Mabuku Marĩa Magwetetwo Thĩinĩ wa Kabuku ka Mũcemanio wa Ũtũũro na Ũtungata
MACHI 7-13
MŨTHITHŨ KUUMA KIUGO-INĨ KĨA NGAI | 1 SAMUELI 12-13
“Mwĩĩkĩrĩro Ũtũmaga Twage Kũheo Gĩtĩo”
w00 8/1 13 kĩb. 17
Mwĩĩkĩrĩro Ũtũmaga Twage Kũheo Gĩtĩo
17 Kĩambĩrĩria-inĩ mũndũ no one ta Saulu ateekire ũndũ mũũru. Gĩtũmi nĩ tondũ, andũ a Ngai “marĩ thĩna-inĩ,” tondũ “maarĩ ahatĩke” na nĩ maainainaga nĩ ũndũ wa thĩna ũrĩa wamangʼetheire. (1 Samueli 13:6, 7) Hatarĩ nganja ti ũũru mũndũ kuoya ikinya kũngĩbatarania twĩke ũguo. O na kũrĩ ũguo, ririkana atĩ Jehova nĩ athomaga ngoro na akona mwerekera witũ wa na thĩinĩ. (1 Samueli 16:7) Kwoguo no mũhaka akorũo nĩ oonire maũndũ megiĩ Saulu matakoragwo magwetetwo thĩinĩ wa Bibilia. Kwa ngerekano, no gũkorũo Jehova oonire atĩ Saulu aagire wetereri nĩ ũndũ wa mwĩtĩo. No kũhoteke Saulu aarakarĩte tondũ nĩwe warĩ mũthamaki wa Isiraeli yothe, na rĩu aabataraga gweterera mũnabii ũcio mũkũrũ wacereirũo. Ningĩ no kũhoteke Saulu oonire atĩ tondũ Samueli nĩ aacereirũo, aarĩ na kĩhooto gĩa gwĩka maũndũ we mwene na ndaabataraga kũrũmĩrĩra ũtongoria mũhũthũ ũrĩa aaheetwo. Maumĩrĩra maarĩ marĩkũ? Samueli ndamũgaathĩrĩirie nĩ ũndũ wa ũndũ ũcio eekire. Handũ ha ũguo, aarũngire Saulu akĩmwĩra ũũ: “Ũthamaki waku ndũgũtũũra . . . tondũ ndũnathĩkĩra ũrĩa Jehova aagwathire.” (1 Samueli 13:13, 14) O rĩngĩ, mwĩĩkĩrĩro ũgĩtũma age kũheo gĩtĩo.
w07 6/15 27 kĩb. 8
Jehova nĩ Onaga Wathĩki Waku Ũrĩ wa Bata
8 Rũgano rwa Bibilia rwa Mũthamaki Saulu nĩ ruonanagia ũrĩa wathĩki ũrĩ wa bata. Kĩambĩrĩria-inĩ Saulu aarĩ mwĩnyihia na eeyonaga ta ‘atagĩrĩire.’ No thutha wa ihinda, mwĩtĩo na mwĩcirĩrie ũtagĩrĩire igĩtũma atue matua moru. (1 Samueli 10:21, 22; 15:17) Kũrĩ hĩndĩ Saulu aarĩ angʼethanĩre na Afilisti mbaara-inĩ. Samueli akĩra Mũthamaki amweterere oke nĩguo arutĩre Jehova magongona na amũhe ũtongoria makĩria. O na kũrĩ ũguo, Samueli ndaakinyire na ihenya ta ũrĩa eerĩgĩrĩirũo, na andũ makĩambĩrĩria kũhurunjũka. Rĩrĩa Saulu oonire ũguo, “akĩruta igongona rĩa njino.” Ũndũ ũcio ndwakenirie Jehova. Rĩrĩa Samueli aakinyire, mũthamaki akĩambĩrĩria gwĩtetera kĩrĩa gĩatũmĩte age gwathĩka akiuga atĩ tondũ Samueli nĩ aaceereirũo, oonire “no nginya” arute igongona rĩa njino nĩguo athaithe Jehova. Harĩ Mũthamaki Saulu, kũruta igongona kwarĩ kwa bata gũkĩra gwathĩkĩra ũtongoria ũrĩa aaheetwo, wa gweterera Samueli oke arute igongona arĩ we. Samueli aamwĩrire ũũ: “Nĩ weka ũndũ wa ũrimũ. Ndũnathĩkĩra rĩathani rĩrĩa Jehova Ngai waku aakũheire.” Kwaga gwathĩkĩra Jehova gwatũmire Saulu atunywo Ũthamaki.—1 Samueli 10:8; 13:5-13.
MACHI 14-20
MŨTHITHŨ KUUMA KIUGO-INĨ KĨA NGAI | 1 SAMUELI 14-15
“Gwathĩka nĩ kwa Bata Gũkĩra Igongona”
w07 6/15 26 kĩb. 4
Jehova nĩ Akenagio nĩ Wathĩki Waku
4 Arĩ we Mũũmbi witũ, Jehova nĩwe mwene indo ciothe cia kĩĩmwĩrĩ iria tũkoragwo nacio. Gũkĩrĩ ũguo-rĩ, hihi nĩ harĩ kĩndũ tũngĩmũhe? Ĩĩ no tũmũhe kĩndũ kĩa bata mũno. Nĩ kĩĩ tũngĩmũhe? No tuone macokio thĩinĩ wa ũtaaro ũyũ: “Mũrũ wakwa, tuĩka mũndũ mũũgĩ, ũkenagie ngoro yakwa, nĩgetha hotage gũcokeria ũrĩa ũnyũrũragia.” (Thimo 27:11) No tũhe Ngai wathĩki witũ. O na gũtuĩka tũkoragwo na maũndũ matahaanaine na mĩrerere ngũrani, rĩrĩa twathĩka, o ũmwe witũ no ahote gũcokia thitango ya Shaitani ũrĩa Mũcukani atĩ andũ matingĩtũũria wĩhokeku wao harĩ Ngai rĩrĩa maragerio. Ũcio nĩ mweke wa mwanya.
it-2 521 kĩb. 2
Wathĩki
Wathĩki nĩ ũndũ wa o mũhaka na tũtingĩtĩkĩrĩka nĩ Ngai tũtekũmwathĩkĩra. Samueli eerire Mũthamaki Saulu ũũ: “Hihi Jehova akenagio nĩ magongona ma njino na maruta gũkĩra gwathĩkĩra [Kĩhibirania sha·maʽʹ] mũgambo wa Jehova? Atĩrĩrĩ, gwathĩka [kana gũthikĩrĩria] nĩ kwa bata gũkĩra igongona, na gũthikĩrĩria nĩ kwa bata gũkĩra maguta ma ndũrũme.” (1Sa 15:22) Kũrega gwathĩka nĩ kũregana na kiugo kĩa Jehova, na ũndũ ũcio wonanagia atĩ mũndũ ndetĩkĩtie, ndehokete, na ndakoragwo na wĩtĩkio harĩ kiugo kĩu na harĩ Jehova o we Kĩhumo kĩaguo. Kwoguo mũndũ ũrĩa ũregaga gwathĩka ndakoragwo arĩ ngũrani na mũndũ ũrĩa ũhũthagĩra hinya wa ũragũri, kana ũrĩa ũhoyaga mĩhianano. (1Sa 15:23; ringithania Ro 6:16.) Ũngĩkorũo ũrĩ ũndũ wa tũhũ mũndũ angiuga atĩ nĩ egwĩka ũndũ mũna acoke age kũwĩka; kwaga gwĩka ũndũ ũcio kuonanagia atĩ ndehokete kana akahe gĩtĩo mũndũ ũrĩa ũkũmwĩrĩte eke ũndũ ũcio. (Mat 21:28-32) Arĩa maiganagĩra tu na kũigua na gwĩtĩkĩra meciria-inĩ ũhoro wa ma wĩgiĩ Ngai, no matiĩkaga ũrĩa uugĩte, nĩ kwĩheenia meheenagia o ene na mwĩcirĩrie wa maheeni na matingĩamũkĩra kĩrathimo. (Jak 1:22-25) Mũrũ wa Ngai aaugire wega atĩ arĩa mekaga maũndũ mahaanaine na marĩa mathanĩtwo no matiĩkaga na njĩra ĩrĩa yagĩrĩire kana mekaga marĩ na muoroto mũũru matikaingĩra Ũthamaki-inĩ, no nĩ kũregwo makaaregwo biũ.—Mat 7:15-23.
Kũmaatha Maũndũ ma Bata Maandĩko-inĩ
it-1 493
Ũcayanĩri
Mũndũ angĩtĩkĩra kũhatĩkwo onanie ũcayanĩri, rĩrĩa ũndũ ũcio ũtaringaine na wendi wa Ngai, ũndũ ũcio no ũrehe maumĩrĩra moru. Ũndũ ũcio nĩ wonanĩtio wega harĩ ũndũ ũrĩa wahaanĩkire harĩ Mũthamaki Saulu. Ihinda rĩa Aisiraeli kũhingia ituĩro rĩa Jehova kwerekera Aamaleki nĩ rĩakinyĩte nĩ ũndũ wa ũrĩa maatharĩkĩire Aisiraeli makiuma Misiri o na gũtuĩka Aisiraeli matiamacogothete. Saulu aathĩtwo atĩ ndakamacaĩre. No nĩ eetĩkĩrire kũhatĩkwo nĩ ndungata ciake na kwoguo ndaathĩkĩire biũ ũndũ ũrĩa Jehova aamwĩrĩte. Nĩ ũndũ ũcio Jehova akĩrega Saulu akorũo arĩ mũthamaki. (1Sa 15:2-24) Mũndũ angĩtĩkĩra atĩ njĩra ya Jehova ya gwĩka maũndũ nĩyo yagĩrĩire, na akorũo arĩ mwĩhokeku harĩ Jehova, ũndũ ũcio no ũmũgirĩrĩrie kwĩhia ta ũrĩa Saulu eekire na ũndũ ũcio ũgĩtũma age gwĩtĩkĩrĩka harĩ Jehova.
MACHI 21-27
MŨTHITHŨ KUUMA KIUGO-INĨ KĨA NGAI | 1 SAMUELI 16-17
Kũmaatha Maũndũ ma Bata Maandĩko-inĩ
it-2 871-872
Saulu
Thutha ũcio, na thutha wa Daudi gũitĩrĩrio maguta atuĩke mũthamaki wa Isiraeli wa ihinda rĩũkĩte, nĩrĩo roho wa Jehova wehereire Saulu. Kuuma hĩndĩ ĩyo gũthiĩ na mbere, “roho mũũru kuuma kũrĩ Jehova nĩ wamũthumbũraga.” Thutha wa Jehova kwehereria Saulu roho wake, nĩ aarekire Saulu agĩe na roho mũũru, ũrĩa watũmaga age thayũ wa meciria, aigue ũũru, na agĩe na mwĩcirĩrie mũũru. Saulu kũrega gwathĩkĩra Jehova kuoonanirie atĩ aarĩ na mwerekera mũũru wa meciria na ngoro, ũndũ ũrĩa watũmire Ngai amwehererie roho wake ũrĩa ũngĩamũgitĩrire na ũrĩa ũngĩamũteithirie kũregana na roho ũcio mũũru. Kwoguo, tondũ Jehova nĩ eetĩkĩrĩtie “roho mũũru” ũũke ithenya rĩa roho wake na ũthumbũre Saulu, nĩ kũngĩerirũo atĩ nĩ “roho mũũru kuuma kũrĩ Jehova,” na nĩkĩo ndungata cia Saulu ciaugire atĩ nĩ “roho mũũru kuuma kũrĩ Ngai.” Ndungata ĩmwe ya Saulu yamwĩrire ete Daudi oke amũinagĩre nĩguo akamũhooreria rĩrĩa rĩothe athumbũrũo nĩ “roho mũũru.”—1Sa 16:14-23; 17:15.
MACHI 28–ĨPURO 3
MŨTHITHŨ KUUMA KIUGO-INĨ KĨA NGAI | 1 SAMUELI 18-19
“Tũũria Wĩnyihia Rĩrĩa Wagaacĩra”
w04 4/1 15 kĩb. 4
Wĩhokage Roho wa Jehova Ũkĩhiũrania na Mogarũrũku ma Ũtũũro
4 Thutha wa ihinda inini, mwanake ũcio warĩ mũrĩithi, nĩ angĩagĩire na ngumo bũrũri wothe. Nĩ eetirũo agatungatage mũthamaki na amũinagĩre nyĩmbo. Ooragire Goliathu, mũndũ warĩ mũnene mũno, ũrĩa nginya thigari cia Isiraeli iria ciarĩ na ũmenyeru cietigagĩra kũngʼethanĩra nake. Rĩrĩa Daudi aaheirũo wĩra wa gũtongoria arũme a mbaara, nĩ aahotire gũtooria Afilisti. Andũ nĩ maamwendire mũno. Maatungire nyĩmbo cia kũmũgaathĩrĩria. Mbere ĩyo mũtaarani wa Mũthamaki Saulu aaugĩte atĩ Daudi “ahũũraga kĩnanda wega,” nĩ “njamba ya ita ĩrĩ hinya na ũmĩrĩru, nĩ oĩ kwaria wega, na nĩ mũthaka.”—1 Samueli 16:18; 17:23, 24, 45-51; 18:5-7.
Kũmaatha Maũndũ ma Bata Maandĩko-inĩ
it-2 695-696
Mũnabii
O na gũtuĩka anabii maamũragwo kũgerera roho wa Jehova, ti kuuga atĩ hingo ciothe maaragia magĩtongorio nĩ roho. Handũ ha ũguo, roho wa Ngai ‘wookaga igũrũ rĩao’ rĩmwe na rĩmwe, ũkamaguũrĩria ndũmĩrĩri iria irabatara kũheanwo. (Ezk 11:4, 5; Mik 3:8) Roho wa Ngai wamaheaga hinya, ũgatũma maheane ũhoro. (1Sa 10:10; Je 20:9; Am 3:8) To gwĩka meekaga maũndũ ma magegania, no njĩra ĩrĩa maaragia nayo na mageka maũndũ nayo, yakoragwo ĩtarĩ ya ndũire na ĩkonania ũritũ wa maũndũ macio. Ũndũ ũcio no ũtũteithie gũtaũkĩrũo na gĩkĩro kĩna kĩrĩa gĩatũmaga andũ merũo atĩ ‘mareka ta anabii.’ (1Sa 10:6-11; 19:20-24; Je 29:24-32; ringithania Atũ 2:4, 12-17; 6:15; 7:55.) Gũkorũo mehotorete biũ na marĩ na ũcamba wa kũhingia wĩra wao, nĩ kũngĩatũmire andũ amwe mone ta mareka maũndũ na njĩra ĩtarĩ ya ndũire na nginya hihi makarakaria andũ amwe, ta ũrĩa atongoria a mbũtũ meekire rĩrĩa mũnabii aamaumĩrĩire hĩndĩ ĩrĩa Jehu aaitĩrĩirio maguta. No rĩrĩa maamenyire atĩ nĩ mũnabii, anene acio nĩ mooire ndũmĩrĩri yake na ũritũ. (2Ath 9:1-13; ringithania Atũ 26:24, 25.) Hĩndĩ ĩrĩa Saulu aarũmagĩrĩra Daudi nĩgetha amũnyite, aambĩrĩirie ‘gwĩka ta mũnabii,’ akĩruta nguo ciake, na ‘agĩkoma hau arĩ njaga mũthenya ũcio wothe na ũtukũ ũcio wothe,’ na no kũhoteke hĩndĩ ĩyo nĩrĩo Daudi oorire. (1Sa 19:18–20:1) No ũguo ti kuuga atĩ anabii hingo ciothe maathiaga marĩ njaga, tondũ Bibilia ndĩonanagia ũguo. Maita macio mangĩ merĩ magwetetwo, mũnabii aathiaga arĩ njaga nĩ ũndũ wa gĩtũmi kĩna, nĩguo onanie ũndũ mũna wĩgiĩ ũrathi wake. (Isa 20:2-4; Mik 1:8-11) Bibilia ndĩgwetete kĩrĩa gĩatũmire Saulu aikare arĩ njaga. No gũkorũo ũndũ ũcio weendaga kũmuonania tu arĩ mũndũ o ta andũ arĩa angĩ, arutĩtwo nguo ciake cia ũthamaki na atekũhota gwĩka ũndũ mũgarũ na ũnene na hinya wa Jehova, kana hihi nĩ ũndũ wa gĩtũmi kĩngĩ.
Wĩrutanĩrie Biũ Ũtungata-inĩ
km 1/03 1
Kũhunjia nĩ Kũbataraga Wĩnyihia
1. Kiugo kĩa Ngai gĩtwĩkĩraga ngoro tũkoragwo na ‘wĩnyihia, tũtikarĩhage ũũru na ũũru, ithenya rĩa ũguo, tũrĩhage na kĩrathimo.’ (1 Pet. 3:8, 9) Nĩ twagĩrĩirũo kũhũthĩra ũtaaro ũcio rĩrĩa tũraruta wĩra witũ wa kũhunjia. Tũrauga ũguo tondũ wĩnyihia witũ no ũgerio rĩrĩa tũrĩ ũtungata-inĩ witũ.
2. Wĩnyihia nĩ ngumo ĩtũteithagia gũkirĩrĩria rĩrĩa tũracemania na maũndũ maritũ. Hĩndĩ ĩrĩa tũrahunjia, nĩ tũcemanagia na andũ tũtoĩ, na nĩ tũĩ atĩ amwe ao no mage gũtwamũkĩra na njĩra njega. Nĩguo tũhote gũthiĩ na mbere kũhunjia nginya hĩndĩ ta ĩyo nĩ tũrabatara wĩnyihia. Aarĩ a Ithe witũ erĩ mapainia arĩa maahunjagia gĩcigo-inĩ kĩmwe kĩritũ mũno, maahunjirie nyũmba kwa nyũmba o mũthenya ihinda rĩa mĩaka ĩĩrĩ matekũnyitwo ũgeni mũciĩ kwa mũndũ. O na kũrĩ ũguo, nĩ maakirĩrĩirie, na gĩcigo-inĩ kĩu ũmũthĩ gũkoragwo na ciũngano igĩrĩ.
3. Ũrĩa Tũngĩka Rĩrĩa Twarĩrio Ũũru: Wĩnyihia nĩ ũrĩtũteithagia kwĩgerekania na Jesu hĩndĩ ĩrĩa andũ arĩa angĩ maga gũtuonia ũtugi kana matwarĩria ũũru. (1 Pet. 2:21-23) Mwarĩ wa Ithe witũ ũmwe nĩ aathiire kũhunjia mũciĩ ũmwe no nĩ aarumirũo nĩ mũtumia mwene kũu, nake mũthuri wa mũtumia ũcio akĩmũingata. Mwarĩ wa Ithe witũ ũcio ndoorirũo nĩ gĩkeno gĩake, na nĩ aameerire atĩ arĩ na mwĩhoko atĩ nĩ akaaria nao ihinda rĩngĩ. Ũndũ ũcio nĩ wakenirie mũthuri ũcio na mũtumia wake mũno ũũ atĩ, nĩ maathikĩrĩirie Mũira wa Jehova ũngĩ ũrĩa wathiire kũmahunjĩria, na rĩrĩa maanyitirũo ũgeni mathiĩ Nyũmba-inĩ ya Ũthamaki nĩ meetĩkĩrire gũthiĩ. Mathiĩ nĩ maakorire mwarĩ wa Ithe witũ ũrĩa maaingatĩte, na mwarĩ wa Ithe witũ ũcio akĩmageithia na makĩaria maũndũ maingĩ megiĩ Bibilia. O na ithuĩ no tũhũthahũthie ngoro cia andũ arĩa matakoragwo mehaarĩirie gũthikĩrĩria tũngĩkorũo ‘tũhooreire na tũrĩ na gĩtĩo kĩnene.’—1 Pet. 3:15; Thim. 25:15.
4. Wĩtheme Mwĩtĩo: Gũkorũo tũrĩ na ũmenyo wa Bibilia gũtiagĩrĩirũo gũtũma tũhũthie andũ arĩa angĩ, kana tũhũthĩre ciugo cia kũmanyararithia hĩndĩ ĩrĩa tũraria igũrũ rĩmegiĩ. (Joh. 7:49) Handũ ha ũguo, Kiugo kĩa Ngai gĩtwĩraga atĩ tũtikaragie “ũũru igũrũ rĩa mũndũ o na ũrĩkũ.” (Tit. 3:2) Tũngĩkoragwo tũrĩ na wĩnyihia o ta Jesu, nĩ tũrĩcanjamũraga andũ arĩa angĩ. (Mat. 11:28, 29) Wĩnyihia nĩ ũrĩtũmaga andũ magucĩrĩrio nĩ ndũmĩrĩri itũ.
5. Hatarĩ nganja, wĩnyihia nĩ ũtũteithagia gũkirĩrĩria hĩndĩ ĩrĩa tũrahunjia gĩcigo-inĩ kĩritũ. Ningĩ no ũhũthahũthie ngoro cia andũ arĩa matakoragwo mehaarĩirie gũtũthikĩrĩria, na ũtũme andũ mende gũthikĩrĩria ndũmĩrĩri ya Ũthamaki. Makĩria ma ũguo, wĩnyihia nĩ ũkenagia Jehova, na “nĩ aheaga arĩa enyihia ũtugi mũnene.”—1 Pet. 5:5.
ĨPURO 4-10
MŨTHITHŨ KUUMA KIUGO-INĨ KĨA NGAI | 1 SAMUELI 20-22
“Ũrĩa Ũngĩtuĩka Mũrata Mwega”
w08 2/15 8 kĩb. 7
Thiagĩra Njĩra-inĩ cia Jehova
7 Ngai erĩgagĩrĩra tũkorũo tũrĩ ehokeku harĩ arata aitũ. (Thim. 17:17) Jonathani mũrũ wa Mũthamaki Saulu nĩ aatuĩkire mũrata wa Daudi. Rĩrĩa Jonathani aaiguire atĩ Daudi nĩ ooragĩte Goliathu, “makĩendana na makĩgĩa ũrata wa hakuhĩ mũno, na Jonathani akĩambĩrĩria kũmwenda o ta ũrĩa eeyendete we mwene.” (1 Sam. 18:1, 3) Jonathani o na nĩ eerire Daudi hĩndĩ ĩrĩa Saulu eendaga kũmũũraga. Thutha wa Daudi kũũra, nĩ maacemanirie na Jonathani, na makĩgĩa na kĩrĩkanĩro. Rĩrĩa Jonathani eerire Saulu ũhoro wĩgiĩ Daudi, ũndũ ũcio nĩ ũngĩatũmire oragwo, no nĩ aathiire agĩcemania na Daudi rĩngĩ na makĩerũhia kĩrĩkanĩro kĩao kĩa ũrata. (1 Sam. 20:24-41) Hĩndĩ ĩrĩa maacemanirie riita rĩa mũico, Jonathani nĩ aateithirie Daudi “agĩe hinya kuuma harĩ Jehova.”—1 Sam. 23:16-18.
w09 10/15 19 kĩb. 11
ũtũũria Ũrata Thĩinĩ wa Thĩ Ĩtarĩ na Wendo
11 Koragwo ũrĩ mwĩhokeku. Suleimani aandĩkire ũũ: “Mũrata wa ma onanagia wendo hingo ciothe, na aciarĩtwo atuĩke mũrũ wa nyina na mũndũ hĩndĩ ya mĩtangĩko.” (Thim. 17:17) Suleimani akĩandĩka ciugo icio, no gũkorũo eeciragia ũhoro wĩgiĩ ũrata ũrĩa warĩ gatagatĩ ga ithe Daudi na Jonathani. (1 Sam. 18:1) Mũthamaki Saulu eendaga mũrũwe Jonathani akaagaya gĩtĩ gĩa ũthamaki kĩa Isiraeli. No Jonathani nĩ aamenyaga atĩ Jehova aathuurĩte Daudi agaatuĩka mũthamaki, na nĩ eetĩkĩrĩte ũndũ ũcio. Ngũrani na Saulu, Jonathani ndaaiguagĩra Daudi ũiru. Ndaaiguaga ũũru Daudi agaathĩrĩrio, na ndeetĩkirie ndeto cia maheeni iria Saulu aatheremagia ciĩgiĩ Daudi. (1 Sam. 20:24-34) Hihi ithuĩ tũhaana ta Jonathani? Hĩndĩ ĩrĩa arata aitũ mamũkĩra mĩeke ya ũtungata-rĩ, hihi nĩ tũkenaga hamwe nao? Hĩndĩ ĩrĩa macemania na moritũ-rĩ, hihi nĩ tũmomagĩrĩria na tũkamateithia? Tũngĩigua ndeto cia gũthũkĩria mũrata witũ rĩĩtwa-rĩ, hihi nĩ tũciĩtĩkagia o na ihenya? Kana hihi nĩ tũtetagĩra mũrata witũ o ta Jonathani?
ũmaatha Maũndũ ma Bata Maandĩko-inĩ
05 3/15 24 kĩb. 4
atemo Kuuma Ibuku-inĩ rĩa Samueli wa Mbere
21:12, 13. Jehova nĩ erĩgagĩrĩra tũhũthĩre ũhoti witũ wa gwĩciria hĩndĩ ĩrĩa twacemania na maũndũ maritũ ũtũũro-inĩ. Nĩ atũheete Kiugo gĩake gĩtongoretio nĩ roho, kĩrĩa gĩtũteithagia gũikia riitho kabere, kũgĩa ũmenyo, na ũhoti wa gwĩciria. (Thimo 1:4) Ningĩ tũrĩ na ũteithio wa athuri a kĩũngano.
ĨPURO 18-24
ŨTHITHŨ KUUMA KIUGO-INĨ KĨA NGAI | 1 SAMUELI 23-24
Etagĩrĩra Jehova ũrĩ na Ũkirĩrĩria”
04 4/1 16 kĩb. 8
ĩhokage Roho wa Jehova Ũkĩhiũrania na Mogarũrũku ma Ũtũũro
8 Daudi nĩ aaregire gwĩka Saulu ũndũ mũũru. Nĩ ũndũ wa gũkorũo na wĩtĩkio na wetereri, nĩ eehaarĩirie gũtiga maũndũ moko-inĩ ma Jehova. Rĩrĩa mũthamaki aaumire ngurunga-inĩ, Daudi aamwĩtire akĩmwĩra ũũ: “Jehova arotua ciira gatagatĩ-inĩ gakwa nawe, na Jehova arondĩhĩria harĩ wee, no guoko gwakwa gũtigũgũũkĩrĩra.” (1 Samueli 24:12) O na gũtuĩka Daudi nĩ aamenyaga atĩ Saulu nĩ aahĩtĩtie, ndeerĩhĩirie, akĩmũruma, kana akĩaria maũndũ moru mamwĩgiĩ. O na kũrĩ maita mangĩ maigana ũna Daudi eegirĩrĩirie agĩtiga maũndũ moko-inĩ ma Jehova. Eehokire Jehova arũnge maũndũ.—1 Samueli 25:32-34; 26:10, 11.
ihi Maũndũ Maku Nĩmo Matongoragia Ũtũũro Waku?
Ũndũ wa gatatũ ũrĩa tũreruta nĩ atĩ, handũ ha kũhũthĩra njĩra itarĩ cia kĩĩmaandĩko gũcenjia maũndũ maitũ, twagĩrĩirũo gweterera Jehova. Jakubu aandĩkire ũũ: “Rekagai ũkirĩrĩria ũrĩkie wĩra waguo, nĩgetha mũkoragwo mũrĩ akinyanĩru na mũrĩ agima maũndũ-inĩ mothe, mũtekwaga ũndũ o na ũmwe.” (Jakubu 1:4) Twagĩrĩirũo kũreka ũkirĩrĩria “ũrĩkie wĩra waguo” na njĩra ya gwĩtĩkĩria igerio rĩthiĩ na mbere nginya mũico, handũ ha kũgeria kũriniina na ihenya tũkĩhũthĩra njĩra itarĩ cia kĩĩmaandĩko. Tũngĩka ũguo wĩtĩkio witũ nĩ ũkũgerio na wagagĩrio, na woneke kana wĩ na hinya wa gwĩtiiria. Jusufu na Daudi nĩ maarĩ na ũkirĩrĩria ta ũcio. Matiageririe gwetha kĩhonia kĩngĩatũmire Jehova arakare. Handũ ha ũguo, maageririe gwĩka ũrĩa wothe mangĩahotire kũringana na ũrĩa maũndũ mao maahaanaga. Nĩ meetereire Jehova, na ũndũ ũcio ũgĩtũma mamũkĩre irathimo nyingĩ! Jehova nĩ aamahũthĩrire kũhonokia na gũtongoria andũ ake.—Kĩambĩrĩria 41:39-41; 45:5; 2 Samueli 5:4, 5.
O na ithuĩ no tũcemanie na maũndũ mangĩtũma twende kũhũthĩra njĩra itarĩ cia kĩĩmaandĩko. Kwa ngerekano, hihi nĩ ũkuĩte ngoro tondũ ndũrĩ ũrona mũndũ ũrĩa wagĩrĩire wa kũhikania nake? Angĩkorũo nĩguo kũrĩ, wĩtheme ũndũ o wothe ũngĩtũma wage gwathĩkĩra rĩathani rĩa Jehova rĩa kũhikania “thĩinĩ wa Mwathani tu.” (1 Akorintho 7:39) Hihi wĩ na mathĩna kĩhiko-inĩ gĩaku? Handũ ha gũtongorio nĩ roho wa gũkũ thĩ wa kweheranĩra na gũtigana, mwĩrutanĩrie kũniina mathĩna manyu mũrĩ hamwe. (Malaki 2:16; Aefeso 5:21-33) Hihi nĩ ũraritũhĩrũo kũrũmbũiya famĩlĩ yaku nĩ ũndũ wa mathĩna ma kĩĩmbeca? Nĩ wega gweterera Jehova na njĩra ya gwĩthema kũhũthĩra njĩra cia ngungo kana itarĩ njĩtĩkĩrĩku nĩguo wone mbeca. (Thaburi 37:25; Ahibirania 13:18) Ithuothe no mũhaka twĩke ũrĩa wothe tũngĩhota kũringana na maũndũ maitũ na twĩrutanĩrie kũhe Jehova kĩndũ angĩrathima. Tũgĩka ũguo, rekei tũtue itua rĩa gweterera Jehova nĩguo atũrehere kĩhonia kĩrĩa kĩega biũ.—Mika 7:7.