Ciĩranĩro cia Ũthamaki​—Kwerũhia Maũndũ Mothe

TA HŨŨRA mbica ũgĩtua itunda inene na rĩĩru rũhonge-inĩ rwa mũtĩ. Ũkamba kũrĩnungĩra ũtanarĩĩkĩra gĩkabu-inĩ kĩrĩa kĩrĩ hakuhĩ kũiyũra. Ũkoretwo ũkĩruta wĩra mathaa maigana ũna, no ũraigua o gũthiĩ na mbere tondũ ndũrĩ mũnogu. Mami wanyu araruta wĩra wa kũgetha akenete o agĩteretaga na andũ angĩ a famĩlĩ na arata arĩa mokĩte kũmũteithia. Aroneka e mwĩthĩ mũno, o ta ũrĩa wamuonaga hĩndĩ ĩrĩa warĩ mũnyinyi mĩaka mĩingĩ mĩhĩtũku. Ndũretĩkia atĩ nĩwe wonire agĩkũra thĩinĩ wa thĩ ĩrĩa yarĩ ho. Nĩ wonire akĩhinyĩrĩrĩka nĩ ũndũ wa mũrimũ, ũkĩmũnyita guoko rĩrĩa aatuĩkanaga, na ũkĩrĩra mũno rĩrĩa aathikagwo. Na rĩu nĩwe ũyũ hamwe na andũ angĩ, arĩ muoyo na acokereirũo nĩ ũgima wa mwĩrĩ!

Nĩ tũĩ atĩ ihinda rĩu nĩ rĩgakinya. Tũmenyaga ũguo tondũ gũtirĩ hĩndĩ ciĩranĩro cia Ngai ciagaga kũhinga. Gĩcigo-inĩ gĩkĩ, nĩ tũkwarĩrĩria ũrĩa ciĩranĩro imwe cia Ũthamaki irĩhingio ica ikuhĩ, mbaara ya Hari-Magedoni ĩtanambĩrĩria. Ningĩ nĩ tũkuona ciĩranĩro imwe cia Ũthamaki iria ikaahinga thutha ũcio. Na githĩ tũtigaakena mũno kuona Ũthamaki wa Ngai ũgĩathana thĩ yothe na ũkĩerũhia maũndũ mothe!