Ũtukũ ũmwe, Mũthamaki Nebukadineza nĩ aarotire kĩroto gĩa kũmakania. Kĩamũthumbũrire mũno nginya akĩaga toro. Agĩta arĩa maamũtaũragĩra iroto na akĩmeera ũũ: ‘Ndaũrĩrai kĩroto gĩakwa.’ Nao makĩmwĩra: ‘Twĩre ũrĩa ũrarotire mũthamaki ũyũ.’ No Nebukadineza akĩmeera ũũ: ‘Ndikũmwĩra! Ndĩrenda mũnjĩre ũrĩa ndĩrarotire na kwaga ũguo ndĩmũũrage.’ Makĩmwĩra ũũ riita rĩa kerĩ: ‘Twĩre ũrĩa ũrarotire na nĩ tũgũgũtaũrĩra.’ Nake akĩmacokeria ũũ: ‘Inyuothe nĩ kũũheenia mũrenda kũũheenia. Njĩrai ũrĩa ndĩrarotire!’ Makiuga: ‘Gũtirĩ mũndũ o na ũmwe gũkũ thĩ ũngĩhota gwĩka ũguo. Ũratwĩra twĩke ũndũ ũtangĩhoteka.’

Nebukadineza akĩrakara mũno nginya akiuga andũ arĩa othe ogĩ bũrũri-inĩ ũcio moragwo. Danieli, Shadraka, Meshaki, na Abedinego maarĩ amwe a andũ acio ogĩ. Danieli akĩũria mũthamaki amũhe ihinda nĩgetha amũtaarĩrie kĩroto kĩu. Danieli na arata ake makĩhoya Jehova amateithie. Jehova eekire atĩa?

Jehova oonirie Danieli kĩoneki kĩgiĩ kĩroto kĩa Nebukadineza na akĩmũmenyithia ũrĩa kĩaugĩte. Mũthenya ũyũ ũngĩ Danieli agĩthiĩ kũrĩ ndungata ya mũthamaki na akĩmĩĩra ũũ: ‘Ndũkorage mũndũ o na ũmwe wa arĩa ogĩ. No hote gũtaũrĩra mũthamaki kĩroto gĩake.’ Ndungata ĩyo ĩgĩtwara Danieli kũrĩ Nebukadineza. Danieli akĩra mũthamaki ũũ: ‘Ngai nĩ akũmenyithĩtie maũndũ marĩa mageekĩka ihinda rĩũkĩte. Gĩkĩ nĩkĩo kĩroto gĩaku: Woonire mũhianano mũnene warĩ na kĩongo gĩa thahabu, gĩthũri na moko ma betha, nda na ciero cia gĩcango, magũrũ ma kĩgera, na makinya ma kĩgera gĩtukanĩte na rĩũmba. Thutha ũcio ihiga rĩkĩrengwo kuuma kĩrĩma-inĩ na rĩkĩringa makinya ma mũhianano ũcio. Mũhianano ũcio ũkĩmemendwo ũgĩtuĩka mũtutu, na ũgĩcoka ũkĩũmbũrũo nĩ rũhuho. Ihiga rĩu rĩgĩtuĩka kĩrĩma kĩnene na rĩkĩiyũra thĩ yothe.’

Danieli agĩcoka akĩra mũthamaki ũũ: ‘Kĩroto gĩaku kĩronania ũndũ ũyũ: Ũthamaki waku nĩguo kĩongo gĩa thahabu. Nayo betha nĩ ũthamaki ũrĩa ũgooka thutha waku. Nĩ gũgaacoka gũũke ũthamaki ũngĩ ũhaana gĩcango na nĩ ũgaathana thĩ yothe. Ũthamaki ũrĩa ũgooka thutha ũcio naguo ũgaakorũo na hinya ta kĩgera. Mũthia-inĩ nĩ gũgaakorũo na ũthamaki mũgayũkanu. Kũndũ kũmwe gũgaakorũo na hinya ta kĩgera na kũrĩa kũngĩ gũkorũo gũtarĩ na hinya ta rĩũmba. Ihiga rĩrĩa rĩratuĩka kĩrĩma nĩ Ũthamaki wa Ngai. Ũkaamemenda mothamaki macio mothe na ũtũũre tene na tene.’

Nebukadineza akĩĩgũithia thĩ mbere ya Danieli na agĩturumithia ũthiũ thĩ. Agĩcoka akĩra Danieli ũũ: ‘Ngai waku nĩ we ũrakũguũrĩirie kĩroto kĩu. Gũtirĩ Ngai ũngĩ take.’ Handũ ha kũũraga Danieli, Nebukadineza aamũtuire mũnene wa andũ arĩa othe ogĩ na akĩmũtua wa gwathaga gĩcigo gĩothe kĩa Babuloni. Hihi nĩ wona ũrĩa Jehova aacokirie mahoya ma Danieli?

Hĩndĩ ĩmwe thutha wa Mũthamaki Nebukadineza kuona mũhianano kĩroto-inĩ, nĩ aathondekire mũhianano mũnene mũno wa thahabu. Aaũhandithirie werũ-inĩ wa Dura na agĩta andũ arĩa a bata mũno bũrũri-inĩ ũcio o hamwe na Shadraka, Meshaki, na Abedinego nĩguo macemanie ho. Mũthamaki aathanire ũũ: ‘Rĩrĩa mũrĩigua mũgambo wa tũrumbeta, inanda, na mũtũrirũ inyuothe mwagĩrĩirũo kũinamĩrĩra mũhianano ũcio! Mũndũ o wothe ũtekũwũinamĩrĩra, egũikio mwaki-inĩ.’ Hihi Ahibirania acio atatũ nĩ mangĩainamĩrĩire mũhianano ũcio, kana mangĩathathairie o Jehova Ngai wao?

Mũthamaki aacokire agĩathana gũthaakwo nyĩmbo. Andũ othe makĩĩgũithia thĩ na magĩthathaiya mũhianano ũcio tiga o Shadraka, Meshaki, na Abedinego. Andũ amwe nĩ maamonire na makĩra mũthamaki ũũ: ‘Ahibirania arĩa atatũ nĩ maregire gũthathaiya mũhianano waku.’ Nebukadineza akiuga matwarũo kũrĩ we na akĩmeera ũũ: ‘Nĩ ngũmũhe mweke ũngĩ wa gũthathaiya mũhianano ũcio. Mwarega kũũthathaiya, ngũmũikia mwaki-inĩ. Gũtirĩ ngai ũngĩhota kũmũhonokia amũrute moko-inĩ makwa.’ Nao makĩmwĩra ũũ: ‘Tũtikũbatara kũheo mweke ũngĩ. Ngai witũ no ahote gũtũhonokia. No o na angĩaga gũtũhonokia, wee mũthamaki, menya atĩ tũtigũthathaiya mũhianano ũcio.’

Nebukadineza nĩ aarakarire mũno. Eerire andũ ake ũũ: ‘Ongererai riiko rĩu mwaki nĩguo rĩhiũhe maita mũgwanja makĩria ma ũrĩa rĩkoragwo!’ Agĩcoka akĩra thigari ũũ: ‘Ohai andũ aya, na mũmaikie riiko!’ Mwaki ũcio waarĩ mũnene ũũ atĩ rĩrĩa thigari ciaũkuhĩrĩirie, no gũkua ciakuire. Ahibirania acio atatũ makĩgwa mwaki-inĩ ũcio. No rĩrĩa Nebukadineza aacũthĩrĩirie riiko rĩu, oonire andũ ana magĩthianga kũu mwaki-inĩ handũ ha andũ atatũ. Nĩ aamakire mũno na akĩũria anene a gwake ũũ: ‘Na githĩ tũtikirie andũ atatũ mwaki-inĩ? Ndĩrona andũ ana, na ũmwe wao ahaana mũraika!’

Nebukadineza aathiire hakuhĩ na riiko na agĩtana ũũ: ‘Umai mũke inyuĩ ndungata cia Ngai Ũrĩa ũrĩ Igũrũ Mũno!’ Andũ othe makĩmaka mona Shadraka, Meshaki, na Abedinego makiuma mwaki-inĩ matahĩte. Matianungaga mwaki na gũtirĩ handũ maahĩte mwĩrĩ, njuĩrĩ, o na kana nguo.

Nebukadineza akiuga ũũ: ‘Ngai wa Shadraka, Meshaki, na Abedinego nĩ mũnene. Nĩ atũmire mũraika wake amahonokie. Gũtirĩ ngai ũngĩ ũhaana ta Ngai wao.’

Hihi wee nĩ ũtuĩte itua ta Ahibirania acio atatũ rĩa gũikara ũrĩ mwĩhokeku harĩ Jehova gũtekũmakania ũrĩa maũndũ mahaana?