Jehova eerire Samueli ũũ: ‘Thiĩ kwa Jesii tondũ mũrũ wake ũmwe nĩwe ũgaatuĩka mũthamaki wa Isiraeli.’ Nĩ ũndũ ũcio Samueli agĩthiĩ kwa Jesii. Rĩrĩa oonire mũrũ ũrĩa mũkũrũ wa Jesii, akĩĩra ũũ: ‘No nginya akorũo nĩwe ũyũ.’ No Jehova akĩmwĩra atĩ ũcio tiwe ũngĩatuĩkire mũthamaki. Jehova agĩcoka akĩmwĩra ũũ: ‘Niĩ ndoraga ũrĩa mũndũ ahaana ngoro thĩinĩ, no ti ũrĩa aroneka na nja.’

Jesii agĩtwara ariũ acio angĩ ake atandatũ kũrĩ Samueli, no Samueli akĩmwĩra ũũ: ‘Hatirĩ o na ũmwe harĩ aya ũthuurĩtwo nĩ Jehova. Hihi ũrĩ na ariũ angĩ tiga aya?’ Nake Jesii akiuga: ‘Nĩ harĩ ũngĩ ũmwe wa kĩhinga nda, na etagwo Daudi. Nĩ kũrĩithia ararĩithia.’ Rĩrĩa Daudi ookire, Jehova eerire Samueli ũũ: ‘Ũcio nĩ we!’ Kwoguo Samueli agĩitĩrĩria Daudi maguta mũtwe nĩguo atuĩke Mũthamaki wa Isiraeli thutha wa Saulu.

Thutha ũcio, Aisiraeli magĩthiĩ kũrũa na Afilisti, arĩa maakoragwo na njamba ĩmwe ya ita yetagwo Goliathu. Goliathu aanyũrũragia Aisiraeli o mũthenya. Aaugaga ũũ aanĩrĩire: ‘Ndũmĩrai mũndũ ũmwe oke tũrũe nake. Angĩhoota, tũgũtuĩka ngombo cianyu, no ingĩmũhoota, mũgũtuĩka ngombo citũ.’

Daudi nĩ aathiire kambĩ-inĩ ya Aisiraeli gũtwarĩra ariũ a nyina irio tondũ maarĩ thigari. Akĩigua ũrĩa Goliathu aaugaga, nake akiuga: ‘Niĩ nĩ ngũthiĩ kũrũa nake!’ No Mũthamaki Saulu akĩmwĩra: ‘Wee ũrĩ o kamwana.’ Nake Daudi akĩmũcokeria: ‘Jehova nĩ ekũndeithia.’

Saulu agĩcoka akĩhe Daudi indo ciake cia mbaara, no Daudi akĩmwĩra: ‘Ndingĩhota kũrũa na indo ici.’ Daudi aacokire akĩoya kĩgũtha gĩake na agĩthiĩ handũ karũũĩ-inĩ. Agĩthuura tũhiga tũtano tũnyoroku na agĩtũikia mondo-inĩ. Daudi agĩcoka agĩtengʼera kũrĩ Goliathu. Goliathu akĩanĩrĩra akĩmwĩra ũũ: ‘Ũka haha kahĩĩ gaka. Ngũgũikĩria nyoni cia rĩera-inĩ na nyamũ cia gĩthaka.’ No Daudi ndeetigĩrire. Aamwĩrire ũũ: ‘Wee ũroka harĩ niĩ na rũhiũ rwa njora na itimũ, no niĩ ndĩroka harĩ wee na rĩĩtwa rĩa Jehova. Ti ithuĩ ũrarũa na ithuĩ, no ũrarũa na Ngai. Gũtirĩ mũndũ ũrĩ haha ũtekuona atĩ Jehova arĩ hinya gũkĩra rũhiũ rwa njora na itimũ. Nĩ ekũmũneana moko-inĩ maitũ inyuothe.’

Daudi agĩkĩra kahiga kĩgũtha-inĩ, na agĩkĩhiũria na hinya wake wothe. Nĩ ũndũ wa ũteithio wa Jehova, kahiga kau kaaringire Goliathu thithi-inĩ na gagĩtonyerera. Goliathu akĩgwa na agĩkua. Nao Afilisti mona ũguo makĩũra. Hihi wee nĩ wĩhokaga Jehova ta ũrĩa Daudi eekire?

Thutha wa Daudi kũũraga Goliathu, Mũthamaki Saulu nĩ aamũtuire mũnene wa thigari ciake. Daudi nĩ aahootanire mbaara nyingĩ na akĩmenyekana mũno. Hĩndĩ ciothe Daudi aacoka mũciĩ kuuma mbaara-inĩ, atumia maathũngũthaga na makaina ũũ: ‘Saulu nĩ oragĩte andũ ngiri nyingĩ, nake Daudi akoraga andũ ngiri makũmi maingĩ!’ Saulu nĩ aaiguagĩra Daudi ũiru na nĩ eendaga kũmũũraga.

Daudi nĩ ooĩ gũthaaka kĩnanda wega mũno. Mũthenya ũmwe rĩrĩa Daudi aathaakagĩra Saulu kĩnanda, mũthamaki ũcio nĩ aamũikĩirie itimũ. Daudi nĩ eegitire o na ihenya na itimũ rĩu rĩgĩĩthecerera rũthingo-inĩ. Thutha ũcio Saulu nĩ aageririe kũũraga Daudi maita mangĩ maingĩ. Mũthia-inĩ, Daudi nĩ oorire na agĩthiĩ kwĩhitha werũ-inĩ.

Saulu nĩ aathiire na thigari ciake 3,000 gũcaria Daudi. Akĩingĩra ngurunga-inĩ o ĩrĩa Daudi na andũ ake meehithĩte atekũmenya. Arũme arĩa maarĩ na Daudi makĩra Daudi ũũ: ‘Gaka nĩ kamweke gaku ga kũũraga Saulu.’ Daudi agĩceema Saulu na agĩtinia gĩcunjĩ kĩa nguo yake. No Saulu ndaamenyire. Thutha ũcio, Daudi akĩigua ũũru mũno ngoro tondũ ndoonetie mũthamaki ũcio warĩ mũitĩrĩrie maguta gĩtĩo. Ndeetĩkĩririe andũ arĩa maarĩ nao matharĩkĩre Saulu. O na nĩ aanĩrĩire akĩra Saulu atĩ auma na kamweke ga kũmũũraga. Hihi Saulu nĩ angĩacenjirie mawoni make kwerekera Daudi?

Aca. Aathiire o na mbere gũcaria Daudi. Ũtukũ ũmwe, Daudi na Abishai nĩ maathiire mehithanĩtie nginya harĩa Saulu aarĩ. Abineri, ũrĩa wagitagĩra Saulu, aarĩ toro. Abishai akĩra Daudi ũũ: ‘Gaka nĩ kamweke gaitũ! Reke ndĩmũũrage.’ No Daudi akĩmwĩra ũũ: ‘Jehova nĩwe ũĩ ũrĩa egwĩka Saulu. Reke tuoe o itimũ na njagi yake ya maĩ twĩthiĩre.’

Daudi akĩambata kĩrĩma kĩrĩa kĩangʼethanĩire na kambĩ ya Saulu. Akĩanĩrĩra akiuga ũũ: ‘Abineri, wagire kũgitĩra mũthamaki nĩkĩ? Itimũ rĩa Saulu na njagi yake ya maĩ irĩ ha?’ Saulu akĩmenya mũgambo wa Daudi na akĩmwĩra: ‘Nĩ ũngĩnjũragire, no ndũneka ũguo. Nĩ njũĩ atĩ nĩwe ũgaatuĩka mũthamaki wa Isiraeli thutha wakwa.’ Saulu agĩcoka gwake mũciĩ. O na kũrĩ ũguo, ti andũ othe famĩlĩ-inĩ ya Saulu maamenete Daudi.