ITHOMO RĨA 14

Gũtĩtĩrithia Maũndũ Marĩa Manene

Ahibirania 8:1

NA NJĨRA NGUHĨ: Teithia athikĩrĩria aku matwarane na mĩario yaku, na wonanie wega ũrĩa ũndũ o wothe mũnene ũkonainie na muoroto waku na kĩongo kĩa mĩario yaku.

ŨRĨA ŨNGĨKA ŨGUO:

Korũo na muoroto. Wĩcirie kana muoroto wa mĩario yaku nĩ kũheana ũhoro, kũruta ihooto, kana gwĩkĩra athikĩrĩria aku ngoro, ũcoke ũmĩheane kũringana na muoroto ũcio. Tigĩrĩra atĩ maũndũ mothe manene nĩ megũgũteithia kũhingia muoroto waku.

Wĩyũrie ũũ: ‘Nĩ ciũria irĩkũ kana nĩ nganja irĩkũ athikĩrĩria akwa mangĩkorũo nacio ciĩgiĩ ũhoro ũyũ? Mangĩtua kũgweta ciũria icio kana nganja icio-rĩ, nĩ irĩkũ mangĩambĩrĩria nacio?’ Ũcoke ũbange maũndũ marĩa ũkwarĩrĩria na njĩra o ta ĩyo nĩgetha athikĩrĩria aku matwarane na ũhoro ũcio, mataũkĩrũo nĩguo, na mawĩtĩkĩre.
Tĩtĩrithia kĩongo kĩa mĩario yaku. Ikara ũkĩgwetaga kĩongo mĩario-inĩ yaku yothe na njĩra ya gũcokera ciugo iria ikuuĩte ũndũ mũnene kĩongo-inĩ kĩu kana kũhũthĩra ciugo ihaanaine nacio.
Taarĩria maũndũ marĩa manene na njĩra ĩkũnyitĩka wega na hũthũ. Thuura o maũndũ manene marĩa mahutanĩtie na kĩongo gĩaku na marĩa ũngĩhota kũrutana wega ihinda-inĩ rĩrĩa ũheetwo. Ndũgakorũo na maũndũ maingĩ manene, gweta maũndũ mothe manene na njĩra ĩranyitĩka wega, tithia thutha wa kũgweta o ũndũ, na wonanie wega ũrĩa ũndũ ũmwe mũnene ũnyitanĩte na ũrĩa ũrũmĩrĩire.

No ũgwete maũndũ marĩa manene ũkĩambĩrĩria nĩgetha ũteithie athikĩrĩria gũtwarana namo kana ũmacokere ũkĩrĩkĩrĩria nĩgetha ũteithie athikĩrĩria kũmaririkana.