Ũthamaki wa mĩhĩrĩga ikũmi ya Isiraeli warĩ na athamaki aingĩ oru, no Ahabu nĩwe warĩ mũũru makĩria. Aahikirie mũtumia mwaganu wetagwo Jezebeli, ũrĩa wathathayagia Baali. Ahabu na Jezebeli nĩ maaihũririe ũthathaiya wa Baali kũndũ guothe na makĩũraga anabii a Jehova. Jehova eekire atĩa? Aatũmire mũnabii Elija atwarĩre Ahabu ndũmĩrĩri.

Elija eerire Mũthamaki Ahabu atĩ tondũ nĩ eekaga maũndũ moru mũno, gũtingĩaurire mbura Isiraeli. Kwa ihinda rĩa makĩria ma mĩaka ĩtatũ, gũtiakũrire kĩndũ bũrũri-inĩ ũcio, kwoguo andũ makĩhũũta mũno. Jehova agĩtũma Elija kũrĩ Ahabu rĩngĩ. No Ahabu akĩmwĩra ũũ: ‘Wee nĩwe ũrehete thĩna gũkũ! Maya mothe nĩ mahĩtia maku.’ Nake Elija akĩmwĩra: ‘Ti niĩ ndũmĩte kũgĩe na ngʼaragu. Wee nĩwe ũtũmĩte nĩ ũndũ wa gũthathaiya Baali. Reke tũgerie tuone Ngai wa ma nũũ. Cokanĩrĩria andũ othe o hamwe na anabii a Baali gacũmbĩrĩ-inĩ ga Kĩrĩma gĩa Karimeli.’

Andũ nĩ maacemanirie kĩrĩma-inĩ kĩu, na Elija akĩmeera ũũ: ‘Ngwenda mũtue itua rĩu. Angĩkorũo Jehova nĩwe Ngai ũrĩa wa ma, mũrũmĩrĩrei. No angĩkorũo nĩ Baali, mũrũmĩrĩrei. Ũũ nĩguo tũgwĩka. Anabii 450 a Baali nĩ mahaarĩrie igongona na mete ngai wao, na niĩ nĩ ngũhaarĩria igongona na njĩte Jehova. Ngai ũrĩa ũgũcokia mahoya kũgerera mwaki nĩwe Ngai wa ma.’ Na andũ magĩtĩkania nake.

Anabii a Baali nĩ mahaarĩirie igongona rĩao. Maatindire magĩta ngai wao mũthenya wothe makiugaga ũũ: ‘Baali, tũthikĩrĩrie!’ Rĩrĩa Baali aagire kũmacokeria, Elija aambĩrĩirie kũmanyũrũria akĩmeeraga ũũ: ‘Mwĩtei na mũgambo mũnene. No gũkorũo nĩ akomire na nĩ arabatara mũndũ wa kũmũũkĩria.’ Gwakinyire hwaĩ-inĩ o anabii a Baali makĩmwĩtaga, no ndaamacokagĩria.

Elija nĩ aaigĩrĩire igongona rĩake kĩgongona-inĩ na akĩrĩitĩrĩria maĩ kũndũ guothe. Aacokire akĩhoya ũũ: ‘Jehova, ndagũthaitha ũreke andũ aya mamenye atĩ wee nĩwe Ngai ũrĩa wa ma.’ Jehova agĩtũma mwaki kuuma igũrũ o hĩndĩ ĩyo, na ũgĩcina igongona rĩu. Andũ makĩanĩrĩra makiugaga: ‘Jehova nĩwe Ngai ũrĩa wa ma!’ Nake Elija akĩmeera ũũ: ‘Mũtikareke mũnabii o na ũmwe wa Baali ore!’ Mũthenya ũcio, anabii 450 a Baali makĩũragwo

Rĩrĩa kwaumĩrire gatu kanini iria-inĩ, Elija eerire Ahabu ũũ: ‘Nĩ gũkuura mbura nene. Haica ngaari-inĩ yaku ya mbarathi na ũinũke.’ Igũrũ gũkĩiyũra matu mairũ, rũhuho rũkĩhurutana, na mbura nene ĩkĩambĩrĩria kuura. Rĩu ngʼaragu nĩ ĩngĩathirire. Ahabu aatwarithirie ngaari yake ya mbarathi na ihenya o ũrĩa angĩahotire. Nĩ ũndũ wa ũteithio wa Jehova, Elija aatengʼerire nginya akĩhĩtũka ngaari ĩyo ya Ahabu. No hihi mathĩna mothe ma Elija nĩ maathirĩte? Reke tuone.

Jezebeli nĩ aaiguire ũrĩa gwathiĩte harĩ anabii a Baali, na akĩrakara mũno. Aatũmĩire Elija ndũmĩrĩri ĩno: ‘Rũciũ ũgaakorũo ũrĩ mũkuũ o ta anabii acio a Baali.’ Elija nĩ aamakire mũno nginya akĩũrĩra werũ-inĩ. Aahoire ũũ: ‘Jehova, ndingĩhota gũkirĩrĩria rĩngĩ. Reke ngue.’ Agĩcoka agĩkoma rungu rwa mũtĩ tondũ aarĩ mũnogu mũno.

Mũraika wa Jehova akĩmũũkĩria na akĩmwĩra ũũ: ‘Ũkĩra ũrĩe.’ Elija akĩona mũgate wa gĩthiũrũrĩ ũrĩ igũrũ rĩa mahiga mahiũ na njagi ya maĩ. Aarĩire na akĩnyua, agĩcoka agĩkoma rĩngĩ. Mũraika akĩmũũkĩria rĩngĩ na akĩmwĩra: ‘Rĩa tondũ nĩ ũrabatara hinya nĩ ũndũ wa thabarĩ ĩrĩa ĩrĩ mbere yaku.’ Kwoguo Elija akĩrĩa rĩngĩ, agĩcoka agĩthiĩ thabarĩ ya thikũ 40 ũtukũ na mũthenya nginya agĩkinya Kĩrĩma-inĩ kĩa Horebu. Akinya kũu, aaingĩrire ngurunga-inĩ na agĩkoma. No Jehova akĩmwarĩria akĩmũũria: ‘Elija, nĩ kĩĩ ũreka gũkũ?’ Nake akĩmũcokeria: ‘Aisiraeli nĩ matigĩte kũrũmĩrĩra kĩrĩkanĩro gĩaku. Nĩ mathũkangĩtie kĩgongona gĩaku na makooraga anabii aku. Na rĩu nĩ niĩ maretha nĩguo manjũrage.’

Jehova akĩmwĩra ũũ: ‘Uma ũthiĩ ũrũgame kĩrĩma igũrũ.’ Gũkĩgĩa rũhuho rũnene rwarĩ na hinya hau ngurunga-inĩ. Gũgĩcoka gũkĩgĩa na gĩthingithia na mwaki. Thutha ũcio, Elija akĩigua mũgambo mũnini mũhooreru. Akĩĩhumbĩra ũthiũ na igooti rĩake na akiuma ngurunga-inĩ. Jehova agĩcoka akĩmũũria kĩrĩa gĩatũmĩte ore. Elija aamũcokeirie ũũ: ‘No niĩ wiki ndigarĩte.’ No Jehova akĩmwĩra: ‘Ndũrĩ wiki. Kũrĩ na andũ angĩ 7,000 thĩinĩ wa Isiraeli marandungatĩra. Thiĩ wamũre Elisha atuĩke mũnabii handũ-inĩ haku.’ Elija agĩthiĩ o rĩo na agĩka ũrĩa eerĩtwo nĩ Jehova. Hihi nĩ ũkuona ta Jehova arĩgũteithagia weka ũrĩa arenda? Ĩĩ, nĩ arĩgũteithagia. Reke tũcoke thutha hanini mahinda marĩa kwarĩ na ngʼaragu Isiraeli, tuone ũndũ wekĩkire hĩndĩ ĩyo.