Rĩrĩa Suleimani aatuĩkire Mũthamaki wa Isiraeli, Jehova aamũũririe ũũ: ‘Ũkwenda ngũhe kĩĩ?’ Suleimani akĩmwĩra: ‘Ndĩ mũnini na ndiũĩ ũrĩa njagĩrĩirũo nĩ gwĩka. Ndagũthaitha ũũhe ũũgĩ nĩguo hote kũrũmbũiya andũ aku.’ Nake Jehova akĩmwĩra ũũ: ‘Tondũ wahoya ũũgĩ, ngũtũma ũtuĩke mũndũ ũrĩa mũũgĩ mũno thĩinĩ wa thĩ. Ningĩ nĩ ngũkũhe ũtonga mũingĩ mũno. Na angĩkorũo nĩ ũrĩnjathĩkagĩra, nĩ ũgũtũũra mĩaka mĩingĩ.’

Suleimani nĩ aambĩrĩirie gwaka hekarũ. Aahũthĩrire thahabu ĩrĩa njega, betha, mbaũ, na mahiga. Athuri na atumia aingĩ arĩa maarĩ na ũũgĩ ũtiganĩte nĩ maarutire wĩra wa gwaka hekarũ. Thutha wa mĩaka mũgwanja, hekarũ nĩ yarĩkire na ihinda rĩgĩkinya rĩa kũmĩamũrĩra Jehova. Yarĩ na kĩgongona kĩaigĩrĩirũo indo cia kũrutwo magongona. Suleimani aaturirie maru mbere ya kĩgongona kĩu akĩhoya ũũ: ‘Jehova, hekarũ ĩno ti nene kana ĩgathakara mũno harĩ wee, no ndagũthaitha wĩtĩkagĩre ũthathaiya witũ na ũkaigua mahoya maitũ.’ Jehova oonaga hekarũ ĩyo na mahoya ma Suleimani atĩa? Suleimani aarĩkia kũhoya, mwaki waumire igũrũ na ũgĩcina magongona marĩa maarĩ kĩgongona-inĩ. Jehova nĩ eetĩkĩrire hekarũ ĩyo. Rĩrĩa Aisiraeli moonire ũguo, magĩkena mũno.

Mũthamaki Suleimani nĩ ooĩkaine Isiraeli guothe na kũndũ kũngĩ kũingĩ nĩ ũndũ wa ũũgĩ wake. Andũ nĩ maathiaga kũrĩ we nĩguo amahe ũtaaro wĩgiĩ mathĩna mao. Nginya mũtumia ũrĩa warĩ mũthamaki wa Sheba nĩ aathiire kũmũgeria na ciũria nditũ. Rĩrĩa aaiguire macokio make akiuga ũũ: ‘Ndiretĩkĩtie ũrĩa ndĩrerĩtwo nĩ andũ, no rĩu nĩ ndona o na wĩ na ũũgĩ mũingĩ gũkĩra ũrĩa maraugĩte. Jehova Ngai waku nĩ akũrathimĩte.’ Ũtũũro warĩ mwega mũno harĩ rũrĩrĩ rwa Isiraeli na andũ maarĩ na gĩkeno mũno. No maũndũ maarĩ hakuhĩ gũcenjia.

Hĩndĩ ĩrĩa yothe Suleimani aathathayagia Jehova, Aisiraeli maatũũraga na thayũ. No Suleimani nĩ aahikirie atumia aingĩ a ndũrĩrĩ arĩa maathathayagia mĩhianano. Aathiire aagarũrũkĩte kahora kahora nginya o nake akĩambĩrĩria gũthathaiya mĩhianano. Jehova nĩ aarakarire mũno nginya akĩra Suleimani ũũ: ‘Ũthamaki wa Isiraeli nĩ ũkweherio famĩlĩ-inĩ yaku na ũgayanio maita merĩ. Gĩcunjĩ kĩrĩa kĩnene kĩaguo ngũhe ndungata ĩmwe yaku, nayo famĩlĩ yaku ĩgũtigwo na gĩcunjĩ kĩrĩa kĩnini.’

Jehova nĩ oonanirie itua rĩake na njĩra ĩngĩ. Ndungata ĩmwe ya Suleimani yetagwo Jeroboamu nĩ yacemanirie na mũnabii wetagwo Ahija njĩra-inĩ. Ahija aatarũrangire nguo yake ya igũrũ icunjĩ 12 na akĩra Jeroboamu ũũ: ‘Jehova nĩ ekweheria ũthamaki wa Isiraeli kuuma famĩlĩ-inĩ ya Suleimani na aũgayanie maita merĩ. Oya icunjĩ ici ikũmi tondũ nĩwe ũgũtuĩka mũthamaki wa mĩhĩrĩga ikũmi.’ Mũthamaki Suleimani nĩ aaiguire ũhoro ũcio na akĩbanga kũũraga Jeroboamu. Nĩ ũndũ ũcio Jeroboamu akĩũra na agĩthiĩ Misiri. Thutha wa ihinda, Suleimani nĩ aakuire na mũrũwe Rehoboamu agĩtuĩka mũthamaki. Hĩndĩ ĩyo nĩrĩo Jeroboamu oonire atĩ no acoke Isiraeli.

Athuri a Isiraeli meerire Rehoboamu ũũ: ‘Angĩkorũo nĩ ũrĩkaga andũ maũndũ mega nĩ megũtuĩka ehokeku harĩ wee.’ No anake arĩa maarĩ arata a Rehoboamu makĩmwĩra ũũ: ‘Wagĩrĩirũo kũritũhĩria andũ ũtũũro! Ũmarutithie wĩra mũritũ biũ!’ Rehoboamu aarũmĩrĩire ũtaaro wa anake acio maarĩ arata ake. Akĩhinyĩrĩria andũ mũno nao makĩmũremera. Maatuire Jeroboamu mũthamaki wa mĩhĩrĩga ĩrĩa ikũmi yacokire gwĩtwo ũthamaki wa Isiraeli. Mĩhĩrĩga ĩyo ĩngĩ ĩĩrĩ yetirũo ũthamaki wa Juda na maaikarire marĩ ehokeku harĩ Rehoboamu. Na njĩra ĩyo, mĩhĩrĩga ĩrĩa 12 ya Isiraeli ĩkĩgayũkanio.

Jeroboamu ndeendaga andũ arĩa aathamakagĩra mathiĩ Jerusalemu gũthathaĩria Jehova kuo, tondũ nĩ Rehoboamu wathanaga kuo. Oonaga ta andũ mathiĩ kuo mangĩagarũrũkire manyite Rehoboamu mbaru. Nĩ ũndũ ũcio agĩthondeka njaũ igĩrĩ cia thahabu na akĩra andũ ũũ: ‘Jerusalemu nĩ kũraihu mũno. No mũthathaĩrie o gũkũ.’ Andũ makĩambĩrĩria gũthathaiya njaũ icio na makĩriganĩrũo nĩ Jehova rĩngĩ.