Nyũmba o yothe ya Ũthamaki ya Aira a Jehova ĩĩtanĩtio na rĩĩtwa itheru rĩa Ngai. Kwoguo, tuonaga kũnyita itemi wĩra-inĩ wa kũmĩiga ĩrĩ theru na ĩrĩ njega, na gũthondeka kũrĩa gwathũka kĩrĩ gĩtĩo na ũndũ wa bata ũthathaiya-inĩ witũ. Andũ othe no manyite itemi.

Wĩrutĩre kũruta wĩra wa gũtheria thutha wa mĩcemanio. Thutha wa o mũcemanio, aarĩ na ariũ a Ithe witũ nĩ makenagĩra gwĩka ũtheru mũnini thĩinĩ wa Nyũmba ya Ũthamaki. Riita rĩmwe o kiumia, ũtheru ũngĩ mũnene nĩ wĩkagwo. Wĩra ũcio ũtabanagio nĩ mũthuri kana ndungata ya kĩũngano, kaingĩ akĩrũmĩrĩra mũtaratara wandĩkĩtwo wa maũndũ marĩa magĩrĩire gwĩkwo. Kũringana na bata ũrĩa ũngĩkorũo kuo, andũ merutagĩra kũhaata, kũhura rũkũngũ, kũbanga itĩ, gũthambia cioro, ndirica na icicio, kweheria gĩko kĩrĩa kĩngĩkorũo kuo, kana gũtheria kũu nja. Riita rĩmwe mwaka, nĩ kũbangagwo mũthenya wa ũtheru mũnene makĩria. Rĩrĩa twaruta mawĩra macio hamwe na ciana citũ, nĩ tũcirutaga gũtĩa harĩa tũthathayagĩria.​—⁠Kohelethu 5:⁠1.

Teithĩrĩria harĩa hangĩbatara gũthondekwo. O mwaka, Nyũmba ya Ũthamaki nĩ ĩroragwo ũrĩa ĩhaana thĩinĩ, o na nja. Yarorũo, harĩa ĩthũkĩte nĩ hathondekagwo nĩguo ĩikare ĩrĩ njega, na njĩra ĩyo tũgethema kũhũthĩra mbeca nyingĩ thutha-inĩ. (2 Maũndũ ma Matukũ ma Tene 24:13; 34:10) Nyũmba ya Ũthamaki theru na ĩmenyereirũo wega nĩ handũ hagĩrĩru ha gũthathaĩria Ngai witũ. Rĩrĩa twanyita itemi wĩra-inĩ ũcio, tuonanagia ũrĩa twendete Jehova na harĩa tũthathayagĩria. (Thaburi 122:⁠1) Ningĩ gwĩka ũguo nĩ kũrehaga mbica njega itũũra-inĩ.​—⁠2 Akorintho 6:⁠3.

• Twagĩrĩirũo kũmenyerera harĩa tũthathayagĩria nĩkĩ?

• Nĩ mĩbango ĩrĩkũ ĩkagwo ya kũiga Nyũmba ya Ũthamaki ĩrĩ theru?

Hihi no wende gwĩka ũthuthuria nĩguo wongerere ũmenyo waku wĩgiĩ Bibilia? Nĩ harĩ ũndũ wendaga kũmenya wĩgiĩ rĩandĩko rĩna kana mũndũ, kũndũ, kana ũndũ mũna ũgwetetwo Bibilia-inĩ? Hihi ũrĩ weyũria kana Kiugo kĩa Ngai no gĩgũteithie kũhiũrania na thĩna ũrĩ naguo? No ũthiĩ Nyũmba-inĩ ya Ũthamaki ũhũthĩre library ĩrĩa ĩkoragwo kuo.

Nĩ ĩkoragwo na indo cia gwĩka ũthuthuria. No kũhoteke ndũkoragwo na mabuku mothe ma Aira a Jehova marĩa maarĩrĩirie Bibilia marĩa mangĩoneka na rũthiomi rwanyu. No library ĩyo ĩkoragwo Nyũmba-inĩ ya Ũthamaki, nĩ ĩkoragwo na mabuku maingĩ ma ica ikuhĩ. O na no ĩkorũo na Bibilia cia ũtaũri ũtiganĩte, ibuku rĩa gũtaarĩria ciugo, na mabuku mangĩ ũngĩhũthĩra gwĩka ũthuthuria. Wĩna wĩyathi wa kũhũthĩra library ĩyo mbere kana thutha wa mĩcemanio. Kũngĩkorũo na kompiuta, yahota gũkorũo na Watchtower Library. Ĩyo nĩ programu ya kompiuta ĩkoragwo na mabuku maitũ maingĩ, na nĩ hũthũ kũhũthĩra ũgĩcaria ũhoro mũna, kiugo, kana rĩandĩko.

Nĩ ĩteithagia arutwo arĩa marĩ na tũcunjĩ Mũcemanio-inĩ wa Ũtũũro na Ũtungata. No ũteithĩke ũngĩhũthĩra wega library ĩyo ĩrĩ Nyũmba-inĩ ya Ũthamaki ũkĩhaarĩria icunjĩ iria ũgaĩirũo. Mũrori wa Mũcemanio wa Ũtũũro na Ũtungata nĩwe wĩhokeirũo library ĩyo. Nĩwe ũtigagĩrĩra atĩ mabuku marĩa ma ica ikuhĩ makĩria marĩ ho na nĩ mabange wega. We kana ũrĩa mwĩrutaga Bibilia nake no makuonie ũrĩa ũngĩetha ũhoro ũrĩa ũrabatara. O na kũrĩ ũguo, gũtirĩ ibuku rĩagĩrĩirũo kũrutwo Nyũmba-inĩ ya Ũthamaki. Na ningĩ twagĩrĩirũo kũmenyerera mabuku macio, na tũtikamandĩke kana kũhaka gĩko.

Bibilia ĩtaaragĩria atĩ nĩguo ‘tũgĩe na ũmenyo wĩgiĩ Ngai’ no mũhaka twĩrutĩre gwetha ũmenyo ũcio “ta ũrĩa mĩthithũ mĩhithe yethagwo.” (Thimo 2:​1-5) Library ĩyo ĩrĩ Nyũmba-inĩ ya Ũthamaki no ĩgũteithie kwambĩrĩria gwetha ũmenyo ũcio.

• Nĩ indo irĩkũ cia gwĩka ũthuthuria ikoragwo thĩinĩ wa library ĩrĩa ĩrĩ Nyũmba-inĩ ya Ũthamaki?

• Nĩa mangĩgũteithia kũhũthĩra wega makĩria library ĩrĩa ĩrĩ Nyũmba-inĩ ya Ũthamaki?

Jesu eerire arũmĩrĩri ake ũũ: “Rekei ũtheri wanyu waragĩre andũ, nĩguo monage ciĩko cianyu njega na makagooca Ithe wanyu wa igũrũ.” (Mathayo 5:16) Nĩguo tũhote gwĩka ũguo, tũgeragia kũhũthĩra wega ũũgĩ wa kĩĩrĩu, na kĩndũ kĩmwe nĩ Intaneti. Website itũ ĩrĩa njĩtĩkĩrĩku nĩ jw.org, ĩrĩa mũndũ angĩhũthĩra gwetha ũhoro wĩgiĩ wĩtĩkio wa Aira a Jehova na maũndũ marĩa mekaga. Hihi ĩkoragwo na maũndũ marĩkũ?

Macokio ma Bibilia ma ciũria iria ciũragio kaingĩ. No wone macokio ma ciũria imwe iria cia bata makĩria andũ manoria. Kwa ngerekano, trakti ya Hihi Mathĩna nĩ Magaathira? na ya Hihi Arĩa Makuĩte no Macoke Muoyo? irĩ thĩinĩ wa intaneti na thiomi makĩria ma 800. Ningĩ no wone Bibilia ya New World Translation na thiomi makĩria ma 160, na mabuku ma gũgũteithia kwĩruta Bibilia, rĩmwe rĩamo rĩrĩ Bibilia Ĩtũrutaga Atĩa? na ngathĩti cia ica ikuhĩ cia Mũrangĩri na Amkeni! Maingĩ mamo no mathomwo kana mathikĩrĩrio Intaneti-inĩ, kana marutwo na njĩra ihũthagĩrũo kaingĩ ta MP3, PDF, kana EPUB. O na no ũcabe tũratathi tũmwe twa rũthiomi rũngĩ ũngĩhe mũndũ ũrakenio nĩ ũhoro na rũthiomi rũu! Ningĩ nĩ kũrĩ video cia thiomi nyingĩ cia arĩa maragia na thiomi cia kwaria na ciĩko. No ũrute drama cia Bibilia, ũthomi wa Bibilia wongereirũo mĩgambo, na tũrwĩmbo twa gũgũcanjamũra rĩrĩa ũhurũkĩte, kuuma Intaneti-inĩ.

Ũhoro wa kwĩhokeka wĩgiĩ Aira a Jehova. Ningĩ thĩinĩ wa Website ĩyo no wone mohoro ma ica ikuhĩ na tũcunjĩ twa video ciĩgiĩ wĩra witũ wa thĩ yothe, maũndũ marahutia Aira a Jehova, na ũrĩa tũheanaga ũteithio rĩrĩa kwagĩa thĩna. No wone ũhoro wĩgiĩ igomano iria irĩ hakuhĩ gwĩkwo, na andirethi cia wabici citũ cia honge.

Kwoguo, kũgerera Intaneti nĩ tũrekaga ũtheri wa ma ware nginya ituri-inĩ ciothe cia thĩ. Andũ a itarũ ciothe cia thĩ, nginya Antarctica, nĩ maragunĩka. Ihoya ritũ nĩ “kiugo kĩa Jehova gĩthiĩ na mbere gũtherema na ihenya” thĩ yothe nĩguo Ngai agoocithio.​—⁠2 Athesalonike 3:⁠1.

• Website ya jw.org ĩrateithia atĩa andũ merute ma cia Bibilia?

• Nĩ ũndũ ũrĩkũ ũngĩenda kũrora thĩinĩ wa website itũ?