Mũthamaki ũngĩ waathanire Babuloni eetagwo Dario na aarĩ Mũmedia. Nĩ oonaga atĩ Danieli aarĩ mũndũ wa mwanya. Aamũheire wĩra wa kũrũgamĩrĩra andũ arĩa maarĩ a bata mũno bũrũri-inĩ ũcio. Andũ acio nĩ maaiguagĩra Danieli ũiru mũno na nĩ meendaga kũmũũraga. Tondũ nĩ maamenyaga atĩ Danieli nĩ aahoyaga Jehova maita matatũ o mũthenya, meerire mũthamaki ũũ: ‘Mũthamaki witũ, reke kũgĩe na watho atĩ andũ othe nĩwe marĩhoyaga. Mũndũ o wothe ũkuuna watho ũcio agĩrĩirũo gũikio irima-inĩ rĩa mĩrũthi.’ Dario nĩ aakenirio nĩ rĩciria rĩu na agĩkĩra watho ũcio mũhũũri.

Rĩrĩa Danieli aaiguire watho ũcio mwerũ, aathiire nyũmba-inĩ yake ĩrĩa yarĩ na ndirica ciahingũrĩtwo, na agĩturia maru nĩguo ahoe Jehova. Andũ acio maarĩ na ũiru nĩ maaingĩrire gwake o rĩmwe na makĩmũkora akĩhoya. Nĩ ũndũ ũcio magĩthiĩ kũrĩ Dario na makĩmwĩra ũũ: ‘Danieli ndaragwathĩkĩra. Ahoyaga Ngai wake maita matatũ o mũthenya.’ Dario nĩ eendete Danieli mũno na ndangĩendire oragwo. Aatindire agĩciria ũrĩa angĩamũhonokirie. No mũthamaki angĩahĩtũkirie watho, o nake ndangĩahotire kũũcenjia. Kwoguo no mũhaka aangĩathanire Danieli aikio irima-inĩ rĩa mĩrũthi.

Ũtukũ ũcio Dario aarĩ na kĩeha mũno nĩ ũndũ wa Danieli, nginya akĩaga toro. Mũthenya ũrĩa warũmĩrĩire, nĩ aarokire irima-inĩ rĩa mĩrũthi na agĩtana ũũ: ‘Danieli, Ngai waku nĩ arakũhonokirie?’

Dario nĩ aaiguire mũgambo. Mũgambo ũcio warĩ wa Danieli! Danieli ooigire ũũ: ‘Mũraika wa Jehova nĩ arahingire mĩrũthi tũnua na ndĩnanjĩka ũndũ.’ Dario nĩ aakenire mũno! Nĩ aathanire Danieli arutwo irima-inĩ rĩu. Danieli ndaagurarĩtio nĩ mĩrũthi o na hanini. Mũthamaki agĩcoka agĩathana ũũ: ‘Oyai andũ arĩa marathitangĩte Danieli mũmaikie irima-inĩ rĩu rĩa mĩrũthi.’ Rĩrĩa maikirio, no kũrĩo maarĩirũo nĩ mĩrũthi ĩyo.

Dario akĩhe andũ ake watho na akĩmeera ũũ: ‘Andũ othe no mũhaka metigĩre Ngai wa Danieli. Nĩ arahonokirie Danieli kuuma kũrĩ mĩrũthi.’

Hihi nĩ ũhoyaga Jehova o mũthenya ta ũrĩa Danieli eekaga?

Esiteri aarĩ mũirĩtu Mũyahudi waikaraga Perisia itũũra-inĩ rĩa Shushani. Famĩlĩ yao yarutĩtwo Jerusalemu nĩ Nebukadineza mĩaka mĩingĩ mbere ĩyo. Aarerirũo nĩ mũriũ wa mũrũ wa nyina na ithe, wetagwo Moridekai, ũrĩa warĩ ndungata ya Mũthamaki Ahasuerusu.

Mũthamaki Ahasuerusu nĩ eendaga kũhikia mũtumia ũngĩ. Ndungata ciake ikĩmũtwarĩra airĩtu arĩa athaka mũno bũrũri-inĩ ũcio, na Esiteri aarĩ ũmwe wao. Harĩ airĩtu acio othe mũthamaki aatwarĩirũo, aathuurire Esiteri atuĩke mũtumia wake. Moridekai nĩ eerĩte Esiteri ndakaumbũre atĩ aarĩ Mũyahudi.

Mũndũ ũmwe warĩ mwĩtĩi wetagwo Hamani nĩwe warũgamĩrĩire anene othe a kwa mũthamaki. Eendaga andũ othe mamũinamĩrĩre. Moridekai nĩ aaregire kũmũinamĩrĩra, na nĩ ũndũ ũcio Hamani akĩrakara na akĩenda kũmũũraga. Rĩrĩa Hamani aamenyire atĩ Moridekai aarĩ Mũyahudi, akĩbanga ũrĩa Ayahudi othe bũrũri-inĩ ũcio mangĩoragirũo. Eerire mũthamaki ũũ: ‘Ayahudi nĩ andũ oru mũno, magĩrĩirũo kũniinwo.’ Ahasuerusu akĩmwĩra eke ũrĩa arona kwagĩrĩire, agĩcoka akĩmũhe ũhoti wa gũthondeka watho. Hamani aathondekire watho waugĩte Ayahudi othe moragwo mũthenya wa 13 mweri-inĩ wa Adari. Jehova nĩ oonaga maũndũ macio mothe.

Esiteri ndaamenyaga ũhoro wĩgiĩ watho ũcio. Nĩ ũndũ ũcio Moridekai akĩmũtũmĩra kobĩ ya watho ũcio na akĩmwĩra ũũ: ‘Thiĩ warie na Mũthamaki.’ Nake Esiteri akĩmwĩra: ‘Mũndũ o wothe angĩthiĩ harĩ mũthamaki atetĩtwo no kũũragwo angĩũragwo. Mũthamaki ndanjĩtĩte kwa ihinda rĩa thikũ 30, no nĩ ngũthiĩ. Angĩndambũrũkĩria rũthanju rwake, ndikũũragwo, no angĩaga kũrũtambũrũkia, no ngũũragwo.’

Esiteri nĩ aathiire kũrĩ mũthamaki. Rĩrĩa mũthamaki aamuonire, agĩtambũrũkia rũthanju rwake. Esiteri agĩthiĩ harĩ mũthamaki na mũthamaki akĩmũũria ũũ: ‘Ũkwenda ngwĩkĩre atĩa Esiteri?’ Nake akĩmwĩra: ‘Ngwenda kũmwĩta iruga-inĩ mũrĩ na Hamani.’ Marĩ iruga-inĩ rĩu, Esiteri akĩmetĩra iruga rĩngĩ aabangaga. Marĩ iruga-inĩ rĩu rĩa kerĩ, mũthamaki akĩmũũria ũũ: ‘Ũkwenda ngwĩkĩre atĩa?’ Nake akĩmũcokeria: ‘Kũrĩ mũndũ ũbangĩte kũnjũraga hamwe na andũ aitũ. Ndagũthaitha ũtũhonokie.’ Mũthamaki akĩmũũria: ‘Nũũ ũcio ũrenda kũmũũraga?’ Nake akĩmwĩra: ‘Nĩ Hamani ũyũ mũũru.’ Ahasuerusu akĩrakara mũno na akiuga Hamani oragwo o hĩndĩ ĩyo.

O na kũrĩ ũguo, gũtirĩ mũndũ o na ũmwe nginya mũthamaki ũngĩahotire kweheria watho ũrĩa Hamani aathondekete. Kwoguo mũthamaki agĩtua Moridekai mũrũgamĩrĩri wa anene othe, na akĩmũhe ũhoti wa gũthondeka watho mwerũ. Moridekai agĩthondeka watho wetĩkagĩria Ayahudi kwĩgitĩra mangĩatharĩkĩirũo. Mũthenya wa 13 mweri-inĩ wa Adari, Ayahudi nĩ maatooririe thũ ciao. Kuuma hĩndĩ ĩyo, nĩ maakũngũyagĩra ũhootani ũcio o mwaka.