Kwĩrutanĩria Gũkinyĩra Ngoro

Thimo 3:1

NA NJĨRA NGUHĨ: Teithia athikĩrĩria aku gũtaũkĩrũo nĩ bata wa ũndũ ũrĩa mareruta nĩguo moe ikinya.

ŨRĨA ŨNGĨKA ŨGUO:

• Teithia athikĩrĩria aku gwĩthuthuria. Ũria ciũria itarabatara macokio nĩguo ũteithie arĩa maragũthikĩrĩria gwĩthuthuria ũrĩa maraigua ngoro-inĩ.

• Mekĩre ngoro makorũo na muoroto mwega. Ĩkĩra ngoro athikĩrĩria aku mathuthurie kĩrĩa gĩtũmaga meke ciĩko njega. Mateithie gũkoragwo na muoroto ũrĩa mwega makĩria—kwenda Jehova, andũ arĩa angĩ, na morutani ma Bibilia. Teithia athikĩrĩria aku mone ũũgĩ wa morutani ma Bibilia; ndũkahaane ta arĩ kũmathomera ũramathomera. Handũ ha kũmaconorithia, mateithie nĩguo maigue mekĩrĩtwo ngoro, na mekĩrĩtwo hinya merutanĩrie gwĩka ũrĩa wothe mangĩhota.

• Erekeria meciria mao kũrĩ Jehova. Onania ũrĩa morutani ma Bibilia, motaaro, na maathani monanagia ngumo cia Ngai na wendo wake harĩ ithuĩ. Teithia athikĩrĩria aku makũrie wendi wa gwĩciragia ũhoro wa mawoni ma Jehova na kũmũkenagia.