Nĩ Kĩĩ Gĩtũmaga Aira a Jehova Mahunjĩrie Andũ Arĩa Mbere ĩyo Maaugĩte Matikwenda Kũhunjĩrio?

Nĩ ũndũ wa wendo wao harĩ Ngai na harĩ andũ arĩa angĩ, Aira a Jehova nĩ makenaga kũhunjĩria andũ othe ũhoro wa Bibilia, nginya arĩa mbere ĩyo maaugĩte matikwenda kũhunjĩrio. (Mathayo 22:37-39) Kwenda Ngai nĩ gũtũtindĩkaga gwathĩkĩra rĩathani rĩa Mũrũwe rĩrĩa aaugire “tũrute ũira kĩhinyio.” (Atũmwo 10:42; 1 Johana 5:3) Nĩguo twathĩkĩre rĩathani rĩu, nĩ tũhunjagĩria andũ makĩria ma riita rĩmwe o ta ũrĩa anabii a Ngai a mahinda ma tene meekaga. (Jeremia 25:4) Tondũ nĩ twendete andũ, nĩ twĩrutanagĩria kũmahunjĩria ũhoro wa kũhonokia mĩoyo, nĩguo ‘ũhoro ũrĩa mwega wa Ũthamaki,’ nginya kũrĩ arĩa mbere ĩyo maaugĩte atĩ matikwenda kũhunjĩrio.—Mathayo 24:14.

Kaingĩ nĩ tũkoraga andũ megũthikĩrĩria rĩrĩa twahunjia mĩciĩ ĩrĩa tũtaathikĩrĩirio na hau kabere, nĩ ũndũ wa itũmi ici ithatũ:

• Andũ maikaraga magĩthamaga.

• No kũgĩe na andũ angĩ mũciĩ ũcio megũkenio nĩ ũhoro witũ.

• Andũ nĩ macenjagia. Mogarũrũku thĩinĩ wa thĩ kana ũtũũro-inĩ wa mũndũ no matũme andũ amwe mone bata wa ‘kũrũmbũyia mabataro mao ma kĩĩroho,’ na kwoguo makenio nĩ ũhoro wa Bibilia. (Mathayo 5:3) O na andũ amwe makararagia ũhoro witũ no magarũrũke o ta ũrĩa mũtũmwo Paulo eekire.—1 Timotheo 1:13.

O na kũrĩ ũguo, tũtitindĩkagĩrĩria andũ metĩkĩre ũhoro witũ. (1 Petero 3:15) Twĩtĩkĩtie atĩ o mũndũ nĩwe wagĩrĩire gwĩtuĩra itua rĩake mwene rĩgiĩ ũthathaiya wake.—Gũcokerithia Maathani 30:19, 20.