Aisiraeli nĩ maatiganĩirie Jehova o rĩngĩ na makĩambĩrĩria gũthathaiya ngai cia mĩhianano. Rĩrĩa Aamoni maatharĩkĩire Aisiraeli na makĩmatooria, ngai icio cia maheeni itiamateithirie. Aisiraeli nĩ maahinyĩrĩirio mũno ihinda rĩa mĩaka mĩingĩ. Mũthia-inĩ makĩra Jehova ũũ: ‘Nĩ tũhĩtĩtie. Twagũthaitha ũtũhonokie kuuma kũrĩ thũ citũ.’ Makĩananga mĩhianano yao na makĩambĩrĩria gũthathaiya Jehova rĩngĩ. Jehova ndeendaga kuona magĩthiĩ na mbere kũhinyĩrĩrio.

Mũndũ ũmwe warĩ na hinya wetagwo Jefitha nĩ aathuurirũo gũtongoria andũ nĩguo mathiĩ makahũũre Aamoni. Eerire Jehova ũũ: ‘Angĩkorũo nĩ ũgũtũteithia kũhootana mbaara ĩno, ndehĩta atĩ rĩrĩa ngaacoka mũciĩ, nĩ ngaakũhe mũndũ ũrĩa ũkoima nyũmba yakwa arĩ wa mbere okĩte kũndũnga.’ Jehova nĩ aaiguire mahoya ma Jefitha na akĩmũteithia kũhootana mbaara ĩyo.

Rĩrĩa Jefitha aacokire mũciĩ, mũndũ ũrĩa warĩ wa mbere kũmũtũnga aarĩ mũirĩtu wake, na ndaarĩ na mwana ũngĩ tiga ũcio. Aamũtũngire agĩthũngũthaga akĩinagia manyanga. Jefitha angĩekire atĩa? Aaririkanire mwĩhĩtwa wake harĩ Jehova na akiuga: ‘Mwarĩ wakwa! Nĩ wanjũraga ngoro mũno. Harĩ ũndũ ndĩrerĩire Jehova, na nĩguo ũhinge no mũhaka ndeke ũthiĩ Shilo ũgatungate nyũmba-inĩ yake.’ No mũirĩtu wake akĩmwĩra ũũ: ‘Baba, akorũo nĩ ũrehĩtire harĩ Jehova, no mũhaka ũhingie ũndũ ũcio. Ũrĩa ngwenda no ũreke thiĩ irĩma-inĩ mĩeri ĩĩrĩ nĩguo ngahũthĩre mahinda na airĩtu arata akwa. Thutha ũcio nĩ ngaathiĩ.’ Mũirĩtu ũcio wa Jefitha aatungatĩire Jehova thĩinĩ wa nyũmba yake arĩ mwĩhokeku ũtũũro wake wothe. Arata ake nĩ maathiaga Shilo o mwaka kũmũceerera.

Eli, ũrĩa warĩ mũthĩnjĩri-Ngai mũnene, nĩ aarĩ na ariũ eerĩ arĩa maatungataga nyũmba-inĩ ya Jehova marĩ athĩnjĩri-Ngai. Meetagwo Hofini na Finehasi. Matiathĩkagĩra mawatho ma Jehova na meekaga andũ maũndũ moru mũno. Aisiraeli mangĩathiire kũrutĩra Jehova magongona, Hofini na Finehasi maathiaga makoya nyama iria njega. Eli nĩ aaiguaga ũrĩa ariũ ake meekaga, no gũtirĩ ikinya ooyaga. Hihi Jehova nĩ angĩarekire ũndũ ũcio ũthiĩ na mbere?

O na gũtuĩka Samueli aarĩ mũnini gũkĩra Hofini na Finehasi, ndeekaga tao. Jehova nĩ aakenagio mũno nĩ Samueli. Mũthenya ũmwe Samueli arĩ toro, nĩ aaiguire etwo. Ookĩrire agĩtengʼera kũrĩ Eli na akĩmwĩra: ‘Ĩ niĩ ũyũ!’ No Eli akĩmwĩra: ‘Niĩ ndigwĩtĩte. Coka toro.’ Samueli agĩcoka toro, no akĩigua etwo rĩngĩ. Rĩrĩa Samueli eetirũo riita rĩa gatatũ, Eli nĩ aamenyire atĩ nĩ Jehova wamwĩtaga. Kwoguo akĩra Samueli atĩ etwo rĩngĩ auge ũũ: ‘Aria, Jehova. Nĩ gũkorũo ndungata yaku nĩ ĩgũthikĩrĩirie.’

Samueli agĩcoka toro o rĩngĩ, no akĩigua gũgĩtanwo rĩngĩ ũũ: ‘Samueli! Samueli!’ Nake agĩcokia: ‘Aria tondũ ndungata yaku nĩ ĩgũthikĩrĩirie.’ Jehova akĩmwĩra ũũ: ‘Ĩra Eli atĩ nĩ ngũmũherithia hamwe na famĩlĩ yake. Nĩ oĩ atĩ ariũ ake mekaga maũndũ moru nyũmba-inĩ yakwa, no gũtirĩ ikinya oyaga.’ Mũthenya ũyũ ũngĩ rũcinĩ, Samueli akĩhingũra mĩrango ya nyũmba ya Jehova o ta ũrĩa aamenyerete. Nĩ eetigĩraga kwĩra Eli ũrĩa Jehova aamwĩrĩte. No Eli nĩ aamwĩtire na akĩmũũria ũũ: ‘Samueli, nĩ atĩa Jehova arakwĩrire? Njĩĩra na ndũkahithe.’ Nĩ ũndũ ũcio, Samueli akĩra Eli ũrĩa wothe eerĩtwo.

O ũrĩa Samueli aathiaga akĩnenehaga, Jehova nĩ aathiaga na mbere kũmũteithia. Bũrũri-inĩ wothe, gũtirĩ Mũisiraeli ũtaamenyire atĩ Jehova nĩ aathuurĩte Samueli atuĩke mũnabii na mũtiirĩrĩri bũrũri.