Johana aakoretwo akĩhunjia ũũ: ‘Nĩ kũrĩ mũndũ ũngĩ mũnene kũngĩra ũroka.’ Jesu arĩ na mĩaka ta 30 ũguo, nĩ aaumire Galili agĩthiĩ Rũũĩ-inĩ rwa Jorodani harĩa Johana aabatithagĩria andũ. Jesu eendaga Johana amũbatithie. No Johana aamwĩrire ũũ: ‘Niĩ ndiagĩrĩirũo nĩ gũkũbatithia. Wee nĩwe wagĩrĩirũo nĩ kũũbatithia.’ Jesu akĩra Johana ũũ: ‘Jehova arenda ũũbatithie.’ Nĩ ũndũ ũcio magĩtonya Rũũĩ rwa Jorodani, na Johana akĩrikia Jesu maĩ-inĩ thĩinĩ.

Jesu aumĩra maĩ-inĩ nĩ aahoire. O hĩndĩ ĩyo igũrũ rĩkĩhingũka, na roho wa Ngai ũgĩikũrũka igũrũ rĩake ũhaana ta ndutura. Jehova agĩcoka akĩaria arĩ igũrũ akiuga ũũ: “Wee nĩwe Mũrũ wakwa, ũrĩa nyendete; nĩ ngwĩtĩkĩrĩte.”

Rĩrĩa roho wa Jehova waikũrũkire igũrũ rĩa Jesu, nĩrĩo aatuĩkire Kristo, kana Mesia. Rĩu nĩ angĩambĩrĩirie wĩra ũrĩa Jehova aamũheete oke arute gũkũ thĩ.

Jesu arĩkia kũbatithio o ũguo, nĩ aathiire werũ-inĩ na agĩikara kuo thikũ 40. Rĩrĩa aaumire kuo, nĩ aathiire kũrĩ Johana. Johana aamuona agĩthiĩ kũrĩ we, aaugire ũũ: ‘Gaka nĩko Gatũrũme ka Ngai karĩa gakeeheria mehia ma andũ.’ Rĩrĩa Johana aaugire ũguo, nĩ aamenyithirie andũ atĩ Jesu nĩwe warĩ Mesia. Hihi nĩ ũĩ ũrĩa gwathiire rĩrĩa Jesu aarĩ werũ-inĩ? Reke tuone.

Thutha wa Jesu kũbatithio, roho mũtheru nĩ wamũtongoririe athiĩ werũ-inĩ. Aaikarire thikũ 40 atarĩte kĩndũ na kwoguo nĩ aahũtĩte mũno. Thutha ũcio Mũcukani agĩthiĩ kũmũgeria na akĩmwĩra ũũ: ‘Angĩkorũo ũrĩ Mũrũ wa Ngai-rĩ, ĩra mahiga maya matuĩke mĩgate.’ No Jesu akĩmũcokeria na njĩra ya kũgweta ũrĩa Maandĩko maaugĩte, akĩmwĩra ũũ: ‘Nĩ kwandĩke atĩ to irio tu ũrabatara nĩguo ũtũũre. Ũrabatara gũthikĩrĩria kiugo gĩothe kĩrĩa Jehova augĩte.’

Mũcukani aacokire akĩgeria Jesu rĩngĩ na akĩmwĩra: ‘Angĩkorũo wĩ Mũrũ wa Ngai, wĩgũithie thĩ kuuma gacũmbĩrĩ-inĩ ka hekarũ tondũ nĩ kwandĩke atĩ araika nĩ magaakũnyita ndũkagwe.’ No o rĩngĩ, Jesu akĩgweta Maandĩko na akĩmwĩra ũũ: ‘Nĩ kwandĩke atĩ ndwagĩrĩirũo kũgeria Jehova Ngai waku.’

Shaitani aacokire akĩonia Jesu mothamaki mothe ma thĩ, ũtonga, na riri wamo na akĩmwĩra ũũ: ‘Nĩ ngũkũhe mothamaki maya mothe o na riri wamo angĩkorũo nĩ ũgũũthathaiya o riita rĩmwe tu.’ No Jesu akĩmũcokeria ũũ: ‘Thiĩ, Shaitani! Nĩ kwandĩke atĩ twagĩrĩirũo gũthathaiya o Jehova wiki.’

Mũcukani agĩcoka agĩthiĩ, nao araika magĩũka makĩhe Jesu irio. Kuuma hĩndĩ ĩyo, Jesu aahunjagia ũhoro ũrĩa mwega wa Ũthamaki. Ũcio nĩguo wĩra ũrĩa aatũmĩtwo oke arute gũkũ thĩ. Andũ nĩ maakenagio mũno nĩ maũndũ marĩa Jesu aarutanaga na nĩ maamũrũmagĩrĩra kũrĩa guothe aathiaga.