Musa na Haruni nĩ maathiire kwĩra Firauni ũhoro ũyũ meerĩtwo nĩ Ngai: ‘Akorũo ndũgwĩtĩkĩria andũ akwa mathiĩ, nĩ ngũtũma ngi ciũke ciyũre bũrũri wothe.’ Kwagĩire ngi nyingĩ mũno nginya ikĩiyũra nyũmba cia Amisiri othe, arĩa maarĩ itonga o na athĩni. Bũrũri wothe waiyũrĩte ngi. Ĩndĩ itũũra rĩa Gosheni kũrĩa Aisiraeli maaikaraga gũtiarĩ na ngi. Kwambĩrĩria na ihũũra rĩu rĩa kana, no Amisiri tu maahutagio nĩ mahũũra. Firauni akĩra Musa ũũ: ‘Thiĩ ũthaithe Jehova eherie ngi ici. Andũ anyu no mathiĩ rĩu.’ No rĩrĩa Jehova eeheririe ngi icio, Firauni akĩĩricũkwo. Hihi kũrĩ hĩndĩ ĩngĩakinyire Firauni erute kaũndũ?

Jehova aaugire ũũ: ‘Angĩkorũo Firauni ndegwĩtĩkĩria andũ akwa mathiĩ, nyamũ cia Amisiri ikũrũara na ikue.’ Mũthenya ũrĩa warũmĩrĩire, nyamũ ciao ikĩambĩrĩria gũkua. No nyamũ cia Aisiraeli itiakuire. O na hĩndĩ ĩyo Firauni ndetĩkĩririe andũ mathiĩ.

Jehova agĩcoka akĩra Musa acoke kũrĩ Firauni rĩngĩ na aikie mũhu rĩera-inĩ. Mũhu ũcio watuĩkire rũkũngũ rũhinyu na rũgĩthiĩ kũrĩ Amisiri othe. Rũkũngũ rũu rwatũmire Amisiri othe o hamwe na nyamũ ciao marũare mahũha maarĩ na ruo mũno. O na kũrĩ ũguo, Firauni nĩ aaregire Aisiraeli mathiĩ.

Jehova nĩ aacokire agĩtũma Musa rĩngĩ athiĩ ere Firauni ũũ: ‘Nginya rĩu no ũrarega andũ akwa mathiĩ? Rũciũ nĩ ngaarehe mbura nene mũno ya mbembe.’ Mũthenya ũrĩa warũmĩrĩire Jehova nĩ aarehire mbura ya mbembe, marurumĩ, na mwaki. Gũtioonekete mbura ta ĩyo rĩngĩ bũrũri-inĩ wa Misiri. Mĩtĩ na mĩmera yothe ya Amisiri nĩ yathũkangirio biũ, no ya Aisiraeli ndĩahutirio nĩ mbura ĩyo. Firauni akĩra Musa ũũ: ‘Thaitha Jehova nĩguo atũme mbura ĩno ĩthire! Mũcoke mũthiĩ.’ No rĩrĩa mbura ĩyo ya mbembe yathirire, Firauni nĩ aaregire Aisiraeli mathiĩ.

Musa aacokire akĩmwĩra ũũ: ‘Rĩu ngigĩ igũka irĩe mĩmera ĩrĩa yothe ĩtananiinwo nĩ mbura ya mbembe.’ Gwacokire gũgĩũka ngigĩ nyingĩ mũno na ikĩrĩa mĩmera yothe ĩrĩa yatigarĩte, o hamwe na mĩtĩ. Firauni akĩra Musa ũũ: ‘Thaitha Jehova nĩguo eherie ngigĩ ici.’ No o na thutha wa Jehova kweheria ngigĩ icio, Firauni no oomĩtie ngoro.

Jehova akĩra Musa ũũ: ‘Tambũrũkia guoko gwaku na igũrũ.’ O hĩndĩ ĩyo, gũkĩgĩa nduma ndumanu biũ. Amisiri maaikarire thikũ ithatũ matekuona mũndũ kana kĩndũ. Kũrĩa Aisiraeli maaikaraga nokuo kwarĩ na ũtheri.

Firauni akĩra Musa ũũ: ‘Oya andũ anyu mũthiĩ, no nyamũ cianyu mũtigũthiĩ nacio.’ Nake Musa akĩmwĩra: ‘No mũhaka tũthiĩ na nyamũ citũ nĩguo tũthiĩ tũgacirute magongona kũrĩ Ngai witũ.’ Firauni aigua ũguo nĩ aarakarire mũno nginya akĩgũthũkĩra Musa akĩmwĩra: ‘Njeherera! Na ũngĩgoka rĩngĩ kũrĩ niĩ, no ngakũũraga.’

Musa eerire Firauni atĩ ndangĩacokire kũrĩ we rĩngĩ. No atanathiĩ, akĩra Firauni ũũ: ‘Ũmũthĩ ũtukũ, marigithathi mothe thĩinĩ wa Misiri nĩ megũkua, kuuma marigithathi ma ngombo nginya mũriũ wa Firauni.’

Jehova eerire Aisiraeli mahaarĩrie irio ciarĩ cia mwanya. Aameerire ũũ: ‘Thĩnjai ngʼondu kana mbũri ya mwaka ũmwe na mũcoke mũhake thakame yayo mũrango-inĩ. Hĩhiai nyama ciayo, na mũrĩanĩrie na mũgate ũtarĩ na ndawa ya kũimbia. Ĩkĩrai nguo na iratũ, mwĩhaarĩrie gũthiĩ tondũ ũtukũ wa ũmũthĩ nĩguo mũkuuma Misiri.’ Ta hũũra mbica ũrĩa Aisiraeli maakenire!

Ũtukũ ũcio, mũraika wa Jehova agĩthiĩ nyũmba ciothe thĩinĩ wa Misiri. Marigithathi mothe ma nyũmba iria itaarĩ hake thakame mĩrango-inĩ magĩkua. Kwoguo marigithathi mothe ma Amisiri magĩkua, gwa itonga na gwa athĩni. No mũraika ũcio nĩ aahĩtũkire nyũmba ciothe iria ciahakĩtwo thakame. Gũtirĩ mwana o na ũmwe wa Aisiraeli wakuire.

O na mũrũ wa Firauni nĩ aakuire. Firauni ndangĩomĩrĩirie rĩngĩ. O hĩndĩ ĩyo akĩra Musa na Haruni ũũ: ‘Umai gũkũ! Thiĩi mũgatungatĩre Ngai wanyu, na mũthiĩ hamwe na nyamũ cianyu!’

Kwoguo Aisiraeli makiuma Misiri ũtukũ ũcio kũrĩ na mweri, na maabangĩtwo kũringana na famĩlĩ na mĩhĩrĩga. Aisiraeli arĩa mooimire Misiri maarĩ arũme 600,000, atumia aingĩ, o hamwe na ciana ciao. Ningĩ nĩ kwarĩ na andũ angĩ maathiire hamwe na Aisiraeli, nĩguo magatungatĩre Jehova o nao. Rĩu Aisiraeli makĩrekererio kuuma ũkombo-inĩ!

Nĩguo maririkanage ũrĩa Jehova aamahonokirie, nĩ maagĩrĩirũo kũrĩaga irio icio cia mwanya o mwaka. Na ũndũ ũcio ũgĩtwo Pasaka.