Jonathani, ũrĩa warĩ irigithathi rĩa Mũthamaki Saulu, aarĩ mũthigari warĩ na ũcamba. Daudi aaugire atĩ Jonathani aarĩ na ihenya gũkĩra nderi na aarĩ na hinya gũkĩra mũrũthi. Mũthenya ũmwe Jonathani nĩ oonire thigari 20 cia Afilisti irĩ handũ kĩrĩma-inĩ. Akĩra mũndũ ũrĩa wamũkuagĩra indo cia mbaara ũũ: ‘Nĩ tũgũthiĩ kũmatharĩkĩra angĩkorũo Jehova nĩ egũtũhe kĩmenyithia. Afilisti mangĩtwĩra twambate harĩa marĩ, nĩ tũkũmenya nĩ ihinda rĩa kũmatharĩkĩra.’ Afilisti maacokire makĩanĩrĩra ũũ: ‘Ambatai mũke tũrũe!’ Nĩ ũndũ ũcio, Jonathani na mũndũ ũrĩa wamũkuagĩra indo cia mbaara makĩambata kĩrĩma-inĩ na makĩũraga thigari icio cia Afilisti.

Tondũ Jonathani aarĩ irigithathi rĩa Saulu, nĩwe ũngĩatuĩkire mũthamaki thutha wa ithe. No ndaarĩ na ũiru, o na gũtuĩka nĩ aamenyaga Jehova nĩ aathuurĩte Daudi atuĩke mũthamaki wa Isiraeli thutha wa Saulu. Jonathani na Daudi nĩ maatuĩkire arata a hakuhĩ mũno, na makĩrĩkanĩra atĩ o mũndũ nĩ angĩagitĩrire ũrĩa ũngĩ. Jonathani akĩhe Daudi kagooti gake, rũhiũ rwake rwa njora, ũta wake, na mũcibi wake, ĩrĩ njĩra ya kuonania ũrata wao mũrũmu.

Rĩrĩa Daudi ooragĩra Saulu, Jonathani aathiire akĩmwĩra ũũ: ‘Gĩa na hinya, na ndũgetigĩre. Jehova nĩ agũthuurĩte ũtuĩke mũthamaki. O na baba nĩ oĩ ũguo.’ Hihi no wende gũkorũo na mũrata mwega ta Jonathani?

Jonathani nĩ eeingĩririe ũgwati-inĩ maita maingĩ akĩgeria gũteithia Daudi. Nĩ aamenyaga atĩ Mũthamaki Saulu nĩ eendaga kũũraga Daudi, na kwoguo akĩra ithe ũũ: ‘Ũngĩũraga Daudi nĩ ũkwĩhia, tondũ gũtirĩ ũndũ mũũru ekĩte.’ Saulu akĩrakarĩra Jonathani mũno. Thutha wa mĩaka ĩigana ũna, Jonathani na Saulu nĩ maakuĩrĩire mbaara-inĩ.

Thutha wa Jonathani gũkua, Daudi nĩ eethire mũrũ wa Jonathani wetagwo Mefiboshethu. Rĩrĩa aamuonire, akĩmwĩra ũũ: ‘Tondũ baba wanyu ararĩ mũrata wakwa mũno, nĩ ngũkũrũmbũiya ũtũũro-inĩ waku wothe. Ũgũtũũra nyũmba-inĩ yakwa na ũrĩrĩagĩra metha-inĩ yakwa.’ Daudi ndaaumire ariganĩirũo nĩ mũrata wake Jonathani.

Rĩrĩa Saulu aakuire, Daudi nĩ aatuĩkire Mũthamaki arĩ na mĩaka 30. Thutha wa Daudi gũthamaka mĩaka ĩigana ũna, hwaĩ-inĩ ũmwe arĩ nyũmba igũrũ nĩ oonire mũtumia mũthaka. Nĩ aamenyire atĩ mũtumia ũcio eetagwo Bathi-Sheba na aahikĩtio nĩ mũthigari ũmwe wetagwo Uria. Agĩtũmanĩra mũtumia ũcio atwarũo nyũmba-inĩ yake, agĩkomania nake, na Bathi-Sheba akĩgĩa nda. Daudi akĩgeria kũhitha ũrĩa eekĩte. Akĩra mũnene wa thigari matware Uria mũhari-inĩ wa mbere harĩa mbaara yacacĩire, macoke mehere thutha wake nĩguo oragwo. Thutha wa Uria kũũragwo, Daudi nĩ aahikirie Bathi-Sheba.

Jehova nĩ oonaga maũndũ macio mothe moru magĩkĩka. Hihi angĩekire atĩa? Aatũmire mũnabii Nathani kũrĩ Daudi. Nathani eerire Daudi ũũ: ‘Mũndũ ũmwe warĩ mũtongu nĩ aarĩ na ngʼondu nyingĩ, no nĩ kwarĩ na mũthĩni warĩ na kagondu kamwe tu karĩa eendete mũno. Mũndũ ũcio warĩ mũtongu nĩ ooire kagondu kau ka mũthĩni ũcio.’ Daudi aigua ũguo akĩrakara mũno na akiuga: ‘Mũndũ ũcio mũtongu agĩrĩirũo gũkua!’ Nathani akĩra Daudi ũũ: ‘Wee nĩwe mũndũ ũcio!’ Daudi akĩigua ũũru mũno, na agĩtĩkĩra mahĩtia make. Akĩra Nathani ũũ: ‘Nĩ njĩhĩirie Jehova.’ Mehia macio nĩ maatũmire Daudi na famĩlĩ yake macemanie na mathĩna maingĩ mũno. Jehova nĩ aaherithirie Daudi, no nĩ aamwĩtĩkĩririe athiĩ na mbere gũtũũra tondũ aarĩ mwĩnyihia na aarĩ mwĩhokeku.

Daudi nĩ eendaga gwakĩra Jehova hekarũ, no Jehova agĩthuura mũrũwe Suleimani amwakĩre. Daudi akĩambĩrĩria kũhaarĩria indo iria Suleimani angĩahũthĩrire gwaka, na akiuga ũũ: ‘Hekarũ ya Jehova no mũhaka ĩkorũo ĩrĩ thaka. Suleimani no mũndũ mũnini, no nĩ ngũmũteithĩrĩria na njĩra ya kũhaarĩria indo cia gwaka.’ Mũthamaki Daudi nĩ aarutire mbeca nyingĩ cia gũteithĩrĩria wĩra-inĩ ũcio. Eethire andũ moĩ gwaka wega, agĩcokanĩrĩria thahabu na betha, na akĩrehithia mbaũ cia mĩtarakwa kuuma Turo na Sidoni. Daudi atanakua, nĩ aataarĩirie Suleimani ũrĩa angĩakire hekarũ. Aamwĩrire ũũ: ‘Jehova aanjĩrire nyandĩke maũndũ maya nĩ ũndũ waku na nĩ egũgũteithia. Ndũgetigĩre, gĩa na hinya na wambĩrĩrie wĩra.’