• Marũa Kuuma Kũrĩ Kĩama Kĩrĩa Gĩtongoragia
    Ũtungata wa Ũthamaki—2013 | Machi

    • Marũa Kuuma Kũrĩ Kĩama Kĩrĩa Gĩtongoragia

      Aarĩ na Ariũ a Ithe Witũ Ende:

      Ithe witũ wa igũrũ Jehova, nĩwe kĩonereria kĩrĩa kĩega biũ kĩa wendo. Nĩkĩo Bibilia yugaga ũũ: “Ngai nĩwe wendani.” (1 Joh. 4:8) O na gũtuĩka Jehova nĩwe Mwene Hinya Wothe-rĩ, Kiugo gĩake gĩtiugaga atĩ, “Ngai nĩ hinya” kana, “Ngai nĩ ũhoti.” Wathani wake ũkoragwo wĩhocetie harĩ wendo. Na githĩ ũndũ ũcio ndũtũmaga tũmwende mũno!

      Nĩ gĩkeno kuona atĩ Jehova ndatũtindĩkagĩrĩria tũmũtungatĩre. Wathani wake ti wa gĩthũri. Endaga tũmũtungatĩre nĩ ũndũ wa kũmwenda kuuma ngoro. Tweka ũguo, tuonanagia atĩ nĩ twendete wathani wake, tondũ nĩ twĩtĩkĩtie atĩ njĩra yake ya gwathana nĩ ya kĩhooto na wendo. Ũndũ ũcio nĩ ũkoretwo ũkĩoneka kuuma o rĩrĩa mũndũ ombirũo.

      Handũ ha kwĩra Adamu na Hawa kĩa hinya mamwathĩkagĩre, Jehova aamaheire mweke methurĩre ũrĩa mekwenda. Korũo nĩ meendete Jehova kũna na makona ũrĩa aamekĩire ũrĩ wa bata, nĩ mangĩareganire na igeria rĩa Shaitani rĩa kũmahĩtithia.

      Thutha ũcio, mĩario-inĩ yake ya mũthia Musa eerire rũrĩrĩ rwa Isiraeli ũũ: “Ta rora wone atĩ ũmũthĩ ndakũigĩra mbere yaku ũhoro wa gũtũũra muoyo, na maũndũ mega, na ndakũigĩra gĩkuũ, o na ũũru.” (Gũcok. 30:15) Andũ acio maarĩ na wĩyathi wa gwĩthurĩra ũrĩa mekwenda gũikara. O ũndũ ũmwe na ũcio, Joshua eerire Isiraeli ũũ: ‘Mũngĩkorũo nĩ mũkuona arĩ ũũru gũtungatĩra Jehova, thurai ũmũthĩ ũrĩa mũrĩtungatagĩra.’ Nao magĩcokeria Joshua makiuga ũũ: “Tũroaga gũkanatigana na Jehova atĩ nĩguo tũtungatĩre ngai ingĩ.” (Josh. 24:15, 16) Ũguo noguo o na ithuĩ tũiguaga ũmũthĩ. Tondũ nĩ twendete Jehova-rĩ, “tũroaga” gũkanatigana nake.

      Thĩinĩ wa kĩũngano gĩa Gĩkristiano, ithuĩ nĩ tũmenyete gũkorũo na wĩyathi nĩ kuga atĩa. O na gũtuĩka athuri a kĩũngano nĩ maheetwo wĩra wa gũtaara na kũrũithia-rĩ, matigeragia gwathĩra andũ ũtũũro wao kana wĩtĩkio wao. Mũtũmwo Paulo aandĩkire ũũ: “Na ti atĩ tũrĩ a kũmwatha ũhoro-inĩ wa ũrĩa mwĩtĩkĩtie, tiga o atĩ tũkĩrĩ a kũrutithania wĩra na inyuĩ nĩguo mũkenage, amu ũhoro-inĩ wa gwĩtĩkia-rĩ, mũtũire mwĩhandĩte wega.”—2 Kor. 1:24.

      Na githĩ ti ũndũ ũrehaga gĩkeno gwĩka ũndũ nĩ ũndũ wa kwĩyendera handũ ha kũringĩrĩrio! Jehova atwĩraga twĩke maũndũ marĩa mega tũgĩtindĩkwo nĩ wendo. Bata wa ũndũ ũcio nĩ wonekaga thĩinĩ wa ciugo ici cia Paulo iria itongoretio na roho: ‘O na ingĩtũũra ndutaga indo ciakwa ciothe cia gũtuga athĩni, o na ingĩheana mwĩrĩ wakwa, na ngorũo ndirĩ na wendani-rĩ, ndingĩgunĩka.’—1 Kor. 13:3.

      Na githĩ Jehova ndagĩkenaga na agakumio mũno nĩ kuona aarĩ na ariũ a Ithe witũ milioni nyingĩ makĩmũtungatĩra nĩ ũndũ wa kũmwenda kuuma ngoro!

      Ningĩ Jehova nĩ endete mũno ndungata ciake ciothe o hamwe na inyuĩ ciana na andũ ethĩ arĩa muonanagia atĩ nĩ mwendete Jehova handũ ha kwenda thĩ na maũndũ mayo. Gĩai na ma atĩ, o na ithuĩ nĩ tũmwendete mũno.—Luk. 12:42, 43.

      Nĩ ũndũ wa wendo wanyu harĩ Jehova, inyuĩ aarĩ na ariũ a Ithe witũ o hamwe na andũ ethĩ mũrahũthĩrire mathaa 1,748,697,447 mwaka ũcio ũrathirire, mũkĩhunjia ũhoro ũrĩa mwega. Magĩtindĩkwo nĩ wendo, ahunjia 7,782,346 nĩ maanyitanĩire wĩra-inĩ wa kũhunjia thĩinĩ wa thĩ yothe. Tũrĩ na gĩkeno kuona atĩ andũ erũ 268,777, aingĩ ao marĩ andũ ethĩ nĩ maronanirie wĩyamũrĩri wao harĩ Jehova na njĩra ya kũbatithio. Ũguo nĩ kuonania nĩ ta andũ 5,168 marabatithagio o kiumia. Ũcio nĩ ũndũ wa kũhutia ngoro!

      Mahinda-inĩ maya ma kũrigĩrĩria, andũ a Ngai no mũhaka mahiũranie na mathĩna maingĩ, moritũ, kũnyarirũo, ndwari, na amwe ũkũrũ. Ĩndĩ nĩ tũtuĩte itua rĩa kwaga ‘gũcoka na thutha’ kana ‘kũũrũo nĩ hinya.’ Nĩ tũmwendete mũno inyuothe.—Ahib. 10:39; 2 Kor. 4:16.

      Nĩ ithuĩ ariũ a Ithe wanyu,

      Kĩama Kĩrĩa Gĩtongoragia kĩa Aira a Jehova

  • Ũrĩa Tũngĩhũthĩra Broshua Njerũ Ũhoro Mwega Kuuma Kũrĩ Ngai!
    Ũtungata wa Ũthamaki—2013 | Machi

    • 3. Broshua ĩno nĩ ngũrani na mabuku marĩa mangĩ tũhũthagĩra kũruta andũ na njĩra ĩrĩkũ?

      3 Ũrĩa Ĩbangĩtwo: Mabuku maitũ maingĩ maandĩkĩtwo nĩguo mũndũ ethomere na ataũkĩrũo nĩ ũhoro wa ma, o na ategũteithĩrĩrio. Broshua ĩno nĩ ngũrani. Yandĩkĩtwo ĩrĩ ya kwĩruta Bibilia mũndũ agĩteithĩrĩrio nĩ mwarimũ. Kwoguo ũkĩmĩtigĩra mũndũ, harĩ bata kwarĩrĩria nake kĩbungo kĩmwe kana igĩrĩ. Ibungo ciayo nĩ nguhĩ, kwoguo o na no ciarĩrĩrio mũrũgamĩte mũrango-inĩ wa mũndũ kana harĩa ahũragĩra biacara. O na gũtuĩka nĩ wega kwambĩrĩria na ithomo rĩa 1, no twambĩrĩrie kwĩruta na mũndũ handũ o hothe thĩinĩ wa broshua ĩyo.

      4. Broshua ĩno ĩrĩtũteithagia atĩa kũruta andũ ĩmwe kwa ĩmwe kuuma Bibilia-inĩ?

      4 Thĩinĩ wa mabuku maitũ maingĩ, macokio ma ciũria iria icabĩtwo no moneke thĩinĩ wa ibungo. Ĩndĩ thĩinĩ wa broshua ĩno, macokio maingĩ monekaga thĩinĩ wa Bibilia. Andũ aingĩ mendaga kwĩruta kuuma thĩinĩ wa Bibilia handũ ha kuuma mabuku-inĩ maitũ. Nĩ ũndũ ũcio, hakuhĩ maandĩko mothe marĩa monanĩtio ibungo-inĩ matiandĩkĩtwo ũrĩa moigĩte. Magĩrĩirũo gũthomwo kuuma Bibilia-inĩ. Ũndũ ũcio nĩ ũrĩteithagia arutwo kuona atĩ maũndũ marĩa mareruta moimĩte kũrĩ Ngai.—Isa. 54:13.

      5. Nĩkĩ nĩ harĩ bata mũrutani gũkorũo eharĩirie wega hingo ciothe agĩthiĩ kwĩruta na mũndũ Bibilia?

      5 Broshua ĩno ndĩtaarĩirie maandĩko mothe. Nĩkĩ? Yandĩkĩtwo ũndũ ĩgwĩkĩra mũrutwo ngoro orie ciũria na ĩteithie mũrutani ahũthĩre ũhoti wake wa kũrutana. Kwoguo, harĩ bata mũndũ gũkoragwo ehaarĩirie wega hingo ciothe agĩthiĩ kwĩruta na mũrutwo. No nĩ wega kwĩmenyerera tũtikarie mũno. Nĩ tũkenaga tũgĩtaarĩria Maandĩko, ĩndĩ kaingĩ tũkoragwo na moimĩrĩro mega rĩrĩa tuoria mũrutwo ataarĩrie mawoni make megiĩ rĩandĩko. Tũngĩhũthĩra ciũria na njĩra ya ũũgĩ, no tũmũteithie one ũrĩa o rĩandĩko riugĩte.—Atũm. 17:2.