Kĩama Iria-inĩ Itune

Rĩrĩa Firauni aaiguire atĩ Aisiraeli nĩ mauma Misiri, nĩ eericũkirũo nĩ ũndũ wa kũmarekereria mathiĩ. Eerire thigari ciake ũũ: ‘Haarĩriai ngaari ciakwa ciothe cia mbaara nĩguo tũmarũmĩrĩre! Tũtingĩrekire mathiĩ.’ Firauni na thigari ciake makĩrũmĩrĩra Aisiraeli.

Jehova aatongoragia andũ ake akĩhũthĩra itu mũthenya na mwaki ũtukũ. Aamatongoririe nginya Iria-inĩ Itune, na akĩmeera maambe hema ho.

Thutha ũcio Aisiraeli makĩona Firauni na thigari ciake mamarũmĩrĩire. Magĩkorũo marĩ gatagatĩ ga thigari cia Amisiri mwena ũmwe na Iria Itune mwena ũcio ũngĩ. Magĩkaĩra Musa makĩmwĩra ũũ: ‘Nĩ tũkũũragwo! Kaba ũngĩrekire tũikare Misiri.’ No Musa akĩmeera ũũ: ‘Tigai gwĩtigĩra. Etererai muone ũrĩa Jehova egũtũhonokia.’ Hatarĩ nganja Musa nĩ eehokete Jehova.

Jehova akĩra Aisiraeli mambĩrĩrie thabarĩ. Ũtukũ ũcio, Jehova akĩiga itu gatagatĩ ka Amisiri na Aisiraeli. Kwarĩ na nduma mwena ũrĩa Amisiri maarĩ, no mwena ũrĩa Aisiraeli maarĩ kwarĩ na ũtheri.

Jehova akĩra Musa atambũrũkie guoko gwake iria-inĩ na agĩcoka agĩtũma rũhuho rũnene rũhurutane ũtukũ wothe. Iria rĩkĩgayũkana maita merĩ, na hakĩgĩa njĩra. Aisiraeli milioni nyingĩ makĩringa mũrĩmo ũcio ũngĩ wa iria magereire harĩa haatuĩkĩte thĩ nyũmũ gatagatĩ ga thingo igĩrĩ cia maĩ.

Thigari cia Firauni ikĩrũmĩrĩra Aisiraeli igereire o hau haarĩ na thĩ nyũmũ. Jehova agĩcoka agĩtũma thigari icio itukanĩrũo. Magũrũ ma ngaari cia cio cia mbaara makĩambĩrĩria kuumana. Thigari cia Misiri ikĩanĩrĩra ikiuga: ‘Nĩ tũũrei tũtigane na Aisiraeli! Jehova nĩ aramarũĩrĩra!’

Jehova agĩcoka akĩra Musa ũũ: ‘Tambũrũkia guoko gwaku igũrũ rĩa iria.’ O rĩmwe thingo icio cia maĩ igĩcokana na ikĩhumbĩra thigari cia Amisiri. Firauni na thigari ciake magĩkua na gũtirĩ o na ũmwe wao wahonokire.

Maakinya mwena ũrĩa ũngĩ wa iria, Aisiraeli makĩgooca Jehova na rwĩmbo makĩinaga ũũ: “Nĩ ngũinĩra Jehova, tondũ nĩ atũũgĩrĩte mũno. Nĩ aikĩtie mbarathi na mũmĩtwarithia iria-inĩ.” Rĩrĩa andũ maainaga, atumia nao maathũngũthaga makĩinagia manyanga. Andũ othe maarĩ na gĩkeno mũno tondũ nĩ maatigĩte gũtuĩka ngombo.