Mũthamaki wa Roma, Kaisari Augusto, nĩ aathanire Ayahudi othe macoke kwao nĩguo makeyandĩkithie. Nĩ ũndũ ũcio Jusufu na Mariamu magĩthiĩ Bethilehemu, kũrĩa Jusufu aaumĩte. Hĩndĩ ĩyo Mariamu aarĩ hakuhĩ kũgĩa mwana.

Rĩrĩa maakinyire Bethilehemu, mationire handũ ha gũikara, na nĩ ũndũ ũcio magĩthiĩ kiugũ-inĩ. Hau nĩho Mariamu aahereirũo Jesu. Aamũthaire na tũtaama na akĩmũkomia mũharatĩ-inĩ.

Nĩ kwarĩ na arĩithi maarĩithagia ndũũru ciao ũtukũ hakuhĩ na itũũra rĩa Bethilehemu. Mũraika nĩ aarũgamire mbere yao o rĩmwe na makĩrigicĩrio nĩ ũtheri wa riri wa Jehova. Arĩithi acio nĩ maamakire, no mũraika akĩmeera ũũ: ‘Mũtigetigĩre. Ndĩ na ũhoro mwega. Ũmũthĩ Mesia nĩ aciarirũo itũũra-inĩ rĩa Bethilehemu.’ Ihinda-inĩ o rĩu, araika aingĩ makiumĩra na makiuga: ‘Goocai Ngai ũrĩa ũrĩ igũrũ, na thĩ ĩrogĩa na thayũ.’ Araika acio magĩcoka makĩagwo. Arĩithi meekire atĩa?

Meeranire ũũ: ‘Nĩ tũthiĩi Bethilehemu o rĩu.’ Maathiire o hĩndĩ ĩyo na magĩkora Jusufu na Mariamu marĩ kiugũ-inĩ na mwana wao.

Andũ arĩa othe maaiguire ũrĩa mũraika eerĩte arĩithi acio nĩ maagegire mũno. Mariamu nĩ eecũranirie mũno ciugo icio cia mũraika na ndaariganĩirũo nĩcio. Arĩithi maacokire kũrĩ ndũũru ciao makĩgoocaga Jehova nĩ ũndũ wa maũndũ marĩa mothe moonete na makaigua.

Bũrũri-inĩ ũmwe warĩ mwena wa irathĩro wa Isiraeli nĩ kwarĩ andũ meetĩkĩtie atĩ njata no imatongorie. Ũtukũ ũmwe, andũ amwe kuuma mwena wa Irathĩro nĩ moonire kĩndũ kĩahaanaga ta njata ĩrĩ na ũtheri mũingĩ ĩgĩthiĩra matu-inĩ na makĩmĩrũmĩrĩra. “Njata” ĩyo yamatongoririe nginya Jerusalemu. Maakinya maambĩrĩirie kũũria andũ ũũ: ‘Arĩ kũ mwana ũrĩa ũgatuĩka mũthamaki wa Ayahudi? Tuoka kũmũinamĩrĩra.’

Rĩrĩa Herode, mũthamaki wa Jerusalemu, aaiguire atĩ kũrĩ na mũthamaki ũngĩ, nĩ aamakire mũno. Akĩũria anene a athĩnjĩri-Ngai ũũ: ‘Mũthamaki ũcio aarĩ aciarĩrũo kũ?’ Nao makĩmwĩra ũũ: ‘Anabii maaugĩte atĩ angĩaciarĩirũo Bethilehemu.’ Nĩ ũndũ ũcio, Herode agĩta andũ acio maaumĩte Irathĩro akĩmeera ũũ: ‘Thiĩi Bethilehemu mũtuĩrie ũhoro wa mwana ũcio. Na mwamuona, mũgooka mũnjĩre kũrĩa arĩ. O na niĩ nĩ ndĩrenda kũmũinamĩrĩra.’ No macio maarĩ maheeni.

“Njata” ĩyo nĩ yaambĩrĩirie gũthiĩ rĩngĩ na andũ acio makĩmĩrũmĩrĩra nginya Bethilehemu. “Njata” ĩyo yathiire ĩkĩrũgama igũrũ rĩa nyũmba ĩmwe, nao andũ acio makĩingĩra kuo thĩinĩ. Magĩkora Jesu na nyina Mariamu. Makĩinamĩrĩra mwana ũcio na makĩmũhe thahabu, ũbani, na manemane irĩ iheo. Hihi Jehova nĩwe watũmĩte andũ acio mathiĩ magacarie Jesu? Aca.

Ũtukũ ũcio Jehova eerire Jusufu ũũ kĩroto-inĩ: ‘Herode arenda kũũraga Jesu. Oya mũtumia waku na mwana mũũrĩre Misiri, na mũikare kuo nginya rĩrĩa ngakwĩra ũcoke.’ Jusufu na famĩlĩ yake magĩthiĩ Misiri o hĩndĩ ĩyo.

Jehova nĩ eerĩte andũ arĩa maaumĩte Irathĩro matigacoke kũrĩ Herode. Rĩrĩa Herode oonire atĩ matinacoka kũrĩ we, akĩrakara mũno. Tondũ rĩu ndangĩahotire kuona Jesu, aaugire atĩ tũhĩĩ tũrĩa tuothe twarĩ twa riika rĩa Jesu tũũragwo Bethilehemu guothe. No Jesu ndaarĩ ũgwati-inĩ tondũ aarĩ Misiri.

Thutha wa ihinda Herode nĩ aakuire. Jehova akĩra Jusufu ũũ: ‘Rĩu gũtirĩ na ũgwati, no ũcoke bũrũri wanyu.’ Jusufu, Mariamu, o hamwe na Jesu magĩcoka Isiraeli na magĩthiĩ gũikaraga itũũra-inĩ rĩa Nazarethi.