Tũkaambĩrĩria Ibuku “Mwĩigei Wendo-inĩ wa Ngai” Janũarĩ 6
1. Ibuku “Mwĩigei Wendo-inĩ wa Ngai” rĩacabirũo rĩrĩ na muoroto ũrĩkũ?
1 Nĩtwĩrĩgĩrĩire mũno kwĩruta ibuku “Mwĩigei Wendo-inĩ wa Ngai” hĩndĩ ya Wĩruti wa Bibilia wa Kĩũngano kwambĩrĩria kiumia kĩa Janũarĩ 6! Marũa marĩa Kĩama kĩrĩa Gĩtongoragia kĩaandĩkĩire o mũndũ wothe ũrĩa wendete Jehova marĩkĩrĩirie na ciugo ici: “Twĩ na mwĩhoko atĩ ibuku rĩrĩ nĩ rĩgũgũteithia ũthiĩ na mbere kũhũthagĩra ma ũtũũro-inĩ waku nĩgetha wĩige ‘wendo-inĩ wa Ngai na ũkaaheo muoyo wa tene na tene.’—Jud. 21,” The Holy Bible in Gĩkũyũ Language, 2007.
2. Ibuku rĩrĩ rĩgũtũteithia maũndũ-inĩ marĩkũ ma mũtũũrĩre?
2 Kĩrĩa Tũkwĩrĩgĩrĩra: Mawatho ma Bibilia mahũthĩkaga atĩa maũndũ-inĩ ta, gũthuura arata, maũndũ ma gwĩkenia, gwathĩkĩra watho, maũndũ mũndũ emenyeretie, kĩhiko, mĩario na mĩtugo? Thamiri citũ cikũmenyerio kũringana na ithimi cia igũrũ cia ũthingu iria cionanĩtio thĩinĩ wa Kiugo kĩa Ngai. (Thab. 19:7, 8) O ũrĩa tũrathiĩ na mbere gũtaũkĩrũo nĩ mwĩcirĩrie wa Jehova, noguo wathĩki witũ maũndũ-inĩ mothe ma mũtũũrĩre ũgwĩkĩrũo hinya nĩ wendi witũ wa kũmũkenia.—Thim. 27:11; 1 Joh. 5:3.
3. Twagĩrĩirũo gwĩka o ũrĩa wothe tũngĩhota nĩguo tũnyitanĩre wĩruti-inĩ wa o kiumia nĩkĩ?
3 Tua Itua rĩa Kũnyitanĩra Mũcemanio-inĩ Ũcio: Ũkĩhaarĩria-rĩ, korũo na muoroto wa kũgooca Ngai ũrĩ gatagatĩ-inĩ ka andũ ake. (Ahib. 13:15) Kĩũngano gĩothe nĩ gĩkeeruta ibuku rĩrĩ kĩ hamwe. Nĩ ũndũ tũcunjĩ tũrĩa tũrĩaragĩrĩrio tũrĩkoragwo tũrĩ tũnini-rĩ, nĩ tũrĩhotaga kwĩhaarĩria wega biũ, na tũkagĩa na ũmĩrĩru wa kuuga maũndũ marĩa tweruta. Macokio maitũ mahaarĩrie wega nĩ marĩarahũraga andũ arĩa angĩ, nĩgetha twendanage, na tũkoragwo na ciĩko njega na magatũma kũgĩe na wĩruti mwega na wĩ na kĩguni. (Ahib. 10:24) Ningĩ gĩkeno gitũ nĩ gĩkuongerereka rĩrĩa tũraria ũhoro wa wĩtĩkio witũ.
4. Gwathĩkĩra mawatho ma Jehova nĩ kwa bata nĩkĩ?
4 Ũtukũ wa mũthia gũkũ thĩ arĩ ta mũndũ-rĩ, Jesu oigire atĩ nĩ harĩ bata gwathĩkĩra mawatho ma Jehova nĩguo tũtũũre wendo-inĩ wa Ngai. (Joh. 15:10) Tũgĩteithĩrĩrio nĩ ibuku “Wendo wa Ngai,” nĩ tũgũtua itua gũkĩra hĩndĩ ĩngĩ o yothe, kũhũthagĩra mataaro ma Bibilia mũtũũrĩre-inĩ witũ wa o mũthenya, na ‘twĩige wendo-inĩ wa Ngai.’—Jud. 21, The Holy Bible in Gĩkũyũ Language, 2007.