Hĩndĩ ĩrĩa kwarĩ na ngʼaragu, Jehova nĩ eerire Elija ũũ: ‘Thiĩ Zarefathu na nĩ ũkũheo irio nĩ mũtumia ũmwe wa ndigwa.’ Elija akinya kĩhingo-inĩ gĩa itũũra rĩu, akĩona mũtumia wa ndigwa warĩ mũthĩni akĩũngania ngũ, na akĩmũhoya maĩ ma kũnyua. Rĩrĩa mũtumia ũcio aathiaga kũgĩra maĩ, Elija aamwĩtire na akĩmwĩra ũũ: ‘Ndagũthaitha ũndehere kĩenyũ kĩa mũgate.’ Nake mũtumia ũcio akĩmwĩra: ‘Ndirĩ na mũgate ingĩkũhe. Ndĩ o na kamũtu kanini na tũguta tũnini twa kũruga irio ciakwa na mwana wakwa.’ Elija akĩmwĩra: ‘Jehova augĩte atĩ angĩkorũo nĩ ũkũndugĩra mũgate, gũtirĩ hĩndĩ mũtu waku na maguta maku igaathira o nginya rĩrĩa mbura ĩkaura.’

Nĩ ũndũ ũcio, mũtumia ũcio agĩthiĩ na akĩrugĩra Elija mũgate. O ta ũrĩa Jehova aaugĩte, gũtirĩ hĩndĩ mũtumia ũcio na mwana wake maagire irio ihinda rĩu kwarĩ na ngʼaragu. Ndigithũ yake ya mũtu na ndigithũ yake ya maguta ciatũũraga cihũrĩte.

Thutha ũcio gũgĩkĩka ũndũ mũũru. Kahĩĩ ka mũtumia ũcio wa ndigwa nĩ kaarũarire mũno na gagĩkua. Mũtumia ũcio agĩthaitha Elija amũteithie. Elija akĩoya kahĩĩ kau na agĩgakuua agĩgatwara rumu yarĩ ngoroba-inĩ thĩinĩ wa nyũmba ĩyo. Agĩgakomia ũrĩrĩ-inĩ na akĩhoya ũũ: ‘Jehova, ndagũthaitha ũcokie kaana gaka muoyo.’ Hihi nĩ ũĩ nĩkĩ gũcokia mwana ũcio muoyo kũngĩarĩ ũndũ wa kũgegania? Nĩ tondũ gũtiarĩ na mũndũ ũngĩ wacoketio muoyo mbere ĩyo. Ũndũ ũngĩ nĩ atĩ, mũtumia ũcio na mwana wake matiarĩ Aisiraeli.

No kahĩĩ kau nĩ kaariũkire na gakĩambĩrĩria kũhuhia. Elija akĩra mũtumia ũcio ũũ: ‘Ta rora! Mwana waku arĩ muoyo.’ Mũtumia ũcio nĩ aakenire mũno na akĩra Elija ũũ: ‘Wee ũrĩ mũndũ wa Ngai. Ndamenya ũguo tondũ waragia o ũrĩa Jehova akwĩrĩte.’

Mũthamaki Ahabu arĩ Jezireeli ndirica-inĩ ya nyũmba yake, nĩ oonaga mũgũnda wa mĩthabibũ wa mũthuri wetagwo Nabothu. Ahabu nĩ eendaga mũgũnda ũcio, na kwoguo akĩra Nabothu amwenderie. No Nabothu akĩrega kũmwenderia tondũ rĩarĩ igai rĩake, na gwĩka ũguo nĩ kũngĩatũmire aune Watho wa Jehova. Hihi Ahabu nĩ aaheire Nabothu gĩtĩo nĩ ũndũ wa gwĩka ũrĩa kwagĩrĩire? Aca. Ahabu nĩ aarakarire mũno nginya agĩthiĩ agĩkoma na akĩrega kũrĩa irio.

Mũtumia wake ũrĩa wetagwo Jezebeli na warĩ mwaganu mũno, aamwĩrire ũũ: ‘Na githĩ wee tiwe mũthamaki wa Isiraeli. Wagĩrĩirũo kuoya kĩrĩa gĩothe ũrenda. Niĩ nĩ niĩ ngũkũhe mũgũnda ũcio.’ Jezebeli akĩandĩkĩra athuri a itũũra marũa akĩmeera mathitange Nabothu atĩ nĩ aarumĩte Ngai na mamũhũũre na mahiga nginya akue. Athuri acio magĩka ũrĩa Jezebeli aameerĩte, na thutha ũcio Jezebeli akĩra Ahabu ũũ: ‘Nabothu nĩ mũkuũ. Mũgũnda nĩ waku rĩu.’

Nabothu towe tu woragĩtwo atarĩ na mahĩtia. Jezebeli nĩ ooragĩte andũ angĩ aingĩ arĩa meendete Jehova. Nĩ aathathayagia mĩhianano na ageka maũndũ mangĩ moru. Jehova nĩ oonaga maũndũ macio mothe moru Jezebeli eekaga. Angĩamwĩkire atĩa?

Ahabu nĩ aacokire agĩkua, na thutha-inĩ mũrũwe Jehoramu agĩtuĩka mũthamaki. Jehova nĩ aatũmire mũndũ wetagwo Jehu athiĩ akaherithie Jezebeli na famĩlĩ yake.

Jehu agĩthiĩ na ngaari yake ya mbarathi nginya Jezireeli kũrĩa Jezebeli aaikaraga. Nake Jehoramu akĩhaica ngaari yake ya mbarathi agĩthiĩ gũtũnga Jehu, na akĩmũũria ũũ: ‘Kwĩ na thayũ?’ Nake Jehu akĩmũcokeria: ‘Gũtingĩgĩa na thayũ mami wanyu agĩkaga mĩtugo mĩũru ũguo.’ Jehoramu akĩgeria kũgarũra ngaari yake nĩguo ore, no Jehu akĩmũratha na mũguĩ na agĩkua.

Jehu agĩcoka agĩthiĩ kwa Jezebeli. Rĩrĩa Jezebeli aaiguire atĩ Jehu aarĩ njĩra agĩũka gwake, eegemirie maitho, agĩthondeka njuĩrĩ, agĩcoka agĩikara ndirica-inĩ amwetereire. Rĩrĩa Jehu aakinyire, Jezebeli akĩmũgeithia na kĩnyũrũri. Jehu aanĩrĩire akĩra anene a kwa mũthamaki arĩa maarũgamĩte hakuhĩ na Jezebeli ũũ: “Mũikiei thĩ!” Nao makĩmũnyita makĩmũikĩria ndirica-inĩ akĩgwa thĩ na agĩkua.

Thutha ũcio Jehu akĩũraga ariũ 70 a Ahabu na agĩtheria bũrũri ũcio kuumana na ũthathaiya wa Baali. Hihi nĩ wona atĩ Jehova nĩ amenyaga maũndũ mothe na hĩndĩ ĩrĩa yagĩrĩire yakinya nĩ aherithagia arĩa mekaga maũndũ moru?