Mũthamaki Beni-hadadi wa Siria aaikaraga agĩtharĩkagĩra Isiraeli. No mũnabii Elisha nĩ aamenyithagia Mũthamaki wa Isiraeli kabere, na kwoguo nĩ aahotaga kũũra. Nĩ ũndũ ũcio, Beni-hadadi agĩciria anyite Elisha. Rĩrĩa aamenyire atĩ Elisha aarĩ itũũra-inĩ rĩa Dothani, agĩtũma thigari cia Siria ithiĩ ikamũnyite.

Thigari cia Siria nĩ ciathiire Dothani ũtukũ. Mũthenya ũyũ ũngĩ rũcinĩ, ndungata ya Elisha nĩ yaumire nja na ĩkĩona itũũra rĩu rĩrigicĩirio nĩ thigari nyingĩ mũno. Ĩkĩmaka mũno na ĩkĩanĩrĩra ũũ: ‘Elisha, tũgwĩka atĩa?’ Elisha akĩmĩcokeria ũũ: ‘Arĩa marĩ mwena witũ nĩ aingĩ gũkĩra arĩa marĩ mwena wao.’ Jehova akĩhingũra ndungata ĩyo ya Elisha maitho o hĩndĩ ĩyo, na ĩkĩona irĩma iria ciathiũrũrũkĩirie itũũra rĩu ciyũrĩte mbarathi na ngaari cia mwaki.

Rĩrĩa thigari cia Siria ciageririe kũnyita Elisha, aahoire ũũ: ‘Jehova, ndagũthaitha ũmahinge maitho matikone.’ O rĩmwe, thigari icio ikĩrigwo nĩ kũrĩa ciarĩ, o na gũtuĩka no cioonaga. Elisha akĩra thigari icio ũũ: ‘Itũũra rĩrĩa mũretha ti rĩrĩ. Nũmĩrĩrai, na nĩ ngũmũtwara kũrĩ mũndũ ũrĩa mũracaria.’ Ciarũmĩrĩire Elisha nginya Samaria kũrĩa mũthamaki wa Isiraeli aaikaraga.

Ciakinya, ikĩmenya kũrĩa ciarĩ. Mũthamaki wa Isiraeli akĩũria Elisha ũũ: ‘Nĩ ũkwenda ndĩmorage?’ Hihi Elisha nĩ aahũthĩrire mweke ũcio kwĩrĩhĩria harĩ andũ acio meendaga kũmwĩka ũũru? Aca. Elisha eerire mũthamaki ũcio ũũ: ‘Ndũkamorage. Mahe irio, ũcoke ũmeere mathiĩ.’ Nĩ ũndũ ũcio mũthamaki akĩmarugithĩria iruga inene, agĩcoka akĩmeera mainũke.

Jezebeli nĩ aarĩ na mũirĩtu wetagwo Athalia, na aarĩ mwaganu o take. Aahikĩtio nĩ mũthamaki wa Juda. Rĩrĩa mũthuri wake aakuire, mũrũwe nĩwe watuĩkire mũthamaki. No rĩrĩa mũrũwe ũcio aakuire, Athalia nĩ eetuire mũthamaki wa Juda. Agĩcoka akĩgeria kũniina famĩlĩ yothe ya mũthamaki na njĩra ya kũũraga mũndũ wothe ũngĩatuĩkire mũthamaki handũ-inĩ hake. Ooragire nginya ciana cia ariũ ake. Athalia eetigĩrĩtwo nĩ andũ othe.

Jehoiada, ũrĩa warĩ Mũthĩnjĩri-Ngai-Mũnene o hamwe na mũtumia wake Jehosheba, nĩ maamenyaga atĩ Athalia nĩ kwĩhia eehagia. Nĩ meeingĩririe ũgwati-inĩ na njĩra ya kũhitha kaana geetagwo Jehoashu ka mũrũ wa Athalia. Maakarereire nyũmba-inĩ ya Jehova.

Jehoashu arĩ na mĩaka mũgwanja, Jehoiada nĩ aacokanĩrĩirie Alawii na anene othe a andũ na akĩmeera ũũ: ‘Rangĩrai mĩrango yothe ya nyũmba ya Jehova na mũtigetĩkĩrie mũndũ o na ũmwe aingĩre.’ Jehoiada agĩcoka agĩtua Jehoashu Mũthamaki wa Juda na akĩmũigĩrĩra thũmbĩ mũtwe. Andũ a Juda makĩanĩrĩra makiuga ũũ: ‘Mũthamaki arotũũra ihinda iraya!’

Athalia nĩ aaiguire inegene na agĩtengʼera nyũmba-inĩ ya Jehova nĩguo akamenye nĩ kĩĩ gĩathiaga na mbere. Rĩrĩa oonire mũthamaki ũcio mwerũ, aanĩrĩire akiuga ũũ: “Ĩno nĩ njama! Ĩno nĩ njama!” Anene a andũ makĩmũnyita, makĩmũruta nja, na makĩmũũraga. Kũngĩathiire atĩa nĩ ũndũ wa maũndũ marĩa moru eekĩte?

Jehoiada nĩ aateithĩrĩirie andũ kũgĩa na kĩrĩkanĩro na Jehova atĩ mangĩamũtungatĩire o we wiki. Jehoiada aameerire mathũkangie magongona ma Baali o hamwe na mĩhianano. Nĩ aamũrire athĩnjĩri-Ngai na Alawii marutage wĩra nyũmba-inĩ ya Ngai nĩguo andũ mahote gũthathayagĩria kuo rĩngĩ. Aaheire andũ amwe wĩra wa kũrangĩra nyũmba ya Ngai nĩguo gũtikanagĩe mũndũ ũtarĩ mũtheru ũkũingĩra kuo. Thutha ũcio Jehoiada na anene a thigari magĩtwara Jehoashu nyũmba-inĩ ya mũthamaki nĩguo makamũtue mũthamaki. Andũ a Juda nĩ maakenire mũno. Rĩu nĩ mangĩahotire gũtungatĩra Jehova, mategũthũkio nĩ Athalia kana ũthathaiya wa Baali. Hihi nĩ wona ũrĩa ũcamba wa Jehoiada wateithirie andũ aingĩ?