Hĩndĩ ya karine ya mbere, gakundi kanini ka “atũmwo na athuri” arĩa maarĩ Jerusalemu, nĩko gaatungataga karĩ kĩama kĩrĩa gĩatongoragia gũtua matua ma bata makoniĩ kĩũngano gĩothe kĩa Akristiano aitĩrĩrie maguta. (Atũmwo 15:⁠2) Nĩguo matue itua maraiguithanĩria, maathuthuragia ũrĩa Maandĩko moigĩte na magaathĩkĩra ũtongoria wa roho wa Ngai. (Atũmwo 15:25) Ĩyo noyo njĩra ĩrĩa ĩrũmagĩrĩrũo ũmũthĩ.

Nĩ kĩhũthagĩrũo nĩ Ngai gwĩka wendi wake. Ariũ a Ithe witũ acio aitĩrĩrie maguta arĩa matungataga marĩ Kĩama Kĩrĩa Gĩtongoragia, nĩ mathingataga mũno Kiugo kĩa Ngai na makoragwo na ũmenyeru mũnene wa gũtabania maũndũ na gwĩka maũndũ ma kĩĩroho. Macemanagia o kiumia kwarĩrĩria mabataro ma thiritũ ya ariũ a Ithe witũ a thĩ yothe. O ta karine-inĩ ya mbere, ũtaaro uumĩte Bibilia-inĩ nĩ ũheanagwo rĩmwe kũgerera marũa, arori arĩa magendaga, kana kũgerera andũ angĩ. Ũndũ ũcio ũrehaga ũrũmwe mwĩcirĩrie-inĩ na mwĩkĩre wa maũndũ gatagatĩ-inĩ ka andũ a Ngai. (Atũmwo 16:​4, 5) Kĩama Kĩrĩa Gĩtongoragia nĩ kĩrũgamagĩrĩra wĩra wa kũhaarĩria irio cia kĩĩroho, gĩgekĩra andũ othe ngoro wĩra-inĩ wa kũhunjia Ũthamaki, na gĩkarũgamĩrĩra ũhoro wa kwamũra ariũ a Ithe witũ mawĩra-inĩ matiganĩte.

Nĩ gĩathĩkagĩra ũtongoria wa roho wa Ngai. Kĩama Kĩrĩa Gĩtongoragia kĩĩhokaga ũtongoria wa Jehova, Mũnene wa Thĩ na Igũrũ, na wa Mũtwe wa kĩũngano, Jesu. (1 Akorintho 11:3; Aefeso 5:23) Arĩa makoragwo kĩama-inĩ kĩu matituaga atĩ nĩo atongoria a andũ a Ngai. Marĩ hamwe na Akristiano othe arĩa aitĩrĩrie maguta, “marũmagĩrĩra Gatũrũme [Jesu] o kũrĩa guothe athiaga.” (Kũguũrĩrio 14:⁠4) Kĩama Kĩrĩa Gĩtongoragia nĩ gĩcokagia ngatho nĩ mahoya marĩa tũkĩhoyagĩra.

• Nĩa maarĩ thĩinĩ wa kĩama kĩrĩa gĩatongoragia karine-inĩ ya mbere?

• Kĩama Kĩrĩa Gĩtongoragia ũmũthĩ gĩethaga ũtongoria wa Ngai atĩa?

Betheli, nĩ kiugo gĩa Kĩhibirania kiugĩte “Nyũmba ya Ngai.” (Kĩambĩrĩria 28:​17, 19, kohoro ka magũrũ-inĩ) Rĩu nĩ rĩĩtwa rĩagĩrĩru harĩ ciikaro iria Aira a Jehova mathondekete thĩ yothe irĩ cia kũhũthĩrũo kũbanga na kũnyita mbaru wĩra wa kũhunjia. Kĩama Kĩrĩa Gĩtongoragia gĩtungatagĩra wabici-inĩ nene ya Aira a Jehova ĩrĩa ĩrĩ New York, U.S.A., na kĩrĩ kũu nĩ kĩroraga wĩra wa wabici cia honge mabũrũri-inĩ maingĩ. Marĩ gĩkundi, arĩa matungatagĩra ciikaro-inĩ icio moĩkaine ta famĩlĩ ya Betheli. Maikaranagia na ũrũmwe, makarutithania wĩra, makarĩanĩra hamwe, na makeruta Bibilia hamwe marĩ famĩlĩ.​—⁠Thaburi 133:⁠1.

Nĩ kũndũ kwa mwanya andũ matungatagĩra meheanĩte biũ. Ciikaro-inĩ ciothe cia Betheli, gũkoragwo na arũme na atumia Akristiano merutĩire gwĩka wendi wa Ngai na gũtungatĩra maũndũ ma Ũthamaki hĩndĩ ciothe. (Mathayo 6:33) Hatirĩ o na ũmwe wao ũrĩhagwo, no othe nĩ maheagwo gwa gũikara na mbeca nini cia kũhingia mabataro ma mũndũ kĩũmbe. O mũndũ thĩinĩ wa Betheli nĩ arĩ wĩra ũrĩa agaĩirũo, ũrĩ wa wabici, riiko, kana nyũmba ya kũrĩĩrũo. Amwe matungataga kũrĩa gũcabagĩrũo kana gwa kũnyitithanĩria mabuku, angĩ makaruta wĩra wa kũiga nyũmba irĩ theru, kũhũũra nguo, gũthondeka kũrĩa gũthũkĩte, kana mawĩra mangĩ.

Nĩ kũndũ kũrutagwo wĩra mũingĩ wa gũteithĩrĩria kũhunjia ũhoro wa Ũthamaki. Muoroto ũrĩa mũnene wa Betheli ciothe nĩ gũkinyĩria andũ aingĩ o ũrĩa kũngĩhoteka ma ya Bibilia. Kabuku gaka nĩ ngerekano ĩmwe ya ũndũ ũcio. Kandĩkĩtwo rungu rwa ũrũgamĩrĩri wa Kĩama Kĩrĩa Gĩtongoragia, gagatũmwo na njĩra ya mĩtambo ya kompiuta kũrĩ ikundi magana maingĩ cia ũtaũri thĩ yothe, gagacabwo na macini icabaga na ihenya Betheli-inĩ itiganĩte, gagacoka gagatũmwo kũrĩ ciũngano makĩria ma 120,000. Mũtaratara-inĩ ũcio wothe, famĩlĩ ya Betheli nĩ ĩheanaga ũteithio ũrĩa ũrabatarania wĩra-inĩ ũrĩa wa bata kũrĩ marĩa mangĩ wa kũhunjia ũhoro ũrĩa mwega.​—⁠Mariko 13:⁠10.

• Nĩa matungataga Betheli, na marũmbũyagio atĩa?

• Nĩ wĩra ũrĩkũ wa bata ũnyitagwo mbaru nĩ wĩra ũrĩa ũrutagwo Betheli?

Andũ a famĩlĩ ya Betheli matungataga thĩinĩ wa honge mwanya mwanya, magĩteithĩrĩria wĩra wa kũhunjia thĩinĩ wa bũrũri ũmwe kana mabũrũri maigana ũna. Amwe ao no matungate ũtaũri-inĩ, gũcaba ngathĩti, kũnyitithania mabuku, kũbanga na gũtwara mabuku, kũhaarĩria video na indo cia gũthikĩrĩria, kana kũrũmbũiya maũndũ mangĩ gĩcigo-inĩ kĩao.

Kamĩtĩ ya Wabici ya Rũhonge nĩyo ĩrũgamagĩrĩra wĩra. Kĩama Kĩrĩa Gĩtongoragia kĩĩhokeire maũndũ ma o wabici ya rũhonge harĩ Kamĩtĩ ya Wabici ya Rũhonge ĩrĩa ĩkoragwo na athuri atatũ kana makĩria arĩa magĩrĩire. Kamĩtĩ ĩyo ĩikaraga ĩkĩheaga Kĩama Kĩrĩa Gĩtongoragia ũhoro wa ũrĩa wĩra ũrathiĩ na mbere kana thĩna o wothe ũrĩa ũngĩgĩa gĩcigo-inĩ kĩrĩa ĩrũgamĩrĩire. Riboti ta icio nĩ iteithagia Kĩama Kĩrĩa Gĩtongoragia kũmenya maũndũ marĩa magĩrĩire kwarĩrĩrio thĩinĩ wa mabuku, mĩcemanio, o na igomano. Kaingĩ ariũ a Ithe witũ nĩ matũmagwo nĩ Kĩama Kĩrĩa Gĩtongoragia gũceerera wabici cia honge o na kũhe Kamĩtĩ cia Wabici cia Honge ũtongoria wĩgiĩ kũruta mawĩra marĩa iheetwo. (Thimo 11:14) Programu ya mwanya ĩrĩ na mĩario ya mũrũ wa Ithe witũ ũrĩa ũtũmĩtwo nĩ wabici nene ya Aira a Jehova nĩ ĩbangagwo harĩ na muoroto wa gwĩkĩra ngoro arĩa marĩ rungu rwa wabici ĩyo.

Ciũngano nĩ iteithagĩrĩrio. Ariũ a Ithe witũ thĩinĩ wa wabici ya rũhonge nĩo mahĩtũkagia kwambĩrĩrio gwa ciũngano njerũ. Ningĩ ariũ a Ithe witũ acio nĩ matabanagia wĩra wa mapainia, amishonarĩ, na arori a mũthiũrũrũko arĩa matungataga gĩcigo-inĩ kĩrĩa wabici yao ya rũhonge ĩrũgamĩrĩire. Nĩo mabangaga igomano, na ũrĩa Nyũmba njerũ cia Ũthamaki igwakwo, na magatigĩrĩra atĩ ciũngano nĩ ciatũmĩrũo mabuku marĩa irabatara. Maũndũ marĩa mothe mekagwo wabici-inĩ ya rũhonge nĩ mahotithagia wĩra wa kũhunjia ũrutĩke na mũbango mwega.​—⁠1 Akorintho 14:⁠33, 40.

• Kamĩtĩ cia Wabici cia Honge iteithagĩrĩria Kĩama Kĩrĩa Gĩtongoragia atĩa?

• Nĩ mawĩra marĩkũ marutagwo wabici-inĩ ya rũhonge?