Itũũra-inĩ rĩa Nineve rĩrĩa rĩarĩ bũrũri-inĩ wa Ashuri, nĩ kwarĩ na andũ aganu mũno. Jehova eerire mũnabii Jona athiĩ Nineve akere andũ a kuo macenjie mĩthiĩre yao. No Jona oorire agĩthiĩ kũndũ kũngĩ. Aahaicire meri ya gũthiĩ Tarishishi na akĩambĩrĩria thabarĩ.

Rĩrĩa meri yarĩ iria-inĩ, nĩ kwagĩire na kĩhuhũkanio kĩnene na andũ arĩa maarĩ meri-inĩ ĩyo makĩmaka mũno. Maahoire ngai ciao makĩũragia ũũ: ‘Nĩ kĩĩ kĩrathiĩ na mbere?’ Mũthia-inĩ, Jona akĩmeera ũũ: ‘Nĩ niĩ ndĩratũma. Nĩ kũũra ndĩrora nĩguo ndigeke ũrĩa Jehova anjĩrĩte. Njikiai iria-inĩ na kĩhuhũkanio nĩ gĩgũthira.’ Andũ acio matieendaga gũikia Jona iria-inĩ, ĩndĩ nĩ aamatindĩkĩrĩirie mamũikie. Rĩrĩa maamũikirie, kĩhuhũkanio no gũthira gĩathirire.

Jona oonaga ta egũkua. O na kũrĩ ũguo, o ũrĩa aathiaga akĩrikagĩra nĩ aahoire Jehova. Jehova agĩtũma thamaki nene ĩmũmerie, no ndĩamũrĩire. Jona akĩhoya ũũ arĩ thĩinĩ wa nda ya thamaki ĩyo: ‘Nĩ ndĩgwathĩkagĩra hĩndĩ ciothe.’ Jehova nĩ aagitĩrire Jona arĩ nda ya thamaki ĩyo kwa ihinda rĩa thikũ ithatũ, na agĩcoka agĩtũma ĩthiĩ ĩmũtahĩke hũgũrũrũ-inĩ cia iria.

Tondũ Jehova nĩ aahonoketie Jona-rĩ, hihi ũguo nĩ kuuga atĩ Jona ndangĩathiire Nineve? Aca. Jehova nĩ eerire Jona o rĩngĩ athiĩ Nineve. Ihinda-inĩ rĩu Jona nĩ aathĩkire. Aathiire na akĩra andũ acio aganu ũũ: ‘Thutha wa matukũ 40, Nineve nĩ ĩkwanangwo.’ No nĩ gwekĩkire ũndũ ũteerĩgĩrĩirũo, tondũ andũ a Nineve nĩ maamũthikĩrĩirie na magĩcenjia mĩthiĩre yao. Mũthamaki wa Nineve eerire andũ ake ũũ: ‘Kaĩrai Ngai na mwĩrire. Ahota kwaga gũtũniina.’ Na rĩrĩa Jehova oonire atĩ andũ acio nĩ meerirĩte, ndaamaniinire.

Jona nĩ aarakarire mũno nĩ ũndũ wa itũũra rĩu kwaga kũniinwo. Ta wĩcirie ũndũ ũyũ: Jehova aarĩ na ũkirĩrĩria na tha nyingĩ kwerekera Jona, no Jona ndaarĩ na tha kwerekera andũ a Nineve. Ithenya rĩa ũguo, aathiire nja ya itũũra rĩu agĩikara thĩ kĩĩruru-inĩ kĩa mũũngũ arakarĩte. Mũmera ũcio ũgĩcoka ũkĩũma na Jona akĩrakara makĩria. Nĩ ũndũ ũcio Jehova akĩmwĩra ũũ: ‘Nĩ ũreciria mũmera ũcio mũno gũkĩra ũrĩa ũreciria andũ a Nineve. Nĩ ndĩmaiguĩrĩire tha na makahonoka.’ Eendaga kũmũruta ũndũ ũrĩkũ? Atĩ andũ a Nineve maarĩ a bata gũkĩra mũmera o wothe.

Aashuri nĩ meegwatĩire Ũthamaki wa mĩhĩrĩga ĩrĩa ikũmi ya Isiraeli. Rĩu Senakeribu Mũthamaki wa Ashuri eendaga kwĩgwatĩra ũthamaki wa mĩhĩrĩga ĩrĩa ĩĩrĩ ya Juda. Nĩ aambĩrĩirie kwĩgwatĩra matũũra ma Juda. No itũũra rĩrĩa eendaga mũno nĩ Jerusalemu. Ũndũ ũrĩa aatamenyaga nĩ atĩ Jehova nĩ aagitagĩra Jerusalemu.

Hezekia Mũthamaki wa Juda, nĩ aarĩhire Senakeribu mbeca nyingĩ mũno nĩguo atigane na Jerusalemu. O na gũtuĩka Senakeribu nĩ ooire mbeca icio, no aatũmire thigari ciake ithiĩ igatharĩkĩre Jerusalemu. Aikari a Jerusalemu nĩ maamakaga mũno tondũ Aashuri no maakuhagĩrĩria itũũra rĩu. No Hezekia akĩmeera ũũ: ‘Mũtigetigĩre. Aashuri marĩ na hinya, no Jehova nĩ egũtũhe hinya mũingĩ gũkĩra ũrĩa marĩ naguo.’

Senakeribu nĩ aatũmire Rabishake athiĩ Jerusalemu akanyũrũrie andũ a Ngai. Rabishake agĩthiĩ akĩrũgama nja ya itũũra rĩu na akĩanĩrĩra ũũ: ‘Jehova ndangĩmũteithia. Mũtikareke Hezekia amũheenie. Gũtirĩ ngai ĩngĩhota kũmũgitĩra kuuma kũrĩ ithuĩ.’

Hezekia nĩ ooririe Jehova ũrĩa angĩekire. Nake Jehova akĩmwĩra ũũ: ‘Tiga kũmakio nĩ ũrĩa Rabishake aroiga. Senakeribu ndekwĩgwatĩra Jerusalemu.’ Hezekia agĩcoka akĩreherũo marũa kuuma kũrĩ Senakeribu. Marũa macio mooigaga ũũ: ‘Mwĩneanei kũrĩ ithuĩ. Jehova ndangĩhota kũmũhonokia.’ Hezekia akĩhoya ũũ: ‘Jehova, ndagũthaitha ũtũhonokie, nĩguo andũ othe mamenye atĩ wee nĩwe Ngai ũrĩa wa ma.’ Nake Jehova akĩmũcokeria ũũ: ‘Nĩ ngũgitĩra itũũra rĩakwa. Mũthamaki wa Ashuri ndekũingĩra Jerusalemu.’

Senakeribu aarĩ na ma biũ atĩ nĩ angĩegwatĩire Jerusalemu. No ũtukũ ũmwe Jehova nĩ aatũmire mũraika harĩa thigari ciake ciambĩte hema nja wa itũũra. Mũraika ũcio ooragire thigari 185,000. Kwoguo thigari cia mũthamaki Senakeribu iria ciarĩ na hinya igĩkua. Ndaarĩ na ũndũ ũngĩ angĩekire tiga o kũinũka, tondũ aarĩ mũhoote. Jehova nĩ aagitĩrire Hezekia na itũũra rĩa Jerusalemu o ta ũrĩa eeranĩire. Korũo warĩ itũũra-inĩ rĩa Jerusalemu-rĩ, hihi nĩ ũngĩehokire Jehova?