Mabuku na Maandĩko Marĩa Magwetetwo Thĩinĩ wa Kabuku ka Mũcemanio wa Ũtũũro na Ũtungata
MĨĨ 6-12
MŨTHITHŨ KUUMA KIUGO-INĨ KĨA NGAI | 2 AKORINTHO 4–6
“Tũtikuaga Ngoro”
w04 8/15 25 kĩb. 16-17
O na Twanoga Tũtikuaga Ngoro
16 Hatarĩ nganja, kũrũmbũiya ũgima witũ wa kĩĩroho nĩ ũndũ wa bata mũno. Rĩrĩa twagĩa na ũrata wa hakuhĩ na Jehova Ngai, rĩmwe no tũigue tũnogete, no gũtirĩ hĩndĩ tũnogaga nĩ kũmũthathaiya. Jehova “nĩ aheaga mũndũ ũrĩa mũnogu hinya, nao arĩa morĩtwo nĩ hinya akamongerera ũhoti.” (Isaia 40:28, 29) Mũtũmwo Paulo ũrĩa weyoneire ũũma wa ciugo icio aandĩkire ũũ: “Tũtikuaga ngoro, ĩndĩ o na gũtuĩka mũndũ witũ wa na nja athiaga agĩthiraga-rĩ, hatarĩ nganja mũndũ witũ wa na thĩinĩ athiaga akĩerũhagio mũthenya o mũthenya.”—2 Akorintho 4:16.
17 Ciugo “mũthenya o mũthenya” ironania twagĩrĩirũo kũhũthagĩra indo iria Jehova aheanĩte cia gũtũteithia, o mũthenya. Mishonarĩ ũmwe watungatire mĩaka 43 arĩ mwĩhokeku, nĩ aakoragwo na mahinda mamwe aaiguaga arĩ mũnogu na agakua ngoro. No ndaarekire maũndũ macio mamũtoorie. Ooigire ũũ: “Nĩ ndemenyeririe gũũkĩraga tene nĩgetha itanambĩrĩria wĩra o wothe ngagĩa na ihinda rĩa kũhoya Jehova na gũthoma Kiugo gĩake. Mũtaratara ũcio wa o mũthenya nĩ ũndeithĩtie gũkirĩrĩria nginyagia ũmũthĩ.” No tũkorũo na ma atĩ Jehova nĩ arĩtũheaga hinya angĩkorũo nĩ tũrĩmũhoyaga “mũthenya o mũthenya,” na tũgecũrania ũhoro wĩgiĩ ngumo ciake cia magegania na ciĩranĩro ciake.
it-1 724-725
Ũkirĩrĩria
Ningĩ nĩ ũndũ wa bata kwaga kũriganĩrũo nĩ kĩĩrĩgĩrĩro kĩrĩa Akristiano makoragwo nakĩo kĩa muoyo wa tene na tene tũtarĩ na mehia. O na arĩa matũnyariraga mangĩtũũraga, matingĩtwehereria kĩĩrĩgĩrĩro kĩu. (Ro 5:4, 5; 1The 1:3; Kũg 2:10) Mathĩna marĩa tũcemanagia namo mahinda-inĩ maya makooneka marĩ manini mũno makĩringithanio na kũhingio gwa kĩĩrĩgĩrĩro kĩu kĩa magegania. (Ro 8:18-25) Tũngĩciria ũhoro wa muoyo wa tene na tene, mathĩna o mothe tũngĩcemania namo ihinda rĩrĩ, o na mangĩkorũo marĩ maritũ atĩa, nĩ ma ‘ihinda inini na nĩ mahũthũ.’ (2Ko 4:16-18) Mũndũ angĩikara akĩririkanaga atĩ magerio marĩa tũcemanagia namo no ma ihinda inini na arũmie kĩĩrĩgĩrĩro kĩrĩa Akristiano marĩ nakĩo, ũndũ ũcio no ũmũteithie ndagakue ngoro age kwĩhokeka harĩ Jehova Ngai.
Kũmaatha Maũndũ ma Bata Maandĩko-inĩ
“Kenagia Jehova”
Mũrũ wa Ithe Witũ David Splane wa Kĩama Kĩrĩa Gĩtongoragia nĩ aarĩrĩirie kĩongo kĩu kuuma Maandĩko-inĩ. (2 Akorintho 4:7) Mũthithũ ũcio nĩ kĩĩ? Hihi nĩ ũmenyo kana ũũgĩ? Mũrũ wa Ithe Witũ ũcio aacokirie ũũ: “Aca, mũthithũ ũrĩa mũtũmwo Paulo aaririe ũhoro waguo nĩ ‘ũtungata ũyũ’ wa ‘kũmenyithania ũhoro wa ma.’” (2 Akorintho 4:1, 2, 5) Mũrũ wa Ithe Witũ Splane aaririkanirie arutwo atĩ mĩeri ĩyo ĩtano maahũthĩrĩte makĩĩruta yarĩ ya kũmahaarĩria nĩ ũndũ wa ũtungata wa mwanya. Ũtungata ũcio wagĩrĩire kuonwo ũrĩ wa bata mũno.
Aataarĩirie atĩ “indo cia rĩũmba” nĩ mĩĩrĩ itũ. Ningĩ nĩ oonanirie ngũrani ya kĩndũ gĩthondeketwo na rĩũmba na kĩndũ gĩthondeketwo na thahabu. Indo cia thahabu itihũthagĩrũo kaingĩ. No indo iria ithondeketwo na rĩũmba nĩ cia kũrutithio wĩra. Tũngĩiga mũthithũ thĩinĩ wa kĩndũ gĩa thahabu, twahota kũiga meciria maitũ harĩ kĩndũ kĩu o ta ũrĩa tũraiga harĩ mũthithũ ũcio ũrĩ thĩinĩ wakĩo. Mũrũ wa Ithe Witũ Splane ooigire ũũ: “Inyuĩ arutwo mũtiagĩrĩirũo gwĩtũgĩria, no mũrĩ amishonarĩ mwagĩrĩirũo kwerekeria andũ harĩ Jehova. Inyuĩ mũrĩ o indo cia rĩũmba.”
w09 11/15 21 kĩb. 7
Thiĩi na Mbere Gũkũria Wendo ta wa Andũ a Nyina Ũmwe
7 Ĩ na ithuĩ? ‘Tũngĩandandũka’ atĩa harĩ kuonania wendo ta wa andũ a nyina ũmwe? Nĩ ũndũ wa ndũire mũndũ kũigua akĩgucĩrĩrio kwenda mũndũ wa riika rĩake kana wa rũrĩrĩ rwao. Nao arĩa mendete maũndũ mahaanaine ma gwĩkenia makoragwo hamwe kaingĩ. No angĩkorũo maũndũ marĩa tũhaanainie na Akristiano amwe nĩ matwamũranagia na arĩa angĩ, nĩ tũrabatara ‘kwandandũra wendo witũ.’ Nĩ wega kwĩyũria ũũ: ‘Hihi kaingĩ nyendaga o kũhunjia kana gũkorũo hamwe na aarĩ na ariũ a Ithe witũ arĩa makoragwo marĩ arata akwa? Hihi rĩrĩa ndĩ Nyũmba-inĩ ya Ũthamaki nĩ ndĩthemaga gũkorũo hamwe na andũ arĩa marokire kĩũngano-inĩ ica ikuhĩ tondũ njĩtĩkĩtie atĩ no nginya mambe maikaikare magĩgatuĩka arata akwa? Hihi nĩ ngeithagia andũ othe kĩũngano-inĩ marĩ ethĩ kana akũrũ?
Ciũria Kuuma Kũrĩ Athomi
Nĩa Paulo aaragia ũhoro wao rĩrĩa aahũthĩrire ciugo “andũ matarĩ etĩkia” thĩinĩ wa 2 Akorintho 6:14?
Rĩandĩko rĩa 2 Akorintho 6:14 riugaga ũũ: “Mũtikohanio ũrĩa gũtagĩrĩire icoki-inĩ rĩmwe na andũ matarĩ etĩkia.” Ũhoro ũrĩa ũthiũrũrũkĩirie rĩandĩko rĩu wonanagia wega atĩ Paulo aaragia ũhoro wĩgiĩ andũ arĩa matarĩ thĩinĩ wa kĩũngano gĩa Gĩkristiano. Ũndũ ũcio nĩ ũranyitwo mbaru mĩhari-inĩ ĩngĩ thĩinĩ wa Bibilia kũrĩa Paulo ahũthĩrĩte ciugo “mũndũ ũtarĩ mwĩtĩkia” kana “andũ matarĩ etĩkia.”
Kwa ngerekano, Paulo nĩ aarũngire Akristiano nĩ ũndũ wa gũthiĩ igooti-inĩ “mbere ya andũ matarĩ etĩkia.” (1 Akorintho 6:6) Kwoguo andũ matarĩ etĩkia arĩa mararĩrĩrio haha nĩ atuanĩri ciira arĩa maarĩ igooti-inĩ kũu Korintho. Marũa-inĩ make ma kerĩ, Paulo ooigire atĩ Shaitani nĩ “atumumarĩtie meciria ma arĩa matetĩkĩtie.” Maitho ma andũ ta acio matetĩkĩtie makoragwo mahumbĩrĩtwo na “taama” matikone ũhoro ũrĩa mwega. Andũ acio matetĩkĩtie matioete ikinya rĩa kwenda gũtungatĩra Jehova, tondũ Paulo ooigĩte ũũ mbere ĩyo: “Hĩndĩ ĩrĩa mũndũ agarũrũkĩra Jehova, taama ũcio nĩ weheragio.”—2 Akorintho 3:16; 4:4.
Andũ amwe matarĩ etĩkia nĩ meingĩragia maũndũ-inĩ ma uuni-watho na ũhoi wa mĩhianano. (2 Akorintho 6:15, 16) O na kũrĩ ũguo, ti othe makararagia ndungata cia Jehova. Amwe o na nĩ makenagio nĩ ũhoro wa ma. Angĩ nao, marĩ na athuri kana atumia Akristiano na nĩ makenaga gũikarania nao. (1 Akorintho 7:12-14; 10:27; 14:22-25; 1 Petero 3:1, 2) No o ta ũrĩa hagwetetwo hau igũrũ, Paulo ahũthĩrĩte ciugo “mũndũ ũtarĩ mwĩtĩkia” kwaria igũrũ rĩgiĩ andũ arĩa matarĩ thĩinĩ wa kĩũngano gĩa Gĩkristiano kĩrĩa gĩkoragwo na andũ ‘arĩa metĩkĩtie Mwathani.’—Atũmwo 2:41; 5:14; 8:12, 13.
Ũtaaro ũrĩa ũheanĩtwo thĩinĩ wa 2 Akorintho 6:14 nĩ wa bata harĩ gũteithia Akristiano ũtũũro-inĩ wao wothe na nĩ ũhũthĩrĩtwo kaingĩ gũteithia Akristiano arĩa maracaria mũndũ wa kũhikania nake. (Mathayo 19:4-6) Mũkristiano mũbatithie ndagĩrĩirũo gũcaria mũndũ wa kũhikania nake gatagatĩ-inĩ ka andũ matarĩ etĩkia, tondũ mĩtugo, mĩoroto, na wĩtĩkio wa andũ arĩa matarĩ etĩkia nĩ ngũrani biũ na wa Akristiano a ma.
Ĩ nao andũ arĩa mareruta Bibilia na makanyitanĩra na kĩũngano gĩa Gĩkristiano? Ĩ ahunjia arĩa matarĩ abatithie? Hihi no metwo andũ matarĩ etĩkia? Aca. Andũ arĩa metĩkĩrĩte ũhoro ũrĩa mwega na nĩ marathiĩ na mbere gũkũra kĩĩroho marĩ na muoroto wa kũbatithio matiagĩrĩire gwĩtwo andũ matarĩ etĩkia. (Aroma 10:10; 2 Akorintho 4:13) Korinelio atanabatithio eetagwo mũndũ ‘wĩtigĩrĩte Ngai.’—Atũmwo 10:2.
Gũkĩrĩ ũguo-rĩ, hihi nĩ ũndũ wa ũũgĩ Mũkristiano mũbatithie kũgĩa ndũgũ na kũhikania na mũhunjia ũtarĩ mũbatithie, atĩ tondũ ũtaaro ũcio wa Paulo ũrĩ thĩinĩ wa 2 Akorintho 6:14 ndũngĩhũthĩka ũhoro-inĩ ta ũcio? Aca ũcio ti ũndũ wa ũũgĩ. Nĩkĩ? Tondũ wa ũtaaro wa ĩmwe kwa ĩmwe ũrĩa Paulo aaheire atumia a ndigwa Akristiano. Paulo aandĩkire ũũ: “No ahikĩre mũndũ o wothe angĩenda, thĩinĩ wa Mwathani tu.” (1 Akorintho 7:39) Nĩ ũndũ wa ũtaaro ũcio, Akristiano abatithie mekĩragwo ngoro methe mũndũ wa kũhikania nake gatagatĩ-inĩ ka arĩa tu marĩ “thĩinĩ wa Mwathani.”
Ciugo “thĩinĩ wa Mwathani” na “thĩinĩ wa Kristo” ciugĩte atĩa? Paulo aaririe ũhoro wa andũ marĩ “thĩinĩ wa Kristo” kana “thĩinĩ wa Mwathani” rĩandĩko-inĩ rĩa Aroma 16:8-10 na rĩa Akolosai 4:7. Ũngĩthoma mĩhari ĩyo nĩ ũkuona atĩ andũ acio merĩtwo atĩ nĩ ‘arutithania wĩra hamwe,’ ‘etĩkĩrĩku,’ ‘ariũ a Ithe witũ ende,’ ‘ndungata njĩhokeku,’ na ‘arĩa matungataga hamwe.’
Nĩrĩ mũndũ atuĩkaga ‘ndungata thĩinĩ wa Mwathani’? Nĩ rĩrĩa ambĩrĩria gwĩka o ta ũrĩa ndungata yagĩrĩirũo nĩ gwĩka eyendeire, na erega. Jesu ooigire ũũ: “Mũndũ o wothe angĩenda kũnũmĩrĩra, nĩ erege na oe mũtĩ wake wa kũnyarirĩrũo na anũmagĩrĩre.” (Mathayo 16:24) Mũndũ ambagĩrĩria kũrũmĩrĩra Kristo na gwĩka wendi wa Ngai biũ rĩrĩa eyamũrĩra Ngai. Thutha ũcio akabatithio eyendeire na agatuĩka ndungata ĩtĩkĩrĩkĩte nĩ Jehova Ngai. Kwoguo kũhika kana kũhikania “thĩinĩ wa Mwathani” nĩ kuuga kũhikania na mũndũ wonanĩtie wega atĩ nĩ mwĩtĩkia, mũndũ wĩyamũrĩire Ngai agatuĩka “ngombo kana ndungata ya Ngai na ya Mwathani Jesu Kristo.”—Jakubu 1:1.
Mũndũ ũreruta Bibilia na Aira a Jehova na nĩ arathiĩ na mbere gũkũra kĩĩroho nĩ agĩrĩire gũcokerio ngatho. O na kũrĩ ũguo, ndarĩ areyamũrĩra Jehova na ndatuĩte itua rĩa gũikara ũtũũro wa kwĩima na wa gũtungata. No arathiĩ na mbere gwĩka mogarũrũku. Nĩ arabatara kũrĩkia gwĩka mogarũrũku manene marĩa mũndũ agĩrĩirũo gwĩka nĩgetha eyamũrĩre Ngai na abatithio ataneciria ũhoro wa ũgarũrũku ũngĩ mũnene ta kũingĩra kĩhiko-inĩ.
Hihi Mũkristiano nĩ agĩrĩirũo kũgĩa ndũgũ na mũrutwo wa Bibilia ũroneka nĩ arathiĩ na mbere gũkũra kĩĩroho, hihi arĩ na muoroto wa gweterera nginya ambe abatithio macoke mahikanie? Aca. Muoroto wa mũrutwo ũcio wa Bibilia no ũcenjie angĩmenya atĩ Mũkristiano mũbatithie nĩ arenda kũmũhikia kana kũmũhikĩra, no ndegwĩka ũguo nginya mũrutwo ũcio ambe abatithio.
Mũndũ akoragwo arĩ mũhunjia ũtarĩ mũbatithie kwa ihinda inini nginya agakinyĩra kũbatithio. Kwoguo ũtaaro ũcio wa kũhika kana kũhikania thĩinĩ wa Mwathani tu ti mũritũ. Ĩ angĩkorũo mũndũ nĩ akinyĩtie mĩaka ya kũhika kana kũhikania, arereirũo famĩlĩ-inĩ ya Gĩkristiano, nĩ akoretwo akĩnyitanĩra na kĩũngano kwa ihinda rĩa mĩaka mĩingĩ, na nĩ mũhunjia ũtarĩ mũbatithie? Angĩkorũo nĩguo-rĩ, agĩte kwĩyamũrĩra Jehova nĩkĩ? Araga kuoya ikinya nĩkĩ? Hihi nĩ nganja akoragwo nacio? O na gũtuĩka ndangĩtwo mũndũ ũtarĩ mwĩtĩkia, ndangĩrũo atĩ arĩ “thĩinĩ wa Mwathani.”
Ũtaaro ũcio wa Paulo wĩgiĩ kĩhiko nĩ wa gũtũguna. (Isaia 48:17) Angĩkorũo andũ erĩ arĩa marenda kũhikania nĩ meyamũrĩire Jehova, kĩhiko kĩao nĩ kĩrĩkoragwo na mũthingi mũrũmu wa kĩĩroho. Marũmagĩrĩra ithimi ihaanaine na makoragwo na mĩoroto ĩhaanaine. Ũndũ ũcio nĩ ũtũmaga makorũo na gĩkeno kĩhiko-inĩ. Makĩria ma ũguo, kũhika kana kũhikania “thĩinĩ wa Mwathani” kuonanagia wĩhokeku harĩ Jehova na ũndũ ũcio ũgatũma mũndũ akorũo na irathimo cia gũtũũra tondũ “harĩ mũndũ mwĩhokeku, [Jehova akoragwo arĩ] mwĩhokeku.”—Thaburi 18:25.
MĨĨ 13-19
MŨTHITHŨ KUUMA KIUGO-INĨ KĨA NGAI | 2 AKORINTHO 7–10
“Ũtungata Witũ wa Kũheana Ũteithio”
w98 11/1 25 kĩb. 1
“Ngai Endete Mũndũ Ũheanaga Akenete”
Ũndũ wa mbere, Paulo eerire Akristiano a Korintho ũhoro wa Akristiano a Makedonia, arĩa maaigire kĩonereria kĩega harĩ kũheana ũteithio. Paulo aandĩkire ũũ: “Hĩndĩ ĩrĩa maarĩ na igerio inene rĩa mĩnyamaro, gĩkeno kĩao kĩnene na ũthĩni wao mũkĩru nĩ ciatũmire ũtonga wa ũtaana wao wongerereke.” Akristiano acio a Makedonia matiabataraga kũringĩrĩrio maheane ũteithio. Handũ ha ũguo, Paulo ooigire ũũ: “Magĩtũthaitha mũno meyendeire nĩguo maheo mweke wa kũheana na ũtugi.” Gũkorũo atĩ andũ a Makedonia maaheanire ũteithio makenete nĩ ũndũ wa bata mũno twaririkana atĩ ‘ũthĩni wao warĩ mũkĩru.’—2 Akorintho 8:2-4.
Wĩra wa Kũheana Ũteithio nĩ Ũgoocithagia Jehova
KĨNDŨ mwaka wa 46 thutha wa Kristo, nĩ kwagĩire ngʼaragu nene thĩinĩ wa Judea. Nĩ ũndũ wa ũrĩa irio ciarĩ nini, nĩ ciendagio goro mũno ũũ atĩ arutwo a Kristo arĩa maarĩ Ayahudi itũũra-inĩ rĩu matingĩahotire kwĩgũrĩra. Maarĩ ahinyĩrĩrie mũno nĩ ngʼaragu. O na kũrĩ ũguo, maarĩ hakuhĩ kwĩyonera Jehova akĩmagitĩra na guoko gwake na njĩra ĩtonekete nĩ arutwo angĩ a Kristo mbere ĩyo. Hihi gwathiire atĩa?
Wĩra wa Kũheana Ũteithio nĩ Ũgoocithagia Jehova
4 Thĩinĩ wa marũa make ma kerĩ kũrĩ Akorintho, Paulo aatarĩirie atĩ ũtungata wa Gĩkristiano ũkoragwo na icunjĩ igĩrĩ. O na gũtuĩka marũa macio ma Paulo merekeirio Akristiano aitĩrĩrie maguta, ciugo ciake ũmũthĩ nĩ ihutĩtie nginya “ngʼondu ingĩ” cia Kristo. (Joh. 10:16) Gĩcunjĩ kĩmwe kĩa ũtungata witũ nĩ ‘ũtungata wa ũiguithanio,’ ũguo nĩ kuuga, wĩra wa kũhunjia na kũrutana. (2 Kor. 5:18-20; 1 Tim. 2:3-6) Gĩcunjĩ kĩu kĩngĩ gĩkonainiĩ na ũtungata ũrĩa tũrutaga nĩ ũndũ wa Akristiano arĩa angĩ. Ũtungata ũcio nĩguo Paulo aaragia ũhoro waguo, rĩrĩa aagwetire “gũteithia andũ arĩa aamũre.” (2 Kor. 8:4) Thĩinĩ wa ciugo ‘ũtungata wa ũiguithanio’ na “gũteithia andũ arĩa aamũre,” ciugo ‘ũtungata’ na “gũteithia” itaũrĩtwo kuuma harĩ kiugo gĩa Kĩngiriki di·a·ko·niʹa. Nĩkĩ ũndũ ũcio nĩ wa bata?
5 Rĩrĩa Paulo aahũthĩrire kiugo kĩmwe gĩa Kĩngiriki kũgweta mawĩra macio merĩ, aaigire wĩra wa kũheana ũteithio gĩkundi-inĩ kĩmwe na mawĩra mangĩ ma ũtungata marĩa mahingagio nĩ kĩũngano gĩa Gĩkristiano. Mbere ĩyo nĩ oigĩte atĩ: ‘Mĩtungatĩre o nayo nĩ mĩthemba-mĩthemba, na Mwathani mwene yo no ũmwe. O nayo mĩĩkĩre ya maũndũ nĩ ĩtiganĩte mĩthemba. No rĩrĩ, maũndũ macio mothe no wĩra wa Roho o ro ũcio ũmwe.’ (1 Kor. 12:4-6, 11) Paulo onanirie atĩ mawĩra mwanya mwanya marĩa mahingagio nĩ kĩũngano nĩ makonainiĩ na “ũtungata mũtheru.” (Rom. 12:1, 6-8, New World Translation) Nĩkĩo onire atĩ nĩ kwagĩrĩire ahũthĩre mahinda mamwe make “gũtungata arĩa aamũre.”—Rom. 15:25, 26, NW.
6 Paulo nĩ aateithirie Akorintho kuona kĩrĩa gĩatũmaga wĩra wa kũheana ũteithio ũkorũo ũrĩ gĩcunjĩ kĩa ũtungata na ũthathaiya wao harĩ Jehova. Aameerire ũũ: Akristiano arĩa maheanaga ũteithio mekaga ũguo nĩ ũndũ wa ‘gwathĩkĩra ũhoro ũrĩa mwega wa Kristo.’ (2 Kor. 9:13) Nĩkĩo Akristiano mateithagia arũmĩrĩri arĩa angĩ tondũ wa kwĩrirĩria gwathĩkĩra ũrutani wa Kristo. Paulo oigire atĩ ciĩko cia wendo iria Akristiano mekagĩra aarĩ na ariũ a Ithe wao, cionanagia ũrĩa “wega wa Ngai ũkĩrĩrĩirie mũno” thĩinĩ wao. (2 Kor. 9:14; 1 Pet. 4:10) Nĩkĩo ngathĩti ya Mũrangĩri ya Dicemba 1, mwaka wa 1975, yoigire ũũ ĩkĩarĩrĩria ũhoro wa gũtungata aarĩ na ariũ a Ithe witũ, ũndũ ũmwe ũrĩ wĩra wa kũheana ũteithio: “Tũtiagĩrĩirũo gwĩkĩrĩra nganja kana Jehova Ngai na Mũrũwe Jesu Kristo nĩ monaga wĩra ũyũ ũrĩ wa bata.” Hatarĩ nganja, wĩra wa kũheana ũteithio nĩ mũthemba wa bata wa ũtungata mũtheru.—Rom. 12:1, 7; 2 Kor. 8:7; Ahib. 13:16.
Mbeca cia Gũteithĩrĩria Wĩra wa Ũthamaki Ciumaga Kũ?
10 Kĩa mbere, tũrutaga mĩhothi ya kwĩyendera tondũ nĩ twendete Jehova na nĩ twendaga gwĩka “maũndũ marĩa onaga me mega.” (1 Joh. 3:22) Hatarĩ nganja Jehova nĩ akenagio nĩ mũndũ ũrĩa ũheanaga eyendeire. Reke tũthuthurie ciugo cia mũtũmwo Paulo ciĩgiĩ ũrĩa Akristiano mabatiĩ kũheana. (Thoma 2 Akorintho 9:7.) Mũkristiano wa ma ndaheanaga atekwenda kana nĩ ũndũ wa kũringĩrĩrio. No aheanaga tondũ nĩguo “acirĩire gwĩka na ngoro yake.” Ũguo nĩ kuuga atĩ, aheanaga thutha wa kuona bata mũna na ageciria ũrĩa angĩũhingia. Mũheani ta ũcio nĩ endetwo nĩ Jehova nĩ gũkorũo “Ngai endaga mũndũ ũrĩa ũkũheana akenete.”
Kũmaatha Maũndũ ma Bata Maandĩko-inĩ
Reke ‘Kĩheo kĩa Ngai Kĩrĩa Gũtarĩ Ciugo Ingĩtaarĩria Ũrĩa Gĩtariĩ’ Gĩgũtindĩkage
2 Paulo nĩ aamenyaga atĩ ciĩranĩro ciothe cia magegania iria Ngai atwĩrĩire ikaahinga nĩ ũndũ wa igongona ikinyanĩru rĩa Kristo. (Thoma 2 Akorintho 1:20.) Nĩ ũndũ ũcio, ‘kĩheo kĩu gũtarĩ ciugo ingĩtaarĩria ũrĩa gĩtariĩ’ kĩhutĩtie maũndũ mothe mega na ma wendo marĩa Jehova agaatwĩkĩra kũgerera Jesu ihinda rĩrĩa rĩroka. Kĩheo kĩu nĩ kĩa magegania ũũ atĩ gũtirĩ mũndũ ũngĩhota gũtaarĩria biũ ũhoro wakĩo. Kĩheo kĩu kĩagĩrĩirũo gũtũhutia atĩa? Nĩ na njĩra irĩkũ tũngĩonania ngatho citũ nĩ ũndũ wa kĩheo kĩu tũkĩĩharĩria nĩ ũndũ wa Kĩririkano gĩa gĩkuũ kĩa Jesu kĩrĩa gĩgaakorũo Njumatano Machi 23, 2016?
g99 7/8 20-21
Hihi nĩ Ũũru Gwĩtĩa?
Thĩinĩ wa Maandĩko ma Gĩkristiano ma Kĩngiriki, kiugo gĩa Kĩngiriki kau·khaʹo·mai, kĩrĩa gĩtaũrĩtwo “gwĩtĩa, gũkena, kwĩraha,” no kĩhũthĩrũo kwaria ũhoro wa ũndũ mwega kana ũndũ mũũru. Kwa ngerekano, Paulo ooigire atĩ, nĩ “tũkenagei nĩ ũndũ wa kĩĩrĩgĩrĩro kĩa riri wa Ngai.” Acokete akoiga ũũ: “Mũndũ ũrĩa ũkwĩraha, nĩ erahe nĩ ũndũ wa Jehova.” (Aroma 5:2; 2 Akorintho 10:17) Ũguo nĩ kuuga twĩrahagĩre Jehova arĩ we Ngai witũ, ũndũ ũrĩa ũngĩtũma tũkenage nĩ ũndũ wa rĩĩtwa rĩake na ngumo ciake.
MĨĨ 20-26
MŨTHITHŨ KUUMA KIUGO-INĨ KĨA NGAI | 2 AKORINTHO 11–13
“Paulo Aarĩ na ‘Mũigua Thĩinĩ wa Mwĩrĩ’”
w08 6/15 3-4
Gũkorũo na Hinya O na Tũrĩ na Mawathe
Mũtũmwo Paulo nĩ ndungata ĩngĩ njĩhokeku yoririe Jehova amĩehererie “mũigua thĩinĩ wa mwĩrĩ,” thĩna atũire naguo. Aathaithire Ngai maita matatũ amwehererie igerio rĩu. Gũtekũmakania thĩna ũcio Paulo aahiũranagia naguo warĩ ũrĩkũ, o ta mũigua ũramũthumbũra, thĩna ũcio nĩ ũngĩatũmire age gĩkeno agĩtungatĩra Jehova. Paulo aaũringithanirie na gũikara akĩhũũragwo rũhĩ. Jehova aamwĩrire ũũ: “Ũtugi wakwa mũnene nĩ ũkũiganĩte, nĩ gũkorũo hinya wakwa ũtuĩkaga mũkinyanĩru harĩa hatarĩ na hinya.” Jehova ndaamwehereirie mũigua ũcio aarĩ naguo mwĩrĩ-inĩ. No nginya Paulo angĩahiũranirie naguo, ĩndĩ ooigire ũũ: “Hĩndĩ ĩrĩa itarĩ na hinya, nĩrĩo ngoragwo na hinya.” (2 Kor. 12:7-10) Eendaga kuuga atĩa?
w06 12/15 24 kĩb. 17-18
Jehova nĩ Aheaga “Arĩa Mamũhoyaga Roho Mũtheru”
17 Ngai eerire Paulo ũũ thutha wa ihoya rĩu rĩake: “Ũtugi wakwa mũnene nĩ ũkũiganĩte, nĩ gũkorũo hinya wakwa ũtuĩkaga mũkinyanĩru harĩa hatarĩ na hinya.” Nake Paulo akiuga: “Nĩ ũndũ ũcio-rĩ, ngwĩrahĩra maũndũ marĩa itarĩ na hinya ngenete mũno, nĩguo hinya wa Kristo ũtũũre igũrũ rĩakwa o ta hema.” (2 Akorintho 12:9; Thaburi 147:5) Nĩ ũndũ ũcio, Paulo nĩ eeyoneire atĩ kũgerera harĩ Kristo, Ngai nĩ aamũhumbagĩra na ũgitĩri wake ũrĩ hinya o ta arĩ hema amũhumbĩrĩte nayo. Matukũ-inĩ maya, Jehova acokagia mahoya maitũ na njĩra o ta ĩyo. Nĩ ahumbagĩra ndungata ciake na ũgitĩri wake o ta irĩ handũ hagite.
18 Hatarĩ nganja, hema ndĩngĩgirĩrĩria mbura kuura kana rũhuho kũhurutana ĩndĩ no ĩgitĩre mũndũ kuumana na indo icio. O ũndũ ũmwe na ũcio, njĩra ĩrĩa tũgitagĩrũo nayo nĩ “hinya wa Kristo” ndĩngĩgirĩrĩria magerio kana moritũ matũkore. O na kũrĩ ũguo, nĩ ĩtũheaga ũgitĩri wa kĩĩroho kuumana na maũndũ ma thĩ ĩno marĩa mangĩtũthũkia na tharĩkĩro cia Shaitani, mũtongoria wayo. (Kũguũrĩrio 7:9, 15, 16) Kwoguo, o na angĩkorũo ũrahiũrania na igerio ‘rĩtarakweherera,’ no ũkorũo na ma atĩ Jehova nĩ oĩ ũndũ ũcio ũragerera na nĩ agũthikĩrĩirie ‘ũkĩmũrĩrĩra.’ (Isaia 30:19; 2 Akorintho 1:3, 4) Paulo aandĩkire ũũ: “Ngai nĩ mwĩhokeku, na ndangĩreka mũgerio gũkĩra ũrĩa mũngĩhota gwĩtiiria, no hĩndĩ ya igerio nĩ arĩmũheaga njĩra ya kuumĩrĩra nĩguo mũkahota kũrĩkirĩrĩria.”—1 Akorintho 10:13; Afilipi 4:6, 7.
“Ũrĩa Ũũrĩtwo nĩ Hinya, Nĩwe Ũmũheaga Hinya”
8 Thoma Isaia 40:30. O na tũngĩkorũo tũrĩ na ũmenyeru ũigana atĩa, nĩ maũndũ manini mũno tũngĩhingia na hinya witũ. Ũcio nĩ ũndũ ithuothe twagĩrĩirũo nĩ kũmenya. O na gũtuĩka mũtũmwo Paulo nĩ aahotaga gwĩka maũndũ maingĩ, harĩ moritũ maamũgiragĩrĩria gwĩka maũndũ marĩa mothe eendaga. Rĩrĩa aahoire Ngai nĩ ũndũ wa ũndũ ũcio, eerirũo: “Hinya wakwa ũtuĩkaga mũkinyanĩru harĩa hatarĩ na hinya.” Paulo nĩ aamenyire ũrĩa eerirũo. Oigire ũũ: “Hĩndĩ ĩrĩa itarĩ na hinya, nĩrĩo ngĩaga na hinya.” (2 Kor. 12:7-10) Eendaga kuuga atĩa?
9 Paulo nĩ aamenyire atĩ nĩ maũndũ manini mũno angĩahotire gwĩka atarĩ na ũteithio wa Ngai. Roho mũtheru wa Jehova nĩ ũngĩamũheire hinya ũrĩa aabataraga. Na to ũguo tu, roho wa Ngai nĩ ũngĩamũheire hinya wa gwĩka maũndũ marĩa atangĩahotire gwĩka na hinya wake mwene. Na ũguo noguo kũrĩ harĩ ithuĩ. Angĩkorũo hinya ũrĩa tũrĩ naguo uumaga kũrĩ Jehova, hatarĩ nganja nĩ tũrĩkoragwo na hinya.
Kũmaatha Maũndũ ma Bata Maandĩko-inĩ
Ciũria Kuuma Kũrĩ Athomi
Kũroneka atĩ “igũrũ rĩa gatatũ,” rĩrĩa rĩgwetetwo thĩinĩ wa 2 Akorintho 12:2 nĩ Ũthamaki wa Kĩĩmesia, kana “igũrũ rĩerũ” rungu rwa ũtongoria wa Jesu Kristo na arĩa 144,000 magaathana nake.—2 Pet. 3:13.
Ũthamaki ũcio wĩtĩtwo “igũrũ rĩa gatatũ” tondũ wathani waguo nĩ mũtũũgĩru, na wa gĩkĩro kĩa igũrũ.
“Paradiso” ĩrĩa Paulo ‘ooirũo agĩtwarũo’ thĩinĩ wa kĩoneki no kũhoteke nĩ (1) thĩ Paradiso ĩrĩa ĩgũka ica ikuhĩ, (2) Paradiso ya kĩĩroho ĩrĩa ĩgaakorũo kuo hĩndĩ ĩyo, ĩrĩa ĩgaakorũo ĩrĩ nene gũkĩra paradiso ya kĩĩroho ĩrĩa ĩrĩ kuo rĩu, na (3) “paradiso ya Ngai” kũrĩa igũrũ ĩrĩa ĩgaakorũo kuo hĩndĩ ya thĩ njerũ.
it-2 177
Kũmumunyana
“Ngeithi theru cia kũmumunyana.” Akristiano a tene nĩ maakoragwo na “ngeithi theru cia kũmumunyana” (Ro 16:16; 1Ko 16:20; 2Ko 13:12; 1The 5:26) kana “ngeithi cia kũmumunyana irĩ na wendo” (1Pe 5:14), iria kwahoteka ciarĩ cia atumia gwa atumia na arũme kwa arũme. Ngeithi icio cia tene cia Gĩkristiano no iringane na mũtugo wa Kĩhibirania wa kũgeithia mũndũ na njĩra ya kũmũmumunya. O na gũtuĩka Maandĩko matiheanĩte ũhoro makĩria, no kũhoteke “ngeithi theru cia kũmumunyana” kana “ngeithi cia kũmumunyana irĩ na wendo” cioonanagia wendo na ũrũmwe ũrĩa warĩ kĩũngano-inĩ gĩa Gĩkristiano.—Joh 13:34, 35.
MĨĨ 27–JUNI 2
MŨTHITHŨ KUUMA KIUGO-INĨ KĨA NGAI | AGALATIA 1–3
“Ndamũkararirie Ũthiũ kwa Ũthiũ”
Ũrĩ na Mawoni ta ma Jehova Megiĩ Kĩhooto?
16 Thoma Agalatia 2:11-14. Petero eekire ũguo nĩ ũndũ wa gwĩtigĩra andũ. (Thim. 29:25) O na gũtuĩka Petero nĩ oĩ wega mwĩcirĩrie wa Jehova ũndũ-inĩ ũcio, nĩ eetigagĩra mawoni ma Ayahudi arĩa maaruĩte a kĩũngano kĩa Jerusalemu. Mũtũmwo Paulo ũrĩa o nake warĩ mũcemanio-inĩ ũrĩa wekĩirũo Jerusalemu mwaka-inĩ wa 49, nĩ aarũngire Petero ĩmwe kwa ĩmwe kũu Antiokia na akĩonania ũhinga wa Petero. (Atũm. 15:12; Gal. 2:13) O na kũrĩ ũguo-rĩ, Akristiano a Ndũrĩrĩ arĩa maahutĩtio nĩ ihĩtia rĩu rĩa Petero mangĩaiyũkirie atĩa wagi ũcio wa kĩhooto? Nĩ mangĩahĩngĩkire nĩ ũndũ ũcio? Hihi Petero nĩ angĩehereirio mĩeke ĩrĩa aarĩ nayo nĩ ũndũ wa ihĩtia rĩu?
Arĩa Mendete Jehova “Gũtirĩ Ũndũ Monaga Ũngĩmahĩnga”
12 Petero nĩ onanagia gwĩtigĩra andũ, na akahĩngwo mũno rĩmwe na rĩmwe; ĩndĩ aaikarire arĩ mwĩhokeku harĩ Jesu na Jehova. Kwa ngerekano-rĩ, nĩ aakanire Mwathi wake maita matatũ arĩ mbere ya andũ. (Luk. 22:54-62) Thutha ũcio, harĩ hĩndĩ Petero aagire gwĩka ta Mũkristiano, akĩonia athathaiya arĩa moimĩte harĩ Ndũrĩrĩ ta mataarĩ agĩrĩru ta Akristiano Ayahudi arĩa maarĩ aruu. No mũtũmwo Paulo aarĩ na mawoni marĩa maagĩrĩire ũndũ-inĩ ũcio—mũthutũkanio ndũngĩoneirũo kaanya thĩinĩ wa kĩũngano. Mwerekera ũcio wa Petero ndwarĩ mwega. No mbere ya mũtugo ũcio wa Petero ũthũkie ũrũmwe wa kĩũngano, Paulo nĩ oire ikinya na akĩrũnga Petero ĩmwe kwa ĩmwe. (Gal. 2:11-14) Hihi Petero nĩ onire ta agĩrũo gĩtĩo mũno nginya akiuma kĩhĩtahĩtano-inĩ kĩa muoyo? Aca. Nĩ oire ũtaaro wa Paulo na ũritũ, akĩũhũthĩra, na agĩthiĩ na mbere na kĩhĩtahĩtano.
Tungatagĩra Ngai Ũrĩ na Wĩhokeku o na Kũrĩ na “Mathĩna Maingĩ”
20 Ĩ nacio tharĩkĩro ciĩhithĩte? Kwa ngerekano, tũngĩka atĩa tũngĩigua tũkuĩte ngoro? Ũndũ ũmwe wa bata mũno tũngĩka nĩ gwĩcũrania ũhoro wa igongona rĩa ũkũũri. Ũguo nĩguo mũtũmwo Paulo eekaga. Rĩmwe na rĩmwe nĩ aatangĩkaga mũno. O na kũrĩ ũguo, nĩ aamenyaga atĩ Kristo aakuire nĩ ũndũ wa andũ ehia no ti ũndũ wa andũ akinyanĩru. Na nĩ aamenyaga aarĩ ũmwe wa ehia acio. Aandĩkire ũũ: ‘Ndũũraga nĩ ũndũ wa gwĩtĩkia Mũrũ wa Ngai, o we wanyendire, agĩkĩĩruta nĩ ũndũ wakwa.’ (Gal. 2:20) Hatarĩ nganja, Paulo aarĩ na wĩtĩkio harĩ igongona rĩa ũkũũri. Nĩ aakũranaga atĩ ũkũũri warĩ na ũguni harĩ we kĩũmbe.
21 Gũkorũo na mawoni ta macio ma kuona ũkũũri ũrĩ kĩheo kĩa mũndũ kĩũmbe kuuma kũrĩ Jehova, no gũtũteithie na njĩra nene. Ũguo ti kuuga atĩ tũtirĩkuaga ngoro. No kũhoteke amwe aitũ mekũhiũrania na tharĩkĩro ĩyo ĩĩhithĩte nginya tũingĩre thĩinĩ wa thĩ njerũ. Ĩndĩ nĩ wega kũririkana: Arĩa megũthiĩ na mbere gũtungatĩra Jehova nĩo makaheo kĩheo kĩu. Mũthenya ũrĩa mũnene rĩrĩa Ũthamaki wa Ngai ũkaarehe thayũ na ũcokerie andũ ũkinyanĩru, ũrĩ hakuhĩ mũno gũkĩra hĩndĩ ĩngĩ o yothe. O na angĩkorũo nĩ ũkũgerera mathĩna maingĩ, wĩrutanĩrie nĩguo ũkaingĩra thĩinĩ wa Ũthamaki ũcio.
it-1 880
Marũa Kũrĩ Agalatia
Rĩrĩa Paulo ooigire, “Inyuĩ Agalatia aya mũtarĩ wĩcirio,” ndeendaga kuonania atĩ eeciragia o ũhoro wa andũ a rũrĩrĩ ruoimanĩte na andũ a Gallic kuuma mwena wa rũgongo wa gĩcigo kĩa Galatia. (Ga 3:1) Handũ ha ũguo, Paulo aakaanagia andũ amwe ciũngano-inĩ arĩa meetĩkĩrĩte gũthũkio nĩ mwerekera wa Ayahudi amwe gatagatĩ-inĩ kao, arĩa maageragia kuonania ũthingu wao kũgerera watho wa Musa, handũ ha gũtuĩka “athingu nĩ ũndũ wa gũkorũo na wĩtĩkio” ũrĩa uumanĩte na kĩrĩkanĩro kĩrĩa kĩerũ. (2:15–3:14; 4:9, 10) “Ciũngano cia Galatia” (1:2) iria Paulo aandĩkĩire ciarĩ na mũtukanio wa Ayahudi na andũ matarĩ Ayahudi, na acio mataarĩ Ayahudi nĩ hamwe na arĩa maaruĩte na makagarũra wĩtĩkio na andũ a ndũrĩrĩ matarĩ aruu, na hatarĩ nganja amwe ao mooimanĩte na andũ a Celtic. (Atũ 13:14, 43; 16:1; Ga 5:2) Othe aametire Akristiano a Galatia tondũ gĩcigo kĩu maaikaraga gĩetagwo Galatia. Kwoguo marũa macio monanagia Paulo aandĩkagĩra andũ oĩ wega arĩa maaikaraga mwena wa mũhuro wa gĩcigo kĩa Roma, no ti andũ atoĩ o na hanini a mwena wa rũgongo, kũndũ hihi o na atoimire athiĩte.