Ndũmĩrĩri Igĩrĩ Kuuma Kũrĩ Ngai

No tuuge atĩ Bibilia ĩrĩ yothe nĩ ndũmĩrĩri kuuma kũrĩ Ngai. Ithe witũ wa igũrũ atũheete Bibilia ĩrĩ ya gũtũtongoria. O na kũrĩ ũguo, nĩ harĩ ndũmĩrĩri igĩrĩ cia mwanya ciaheanirũo makĩria ma mĩaka 2,000 mĩhĩtũku. Ciaheanirũo nĩ mũraika wĩtagwo Gaburieli, ũrĩa “ũrũgamaga hakuhĩ na Ngai.” (Luka 1:19) Maũndũ maahanaga atĩa rĩrĩa mũraika ũcio aaheanire ndũmĩrĩri icio cia bata?

Nĩ kĩndũ mwaka wa 3 mbere ya Kristo. Hihi Gaburieli araheanĩra ndũmĩrĩri yake ya mbere kũ? Irĩma-inĩ cia Judea, kwahoteka hakuhĩ na Jerusalemu. Nĩ kũrĩ mũthĩnjĩri-Ngai ũikaraga kuo wĩtagwo Zekaria. We na mũtumia wake Elizabethi nĩ maikangĩtie tũmĩaka, na matirĩ magĩa ciana. Nĩ riita rĩa Zekaria rĩa gũtungata arĩ mũthĩnjĩri-Ngai hekarũ-inĩ thĩinĩ wa Jerusalemu. Zekaria arĩ o kũu hekarũ-inĩ, Gaburieli akoimĩra o rĩmwe hakuhĩ na kĩgongona gĩa gũcinĩra ũbumba.

Ũndũ ũcio ũgathitũra Zekaria. No mũraika ũcio akamũhoreria akamwĩra ũũ: “Zekaria, ndũgetigĩre, tondũ mathaithana maku nĩ maiguĩtwo, Elizabethi mũtumia waku nĩ akaagĩa mwana wa kahĩĩ, na nĩ ũkaamwĩta Johana.” Gaburieli ningĩ akamwĩra atĩ Johana “agaakorũo arĩ wa bata maitho-inĩ ma Jehova” na “athagathagĩre Jehova andũ mahaarĩirio.”​—Luka 1:​13-17.

Harĩ Zekaria, ũndũ ũcio ũkoneka ta ũtangĩhoteka. Nĩkĩ? Tondũ wa mĩaka ĩrĩa we na Elizabethi marĩ nayo. Nĩ ũndũ ũcio Gaburieli akamwĩra ũũ: “Ũgũtuĩka bubu nginya mũthenya ũrĩa maũndũ macio makaahinga, tondũ ndũnetĩkia ciugo ciakwa, iria ikaahinga hĩndĩ ĩrĩa ĩtuĩtwo.”​—Luka 1:20.

Ihinda rĩu rĩothe, andũ arĩa marĩ nja nĩ mararigwo nĩ kĩĩ Zekaria aikarire ũguo kũu thĩinĩ. Agacoka akoima, no ndarahota kwaria. Atua kwaria, no ahũthĩrire moko kuonania ũrĩa arenda kuuga. Kũroneka atĩ no nginya akorũo nĩ harĩ kĩndũ gĩtarĩ kĩa ndũire ona arĩ thĩinĩ wa hekarũ.

Zekaria arĩkia ũtungata wake hekarũ-inĩ, agacoka mũciĩ. Kahinda kanini thutha ũcio, Elizabethi akagĩa nda! Kwa ihinda rĩa mĩeri ĩtano o etereire kũheo mwana, Elizabethi agaikara mũciĩ atekuumĩra andũ-inĩ.

Gaburieli agacoka agoka o rĩngĩ. Kũrĩ ũ hihi? Kũrĩ mũirĩtu wĩtagwo Mariamu, ũikaraga mwena wa rũgongo gĩcigo kĩa Galili taũni-inĩ ya Nazarethi. Hihi mũraika ekũmwĩra atĩa? Akamwĩra ũũ: “Nĩ wĩtĩkĩrĩkĩte nĩ Ngai.” Agacoka akamwĩra atĩrĩ: “Nĩ ũkuoha nda na ũgĩe mwana wa kahĩĩ, na nĩ ũkaamwĩta Jesu.” Ningĩ Gaburieli akoiga: “Ũcio agaakorũo arĩ mũnene na nĩ agetwo Mũrũ wa Ũrĩa ũrĩ Igũrũ Mũno, . . . na nĩ agaatha nyũmba ya Jakubu arĩ Mũthamaki tene na tene, na Ũthamaki wake ndũgakorũo na mũthia.”​—Luka 1:​30-33.

No ũgerie gwĩciria ũrĩa Gaburieli aaiguaga nĩ ũndũ wa kũheo gĩtĩo gĩa kũmenyithania ndũmĩrĩri icio igĩrĩ. O ũrĩa tũkwĩruta makĩria ũhoro wĩgiĩ Johana na Jesu, nĩ tũgũtaũkĩrũo kĩrĩa gĩtũmaga ndũmĩrĩri icio igĩrĩ kuuma kwĩ Ngai ikorũo irĩ cia bata mũno.