Jehova eerire Musa ũũ: ‘Ambata kĩrĩma-inĩ ũũke kũrĩ niĩ. Nĩ ngwandĩka maathani makwa ihengere-inĩ cia mahiga na ngũnengere.’ Nĩ ũndũ ũcio, Musa akĩambata kĩrĩma-inĩ na agĩikara kuo thikũ 40. Jehova akĩandĩka Maathani Marĩa Ikũmi ihengere-inĩ igĩrĩ cia mahiga na akĩmũnengera.

Thutha wa ihinda, Aisiraeli magĩciria atĩ Musa nĩ aamatiganĩirie na makĩra Haruni ũũ: ‘Tũthondekere ngai ũrĩa ũrĩtũtongoragia!’ Nake Haruni akĩmeera ũũ: ‘Nengerai thahabu cianyu.’ Agĩtwekũra thahabu icio na akĩmathondekera mũhianano watariĩ ta njaũ. Aisiraeli mawona makiuga ũũ: ‘Ũyũ nĩwe Ngai ũrĩa watũrutire Misiri!’ Makĩambĩrĩria gũthathaiya mũhianano ũcio na makĩũkũngũĩra. Hihi ũndũ ũcio nĩ waagĩrĩire? Aca ndwaagĩrĩire tondũ nĩ meehĩtĩte gũthathaiya o Jehova tu. No nĩ maagire kũhingia ũrĩa mooigĩte.

Jehova nĩ oonire ũrĩa gwathiaga na mbere na akĩra Musa ũũ: ‘Ikũrũka ũthiĩ, tondũ andũ nĩ maunĩte watho wakwa na marahoya ngai ya mũhianano.’ Nĩ ũndũ ũcio, Musa agĩikũrũka akuuĩte ihengere iria igĩrĩ cia mahiga ciarĩ na Watho.

Rĩrĩa Musa aakuhĩrĩirie kambĩ ya Aisiraeli, nĩ aaiguire makĩina. Agĩcoka akĩona magĩthũngũtha makĩinamagĩrĩra mũhianano ũcio wa njaũ. Musa akĩrakara mũno, akĩrekania ihengere cia mahiga iria ciarĩ na Watho ikĩenyũkanga icunjĩ, na akĩoya mũhianano ũcio o rĩo akĩwananga. Agĩcoka akĩũria Haruni ũũ: ‘Nĩ ũndũ ũrĩkũ andũ aya magwĩkĩte nĩguo wĩtĩkĩre gwĩka ũũ?’ Nake Haruni akĩmwĩra: ‘Ndũkarakare. Wee nĩ ũĩ ũrĩa andũ aya mahaana. Marendaga ngai ĩngĩmatongoria, na kwoguo ndĩratwekũra thahabu ciao na haroimĩra njaũ ĩno!’ Haruni ndaagĩrĩirũo nĩ gwĩka ũguo. Musa agĩcoka kĩrĩma-inĩ rĩngĩ gũthaitha Jehova ohere Aisiraeli.

Jehova nĩ ooheire arĩa meendaga kũmwathĩkĩra. Hihi nĩ wona ũrĩa warĩ ũndũ wa bata harĩ Aisiraeli kũrũmĩrĩra ũtongoria wa Musa?

Rĩrĩa Musa aarĩ Kĩrĩma-inĩ gĩa Sinai, Jehova nĩ aamwĩrire ake hema ya mwanya ĩrĩa yetagwo gĩikaro kĩamũre, na hau nĩho Aisiraeli maathathayagĩria. Nĩ mangĩahotire gũkuua gĩikaro kĩu kĩamũre makiuma handũ hamwe magĩthiĩ harĩa hangĩ.

Jehova eerire Musa ũũ: ‘Ĩra andũ marute kĩrĩa o mũndũ angĩhota nĩguo mateithĩrĩrie gwaka gĩikaro kĩamũre.’ Aisiraeli makĩruta thahabu, betha, gĩcango, mahiga ma goro, na indo ingĩ cia kwĩgemia. Ningĩ nĩ maarutire guoya wa mbũri, gatani ĩrĩa njega, njũũa cia nyamũ, na indo ingĩ nyingĩ. Maarutire indo nyingĩ nginya Musa akĩmeera ũũ: ‘Nĩ ciaigana rĩu! Mũtikarehe ingĩ.’

Athuri na atumia aingĩ arĩa maarĩ na ũhoti ũtiganĩte nĩ maateithĩrĩirie gwaka gĩikaro kĩu kĩamũre. Jehova nĩ aamaheire ũũgĩ wa kũruta wĩra ũcio. Andũ amwe nĩ gũtuma maatumaga, arĩa angĩ makogotha ndigi, na angĩ makagemia itambaya. Nao angĩ maabangaga tũhiga, angĩ makaruta wĩra na thahabu, kana magathondeka mĩthemba yothe ya indo cia mbaũ.

Andũ maakire gĩikaro kĩu kĩamũre o ta ũrĩa meerĩtwo nĩ Jehova. Nĩ maathondekire gĩtambaya gĩthaka gĩa kũgayania gĩikaro kĩu kĩamũre maita merĩ, mwena ũmwe ũgĩtuĩka Harĩa Hatheru na ũcio ũngĩ Harĩa Hatheru Mũno. Harĩa Hatheru Mũno haarĩ na ithandũkũ rĩa kĩrĩkanĩro. Rĩaakĩtwo na mbaũ cia mũtĩ wa mũgaa na rĩkagemio na thahabu. Naho Harĩa Hatheru haakoragwo na mũtĩ wa kũigĩrĩrũo matawa ma thahabu, metha, na kĩgongona gĩa gũcinĩra ũbumba. Nja ya gĩikaro kĩu kĩamũre kwarĩ na kĩraĩ gĩa gĩcango na kĩgongona kĩnene. Ithandũkũ rĩa kĩrĩkanĩro nĩ rĩaririkanagia Aisiraeli ũrĩa maarĩkanĩire na Jehova atĩ nĩ marĩmwathĩkagĩra. Hihi nĩ ũĩ kĩrĩkanĩro nĩ kĩĩ? Nĩ mwĩhĩtwa wa mwanya.

Jehova nĩ aathuurire Haruni na ariũ ake nĩguo matungatage gĩikaro-inĩ kĩu kĩamũre marĩ athĩnjĩri-Ngai. Wĩra wao warĩ kũmenyerera gĩikaro kĩu na kũrutĩra Jehova magongona. Haruni nowe wetĩkĩrĩtio kũingĩra Harĩa Hatheru Mũno, tondũ aarĩ mũthĩnjĩri-Ngai ũrĩa mũnene. Aaingĩraga Harĩa Hatheru Mũno o mwaka riita rĩmwe nĩguo arute igongona rĩa mehia make, ma famĩlĩ yake, na ma Aisiraeli othe.

Aisiraeli maarĩkirie gwaka gĩikaro kĩu kĩamũre mwaka ũmwe kuuma mauma Misiri. Rĩu nĩ maagĩte na handũ ha gũthathayagĩria Jehova.

Jehova nĩ aaiyũririe riri wake thĩinĩ wa gĩikaro kĩu kĩamũre na gũkĩgĩa na itu igũrũ rĩakĩo. Rĩrĩa rĩothe itu rĩu rĩakoragwo igũrũ rĩa gĩikaro kĩu kĩamũre, Aisiraeli matingĩathamire harĩa maambĩte hema ciao. No itu rĩu rĩngĩeherire, nĩ maamenyaga ihinda rĩa gũthama nĩ rĩakinya. Maarutanagia gĩikaro kĩu kĩamũre na makarũmĩrĩra itu rĩu.