁠4.

• Nĩ kĩĩ gĩtũmaga Aira a Jehova mahote kuoya ikinya narua kwagĩa icanjama?

• Arĩa magũmĩirũo nĩ thĩna tũngĩmoomĩrĩria atĩa kĩĩroho?

Kahinda kanini mbere ya Jesu gũkua, nĩ aagĩire na ndeereti na arutwo ake ana​—⁠Petero, Jakubu, Johana, na Andrea. Rĩrĩa Jesu aataaragĩria kĩmenyithia kĩa matukũ ma kũrigĩrĩria, nĩ ooririe kĩũria kĩmwe kĩa bata: “Nũũ kũna ngombo ĩrĩa njĩhokeku na njũgĩ, ĩrĩa mwathi wayo aamũrire igũrũ rĩa andũ a nyũmba yake, nĩguo ĩmaheage irio ihinda rĩrĩa rĩagĩrĩire?” (Mathayo 24:​3, 45; Mariko 13:​3, 4) Jesu eendaga kũũmĩrĩria arutwo ake atĩ arĩ “mwathi” wao, nĩ angĩamũrire arĩa mangĩakorirũo makĩhe arũmĩrĩri ake irio cia kĩĩroho hĩndĩ ciothe matukũ-inĩ ma kũrigĩrĩria. Hihi nĩa mangĩakorirũo marĩ ngombo ĩyo?

Nĩ gakundi kanini ka arũmĩrĩri a Jesu aitĩrĩrie maguta. “Ngombo” ĩyo nĩyo ĩĩtagwo Kĩama Kĩrĩa Gĩtongoragia kĩa Aira a Jehova. Ĩheaga athathaiya a Jehova irio cia kĩĩroho ihinda rĩrĩa rĩagĩrĩire. Ngombo ĩyo njĩhokeku, nĩyo tũkoragwo tũcũthĩrĩirie ĩthiĩ na mbere gũtũhe ‘rwĩga rwitũ rwa irio rwa gũtũigana ihinda rĩrĩa rĩagĩrĩire.’​—⁠Luka 12:⁠42.

Nĩ ĩramataga nyũmba ya Ngai. (1 Timotheo 3:15) Jesu nĩ aaheire ngombo ĩyo wĩra mũnene wa kũramata wĩra wa ithondeka rĩa Jehova gũkũ thĩ, ĩrorage indo ciarĩo, ĩkabanga wĩra wa kũhunjia, na ĩgatũruta kũgerera ciũngano citũ. Kwoguo nĩguo tũkorũo na kĩrĩa tũrabatara rĩrĩa tũrakĩbatara, “ngombo ĩrĩa njĩhokeku na njũgĩ” ĩtũheaga irio cia kĩĩroho kũgerera mabuku marĩa tũhũthagĩra ũtungata-inĩ, o hamwe na programu iria tũkoragwo nacio thĩinĩ wa mĩcemanio na igomano.

Ngombo ĩyo nĩ njĩhokeku harĩ ma cia Bibilia na harĩ wĩra wayo wa kũhunjia ũhoro ũrĩa mwega, na nĩ njũgĩ ũhoro-inĩ wĩgiĩ ũrĩa ĩrũmbũyagia maũndũ ma Kristo gũkũ thĩ na njĩra ya ũũgĩ. (Atũmwo 10:42) Jehova nĩ akoretwo akĩrathima wĩra wayo gũkagĩa wongerereku na irio nyingĩ cia kĩĩroho.​—⁠Isaia 60:22; 65:⁠13.

• Nũũ waamũrirũo nĩ Jesu aheage arutwo ake irio cia kĩĩroho?

• Nĩ na njĩra irĩkũ ngombo ĩyo ĩkoragwo ĩrĩ njĩhokeku na njũgĩ?