Motaaro ma Bibilia Matũgunaga Atĩa?

1. Tũbataraga ũtongoria nĩkĩ?

Mũũmbi witũ nĩ mũũgĩ gũtũkĩra. Arĩ Ithe witũ ũtwendete, nĩ atũrũmbũyagia. Ningĩ, ndaatũmbire twĩyathage. (Jeremia 10:23) Kwoguo, o ta ũrĩa kaana kabataraga ũtongoria wa aciari, ithuothe nĩ tũbataraga ũtongoria wa Ngai. (Isaia 48:17, 18) Motaaro ma Bibilia nĩ matũheaga ũtongoria ũrĩa arĩ kĩheo kuuma kwĩ Ngai.​—Thoma 2 Timotheo 3:16.

Mawatho na motaaro ma Jehova matũrutaga njĩra ĩrĩa njega biũ ya ũtũũro rĩu na magatuonia ũrĩa tũngĩgĩa na irathimo cia tene na tene mahinda marĩa maroka. Tondũ Ngai nĩwe watũmbire-rĩ, nĩ kwagĩrĩire twĩtĩkagĩre ũtongoria wake tũrĩ na ngatho.​—Thoma Thaburi 19:7, 11; Kũguũrĩrio 4:11.

2. Motaaro ma Bibilia nĩ kĩĩ?

Motaaro ma Bibilia nĩ ma cia mũthingi. Mawatho namo monanagia ĩmwe kwa ĩmwe ũrĩa mũndũ agĩrĩirũo gwĩka ũndũ-inĩ mũna. (Gũcokerithia Maathani 22:8) No mũhaka tũhũthĩre ũhoti witũ wa gwĩciria nĩguo tũtaũkĩrũo nĩ ũrĩa tũngĩhũthĩra ũtaaro mũna wa Bibilia. (Thimo 2:10-12) Kwa ngerekano, Bibilia ĩrutanaga atĩ muoyo nĩ kĩheo kuuma kwĩ Ngai. Ũtaaro ũcio wa mũthingi no ũtũtongorie tũrĩ wĩra-inĩ, mũciĩ, na rĩrĩa tũrĩ rũgendo-inĩ. Nĩ ũtũteithagia kwĩgitĩra kuumana na mogwati.​—Thoma Atũmwo 17:28.

3. Nĩ motaaro marĩkũ merĩ ma bata makĩria?

Jesu nĩ aaririe ũhoro wa motaaro merĩ ma bata mũno. Wa mbere ũguũragia muoroto wa ũtũũro wa andũ—kũmenya Ngai, kũmwenda, na kũmũtungatĩra tũrĩ ehokeku. Twagĩrĩirũo gũtongoragio nĩ ũtaaro ũcio tũgĩtua matua maitũ mothe. (Thimo 3:6) Arĩa marũmagĩrĩra ũtaaro ũcio nĩ magĩaga na ũrata hamwe na Ngai, gĩkeno kĩa ma, na muoyo wa tene na tene.​—Thoma Mathayo 22:36-38.

Ũtaaro wa kerĩ no ũtũteithie gũkoragwo na thayũ na andũ arĩa angĩ. (1 Akorintho 13:4-7) Kũrũmĩrĩra ũtaaro ũcio wa kerĩ nĩ kũhutĩtie kwĩgerekania na Ngai harĩ ũrĩa twĩkagĩra andũ arĩa angĩ.​—Thoma Mathayo 7:12; 22:39, 40.

4. Motaaro ma Bibilia matũgunaga atĩa?

Motaaro ma Bibilia marutaga famĩlĩ ũrĩa ingĩgĩa na ũrũmwe kũgerera wendo. (Akolosai 3:12-14) Ningĩ Kiugo kĩa Ngai nĩ kĩgitagĩra famĩlĩ na njĩra ya kũrutana ũtaaro ũyũ wa gũtũtongoria—kĩhiko kĩagĩrĩirũo gũkorũo kĩrĩ gĩa gũtũũra.​—Thoma Kĩambĩrĩria 2:24.

Kũrũmĩrĩra morutani ma Bibilia no gũtũgitĩre kĩĩmwĩrĩ na kĩĩmeciria. Kwa ngerekano, andĩkani kaingĩ mandĩkaga aruti wĩra arĩa matũũraga kũringana na motaaro ma Bibilia megiĩ kĩyo na kwĩhokeka. (Thimo 10:4, 26; Ahibirania 13:18) Ningĩ Kiugo kĩa Ngai nĩ gĩtũrutaga kũiganĩra na maũndũ marĩa ma o mũhaka na kuona ũrata hamwe na Ngai ũrĩ wa bata gũkĩra indo cia kĩĩmwĩrĩ. ​—Thoma Mathayo 6:24, 25, 33; 1 Timotheo 6:8-10.

Kũrũmĩrĩra motaaro ma Bibilia no kũgitĩre ũgima witũ wa mwĩrĩ. (Thimo 14:30; 22:24, 25) Kwa ngerekano, gwathĩkĩra watho wa Ngai wĩgiĩ gwĩthema ũrĩĩu gũtũgitagĩra kuumana na mĩrimũ ĩrĩa ĩrehaga gĩkuũ na maũndũ marĩa mangĩtũgera ngero. (Thimo 23:20) Jehova nĩ atwĩtĩkĩrĩtie kũnyua njohi na gĩthimi. (Thaburi 104:15; 1 Akorintho 6:10) Motaaro ma Bibilia matũgunaga na njĩra ya gũtũruta kũmenyerera ciĩko na meciria maitũ. (Thaburi 119:97-100) O na kũrĩ ũguo, Akristiano a ma matitĩaga ithimi cia Ngai nĩgetha tu megune. Mekaga ũguo nĩguo matĩithie Jehova.​—Thoma Mathayo 5:14-16.