Mabuku Marĩa Magwetetwo Thĩinĩ wa Kabuku ka Mũcemanio wa Ũtũũro na Ũtungata
DICEMBA 7-13
MŨTHITHŨ KUUMA KIUGO-INĨ KĨA NGAI | MAŨNDŨ MA ALAWII 10-11
“Wendo Harĩ Jehova Ũbatiĩ Gũkorũo na Hinya Gũkĩra Wendo Harĩ Famĩlĩ”
it-1 1174
Kĩndũ Gĩtetĩkĩrĩtio
Mwaki na Ũbumba Ũtetĩkĩrĩtio. Thĩinĩ wa Maũndũ ma Alawii 10:1, kiugo gĩa Kĩhibirania zar (kĩrĩa kiugĩte kĩndũ gĩtoĩkaine) kĩhũthĩrĩtwo gĩkĩaria ũhoro wa ‘mwaki ũtetĩkĩrĩtio, ũndũ ũrĩa Ngai ataamathĩte meke’ no ariũ a Haruni Nadabu na Abihu makĩũruta mbere ya Jehova ũndũ ũrĩa watũmire maniinwo na mwaki. (Ala 10:2; Nda 3:4; 26:61) Jehova aacokire akĩra Haruni ũũ: “Ndũkananyue ndibei o na kana kĩndũ kĩngĩ kĩngĩtũma mũndũ arĩĩo, wee o hamwe na ariũ aku arĩa mũrĩ nao, rĩrĩa mũgũtonya hema-inĩ ya gũtũnganwo, nĩguo mũtigakue. Ũcio nĩ watho wa gũtũũra njiarũa-inĩ cianyu ciothe. Nĩgetha gũkagĩaga na ngũrani ya kĩndũ kĩrĩa kĩamũre na kĩrĩa gĩtarĩ kĩamũre na ngũrani ya kĩndũ kĩrĩ na thahu na gĩtarĩ na thahu, na nĩ ũndũ wa kũruta Aisiraeli mawatho marĩa mothe Jehova arĩtie kũgerera Musa.” (Ala 10:8-11) Ũndũ ũcio ũronania atĩ no kũhoteke Nadabu na Abihu maarĩ arĩĩu, ũndũ ũrĩa watũmire magĩe na ũcamba wa kũruta mwaki ũtetĩkĩrĩtio. No kũhoteke mwaki ũcio ndwarĩ mwĩtĩkĩrĩku nĩ ũndũ wa ihinda rĩrĩa warutirũo, harĩa warutĩirũo, kana njĩra ĩrĩa warutirũo nayo, kana hihi mũtukanio wa ũbumba ũrĩa maahũthĩrire ti ta ũrĩa ũtaarĩirio thĩinĩ wa Thama 30:34, 35. Gũkorũo marĩ arĩĩu gũtiarĩ kĩĩgwatio gĩa kwĩhia.
Kũmaatha Maũndũ ma Bata Maandĩko-inĩ
it-1 111 kĩb. 5
Nyamũ
Mawatho megiĩ indo iria itaagĩrĩire kũrĩo, maahutĩtie o andũ arĩa maarĩ rungu rwa Watho wa Musa, tondũ Maũndũ ma Alawii 11:8 yugaga: “Nĩ kĩndũ kĩrĩ thahu harĩ inyuĩ,” ũguo nĩ kuuga Aisiraeli. Thutha wa Watho kũniinwo kũgerera igongona rĩa gĩkuũ kĩa Jesu Kristo, maũndũ macio mothe nĩ maaniinirũo na o rĩngĩ andũ othe maarĩ rungu rwa watho ũrĩa Nuhu aaheirũo thutha wa mũiyũro.—Kol 2:13-17; Kĩa 9:3, 4.
w11 2/15 12
Ciũria Kuuma Kũrĩ Athomi
Nĩ kĩĩ gĩatũmire Musa arakarĩre ariũ a Haruni, Eliazaru na Ithamaru thutha wa gĩkuũ kĩa ariũ a ithe wao Nadabu na Abihu, na marakara make maahooreririo atĩa?—Alaw. 10:16-20.
Ihinda inini thutha wa athĩnjĩri-Ngai kwamũrũo matungate gĩikaro-inĩ kĩrĩa kĩamũre, Jehova nĩ aaniinire ariũ a Haruni, Nadabu na Abihu, tondũ nĩ maarutĩte mwaki ũtetĩkĩrĩtio mbere yake. (Alaw. 10:1, 2) Musa aathire ariũ Haruni arĩa maatigarĩte matigacakaĩre ariũ a ithe wao arĩa maakuĩte. Ihinda inini thutha ũcio, Musa nĩ aarakarĩire Eliazaru na Ithamaru tondũ matiarĩte mbũri ya igongona rĩa mehia. (Alaw. 9:3) Nĩ kĩĩ gĩatũmire Musa arakare?
Mawatho marĩa Jehova aaheete Musa, moonanĩtie atĩ mũthĩnjĩri-Ngai ũrĩa warutaga igongona rĩa mehia, aagĩrĩirũo kũrĩa gĩcunjĩ kĩa rĩo arĩ nja ya hema ya gũtũnganwo. Gwĩka ũguo kwarĩ njĩra ya kũhumbĩra mehia ma arĩa maruta igongona rĩu. O na kũrĩ ũguo, angĩkorũo thakame ĩmwe ya igongona rĩu nĩ yatwarũo Harĩa Hatheru, kana rumu ya mbere ya harĩa hatheru, igongona rĩu rĩtiaagĩrĩire kũrĩo. Handũ ha ũguo rĩaagĩrĩire gũcinwo.—Alaw. 6:24-26, 30.
Kũroneka atĩ thutha wa maũndũ macio moru meekĩkĩte mũthenya ũcio, Musa nĩ oonire bata wa gũtigĩrĩra atĩ mawatho mothe ma Jehova nĩ maarũmagĩrĩrũo. Thutha wa kũmenya atĩ mbũri ya igongona rĩa mehia nĩ yacinĩtwo, arĩ na marakara nĩ ooririe Eliazaru na Ithamaru kĩrĩa gĩatũmĩte mage kũmĩrĩa ta ũrĩa gwathanĩtwo, tondũ thakame yayo ndĩatwarĩtwo thĩinĩ wa Harĩa Hatheru mbere ya Jehova.—Alaw. 10:17, 18.
Haruni nĩ aaheire Musa macokio, tondũ athĩnjĩri-Ngai acio maatigarĩte meekĩte ũguo thutha wa gwĩtĩkĩrio nĩ Haruni. Thutha wa ariũ erĩ a Haruni kũũragwo, no kũhoteke Haruni nĩ eeyũragia kana nĩ kũrĩ mũthĩnjĩri-Ngai ũngĩarĩire igongona arĩ na thamiri theru mũthenya ũcio. Hihi oonaga ta mangĩarĩire igongona rĩu ta matangĩakenirie Jehova, o na gũtuĩka matingĩacokereirio ĩmwe kwa ĩmwe mehia marĩa meekĩtwo nĩ Nadabu na Abihu.—Alaw. 10:19.
No kũhoteke Haruni eeciragia atĩ mũthenya ũrĩa andũ a famĩlĩ yake maarutire wĩra wa ũthĩnjĩri-Ngai riita rĩa mbere, maagĩrĩirũo kwĩmenyerera mũno nĩguo makenie Ngai nginya tũmaũndũ-inĩ tũnini. O na kũrĩ ũguo, rĩĩtwa rĩa Jehova nĩ rĩathahĩtio nĩ Nadabu na Abihu, na marakara ma Ngai makamarĩrĩmbũkĩra. No kũhoteke Haruni eeciririe atĩ, tondũ kũrĩ andũ a famĩlĩ yake meehĩtie, athĩnjĩri-Ngai acio angĩ matiaagĩrĩirũo kũrĩa igongona itheru.
Kwahoteka Musa nĩ e etĩkĩrire macokio marĩa aaheirũo nĩ mũrũ wa nyina, tondũ rũgano rũu rũrĩkagĩrĩria kuuga ũũ: “Rĩrĩa Musa aaiguire ũguo, akĩiganĩra.” (Alaw. 10:20) Kuonekaga atĩ o nake Jehova nĩ aaiganĩrire nĩ macokio ma Haruni.
DICEMBA 14-20
MŨTHITHŨ KUUMA KIUGO-INĨ KĨA NGAI | MAŨNDŨ MA ALAWII 12-13
“Wĩrute Kuumana na Mawatho Megiĩ Mangũ”
it-2 238 kĩb. 3
Mangũ
Nguo-inĩ na nyũmba-inĩ. Ningĩ mangũ nĩ mangĩanyitire nguo ya guoya kana ya gatani, kana kĩndũ kĩa rũũa. Mũrimũ ũcio nĩ ũngĩathirire indo icio ciathambio, na nĩ kwarĩ na mũbango wa gũciiga handũ mwanya. No kĩndũ kĩngĩakorirũo na kĩrooro kĩa rangi ta wa yerũ ũtukanĩte na wa ngirini, kana rangi mũtune, nĩ haamenyekaga atĩ haarĩ na mangũ moru na kĩndũ kĩu kĩaagĩrĩire gũcinwo. (Ala 13:47-59) Na thingo cia nyũmba ingĩakorirũo na tũrima twa rangi ta wa yerũ ũtukanĩte na ngirini kana mũtune, mũthĩnjĩri-Ngai oigaga atĩ nyũmba ĩyo ĩikare ĩrĩ hinge. Ningĩ nĩ kũngĩabatarire mahiga marĩa magĩtwo nĩ mũrimũ ũcio marutwo, na nyũmba ĩkũrũrũo mwena wa na thĩinĩ, na mahiga macio hamwe na mũthanga na thimiti iteo nja wa itũũra handũ hatarĩ hatheru. Mũrimũ ũcio ũngĩacokire, nyũmba ĩyo yoonagwo ĩrĩ na thahu na ĩkamomorũo na indo iria ciamĩakĩte igateo handũ hatarĩ hatheru. No nyũmba ĩngĩanĩrĩirũo atĩ ndĩarĩ na thahu, nĩ kwarĩ na mũbango wa kũmĩtheria. (Ala 14:33-57) Kwĩrĩkanaga atĩ mangũ marĩa maanyitaga nguo na nyũmba, maarĩ mũthemba wa mbuu o na gũtuĩka ũndũ ũcio ndũĩkaine wega.
Kũmaatha Maũndũ ma Bata Maandĩko-inĩ
w04 5/15 23 kĩb. 2
Matemo Kuuma Ibuku-inĩ rĩa Maũndũ ma Alawii
12:2, 5—Nĩ kĩĩ gĩatũmaga kũgĩa mwana gũtũme mũtumia akorũo “arĩ na thahu”? Ciĩga cia ũciari ciombirũo nĩguo ihĩtũkagie muoyo mũkinyanĩru wa mũndũ. O na kũrĩ ũguo, nĩ ũndũ wa kũgaya moimĩrĩro ma mehia, mwana o wothe ũciaragwo nĩ ahĩtũkagĩrio kwaga gũkinyanĩra na mehia. Ihinda rĩa gũkorũo na thahu rĩrĩa rĩoimaga na kũgĩa mwana kana maũndũ mangĩ ta ihinda rĩa mweri, na kuumwo nĩ hinya wa ũciari, nĩ gwatũmaga andũ maririkane atĩ nĩ ehia. (Maũndũ ma Alawii 15:16-24; Thaburi 51:5; Aroma 5:12) Mawatho macio megiĩ gwĩtheria nĩ mangĩateithirie Aisiraeli mone bata wa igongona rĩa ũkũũri, rĩrĩa rĩngĩahumbĩrire mehia ma andũ na rĩtũme andũ macokererũo nĩ ũkinyanĩru. Kwoguo watho ũgĩtuĩka ‘mũreri wa kũmatongoria kũrĩ Kristo.’—Agalatia 3:24.
DICEMBA 21-27
MŨTHITHŨ KUUMA KIUGO-INĨ KĨA NGAI | MAŨNDŨ MA ALAWII 14-15
“Gũkorũo Ũthathaiya-inĩ Mũtheru Kũbataraga Tũkorũo Tũrĩ Atheru”
it-1 263
Gwĩthamba
Aisiraeli meethambaga nĩguo metherie nĩ ũndũ wa itũmi itiganĩte. Mũndũ o wothe wahonete mangũ, wahutĩtie indo ciahutĩtio nĩ mũndũ “ũroimwo nĩ gĩko,” mũndũrũme woimĩtwo nĩ hinya wa ũciari, mũtumia thutha wa ihinda rĩa mweri kana kuura thakame, kana mũndũ wekĩte ngomanio, aakoragwo na “thahu” na aagĩrĩirũo gwĩthamba. (Ala 14:8, 9; 15:4-27) Mũndũ angĩakorirũo hema-inĩ na kĩimba kana akĩhutie, aakoragwo na “thahu” na aagĩrĩirũo gũtherio na maĩ ma gũtheria. Mũndũ angĩaregire gwathĩkĩra watho ũcio, aagĩrĩire ‘kweherio kuuma kĩũngano-inĩ, nĩ gũkorũo nĩ athahĩtie handũ harĩa hatheru ha Jehova.’ (Nda 19:20) Nĩkĩo gwĩthamba kũhũthagĩrũo na njĩra ya mũhaano kuonania mũndũ arĩ na mũrũgamo mwega mbere ya Jehova. (Thb 26:6; 73:13; Isa 1:16; Ezk 16:9) Gwĩthamba na kiugo kĩa Jehova kĩa ũhoro wa ma kĩrĩa kĩrũgamĩrĩirũo nĩ maĩ, nĩ kũrĩ ũhoti wa gũtheria.—Ef 5:26.
it-2 372 kĩb. 2
Ihinda rĩa Mweri
Ningĩ mũtumia nĩ oonagwo arĩ na thahu angĩoirire thakame ihinda iraihu kana oire “thakame ya ihinda rĩa mweri matukũ maingĩ gũkĩra ũrĩa oiraga rĩrĩa rĩngĩ,” na ihinda-inĩ rĩu kĩndũ o gĩothe angĩakomeire kana aikarĩre gĩakoragwo na thahu, na mũndũ o wothe ũngĩahutirie indo icio o nake aakoragwo na thahu. Thutha wa gũtiga kuura thakame ĩyo, aagĩrĩirũo gũtara thikũ mũgwanja, na thutha ũcio agathirũo nĩ thahu. Mũthenya wa kanana mũtumia ũcio aatwaragĩra mũthĩnjĩri-Ngai ndutura igĩrĩ kana njui igĩrĩ cia ndirahũgĩ, nake akahumbĩra mehia make na njĩra ya kũruta ĩmwe ĩrĩ igongona rĩa mehia na ĩyo ĩngĩ ĩrĩ igongona rĩa njino.—Ala 15:19-30.
it-1 1133
Handũ Hatheru
2. Hema ya gũtũnganwo na thutha ũcio hekarũ. Gĩikaro gĩothe kĩamũre na hekarũ hamwe na nja ciacio kuoonagwo kũrĩ handũ hatheru. (Tham 38:24; 2Ma 29:5; Atũ 21:28) Indo cia bata iria ciakoragwo nja ya gĩikaro kĩamũre na hekarũ, nĩ kĩgongona gĩa kũrutĩra magongona na kĩraĩ gĩa gĩcango. Ciakoragwo irĩ indo nyamũre. Andũ arĩa meetheretie no o tu mangĩathire nja ya gĩikaro kĩrĩa kĩamũre ihinda o rĩothe. Ningĩ gũtirĩ mũndũ ũngĩathire nja ya hekarũ arĩ na thahu. Kwa ngerekano, mũtumia warĩ na thahu ndangĩahutirie kĩndũ o gĩothe kĩamũre kana athiĩ harĩa hatheru. (Ala 12:2-4) O na Aisiraeli mangĩathire na mbere gũkorũo na thahu kwa ihinda, ũndũ ũcio woonagwo ũrĩ wa gũthahia gĩikaro kĩrĩa kĩamũre. (Ala 15:31) Arĩa maatwaraga magongona ma gũtherio kuumana na mangũ, maakinyagia magongona macio kĩhingo-inĩ kĩa nja ya gĩikaro kĩamũre kana hekarũ. (Ala 14:11) Gũtirĩ mũndũ warĩ na thahu wetĩkĩrĩtio kũrĩĩra igongona rĩa ũiguano gĩikaro-inĩ kĩrĩa kĩamũre kana hekarũ-inĩ, tondũ ũndũ ũcio nĩ ũngĩatũmire oragwo.—Ala 7:20, 21.
Kũmaatha Maũndũ ma Bata Maandĩko-inĩ
it-1 665 kĩb. 5
Gũtũ
Rĩrĩa athĩnjĩri-Ngai maamũragwo thĩinĩ wa Isiraeli, Musa aathirũo oye thakame ĩmwe ya ndũrũme ya igongona rĩa kwamũrũo amĩhake moni-inĩ ya gũtũ kwa ũrĩo kwa Haruni na kwa ariũ ake othe, o hamwe na guoko-inĩ kwao kwa ũrĩo na kũgũrũ-inĩ kwao kwa ũrĩo kuonania atĩ maũndũ marĩa mangĩathikĩrĩirie, wĩra ũrĩa mangĩarutire, na mĩthiĩre yao, yaagĩrĩire gũtongorio nĩ maũndũ marĩa meekĩkaga gĩikaro-inĩ kĩu. (Ala 8:22-24) O na ũhoro-inĩ wĩgiĩ mũndũ wetheragia kuumana na mangũ, watho woigĩte atĩ mũthĩnjĩri-Ngai aagĩrĩirũo kuoya thakame ĩmwe ya ndũrũme ĩrĩa yarutĩtwo ĩrĩ igongona rĩa mahĩtia, na maguta mamwe marĩa maarutĩtwo, ahake moni-inĩ ya gũtũ kwa ũrĩo kwa mũndũ ũcio warĩ na mangũ. (Ala 14:14, 17, 25, 28) Ũndũ ta ũcio nĩ wekagwo harĩ mũndũ weendaga gũthiĩ na mbere gũkorũo arĩ ngombo ya mwathi wake ũtũũro wake wothe. Hĩndĩ ta ĩyo ngombo ĩyo yatwaragwo gĩtugĩ-inĩ kĩa mũrango, nake mwathi wayo akamĩtũra gũtũ na mũkuha. Tondũ rũũri rũu rwekĩragwo kĩĩga-inĩ gĩa gũthikĩrĩria, ũndũ ũcio woonanagia atĩ ngombo ĩyo nĩ yendaga gũthiĩ na mbere gũthikĩrĩria na gwathĩkĩra mwathi wayo.—Tham 21:5, 6.
g 1/06 14, gathandũkũ
Mbuu nĩ Ciateithagia na Ciarĩ Ũgwati!
NĨ KWARĨ MBUU MAHINDA-INĨ MA BIBILIA?
Bibilia nĩ ĩgwetaga ũhoro wa ‘nyũmba kũgĩa mũrimũ wa mangũ,’ ĩkĩaria ũhoro wa nyũmba yo nyene. (Maũndũ ma Alawii 14:34-48) Gũtuĩkaga atĩ mũrimũ ũcio, ũrĩa wetagwo “mangũ moru mũno,” warĩ mũthemba wa mbuu, no gũtiũĩkaine wega. O ũrĩa kũngĩkorũo kwarĩ, Watho wa Ngai woigĩte atĩ ene nyũmba ĩyo maagĩrĩire kũruta mahiga marĩa maanyitĩtwo nĩ mũrimũ ũcio, makũrũre biũ mwena wa thĩinĩ wa nyũmba ĩyo, na mate indo ciothe iria cianyitĩtwo nĩ mũrimũ ũcio nja ya itũũra “handũ hatarĩ hatheru.” Mũrimũ ũcio ũngĩacokire, nyũmba ĩyo yothe yaagĩrĩire kwanĩrĩrũo atĩ yarĩ na thahu, ĩmomorũo na indo ciayo iteo. Ũtongoria ũcio wa Jehova woonanagia wendo wake mũnene harĩ andũ ake, na atĩ nĩ aarũmbũyagia ũgima wao wa mwĩrĩ.
DICEMBA 28–JANŨARĨ 3
MŨTHITHŨ KUUMA KIUGO-INĨ KĨA NGAI | MAŨNDŨ MA ALAWII 16-17
Kũmaatha Maũndũ ma Bata Maandĩko-inĩ
it-1 226 kĩb. 3
Azazeli
O ta ũrĩa mũtũmwo Paulo aataarĩirie, rĩrĩa Jesu aarutire muoyo wake mũkinyanĩru ũrĩ igongona nĩ ũndũ wa mehia ma andũ, aahingirie ũndũ wa bata makĩria gũkĩra ũrĩa wahingagio nĩ “thakame ya ndegwa na ya mbũri.” (Ahi 10:4, 11, 12) Na njĩra ĩyo agĩtuĩka mbũri ya kũũra, ‘agĩkuua mĩrimũ itũ,’ na ‘agĩthecwo nĩ ũndũ wa mehia maitũ.’ (Isa 53:4, 5; Mat 8:17; 1Pe 2:24) ‘Aakuuire’ mehia ma arĩa othe monanagia wĩtĩkio harĩ igongona rĩake. Oonanirie mũbango wa Ngai wa kweheria mehia biũ. Kũgerera njĩra icio, mbũri ‘ya Azazeli’ yarũgamagĩrĩra igongona rĩa Jesu Kristo.