Makĩria ma mĩaka 400 thutha wa thingo cia Jerusalemu gwakwo rĩngĩ, nĩ kwarĩ mũthĩnjĩri-Ngai ũmwe wetagwo Zekaria na mũtumia wake Elizabethi, arĩa maaikaraga hakuhĩ na itũũra rĩu. Maaikarĩte ihinda inene mũno matarĩ magĩa mwana. Mũthenya ũmwe rĩrĩa Zekaria aacinaga ũbumba hekarũ-inĩ, nĩ aaumĩrĩirũo nĩ mũraika Gaburieli. Zekaria nĩ aamakire, no Gaburieli akĩmwĩra ũũ: ‘Ndũgetigĩre. Ndakũrehera ũhoro mwega kuuma kũrĩ Jehova. Mũtumia waku Elizabethi nĩ akaagĩa mwana wa kahĩĩ, na ũkaamwĩta Johana. Jehova nĩ athuurĩte Johana nĩguo akaaruta wĩra wa mwanya.’ Zekaria akĩũria Gaburieli ũũ: ‘Ingĩgwĩtĩkia atĩa? Niĩ na mũtumia wakwa nĩ tũkĩrĩtie mĩaka ya kũgĩa mwana.’ Gaburieli akĩmũcokeria ũũ: ‘Ndũmĩtwo nĩ Ngai nĩguo ngũkinyĩrie ũhoro ũyũ mwega. No tondũ ndũnanjĩtĩkia, ũgũtuĩka bubu nginya rĩrĩa mwana ũcio agaaciarũo.’

Zekaria nĩ aaikarire kĩgongona-inĩ gũkĩra ũrĩa aamenyerete. Rĩrĩa aaumire nja, andũ arĩa maamwetereire nĩ meendaga kũmenya ũrĩa gwathiaga na mbere. No Zekaria ndangĩahotire kũmaarĩria, aamonagĩrĩria na ciĩko ũrĩa eendaga kuuga. Andũ magĩcoka makĩmenya atĩ Zekaria nĩ aahetwo ndũmĩrĩri kuuma kũrĩ Ngai.

Thutha wa ihinda, Elizabethi nĩ aagĩire nda na agĩciara mwana wa kahĩĩ o ta ũrĩa mũraika aaugĩte. Arata na andũ a famĩlĩ yao nĩ mookire kuona kahĩĩ kau na magĩkena mũno. Elizabethi aameerire ũũ: ‘Karĩĩtagwo Johana.’ Nao makĩmwĩra ũũ: ‘Gũtirĩ mũndũ wĩtagwo Johana famĩlĩ-inĩ yanyu. Geete Zekaria o ta Ithe.’ No Zekaria akĩandĩka ũũ: ‘Karĩĩtagwo Johana.’ O ihinda-inĩ rĩu Zekaria akĩhota kwaria rĩngĩ. Ũhoro wĩgiĩ mwana ũcio nĩ watheremire Judea guothe na andũ makĩambĩrĩria kwĩyũria ũũ: ‘Kaĩ kaana gaka gagatuĩka ũ?’

Zekaria agĩcoka akĩiyũrũo nĩ roho mũtheru. Akĩratha ũũ: ‘Jehova arogoocwo. Nĩ eerĩte Iburahimu atĩ nĩ agaatũma mũhonokia na nĩwe Mesia, nĩguo atũkũũre. Johana agaatuĩka mũnabii ũrĩa ũkaahaarĩria njĩra nĩ ũndũ wa Mesia.’

Ningĩ harĩ ũndũ wa mwanya wekĩkire harĩ Mariamu ũrĩa warĩ wa mbarĩ cia Elizabethi. Rekei tuone nĩ ũndũ ũrĩkũ ũcio thĩinĩ wa gĩcunjĩ kĩrĩa kĩrũmĩrĩire.

Elizabethi nĩ maarĩ na mũirĩtu wa famĩlĩ yao wetagwo Mariamu, ũrĩa waikaraga itũũra-inĩ rĩa Nazarethi thĩinĩ wa Galili. Mariamu maarĩ ndũgũ na bundi wa mbaũ wetagwo Jusufu. Rĩrĩa Elizabethi aarĩ na nda ya mĩeri ĩtandatũ, mũraika Gaburieli nĩ aaumĩrĩire Mariamu. Aamwĩrire ũũ: ‘Ũrĩ mwega Mariamu. Jehova nĩ akũrathimĩte mũno.’ Mariamu ndaataũkĩirũo nĩ ciugo icio. Gaburieli aacokire akĩmwĩra ũũ: ‘Nĩ ũkũgĩa nda, ũgĩe mwana wa kahĩĩ, na ũkaamwĩta Jesu. Agaatuĩka Mũthamaki, na Ũthamaki wake ũgaatũũra tene na tene.’

Mariamu akĩmwĩra ũũ: ‘Niĩ ndirĩ ndakoma na mũndũrũme. Ingĩgĩa mwana atĩa?’ Gaburieli akĩmũcokeria: ‘Gũtirĩ ũndũ ũngĩrema Jehova. Roho mũtheru nĩ ũgooka igũrũ rĩaku na nĩ ũkaagĩa kahĩĩ. Elizabethi wa mbarĩ cianyu o nake nĩ agĩte nda.’ Mariamu aacokire akĩmwĩra ũũ: ‘Niĩ ndĩ ngombo ya Jehova. Reke gwĩkĩke harĩ niĩ o ta ũguo wauga.’

Mariamu nĩ aathiire gũceerera Elizabethi itũũra-inĩ rĩmwe rĩarĩ kũndũ kwarĩ irĩma. Rĩrĩa Mariamu aamũgeithirie, Elizabethi nĩ aaiguire kaana karĩa kaarĩ nda yake kaambarara. Elizabethi akĩiyũrũo nĩ roho mũtheru na akiuga ũũ: ‘Mariamu, Jehova nĩ akũrathimĩte. Nĩ gĩtĩo kĩnene gũceererũo nĩ nyina wa Mwathani wakwa.’ Nake Mariamu akĩmwĩra ũũ: ‘Ndĩragooca Jehova na ngoro yakwa yothe.’ Mariamu aaikarire na Elizabethi mĩeri ĩtatũ agĩcoka akĩinũka kwao Nazarethi.

Rĩrĩa Jusufu aamenyire atĩ Mariamu aarĩ na nda, nĩ eendaga kũniina ndũgũ yao. No mũraika nĩ aamumĩrĩire kĩroto-inĩ akĩmwĩra ũũ: ‘Ndũgetigĩre kũmũhikia. Gũtirĩ ũndũ mũũru ekĩte.’ Nĩ ũndũ ũcio, Jusufu akĩhikia Mariamu na akĩmũinũkia gwake.