Jesu na arutwo ake makoretwo Bethania thikũ ithatũ kuuma rĩrĩa maakinyire moimĩte Jeriko. Rĩu nĩ rũcinĩ tene Njumatatũ Nisani 10, na merekeire Jerusalemu. Jesu nĩ mũhũtu. Kwoguo ona mũtĩ wa mũkũyũ, agathiĩ harĩ guo. Hihi ũrĩ na ngũyũ?

Rĩu nĩ mũthia-inĩ wa Machi, na kĩmera kĩa ngũyũ gĩgaakinya o Juni. Ĩndĩ mũkũyũ ũcio nĩ ũrutĩte mathangũ mbere ya ihinda rĩu. Kwoguo, Jesu arona ta ũngĩkorũo ũciarĩte ngũyũ cia mbere. No akinya agakora hatirĩ kĩndũ. Mathangũ maratũma woneke ta ũrĩ na ngũyũ. Jesu agacoka akoiga: “Mũndũ o na ũrĩkũ ndakanarĩe itunda kuuma harĩ wee rĩngĩ.” (Mariko 11:14) O rĩo mũtĩ ũcio ũkambĩrĩria kũũma, na mũthenya ũyũ ũngĩ rũcinĩ, gũkamenyeka kĩrĩa ũndũ ũcio ũrũgamĩrĩire.

Thutha wa ihinda, Jesu na arutwo ake magakinya Jerusalemu. Agathiĩ hekarũ-inĩ, ĩrĩa arerorangagĩra ira mathaa ma thutha wa mĩaraho. No ũmũthĩ ageka ũndũ ũngĩ makĩria ma kwĩrorera, akoya ikinya ta rĩrĩa oire mĩaka ĩtatũ mĩhĩtũku hĩndĩ ya Pasaka ya mwaka wa 30. (Johana 2:​14-16) Riita rĩrĩ Jesu akarutũrũra ‘arĩa mendagia na makagũra indo thĩinĩ wa hekarũ.’ O na akangʼaũrania ‘metha cia arĩa marakũũrania mbeca, na itĩ cia arĩa marendia ndutura.’ (Mariko 11:15) Ningĩ akaga gwĩtĩkĩria mũndũ o na ũrĩkũ atuĩkanĩrie nja ya hekarũ agĩtwara indo kuuma mwena ũmwe wa itũũra nginya ũrĩa ũngĩ.

Hihi nĩ kĩĩ kĩratũma Jesu oe ikinya irũmu kwerekera acio marakũũrania mbeca na kwendia nyamũ thĩinĩ wa hekarũ? Akoiga: “Githĩ ti kwandĩke ũũ: ‘Nyũmba yakwa ĩgeetagwo nyũmba ya mahoya harĩ andũ othe’? No inyuĩ mũmĩtuĩte ngurunga ya atunyani.” (Mariko 11:17) Areta andũ acio atunyani nĩ ũndũ wa gwĩtia mbeca nyingĩ rĩrĩa marendia nyamũ cia kũrutwo magongona. Jesu arona ciĩko ciao irĩ ũici kana ũtunyani.

Athĩnjĩri-Ngai anene, andĩki-Watho, na atongoria makaigua ũrĩa Jesu eka, na ũndũ ũcio ũgatũma merutanĩrie o na makĩria gũcaria ũrĩa mekũmũũraga. Ĩndĩ harĩ na ũndũ ũramagirĩrĩria. Matiramenya ũrĩa mekũũraga Jesu, tondũ andũ aingĩ nĩ maroka kũmũthikĩrĩria.

To Ayahudi tu mokĩte gũkũngũĩra Pasaka, no nĩ nginya arĩa magarũrĩte wĩtĩkio magatuĩka Ayahudi. Amwe ao nĩ Angiriki arĩa mokĩte gĩkũngũĩro-inĩ nĩ ũndũ wa ũthathaiya. Magathiĩ harĩ Filipu, hihi nĩ ũndũ wa rĩĩtwa rĩake rĩa Kĩngiriki na makoria kana no mone Jesu. Filipu ndarĩ na ma kana hihi ũndũ ũcio nĩ mwagĩrĩru, kwoguo akaria na Andrea. Marĩ erĩ magatwarĩra Jesu ũhoro ũcio, na no kũhoteke o na rĩu Jesu arĩ o hekarũ-inĩ.

Jesu nĩ aramenya atĩ thutha wa thikũ nini nĩ egũkua, kwoguo rĩrĩ ti ihinda rĩa gũcokeria andũ ciũria ciao kana kũmenyeka nĩ andũ aingĩ. Agacokeria atũmwo acio erĩ na njĩra ya kũmahe ngerekano, akoiga: “Ihinda nĩ ikinyu rĩa Mũrũ wa mũndũ gũtũũgĩrio. Ngũmwĩra atĩrĩ o ma o ma, mbegũ ya ngano ĩtangĩgwa thĩ na ĩkue, ĩtũũraga ĩrĩ o ĩmwe; no ĩngĩkua, ĩcokaga ĩgaciara maciaro maingĩ.”​—Johana 12:​23, 24.

Mbegũ ĩmwe ya ngano no yoneke ĩrĩ kĩndũ kĩnini mũno. Ĩndĩ mbegũ ĩyo ĩngĩhandwo tĩri-inĩ na “ĩkue,” no ĩmere na thutha wa ihinda ĩkũre ĩrute maciaro maingĩ. Ũndũ ũmwe na ũguo, Jesu nĩ mũndũ mũkinyanĩru. No nĩ ũndũ wa gũikara arĩ mwĩhokeku nginya gĩkuũ, nĩ egũtũma andũ aingĩ arĩa marĩ na mwerekera o ta wake wa kwĩima makaagĩa na muoyo wa tene na tene. Nĩ ũndũ ũcio Jesu akoiga: “Mũndũ o wothe wendete muoyo wake nĩ aũteaga, no mũndũ o wothe ũthũire muoyo wake thĩinĩ wa thĩ ĩno nĩ aũgitagĩra nĩ ũndũ wa muoyo wa tene na tene.”​—Johana 12:25.

Jesu akonania atĩ ndararia o ũhoro wake tu akoiga: “Mũndũ o wothe angĩenda kũndungatĩra, nĩ anũmagĩrĩre, na harĩa niĩ ndĩrĩkoragwo nĩ ho ndungata yakwa o nayo ĩrĩkoragwo. Mũndũ o wothe angĩenda kũndungatĩra, Awa nĩ arĩmũheaga gĩtĩo.” (Johana 12:26) Kĩu nĩ kĩrathimo kĩnene mũno! Acio matĩagwo nĩ Jehova, nĩ magaathana hamwe na Kristo Ũthamaki-inĩ.

Jesu tondũ nĩ aramenya mĩnyamaro mĩnene na gĩkuũ kĩa ruo kĩrĩa kĩrĩ mbere yake, akoiga: “Rĩu nĩ ndĩratangĩka, ngũkiuga atĩa? Awa, honokia kuumana na ithaa rĩrĩ.” No Jesu ndarenda gwĩthema kũhingia wendi wa Ngai. Akongerera akoiga: “No ningĩ-rĩ, ithaa rĩrĩ no mũhaka rĩngore, kĩu nĩkĩo gĩtũmĩte njũke.” (Johana 12:27) Jesu nĩ aranyita mbaru muoroto wa Ngai, o na kũruta muoyo wake ũtuĩke igongona.

Nĩ Njumatatũ, Nisani 10, na Jesu arĩ hekarũ-inĩ akĩaria ũhoro wa gĩkuũ gĩake kĩrĩa gĩkuhĩrĩirie. Nĩ ũndũ wa gũtangĩkĩra ũrĩa ũndũ ũcio ũkũhutia rĩĩtwa rĩa Ngai, Jesu akoiga: “Awa, goocithia rĩĩtwa rĩaku.” Gũgacoka gũkaiguĩka mũgambo mũnene kuuma igũrũ ũkoiga: “Nĩ ndĩrĩgoocithĩtie na nĩ ngũrĩgoocithia rĩngĩ.”​—Johana 12:​27, 28.

Andũ arĩa marĩ hau hakuhĩ makagega. Amwe mageciria nĩ marurumĩ maigua. Angĩ nao makoiga: “Nĩ mũraika wamwarĩria.” (Johana 12:29) Ĩndĩ mũgambo ũcio maigua ũkĩaria nĩ wa Jehova! Na rĩrĩ ti rĩo riita rĩa mbere andũ kũigua mũgambo wa Ngai kuuma Jesu ambĩrĩria ũtungata wake gũkũ thĩ.

Mĩaka ĩtatũ na nuthu mĩhĩtũku rĩrĩa Jesu aabatithagio, Johana Mũbatithania nĩ aaiguire Ngai akiuga ũũ igũrũ rĩa Jesu: “Ũyũ nĩ Mũrũ wakwa, ũrĩa nyendete mũno, na nĩ ndĩmwĩtĩkĩrĩte.” Ningĩ thutha wa Pasaka ya mwaka wa 32, Jakubu, Johana, na Petero nĩ moonire Jesu akĩgarũrũka ũrĩa aatariĩ na makĩigua Ngai akiuga: “Ũyũ nĩ Mũrũ wakwa, ũrĩa nyendete, na nĩ ndĩmwĩtĩkĩrĩte. Mwathĩkagĩrei.” (Mathayo 3:17; 17:5) No riita rĩrĩ rĩa gatatũ Jehova aria na njĩra ĩraiguĩka nĩ andũ aingĩ.

Jesu akoiga: “Mũgambo ũcio ndũnaiguĩka nĩ ũndũ wakwa, no nĩ ũndũ wanyu.” (Johana 12:30) Mũgambo ũcio nĩ wonania na ma atĩ we nĩ Mũrũ wa Ngai, Mesia ũrĩa weranĩirũo.

Hamwe na ũguo, Jesu gũkorũo arĩ mwĩhokeku ũtũũro-inĩ wake wothe kũronania ũrĩa twagĩrĩirũo gũtũũra, na gũkonania atĩ Shaitani ũrĩa Mũcukani, o we mũnene wa gũkũ thĩ nĩ agĩrĩire kũniinwo. Jesu akoiga: “Rĩu thĩ ĩno nĩ ĩgũtuĩrũo; rĩu mũnene wa thĩ ĩno nĩ egũikio nja.” Gĩkuũ kĩa Jesu gĩgũkorũo kĩrĩ ũhootani mũnene. Na njĩra ĩrĩkũ hihi? Agataarĩria ũũ: “No rĩrĩ, rĩrĩa ngaambatio kuuma gũkũ thĩ, ngaagucĩrĩria andũ a mĩthemba yothe moke kũrĩ niĩ.” (Johana 12:​31, 32) Kũgerera gĩkuũ gĩake mũtĩ-inĩ, Jesu nĩ akaagucĩrĩria andũ kũrĩ we amahotithie gũkona muoyo wa tene na tene.

Ũhoro-inĩ wĩgiĩ Jesu kuuga nĩ ‘akaambatio,’ kĩrĩndĩ gĩkoiga: “Tũiguĩte Watho-inĩ atĩ Kristo atũũraga tene na tene. Ũngiuga atĩa atĩ no mũhaka Mũrũ wa mũndũ ambatio igũrũ? Mũrũ ũcio wa mũndũ nĩ we ũ?” (Johana 12:34) O na thutha wa kuona ũira mũingĩ, nginya kũigua mũgambo wa Ngai we mwene, aingĩ ao matiretĩkia atĩ Jesu nĩwe Mũrũ wa mũndũ kũna, o we Mesia ũrĩa weranĩirũo.

O ta ũrĩa onanĩtie hau kabere, Jesu akoiga atĩ we nĩ “ũtheri.” (Johana 8:12; 9:5) Akeera kĩrĩndĩ kĩu atĩrĩ: “Ũtheri ũgũkorũo hamwe na inyuĩ o kahinda kanini. Thiĩi hĩndĩ ĩrĩa mũrĩ na ũtheri ũcio nĩguo nduma ndĩkamũtoorie . . . Hĩndĩ ĩrĩa mũrĩ na ũtheri, onanagiai wĩtĩkio harĩ ũtheri ũcio, nĩguo mũtuĩke ciana cia ũtheri.” (Johana 12:​35, 36) Jesu agacoka agathiĩ, tondũ mũthenya wa Nisani 10 tiguo agĩrĩirũo gũkua. Mũthenya wa Pasaka, Nisani 14, nĩrĩo ‘angĩkaambatio’ ahũrĩrũo mĩcumarĩ mũtĩ igũrũ.​—Agalatia 3:13.

Twathuthuria ũtungata wa Jesu, no tuone atĩ ũrathi nĩ wahingirio rĩrĩa Ayahudi maaregire kũmwĩtĩkia. Isaia aarathĩte atĩ maitho ma andũ nĩ mangĩgatumumario na momie ngoro ciao nĩguo matikagarũrũke mahonio. (Isaia 6:10; Johana 12:40) Ayahudi aingĩ maregaga na rũtũrĩko ũira ũrĩa wonanagia atĩ Jesu nĩwe Mũhonokia ũrĩa weranĩirũo ũngĩgooka, amonie njĩra ya muoyo.

Nikodemo, Jusufu wa Arimathea, na atongoria angĩ aingĩ nĩ ‘metĩkĩtie’ Jesu. No hihi nĩ mekũrũmia wĩtĩkio ũcio kana nĩ mekũremwo nĩ ũndũ wa gwĩtigĩra kũingatwo thunagogi-inĩ kana ‘kwenda gũtũũgĩrio nĩ andũ’?​—Johana 12:42, 43.

Jesu agataarĩria maũndũ marĩa makonainie na kũmwĩtĩkia akoiga: “Mũndũ o wothe ũgĩaga na wĩtĩkio harĩ niĩ to harĩ niĩ aigaga wĩtĩkio ĩndĩ nĩ nginya harĩ ũrĩa wandũmire; nake ũrĩa wothe ũnyonaga onaga nginya Ũrĩa wandũmire.” Maũndũ marĩa Ngai eerire Jesu arutane, o macio Jesu arathiĩ na mbere kũrutana nĩ ma bata ũũ atĩ Jesu akoiga: “Ũrĩa wothe wagaga kũhe gĩtĩo na akaga kwamũkĩra uuge wakwa nĩ harĩ ũrĩa ũkaamũtuĩra. Kiugo kĩrĩa njarĩtie nĩkĩo gĩkaamũtuĩra mũthenya wa mũthia.”​—Johana 12:44, 45, 48.

Jesu akarĩkĩrĩria na kuuga: “Ndiarĩtie ndĩĩrĩte niĩ mwene, ĩndĩ Awa ũrĩa wandũmire we mwene nĩ aheete rĩathani rĩgiĩ ũhoro ũrĩa nguuga na ũrĩa ngwaria. Na nĩ njũĩ atĩ rĩathani rĩake rĩtongoragia muoyo-inĩ wa tene na tene.” (Johana 12:​49, 50) Jesu nĩ oĩ atĩ thutha wa kahinda nĩ egũita thakame yake ĩtuĩke igongona nĩ ũndũ wa andũ arĩa monanagia wĩtĩkio harĩ we.​—Aroma 5:8, 9.